Personal na Pag-adal na Nagsasangkap Sato Bilang mga Paratokdo

“Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos. Pirme mong atenderan an saimo man sana asin an saimong pagtotokdo.”​—1 TIMOTEO 4:​15, 16.

1. Ano an totoo manongod sa panahon asin personal na pag-adal?

 “PARA sa gabos na bagay igwa nin itinalaan na panahon,” an sabi kan Biblia sa Eclesiastes 3:1. Totoo nanggad iyan sa personal na pag-adal. Dakol an nasasakitan na pensaron an espirituwal na mga bagay kun bakong tama an panahon o bakong tama an lugar. Halimbawa, pakatapos nin mapagal na trabaho sa maghapon asin kadakol kan kinakan sa pamanggihan, gusto pa daw nindong mag-adal, lalo na kun nakahandig na kamo sa saindong paboritong butaka sa atubangan nin TV? Posibleng marhay na dai. Kaya, ano an solusyon? Malinaw nanggad, kaipuhan kitang pumili kun noarin asin saen maadal sa katuyohan na makua an pinakadakulang pakinabang sa satong mga paghihingoa.

2. Sa parate ano an pinakamarahay na panahon para sa personal na pag-adal?

² Para sa dakol an pinakamarahay na panahon ninda para sa pag-adal iyo an amay na aga na sa parate listong marhay an isip ninda. An iba ginagamit an pahingalo sa odto para sa halipot na peryodo nin pag-adal. Mangnoha an nasambitan na panahon para sa importanteng espirituwal na mga aktibidad  sa minasunod na mga halimbawa. Si Hadeng David kan suanoy na Israel nagsurat: “Sa aga padangogan sa sako an saimong mamomoton na kabootan, huli ta sa saimo ibinugtak ko an sakong pagtitiwala. Paaraman sa sako an dalan na maninigo kong lakawan, huli ta sa saimo iinitaas ko an sakuyang kalag.” (Salmo 143:8) Ipinaheling ni propeta Isaias an kaparehong pag-apresyar kan sia magsabi: “An Soberanong Kagurangnan na Jehova mismo nagtao sa sako kan dila kan mga tinokdoan, tanganing tatao ako kun paano sisimbagon nin sarong tataramon an napapagal. Sia nagmamata kada aga; pinupukaw nia an sakong talinga na makadangog siring kan mga tinokdoan.” An punto iyo na kaipuhan kitang mag-adal asin odok na makipag-olay ki Jehova mantang listo an satong isip, ano man na oras iyan kan aldaw.​—Isaias 50:​4, 5; Salmo 5:3; 88:13.

3. Anong mga kamugtakan an marahay para sa epektibong pag-adal?

³ An saro pang nakatatabang sa epektibong pag-adal iyo na dai kita maninigong tumukaw sa pinakakomportableng butaka o sopa. Bako ini an paagi tanganing magdanay na listo. Kun kita nag-aadal, an satong isip dapat na nag-aandar, asin an komportableng marhay na kamugtakan garo baga baliktad an epekto. Marahay man sa pag-adal asin paghorophorop an toninong na gayong kamugtakan asin mayo nin mga disturbo. An paghihingoang mag-adal na an radyo, TV, o mga aki nakikiagawan sa saindong atension dai matao kan pinakamarahay na mga resulta. Kan gusto ni Jesus na maghorophorop, nagduman sia sa sarong toninong na lugar. Nagtaram man sia manongod sa paghanap nin pribadong lugar tanganing mamibi.​—Mateo 6:6; 14:13; Marcos 6:30-32.

Personal na Pag-adal na Nagsasangkap Sato sa Pagsimbag

4, 5. Sa anong mga paagi praktikal na tabang an brosyur na Kahagadan?

⁴ Nakakokontento an personal na pag-adal kun ginagamit niato an laen-laen na pantabang sa pag-adal sa Biblia tanganing masiyasat nin mas hararom an sarong tema, nangorogna kun ginigibo niato iyan tanganing simbagon an sinserong mga hapot nin sarong tawo. (1 Timoteo 1:4; 2 Timoteo 2:23) Bilang pagpoon, dakol na bagohan an nag-aadal sa brosyur na Ano an Kahagadan sa Sato nin Dios?, a na makukua na ngonyan sa 261 lenguahe. Iyan simpleng marhay alagad espesipikong publikasyon na enterong basado sa Biblia. Tinatabangan kaiyan an mga nagbabasa kaiyan na marikas na masabotan kun ano an mga kahagadan nin Dios para sa tunay na pagsamba. Minsan siring,  an pagkadisenyo kaiyan dai nagtataong lugar para sa detalyadong pag-adal sa lambang tema. Kun an inaadalan nindo sa Biblia magbangon nin seryosong mga hapot manongod sa nagkapirang tema sa Biblia na pinag-oolayan nindo, paano nindo gigibohon an paghanap sa orog pang impormasyon sa Biblia na matabang sa saiya na masimbag an mga hapot na iyan?

