Pakosoga an Saimong mga Kamot

SA Biblia, an kamot nasasambitan nin labing 1,800 na beses. Ginagamit sa laen-laen na paagi an mga idioma may labot sa kamot. Halimbawa, an malinig na kamot nangangahulogan nin pagigin daing sala. (2 Samuel 22:21; Salmo 24:​3, 4) An pagbuka kan palad nangangahulogan nin pagpaheling nin pagkamatinao sa iba. (Deuteronomio 15:11; Salmo 145:16) An saro na isinasapeligro an saiyang buhay sinasabing nagbubugtak kan saiyang kalag sa saiyang kamot. (1 Samuel 19:5) An paglaylay nin mga kamot nangangahulogan nin panluluya nin boot. (2 Cronica 15:7) Asin an pagpakosog sa kamot nin saro nangangahulogan nin pagpasarig asin pagtao nin puersa tanganing humiro.​—1 Samuel 23:16.

Ngonyan kaipuhan na marhay na pakosogon an satong mga kamot. Kita nabubuhay sa “delikadong mga panahon na masakit pakibagayan.” (2 Timoteo 3:1) Pagpinanluyahan kita nin boot, an tendensia nin tawo sumuko, palaylayon an satong mga kamot. Ordinaryo na sanang makaheling nin mga tinedyer na minapondo sa pag-eskuela, mga agom na lalaki na binabayaan an saindang pamilya, asin mga ina na inaabandonar an saindang mga aki. Bilang mga Kristiano, kaipuhan na pakosogon niato an satong mga kamot tanganing tagalan an mga pagbalo na napapaatubang sa sato sa satong paglilingkod sa Dios. (Mateo 24:13) Sa paggibo kaiyan, pinaoogma niato an puso ni Jehova.​—Talinhaga 27:11.

Kun Paano Pinakokosog an mga Kamot

An mga Judio kan kaaldawan ni Esdras nangaipong pakosogon an saindang mga kamot tanganing matapos an pagtogdok liwat kan templo ni Jehova sa Jerusalem. Paano pinakosog an saindang mga kamot? An pagkasaysay nagsasabi: “Isinelebrar ninda an kapiestahan nin mga tinapay na mayo nin lebadura nin pitong aldaw na may paggayagaya; huli ta pinangyari ni Jehova na sinda maggayagaya, asin pinabalik nia an puso kan hade nin Asiria sa sainda tanganing pakosogon an saindang mga kamot sa gibohon sa harong kan tunay na Dios, an Dios kan Israel.” (Esdras 6:22) Malinaw nanggad, paagi sa saiyang puersa aktiba na pinukaw ni Jehova an “hade nin Asiria” tanganing togotan an banwaan nin Dios na bumalik, asin pinahiro Nia an espiritu kan banwaan, kaya natapos ninda an gibohon na pinonan ninda.

Kan huri, kan kinaipuhan na hirahayon an mga lanob kan Jerusalem, pinakosog ni Nehemias an mga kamot kan saiyang mga tugang para sa gibohon. Mababasa niato: “Isinaysay ko sa sainda an manongod sa kamot kan sakuyang Dios, kun gurano idto karahay sa sakuya, siring man manongod sa mga tataramon kan hade kan isinabi nia sa sakuya. Dangan sinda nagsarabi: ‘Magburuhat kita, asin magtorogdok kita.’ Kaya pinakosog ninda an saindang mga kamot para sa marahay na gibo.” Huling an mga kamot napakosog, pambihira na nahimong taposon ni Nehemias asin kan saiyang mga kapwa Judio an pagtogdok liwat kan mga lanob nin Jerusalem sa laog nin 52 na aldaw!​—Nehemias 2:18; 6:​9, 15.

Kaagid kaiyan, pinakokosog ni Jehova an satong mga kamot tanganing ihulit an maogmang bareta kan Kahadean. (Mateo 24:14) Ginigibo nia iyan paagi sa ‘pagsangkap sa sato nin lambang marahay na bagay sa pag-otob kan saiyang kabotan.’ (Hebreo 13:21) Itinao nia sa sato an pinaka de kalidad na mga kasangkapan. Igwa kita nin Biblia asin basado sa Biblia na mga libro, magasin, brosyur, pulyeto, asin rekording sa audio asin video tanganing magamit niato  sa pag-abot sa mga tawo sa bilog na kinaban. Sa katunayan, an satong mga publikasyon makukua sa mga 380 lenguahe. Dugang pa, paagi sa mga pagtiripon sa kongregasyon, asamblea, asin kombension, si Jehova nagtatao nin teokratikong edukasyon asin pagsasanay kun paano gagamiton an marahayon na kasangkapan na ini sa pag-otob kan satong ministeryo.

