Pagtao na Nagbubunga nin Kagayagayahan

SI Genival, na nag-iistar sa sarong lugar nin mga barong-barong sa amihanan-sirangan na Brazil, nagsusustento sa saiyang agom asin mga aki paagi sa dikit na sueldo na nakukua nia bilang sarong guardia sa ospital. Sa ibong kan saiyang kasakitan, si Genival nagtatao nin tinagba sa maatom na paagi. “Kun beses nagugutom an sakong pamilya,” an paggirumdom nia mantang hinahapiyap an saiyang tulak, “alagad gusto kong itao sa Dios an pinakamakakaya ko, ano man na pagsasakripisyo an kinakaipuhan.”

Pagkatapos na mawaran sia nin trabaho, si Genival padagos na nagtao kan saiyang tinagba. Sinadol sia kan saiyang ministro na baloon an Dios paagi sa pagtao nin dakulang donasyon. Ginarantiyahan kan klerigo na siertong ibububo nin Dios an bendisyon. Kaya nagdesisyon si Genival na ipabakal an saiyang harong asin itao an kabaklan sa simbahan.

Bako sanang si Genival an igwa kan arog kaiyan na sinseridad sa pagtao. Dakol na dukhang marhay an makinuyog na nagtatao kan tinagba huli ta natokdoan sinda kan saindang iglesia na an pagtao nin tinagba sarong kahagadan sa Biblia. Totoo daw iyan?

An Pagtao nin Tinagba Asin an Ley

An togon sa pagtao nin tinagba kabtang kan Ley na itinao ni Jehova Dios sa 12 tribo kan suanoy na Israel labing 3,500 na taon na an nakaagi. An Ley na iyan nagdekreto na an ikasampulong kabtang kan produkto kan daga asin kan mga kahoy na namumunga saka an ikasampulong kabtang kan nadagdag sa mga pugro itatao sa tribo ni Levi sa pagsuportar sa saindang paglilingkod sa tabernakulo.​—Levitico 27:​30, 32; Bilang 18:​21, 24.

Inasegurar ni Jehova an mga Israelita na an Ley ‘dai magigin labi kadepisil para sa sainda.’ (Deuteronomio 30:11) Sagkod na fiel nindang sinusunod an mga togon ni Jehova, kaiba an pagtao nin tinagba, pinanunugaan nia sinda nin abundang ani. Asin bilang proteksion, regular na itinatagama an dugang pang taonan na pagtao nin tinagba, na sa parate ginagamit kun an banwaan nagtitiripon para sa relihiosong mga kapiestahan kaiyan. Sa siring ‘an nakikihimanwa, an aking lalaki na ilo sa ama, asin an babaeng balo’ magkakabarasog.​—Deuteronomio 14:​28, 29; 28:​1, 2, 11-14.

Mayong sinabi nin eksakto an Ley na penalidad sa dai pagtao nin tinagba, alagad an kada Israelita may makosog na obligasyon sa moral na suportaran an tunay na pagsamba sa paaging ini. Sa katunayan, inakusar ni Jehova an mga Israelita na nagpabaya sa pagtao nin tinagba kan kaaldawan ni Malaquias nin ‘paghabon sa saiya sa mga pagtao nin tinagba asin dolot.’ (Malaquias 3:​8, New International Version) Puede man daw na akusaron nin siring an mga Kristiano na dai nagtatao nin tinagba?

Bueno, estudyaran niato. An mga ley kan nasyon sa parate bakong balido sa luwas kan linderos nin sarong nasyon. Halimbawa, an ley na nag-oobligar sa mga motorista sa Britania na magmaneho sa wala kan tinampo dai minaaplikar sa mga nagmamaneho sa Pransia. Kaagid kaiyan, an ley na naghahagad nin pagtao nin tinagba kabtang nin sarong eksklusibong tipan nin Dios asin kan nasyon nin Israel. (Exodo 19:3-8; Salmo 147:​19, 20) An mga Israelita sana an sakop kan ley na iyan.

Dugang pa, minsan ngani totoo na an Dios dai noarin man nagbabago, an saiyang mga kahagadan kun beses iyo. (Malaquias 3:6) An Biblia depinidong nagsasabi na an kagadanan ni Jesus bilang atang, kan 33 C.E., “pinara,” o “hinale,” an Ley asin kaiba dian an “togon na magkolekta nin tinagba.”​—Colosas 2:​13, 14; Efeso 2:13-15; Hebreo 7:​5, 18.

An Kristianong Pagtao

Minsan siring, kaipuhan pa man giraray an mga kontribusyon sa pagsuportar sa tunay na pagsamba. Isinugo ni Jesus an saiyang mga disipulo ‘na magin mga saksi sagkod sa kaporoporohi kan daga.’ (Gibo 1:8) Mantang nagdadakol an mga  may pagtubod, nagdadakol man an pangangaipo para sa Kristianong mga paratokdo asin paraataman na madalaw asin mapakosog sa mga kongregasyon. An mga babaeng balo, ilo, asin iba pa na daing sukat kaipuhan na asikasohon kun beses. Paano sinustentohan kan mga Kristiano kan enot na siglo an gastos?