⁵ Para sa mga igwa nin Watchtower Library sa CD-ROM sa saindang lenguahe, pasil na makakua nin dakol na reperensia nin impormasyon sa komputer. Alagad paano man an mga mayo kan kasangkapan na ini? Siyasaton niato an duwang topiko na tinotokar sa brosyur na Kahagadan tanganing maheling kun paano niato mapahihiwas an satong pakasabot asin mahihimong tumao nin mas detalyadong simbag​—nangorogna kun may naghahapot nin siring kan, Siisay an Dios, asin ano man nanggad si Jesus?​—Exodo 5:2; Lucas 9:18-20; 1 Pedro 3:15.

Siisay an Dios?

6, 7. (a) Anong hapot an minalataw mapadapit sa Dios? (b) Ano an seryosong dai sinambit nin sarong klerigo sa sarong diskurso?

⁶ Sinisimbag kan Leksion 2 sa brosyur na Kahagadan an mahalagang marhay na hapot na, Siisay an Dios? Pundamental ini huli ta an saro dai makakasamba sa tunay na Dios kun dai nia Sia midbid o tibaad nagdududa sa Saiyang pag-eksister. (Roma 1:​19, 20; Hebreo 11:6) Pero, an mga tawo sa bilog na kinaban igwa nin kadakol na ideya kun siisay an Dios. (1 Corinto 8:4-6) An lambang relihiosong pilosopiya igwa nin laen na simbag sa hapot na kun siisay an Dios. Sa Kakristianohan an kadaklan na relihion naniniwala na an Dios Trinidad. An sarong prominenteng klerigo sa E.U. nagtao nin diskurso na may titulong “Midbid daw Nindo an Dios?” alagad ni sarong beses dai nia sinambit sa pahayag an ngaran nin Dios, minsan ngani nagkapirang beses siang nagkotar sa Hebreong Kasuratan. Siempre, nagbasa sia sa sarong traduksion nin Biblia na naggagamit kan alanganon asin daing ngaran na “Kagurangnan” imbes na Jehova o Yahweh.

⁷ May mahalagang marhay na dai nasambitan an klerigong idto kan kotaron nia an Jeremias 31:​33, 34: “‘An lambang saro dai na matokdo sa saiyang kapwa, asin an lambang saro sa saiyang tugang, na nagsasabi, “Midbida an Kagurangnan” [sa Hebreo, “Midbida si Jehova”], huli ta sinda gabos makamimidbid na sa Sako, pagpoon sa pinakasadit sa sainda sagkod sa pinakadakula sa sainda,’ an sabi kan Kagurangnan [sa Hebreo, Jehova].” Hinale sa traduksion na ginamit nia an napapalaen na ngaran nin Dios, an Jehova.​—Salmo 103:​1, 2.

8. Ano an nagpapaheling kan kahalagahan kan paggamit kan ngaran nin Dios?

⁸ Ipinaheheling kan Salmo 8:9 kun taano ta importanteng marhay an paggamit kan ngaran ni Jehova: “O Jehova na samong Kagurangnan, halangkawon nanggad an saimong ngaran sa bilog na daga!” Ikomparar nindo iyan sa: “O KAGURANGNAN, na samong Kagurangnan. Kanigoan kaekselente kan saimong ngaran sa bilog na daga!” (King James Version; helingon man an The New American Bible, The Holy Bible​​—New International Version, Tanakh​​—The Holy Scriptures) Pero, siring kan nasabi sa naenot na artikulo, makukua niato “an mismong kaaraman nin Dios” kun totogotan niato an saiyang Tataramon na ilawan kita. Alagad arin na pantabang sa pag-adal sa Biblia an tolos na makasisimbag sa satong mga hapot manongod sa kahalagahan kan ngaran nin Dios?​—Talinhaga 2:1-6.

9. (a) Arin na publikasyon an makatatabang sa sato na ipaliwanag an kahalagahan kan paggamit kan ngaran nin Dios? (b) Paano dai nakapaheling nin paggalang sa ngaran nin Dios an dakol na paratradusir?