Minsan ngani pinakokosog ni Jehova an satong mga kamot sa kadakol na paagi, linalaoman man nia na kita maghihingoa. Girumdomon an sinabi ni propeta Eliseo ki Hadeng Joas, na nagpatabang ki Eliseo sa pakikilaban tumang sa mga nanakyadang Sirio. Sinabihan ni Eliseo an hade na kumua nin nagkapirang pana asin panaon nia kaiyan an daga. An pagkasaysay sa Biblia nagsasabi: “Tuminira sia nin tolong beses asin puminondo. Asin an tawo kan tunay na Dios naanggot sa saiya; huli kaini sinabi nia: ‘Lima o anom na beses kutana an pagtira! Kun siring kaiyan pababagsakon mo nanggad an Siria sagkod na matapos, alagad ngonyan tolong beses mong pababagsakon an Siria.’” (2 Hade 13:​18, 19) Huli sa dai paghingoa nin maigot, limitado sana an nagin kapangganahan ni Joas sa pakikilaban sa mga Sirio.

An iyo man sanang prinsipyo aplikado sa sato kun gusto niatong otobon an ipinagigibo sa sato ni Jehova. Imbes na maghadit manongod sa mga kaolangan na nasa atubangan niato o manongod sa kun gurano tibaad kasakit kan asignasyon, maninigo niatong gibohon iyan nin maigot asin bilog na puso. Kaipuhan niatong pakosogon an satong mga kamot asin manarig ki Jehova para sa tabang.​—Isaias 35:​3, 4.

Pakokosogon ni Jehova an Satong mga Kamot

Seguradong tatabangan kita ni Jehova asin pakokosogon an satong mga kamot tanganing gibohon an saiyang kabotan. Siempre, dai magibo nin milagro an Dios asin dai nia gigibohon an gabos para sa sato. Linalaoman nia na gigibohon niato an satong kabtang​—pagbasa kan Biblia aroaldaw, regular na pag-andam para sa asin pag-atender sa mga pagtiripon, pakikikabtang sa ministeryo nin parate sagkod sa mapupuede, asin pamimibi sa saiya nin dayaday. Kun fiel asin mahigos niatong gigibohon an satong kabtang mantang igwa kita nin oportunidad, itatao sa sato ni Jehova an kosog tanganing magibo an linalaoman nia sa sato.​—Filipos 4:13.

Estudyare an nangyari sa sarong Kristiano na nagadanan nin agom na babae sagkod ina sa laog nin sarong taon. Dai pa sia nauulian sa kolog nin boot kan bayaan kan saiyang manugang na babae an saiyang aking lalaki asin inabandonar an Kristianong pamumuhay. “Nanodan ko na dai puedeng kita an pumili kan pagbalo sa sato, ni kun noarin iyan mangyayari ni kun gurano iyan kaparate,” an sabi kan tugang na ini. Paano sia nakanompong nin kosog na magpadagos? “An pamibi asin personal na pag-adal nagin garo salbabida na nagpadanay sa sakong payo na nakalataw sa tubig. Asin an suporta kan sakong espirituwal na mga tugang na lalaki asin babae nagtao sa sako nin dakulang karangahan. Orog sa gabos, nasabotan ko an halaga nin pagpatalubo nin marahay na personal na relasyon ki Jehova bago pa lumataw an depisil na mga situwasyon.”

Ano man an saindong eksperyensia sa buhay, magin determinado na lubos na magtiwala ki Jehova asin gamiton nin tama an gabos na itinatao niang probisyon para sa pagpakosog kan saindong mga kamot. Kun siring ikatatao nindo an pinaka de kalidad na paglilingkod ki Jehova asin sa siring matao nin kaomawan asin onra sa saiyang mahal na marhay na ngaran.​—Hebreo 13:15.

[Ritrato sa pahina 31]

Huli sa dai paghingoa nin maigot, limitado sana an nagin kapangganahan ni Joas sa pakikilaban tumang sa mga Sirio