An Pagkamundag ni Jesus—Kun Paano Asin Kun Taano ta Nangyari Iyan

“IMPOSIBLE!” Ini an sasabihon nin dakol na bakong Kristiano kun madangog an pagkasaysay manongod sa pagkamundag ni Jesus. Sa paghona ninda bakong sientipiko na maniwala na an sarong birhen puedeng mangidam asin mangaki na dai nin amang tawo. Ano sa paghona nindo?

Kan 1984, an The Times kan Londres nagpublikar nin sarong surat na nangangatanosan sa bagay na ini, na nagsasabi: “Bakong rasonable na gamiton an siensia bilang argumento tumang sa mga milagro. An paniniwala na dai puedeng mangyari an mga milagro saro man na akto nin pagtubod kapareho kan paniniwala na puedeng mangyari iyan.” An surat pinirmahan nin 14 propesor sa siensia sa mga unibersidad sa Britania. Sinabi ninda: “Maogma ming inaako an pangangaki nin sarong birhen, an mga milagro sa Ebanghelyo, asin an pagkabuhay liwat ni Cristo bilang mga pangyayari sa kasaysayan.”

Pero, natural sana na an sarong tawo madepisilan sa pag-isip-isip sa enot na pakadangog kan estorya manongod sa pangangaki ki Jesus nin sarong birhen. An mismong birhen na ina ni Jesus nadepisilan sa pag-isip-isip kan sabihon nin sarong anghel nin Dios: “Uya! ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus.” Bilang simbag, si Maria naghapot: “Paano ini mangyayari, mantang dai ako nakikidorog sa lalaki?” Ipinaliwanag ngonyan kan anghel na an Dios an magibo kan milagrong ini paagi sa Saiyang banal na espiritu, na nagsasabi pa: “Sa Dios mayo nin tataramon na imposible.” (Lucas 1:​31, 34-37) Daing duwa-duwa, an Saro na naglalang kan makangangalas na proseso nin pangangaki puede man na pangyarihon an pangingidam asin pangangaki ki Jesus nin sarong mabining birhen. Kun linalang nin Dios an uniberso asin an eksaktong mga ley kaiyan, kaya man niang gamiton an sarong semilya sa obaryo ni Maria tanganing gumibo nin sarong sangkap na tawong Aki.

Kun Taano ta Kaipuhan Iyan

An diosnon na lalaking si Jose nakatrato nang pakasal ki Maria kan si Maria mangidam. Sa sarong pangatorogan, ipinaliwanag kan anghel nin Dios ki Jose an makangangalas na dahelan kun taano ta bados an birhen na saiyang katrato. An anghel nagsabi: “Dai ka matakot na ipuli si Maria na saimong agom na babae, huli ta an pinapangyaring ipangidam nia paagi sa banal na espiritu. Sia mangangaki nin sarong lalaki, asin kaipuhan na apodon mo an saiyang ngaran na Jesus, huling ililigtas nia an saiyang banwaan sa saindang mga kasalan.” (Mateo 1:​20, 21) An ngaran na Jesus sa Hebreo nangangahulogan na “Si Jehova Kaligtasan.” Ipinagigirumdom sato kaiyan an pangangaipong maligtas sa kasalan saka kagadanan asin an probisyon ni Jehova Dios para sa siring na kaligtasan paagi ki Jesus.

 Huling an enot na tawong si Adan nagkasala, an gabos na gikan nia namundag na bakong sangkap, na may tendensiang balgahon an mga ley nin Dios. (Roma 5:12) Paano daw ikaliligtas an mga gikan ni Adan sa kasalan asin magkakamit nin pagkasangkap? Kaipuhan na ibayad an saro pang sangkap na buhay nin tawo na katimbang sa halaga kan ki Adan tanganing magin balanse an timbangan nin hustisya. Iyan an dahelan kaya pinangyari nin Dios an milagrosong pagkamundag kan sangkap na tawo, si Jesus, asin iyan an dahelan kaya tuminogot si Jesus na gadanon sia kan saiyang mga kaiwal. (Juan 10:​17, 18; 1 Timoteo 2:​5, 6) Pagkatapos na si Jesus buhayon liwat asin sumakat sa langitnon na buhay, kompiado niang masasabi: “Ako nagadan, alagad helinga! ako nabubuhay sagkod lamang, asin igwa ako kan mga liabe nin kagadanan asin nin Hades [an pankagabsan na lolobngan nin katawohan].”​—Kapahayagan 1:18.