⁹ Puede niatong gamiton an brosyur na The Divine Name That Will Endure Forever, na trinadusir sa 69 lenguahe. b An kabtang na may titulong “God’s Name​​—Its Meaning and Pronunciation” (pahina 6-​11) malinaw na nagpapaheling na an Hebreong Tetragrammaton (hale sa Griego na nangangahulogan “apat na letra”) minalataw nin haros 7,000 na beses sa suanoy na mga tekstong Hebreo. Pero, an klero asin mga paratradusir sa Judaismo asin Kakristianohan tuyong hinale iyan sa kadaklan kan saindang traduksion nin Biblia. c Paano ninda masasabing midbid ninda an Dios asin igwa sinda nin kawiliwiling relasyon sa saiya kun habo ninda siang apodon sa saiyang ngaran? An saiyang totoong ngaran an nagpapangyaring masabotan  kun ano an saiyang mga katuyohan asin kun siisay sia. Dugang pa, ano an serbi kan kabtang kan modelong pamibi ni Jesus na “Ama niamo na nasa langit, santipikaron logod an saimong ngaran” kun dai ngani ginagamit an ngaran nin Dios?​—Mateo 6:9; Juan 5:43; 17:6.

Siisay si Jesu-Cristo?

10. Sa anong mga paagi kita makakukua nin kompletong paglaladawan kan buhay asin ministeryo ni Jesus?

¹⁰ An leksion 3 sa brosyur na Kahagadan may titulong “Siisay si Jesu-Cristo?” Sa anom na parapo sana, igwa iyan nin halipot sanang sinasabi dapit ki Jesus, sa saiyang pinaghalean, asin sa saiyang katuyohan sa pagdigdi sa daga. Minsan siring, kun gusto nindo nin kompletong estorya kan saiyang buhay, mayo nang maorog pa​—apuera sa pagkasaysay sa Ebanghelyo mismo​—kisa The Greatest Man Who Ever Lived, na makukua sa 111 lenguahe.* Iinaatubang kan librong ini an kompletong kronolohikong estorya kan buhay asin katokdoan ni Cristo, na basado sa apat na Ebanghelyo. An 133 na kapitulo kaiyan manongod sa mga pangyayari sa buhay asin ministeryo ni Jesus. Para sa napapalaen, analitikong pamamaagi, puede nindong konsultahon an Insight, Tomo 2, sa irarom kan titulong “Jesus Christ.”

11. (a) Paano napapalaen an Mga Saksi ni Jehova sa saindang pagtubod manongod ki Jesus? (b) Ano an nagkapirang teksto sa Biblia na malinaw na nagpapatunay na falso an doktrinang Trinidad, asin anong publikasyon an makatatabang sa bagay na ini?

¹¹ Sa Kakristianohan an kontrobersia mapadapit ki Jesus nakasentro sa kun baga sia “an Aki nin Dios” saka an “Dios Aki”​—sa ibang pagtaram, an pagpasuruhay sa inaapod kan Catechism of the Catholic Church na “an prinsipal na misteryo kan Kristianong pagtubod,” an Trinidad. Laen sa mga relihion nin Kakristianohan, an Mga Saksi ni Jehova nagtutubod na si Jesus naggikan sa Dios alagad bakong iyo an Dios. An sarong marahayon na paliwanag dapit sa temang ini manonompongan sa brosyur na Should You Believe in the Trinity?, na trinadusir sa 95 lenguahe. d Kabale sa kadakol na tekstong ginagamit kaiyan tanganing patunayan na falso an doktrinang Trinidad iyo an Marcos 13:32 asin 1 Corinto 15:​24, 28.

12. Ano pang hapot an maninigo sa satong atension?

¹² An mga tinokar sa enotan mapadapit sa Dios asin ki Jesu-Cristo nakatatabang na ipaheling an mga paagi na puede kitang personal na mag-adal sa katuyohan na tabangan na magkaigwa nin tamang kaaraman an mga dai nakakaaram kan katotoohan sa Biblia. (Juan 17:3) Pero kumusta man an mga asosyado na sa Kristianong kongregasyon sa laog nin dakol nang taon? Mantang dakol na an kaaraman ninda sa Biblia, kaipuhan pa daw giraray ninda na atenderan an saindang personal na pag-adal sa Tataramon ni Jehova?

Kun Taano ta Dapat na ‘Pirmeng Atenderan’?

