Sa Lamesa kan Kapitan
Sa Lamesa kan Kapitan
HULI sa interesanteng mga tawo, masiram na kakanon, asin nakagagayagayang pag-orolay nagigin nakaoogmang marhay an pagkakan sa lamesa kan kapitan mantang nakasakay sa barko. Alagad an sarong pag-oolay sa lamesa ni Kapitan Robert G. Smith, kan White Star Line, naghayag nin sarong espirituwal na bangkete.—Isaias 25:6.
Kan 1894, sa edad na 24, si Robert nagin kapitan kan barkong Kinclune of Dundee sa enot niang pagbiahe sa bilog na kinaban. Pagkatapos nagin kapitan sia kan mga barko kan White Star Line, arog kan Cedric, Cevic, asin Runic. a Mantang binabalyo an Atlantiko hale sa Nueva York pasiring sa Liverpool, Inglaterra, sa saro sa mga barkong ini, nagin bisita ni Robert sa lamesa kan kapitan si Charles Taze Russell. An pakikipag-olay ki Russell nakapukaw kan interes ni Robert sa mensahe kan Biblia, asin tanganing makatabang sa saiya na makanood pa, maogma niang kinua ki Russell an mga kopya kan Studies in the Scriptures.
Si Russell nakipagkomunikar paagi sa surat, asin bilang resulta, an interes ni Robert sa mensahe kan Biblia tuminalubo. Sinabi man ni Robert sa saiyang agom an kaaraman na bago pa sana niang makua. Dai naghaloy pareho na sindang nagin aktibong miembro kan Mga Estudyante sa Biblia, na apod kaidto sa Mga Saksi ni Jehova. Sa huri si Robert nagkapribilehiong magtao nin mga diskurso sa Biblia. Halimbawa, sa Brisbane, Australia, sia nagpahayag sa temang “An Panhaplas nin Galaad” asin ipinaheling nia kun paanong an Tataramon nin Dios igwa nin mensahe na “panremedyo sa gabos na grabeng pagsakit sa daga.” Duman man sa Inglaterra, an saiyang agom asin hoben pang mga aki nagtabang sa pagpasale kan “Photo-Drama of Creation,” na pinatutugtog an mga rekording kan komentaryo ni Russell mantang ipinadadalan an mga slide.
Ipinamana ni Robert sa saiyang mga aki an katotoohan kan Kahadean na saiyang naako. Ngonyan, pakalihis nin limang henerasyon, 18 miembro kan pamilya an sibot sa pagpaabot kan maogmang bareta sa iba, na nagpapasalamat sa isinerbi sa lamesa kan kapitan.
Paagi sa saindang mga publikasyon asin gibohon na pagtotokdo sa Biblia, tinatabangan kan Mga Saksi ni Jehova an mga tawo sa bilog na kinaban na manodan an mensahe sa Biblia na nakapukaw kan interes ni Kapitan Smith. Puede man nindong maaraman kun ano an nagin interesanteng marhay sa lamesa kan kapitan.
[Nota sa Ibaba]
a An kapitan kan saro pang barko na sadiri man kan White Star Line, an Titanic, iyo si Kapitan E. J. Smith (bakong paryente) sa kapahapahamak na primerong biahe kaiyan.
[Ritrato sa pahina 8]
Si Robert G. Smith
[Ritrato sa pahina 8]
Si Charles T. Russell