Paagi sa piguratibong mga liabe nin kagadanan asin Hades, binukasan ni Jesus an dalan tanganing mabawi nin makasalan na mga tawo an iwinara ni Adan. Ipinaliwanag ni Jesus: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay; asin an gabos na nabubuhay asin naggigibo nin pagtubod sa sako dai na noarin man magagadan.” (Juan 11:​25, 26) Kanigoan kamakangangalas na panuga! Alagad ta igwa nin mas dakula pa nganing dahelan an pagkamundag ni Jesus.

An Pinakamahalagang Dahelan

An pangingidam ki Jesus sa matris ni Maria bakong an pagpoon kan saiyang buhay. “Ako naghilig hale sa langit,” an malinaw na sabi nia. (Juan 6:38) Si Jesus nabuhay sa rona kan mga espiritu kaiba kan saiyang langitnon na Ama poon sa kapinonan kan paglalang. Sa katunayan, sinasabi kan Biblia na sia “an kapinonan kan paglalang nin Dios.” (Kapahayagan 3:14) Duman sa langit, naheling ni Jesus an pagrebelde nin maraot na anghel na nagpatalikod sa enot na mga tawo sa pamamahala nin Dios. Ini an nagtao ki Jesus kan pinakaimportanteng dahelan na mawoton na mamundag bilang sarong sangkap na tawong Aki nin Dios. Ano iyan?

Tanganing patunayan na an saiyang langitnon na Ama may deretsong mamahala sa uniberso. Paagi sa pagdanay na fiel poon kan sia mamundag sagkod sa saiyang kagadanan sa daga, ipinaheling ni Jesus an saiyang pagigin andam na magpasakop sa paagi kan pamamahala ni Jehova sa Saiyang mga linalang. Bago sia magadan sa kamot kan mga enemigo nin Dios, malinaw na sinabi ni Jesus an dahelan kan saiyang pagigin andam na umagi sa kagadanan bilang atang. Sinabi nia na iyan tangani na maaraman kan kinaban na namomotan nia an Ama. (Juan 14:31) Kun napatalubo kan enot na mga tawo, si Adan asin Eva, an siring na pagkamoot, nagin fiel kutana sinda sa irarom kan mas pasil na pagbalo sa sainda.​—Genesis 2:15-17.

Ibinuyagyag man kan pagigin fiel ni Jesus an maraot na anghel, si Satanas, bilang sarong putikon. Pinakaraot ni Satanas an Dios asin an mga tawo paagi sa pagsabi sa atubangan nin mga anghel sa langit: “An gabos na sadiri nin tawo itatao nia para sa saiyang buhay.” (Job 2:​1, 4, Tanakh​​—The Holy Scripture) Si Satanas nagsahot nin sala na an gabos na  tawo makikisuway sa Dios tanganing iligtas an saindang buhay.

Kinuestion kan mga isyu na nasambitan sa enotan an pagigin matanos asin pagigin tama kan pamamahala nin Dios. Tanganing resolberan iyan, andam si Jesus na mamundag bilang tawo asin patunayan na sia magigin fiel sagkod sa kagadanan.

Sa siring, an pangenot na dahelan kaya namundag si Jesus digdi sa daga, arog kan mismong sinabi nia, iyo na sia “magpatotoo sa katotoohan.” (Juan 18:37) Ginibo nia iyan paagi sa pagpaheling sa tataramon asin gibo na an pamamahala nin Dios biyong matanos asin na an pagpasakop dian maresulta sa nagdadanay na kaogmahan. Ipinaliwanag man ni Jesus na sia nagdigdi sa kinaban tanganing an saiyang buhay bilang tawo itao “na pantubos karibay kan dakol,” na nagbubukas kan dalan tanganing an makasalan na mga tawo magkamit nin pagkasangkap asin buhay na daing katapusan. (Marcos 10:45) Tanganing masabotan nin katawohan an mahalagang marhay na mga bagay na ini, kaipuhan an sarong rekord kan pagkamundag ni Jesus. Saro pa, an mga pangyayari na nakapalibot sa pagkamundag ni Jesus igwa nin iba pang importanteng mga leksion, arog kan ipaheheling sa masunod na artikulo.

[Mga ritrato sa pahina 4]

Paano daw ikaliligtas sa kasalan an mga gikan ni Adan?