Kan mga 55 C.E., sarong pakiolay an ipinaabot sa mga Kristianong Hentil sa Europa asin Asia Minor para sa pobreng kongregasyon sa Judea. Sa saiyang mga surat sa kongregasyon sa Corinto, isinaysay ni apostol Pablo kun paano inorganisar an ‘arambagan na ini para sa mga banal.’ (1 Corinto 16:1) Tibaad masorpresa kamo sa ihinahayag kan mga tataramon ni Pablo manongod sa Kristianong pagtao.

Dai inagyat ni apostol Pablo an mga kapagtubod na magtao. Sa katunayan, kinaipuhan kan mga Kristianong Macedonio na nasa “irarom nin kasakitan” asin “grabeng kadukhaan” na ‘padagos na makimaherak sa saiya na may makuring pagngayongayo para sa pribilehio na maboot na pagtao asin para sa kahirasan sa ministeryong itinalaga para sa mga banal.’​—2 Corinto 8:1-4.

Totoo, inenkaminar ni Pablo an mas may kayang mga taga Corinto na arogon an saindang mga tugang sa Macedonia na buka an palad. Dawa siring, nagkomento an sarong reperensia, ‘dai sia nagtao nin mga direktiba kundi mas gusto niang maghagad, magsuherir, mag-enkaminar, o makiolay. Mawawara an pagigin gikan sa boot asin init sa pagtao kan mga taga Corinto kun may pamimirit.’ Aram ni Pablo na an “Dios namomoot sa maogmang paratao,” bakong sa saro na nagtatao “sa maraot na boot o sa kapiritan.”​—2 Corinto 9:7.

An abundang pagtubod asin kaaraman kaiba an tunay na pagkamoot para sa kapwa mga Kristiano an matulod sa mga taga Corinto na magtao nin gikan sa boot.​—2 Corinto 8:​7, 8.

‘Oyon sa Napagdesisyonan Nia sa Saiya Mismong Puso’

Imbes na isabi nin eksakto an kantidad o porsentahe, si Pablo nagsuherir sana na “sa enot na aldaw kan kada semana, an lambang saro . . . maninigong magtagama nin sarong kantidad nin kuarta sono sa saiyang entrada.” (Samo an italiko; 1 Corinto 16:​2, NIV) Paagi sa regular na pagplano asin pagreserba nin sarong kantidad, an mga taga Corinto dai makakamateng nasasakitan sa pagtao na napipiritan sana o napahiro kan emosyon pag-abot ni Pablo. Para sa lambang Kristiano, an desisyon kun gurano an itatao sarong pribadong bagay, saro na ‘napagdesisyonan nia sa saiya mismong puso.’​—2 Corinto 9:​5, 7.

Tanganing mag-ani nin abunda, an mga taga Corinto kaipuhan na magsabwag nin abunda. Dai noarin man isinuherir an pagtao na makolog sa bulsa. ‘Bako kong katuyohan na iyan magin depisil sa saindo,’ an pag-asegurar sa sainda ni Pablo. An mga kontribusyon “orog nang inaako sono sa kun ano an nasa tawo, bakong sono sa kun ano an mayo sa tawo.” (2 Corinto 8:​12, 13; 9:6) Sa sarong mas huring surat, an apostol nagpatanid: “Kun an siisay man dai nagsusustento sa mga . . . kasararo nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Dai inenkaminar ni Pablo an pagtao na minabalga sa prinsipyong ini.

Makahulogan na dinirehiran ni Pablo an ‘arambagan para sa mga banal’ na nangangaipo. Dai  niato mababasa sa Kasuratan na inorganisar ni Pablo o kan ibang apostol an mga pangongolekta o pag-ako nin mga tinagba tanganing gastoson para sa sainda mismong ministeryo. (Gibo 3:6) Pirmeng nagpapasalamat sa pag-ako nin mga regalo na ipinapadara sa saiya kan mga kongregasyon, maatom na linikayan ni Pablo na iimponer an “magastos na pagabat” sa saiyang mga tugang.​—1 Tesalonica 2:9; Filipos 4:15-18.

Gikan sa Boot na Pagtao Ngonyan

Malinaw nanggad, durante kan enot na siglo, ginibo kan mga parasunod ni Cristo an gikan sa boot na pagtao, bakong an pagtao nin tinagba. Minsan siring, tibaad mag-isip-isip kamo kun baga epektibo pa man giraray ining paagi sa pagsustento sa paghuhulit kan maogmang bareta asin pag-asikaso sa mga Kristianong nangangaipo.

Estudyare an minasunod. Kan 1879 an mga editor kan magasin na ini hayag na nagsabi na sinda “nungka na makikimaherak o mahagad nin suporta sa mga tawo.” Inolang daw kan desisyon na iyan an mga paghihingoa kan Mga Saksi ni Jehova na ipalakop an katotoohan sa Biblia?