13. Ano an tibaad napapasalang paghona nin nagkapira manongod sa personal na pag-adal?

¹³ An nagkapira na dakol nang taon na miembro kan kongregasyon tibaad matuod na magsarig na sana sa kaaraman sa Biblia na nakua ninda sa saindang enot na pirang taon bilang Saksi ni Jehova. Pasil na mangatanosan: “Dai ko kaipuhan na mag-adal nin siring kaseryoso kan pag-adal kan mga mas bagohan. Total, helinga daw kun pirang beses ko nang nabasa an Biblia asin an mga publikasyon sa Biblia sa nag-aging mga taon.” Kaagid ini kan pagsabing: “Dai ko na man talaga kaipuhan na bantayan na gayo an sakong pagkakan ngonyan, ta helinga dakol na akong nakakan kan nakaagi.” Aram niato na an hawak nagkakaipo nin dayaday na nutrisyon hale sa masustansia asin tama an pagkaluto na pagkakan tanganing magdanay iyan na marahay an salud asin aktibo. Lalo na nanggad na totoo iyan sa pagpapadanay kan satong espirituwal na salud asin kosog!​—Hebreo 5:12-14.

14. Taano ta maninigo na pirme niatong atenderan an satong sadiri?

¹⁴ Kun siring, kaipuhan na himateon niato gabos, baga man haloy nang nag-aadal sa Biblia o bako, an hatol ni Pablo ki Timoteo, na kan panahon na idto saro nang maygurang, responsableng paraataman: “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.” (1 Timoteo 4:​15, 16) Taano ta maninigo niatong isapuso an konseho ni Pablo? Girumdomon, sinabi man ni Pablo na kita nakikipaglaban tumang sa “mga pakana [“katusohan,” nota sa ibaba] kan Diablo” asin “tumang sa maraot na mga puersang espiritu sa langitnon na mga lugar.” Asin nagpatanid si apostol Pedro na an Diablo  “naghahanap nin masisiba,” asin an “masisiba” na iyan puedeng an siisay man sa sato. An pagigin kontento na niato sa sadiri puedeng magin iyo an oportunidad na hinahanap nia.​—Efeso 6:​11, 12; 1 Pedro 5:8.

15. Ano an espirituwal na pandepensa niato, asin paano niato iyan mamamantenir?

¹⁵ Kaya, ano an pandepensa niato? Ipinagigirumdom sa sato ni apostol Pablo: “Gamita nindo an bilog na pangalasag hale sa Dios, tanganing makapanumang kamo sa maraot na aldaw asin, pakagiboha nindo nin lubos kan gabos na bagay, marigon na tumindog.” (Efeso 6:13) An pagigin epektibo kan espirituwal na pangalasag na iyan nakadepende bako sana sa kalidad kaiyan sa primero kundi pati sa regular na pagmantenir. Kun siring, dapat na kabale sa bilog na kasangkapan na iyan hale sa Dios an sunod sa panahon na kaaraman sa Tataramon nin Dios. Itinotokdo kaini an kahalagahan nin pagigin sunod sa panahon kan satong pakasabot sa katotoohan na ihinahayag ni Jehova paagi sa saiyang Tataramon asin paagi sa grupong fiel asin may diskresion na oripon. An regular na personal na pag-adal sa Biblia asin mga publikasyon sa Biblia mahalagang marhay sa pagmantenir kan satong espirituwal na pangalasag.​—Mateo 24:45-47; Efeso 6:​14, 15.

16. Ano an puede niatong gibohon tanganing masegurado na nasa marahay na kamugtakan an satong “dakulang kalasag nin pagtubod”?

¹⁶ Idinoon ni Pablo bilang mahalagang marhay na kabtang kan satong pandepensang pangalasag “an dakulang kalasag nin pagtubod,” na paagi kaiyan malilikayan asin masisigbo niato an naglalaad na mga bosog ni Satanas na falsong mga sahot asin apostatang katokdoan. (Efeso 6:16) Kaya mahalagang marhay na seguradohon niato kun gurano kapusog an satong kalasag nin pagtubod asin kun ano an mga ginigibo niato tanganing mamantenir asin pakosogon iyan. Halimbawa, puedeng ihapot nindo: ‘Paano ako nag-aandam para sa semanal na pag-adal sa Biblia na ginagamit An Torrengbantayan? Nag-adal daw ako nin igo tanganing “mandagka sa pagkamoot asin sa marahay na mga gibo” paagi sa pagtao nin inandam na marhay na mga simbag durante kan pagtiripon? Binubuksan ko daw an Biblia asin binabasa an mga teksto na sitado alagad bakong kotado? Napaparigon ko daw an boot nin iba paagi sa sakong entusiastikong partisipasyon sa mga pagtiripon?’ Matagas an satong espirituwal na kakanon, asin kaipuhan an lubos na pagtunaw kaiyan tanganing kita lubos na makinabang.​—Hebreo 5:14; 10:24.

17. (a) Anong hilo an ginagamit ni Satanas sa paghingoang paluyahon an satong espirituwalidad? (b) Ano an pangontra sa kamandag ni Satanas?

¹⁷ Aram ni Satanas an mga kaluyahan kan makasalan na laman, asin tuso an saiyang mga pakana. An saro sa mga paagi nin pagpalakop nia kan saiyang maraot na impluwensia iyo an pagpangyari sa pornograpiya na pirmeng madaling makua sa TV, Internet, video, asin imprentadong mga publikasyon. Tinogotan nin nagkapirang Kristiano na makalaog an hilo na ini sa saindang luminuyang mga pandepensa, asin nagbunga iyan nin pagkawara nin mga pribilehio sa kongregasyon o nin mas grabe pa nganing mga resulta. (Efeso 4:17-19) Ano an pangontra sa espirituwal na kamandag ni Satanas? Dai niato dapat na pagpabayaan an satong regular na personal na pag-adal sa Biblia, an satong Kristianong mga pagtiripon, asin an bilog na pangalasag gikan sa Dios. Pagpinag-iriba, ini nagtatao sa sato kan kakayahan na mamidbid an kalaenan nin tama asin sala patin ikaongis an ikinaoongis nin Dios.​—Salmo 97:10; Roma 12:9.

18. Paano makakatabang sato an “espada kan espiritu” sa satong espirituwal na pakikilaban?

¹⁸ Kun papagdadanayon niato an satong regular na ugale nin pag-adal sa Biblia, magkakaigwa kita bako sanang kan pusog na pandepensang itinatao kan satong tamang kaaraman sa Tataramon nin Dios kundi pati kan epektibong pansalakay paagi sa “espada kan espiritu, arin na baga, an tataramon  nin Dios.” An tataramon nin Dios “mas matarom kisa arin man na espada na may duwang tarom asin nakalalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakamamansay kan mga kaisipan asin intension kan puso.” (Efeso 6:17; Hebreo 4:12) Kun kita magigin eksperto sa paggamit kan “espadang” iyan, kun siring kun mapaatubang kita sa mga sugot, mahihimo niatong lagbason an garo baga dai man nakakaano, o nakaaakit pa ngani, asin ibuyagyag iyan bilang nakagagadan na silo kan maraot. An satong saray na kaaraman asin pakasabot sa Biblia matabang sa sato na isikwal an maraot asin gibohon an marahay. Kaya kaipuhan na ihapot niato gabos sa satong sadiri: ‘Matarom pa daw an sakong espada, o iyan daw tinatakla na? Nasasakitan daw ako na magirumdoman an mga tekso sa Biblia na puedeng magpakosog sa pakikilaban?’ Papagdanayon niato an satong marahay na mga ugale nin personal na pag-adal sa Biblia asin sa siring tumangon an Diablo.​—Efeso 4:​22-​24.

19. Anong mga pakinabang an mapapasato kun magmamaigot kita sa personal na pag-adal?

¹⁹ Si Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa lambang marahay na gibo.” Kun isasapuso niato an mga tataramon ni Pablo ki Timoteo, puede niatong pakosogon an sato mismong espirituwalidad asin magigibo niatong magin mas epektibo an satong ministeryo. An espirituwal na kamagurangan asin ministeryal na mga lingkod puedeng orog na makatabang sa kongregasyon, asin kita gabos puedeng magdanay na marigon sa pagtubod.​—2 Timoteo 3:​16, 17; Mateo 7:24-27.

[Mga Nota sa Ibaba]

Nagigirumdoman daw Nindo?

• Anong mga kamugtakan an nakakokontribwir sa epektibong personal na pag-adal?

• Anong sala an nagigibo kan dakol na paratradusir kan Biblia mapadapit sa ngaran nin Dios?

• Anong mga teksto sa Biblia an gagamiton nindo tanganing patunayan na falso an katokdoan na Trinidad?

• Ano an dapat niatong gibohon tanganing protehiran an satong sadiri sa mga pakana ni Satanas, minsan ngani dakol na taon na kitang tunay na mga Kristiano?

[Mga Hapot Para sa Pag-adal]

[Mga ritrato sa pahina 19]

Para sa epektibong personal na pag-adal, kaipuhan nindo an tamang kamugtakan na kakadikit an mga disturbo

[Mga ritrato sa pahina 23]

An saindo daw na “espada” matarom o tinatakla na?