Sa presente, an mga Saksi nagdidistribwir nin mga Biblia, Kristianong mga libro, asin iba pang publikasyon sa 235 kadagaan. An Torrengbantayan, sarong magasin sa Biblia na nakapagtotokdo, kan enot 6,000 na kopya an iwinawaras kada bulan na inimprenta sa sarong lenguahe. Poon kaidto iyan nagin duwang beses kada bulan na magasin na may iniimprentang labing 24,000,000 na kopya na makukua sa 146 na lenguahe. Tanganing organisaron an saindang lakop sa globong gibohon na pagtotokdo sa Biblia, an mga Saksi nagtogdok o nagbakal nin mga sangang opisina para sa pag-administrar sa 110 na nasyon. Dugang pa, nagtogdok sinda nin rinibong lokal na lugar na tiriponan saka darakulang assembly hall tanganing tawan nin lugar an mga interesado na mag-ako nin dugang pang pagtotokdo sa Biblia.

Minsan ngani ipinaoorog an pag-asikaso sa espirituwal na mga pangangaipo nin mga tawo, dai pinababayaan kan Mga Saksi ni Jehova an materyal na mga pangangaipo nin mga kapagtubod. Kun an saindang mga tugang nagdudusa huli sa epekto nin mga guerra, linog, tigmara, asin bagyo, marikas sinda sa pagtao nin medikal na mga suplay, kakanon,  gubing, asin iba pang pangangaipo. Sinusustentohan ini kan mga donasyon na itinatao nin indibiduwal na mga Kristiano asin nin mga kongregasyon.

Apuera sa pagigin epektibo, an pag-ambag na gikan sa boot pinagigian an pasan kan mga limitado an kakayahan sa pagbuhay, arog ni Genival, na nasambitan sa enotan. Marahay sana ta bago nia ikapabakal an saiyang harong, dinalaw si Genival ni Maria, sarong bilog na panahon na ministro kan Mga Saksi ni Jehova. “Ikinaligtas kan pag-oolay na iyan an sakong pamilya sa dakol na dai man kaipuhan na kasakitan,” an paggirumdom ni Genival.

Naaraman ni Genival na an gibohon kan Kagurangnan dai minadepende sa pagtao nin tinagba. Sa katunayan, an pagtao nin tinagba bako nang kahagadan sa Kasuratan. Naaraman nia na an mga Kristiano binebendisyonan kun sinda buka an palad na nagtatao alagad dai sinda obligadong magtao nin labi kisa makakaya ninda.

An pagsagibo nin gikan sa boot na pagtao nagtao ki Genival nin tunay na kagayagayahan. Isinabi nia iyan sa arog kaining paagi: “Puedeng ikatao ko o dai an 10 porsiento, alagad maogma ako sa sakong ambag, asin nakaseseguro ako na naoogma man si Jehova.”

[Kahon/Mga ritrato sa pahina 6]

Itinokdo daw kan Enot na mga Ama kan Iglesia an Pagtao nin Tinagba?

“An mga mayaman na kairiba niato nagtatabang sa mga daing sukat . . . Sinda na mga may kaya, asin andam, nagtatao kan sinasaboot kan balang saro na angay.”—The First Apology, Justinong Martir, mga 150 C.E.

“Kinonsagrar nanggad sa Saiya kan mga Judio an mga tinagba kan saindang mga rogaring, alagad an mga nag-ako nin katalingkasan itinatagama an gabos nindang rogaring para sa mga katuyohan kan Kagurangnan, . . . arog kan ginibo kan dukhang babaeng balo na itinao an gabos niang pagbuhay sa kaha nin Dios.”​​—Against Heresies, Ireneo, mga 180 C.E.

“Minsan ngani may kaha kita, an laog kaiyan bakong kuartang pambakal, na garo relihion na igwa nin presyo. Kada bulan, kun gusto nia, an balang saro nahulog nin sadit na donasyon; alagad kun kinawiwilihan sana nia, asin kun kaya sana nia: huli ta mayong pinipirit; an gabos gikan sa boot.”​​—Apology, Tertuliano, mga 197 C.E.

“Mantang naghihiwas an Iglesia asin minalataw an manlaenlaen na institusyon, kinaipuhan na gumibo nin mga ley na masegurado kan tama asin permanenteng pansustento sa klero. An pagbayad nin tinagba inarog sa Suanoy na Ley . . . An kaenot-enoteng depinidong paggibo nin ley sa temang iyan garo baga yaon sa sarong surat kan mga obispo na nagtitiripon sa Tours kan 567 asin sa [mga canon] kan Konsilyo nin Macon kan 585.”​​—The Catholic Encyclopedia.

[Credit Line]

Sinsilyo, sa itaas, wala: Pictorial Archive (Near Eastern History) Est.

[Ritrato sa pahina 4, 5]

An gikan sa boot na pagtao nagdadara nin kagayagayahan

[Mga ritrato sa pahina 7]

Sinusustentohan kan gikan sa boot na mga ambag an gibohon na paghuhulit, pan-emerhensiang pag-ayuda, asin pagtogdok nin mga lugar na tiriponan