Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Paano puedeng magin proteksion an “kakayahan sa pag-iisip”? (Talinhaga 1:4)

Puede kitang patanidan kaiyan sa espirituwal na mga peligro asin motibaron na planohon an madonong na dapat gibohon, siring baga kan paglikay sa seksuwal na mga sugot sa trabaho. Tinatabangan kita kaiyan na rekonoseron na an mga kapwa Kristiano bakong sangkap, na puedeng magpahiro sa sato na likayan an pabiglabiglang reaksion kun napoprobokar nin iba. Magpapangyari man iyan sa sato na likayan an materyalistikong mga impluwensia na tibaad makadiskaril sa sato sa espirituwal na paagi.​​—w-E 8/15, pahina 21-4.

• Paano an saro puedeng magin bentaha bilang kataed?

An duwang paagi na magin marahay na kataed iyo an pagigin marahay na paratao asin pagigin mapagpasalamat na nag-aako. Mahalaga an pagigin marahay na kataed kun may mag-abot na kasakitan. Nagmamaigot an Mga Saksi ni Jehova na magin marahay na mga kataed paagi sa pagpatanid sa iba manongod sa madali nang mangyari, an paghiro nin Dios na taposon an karatan.​​—w-BI 9/1, pahina 4-7.

• Segun sa Biblia, sairisay an tunay na mga santo, asin paano ninda tatabangan an katawohan?

An gabos na enot na Kristiano tunay na mga santo, o mga banal, na ginibong siring kaiyan nin Dios, bakong nin mga tawo o organisasyon. (Roma 1:7) Oras na buhayon liwat pasiring sa langitnon na buhay, an mga banal makikikabtang ki Cristo sa pagbendisyon sa mga fiel digdi sa daga. (Efeso 1:​18-​21)​​—w-BI 9/15, pahina 5-7.

• An pakaaram manongod sa atletikong mga aktibidad sa suanoy na Grecia tibaad may anong kahalagahan sa mga Kristiano?

An mga isinurat ni apostol Pedro asin Pablo igwa nin mga ilustrasyon na basado sa o mga pagkaunabi sa suanoy na mga kawat. (1 Corinto 9:​26; 1 Timoteo 4:7; 2 Timoteo 2:5; 1 Pedro 5:10) Para sa sarong atleta kan suanoy, importante na magkaigwa nin sarong matibay na nagpapatuod, magpogol sa sadiri, asin maghingoang marhay. Totoo man iyan mapadapit sa espirituwal na mga paghihingoa kan mga Kristiano ngonyan.​​—w-BI 10/1, pahina 28-​31.

• Ano an mga angat asin balos sa pagpadakula sa mga aki sa ibang nasyon?

An dakol na aki mas marikas na nakanonood nin bagong lenguahe kisa sa saindang mga magurang, na tibaad nadedepisilan na masabotan an kaisipan asin reaksion kan saindang mga aki. Asin tibaad dai tolos nasasabotan kan mga aki an mga katokdoan sa Biblia sa lenguahe kan saindang mga magurang. Pero, puedeng mapakosog an bogkos nin mga pamilya mantang itinotokdo kan mga magurang an saindang lenguahe sa saindang mga aki, na sa siring tibaad makanood kan duwang lenguahe asin magin pamilyar sa duwang kultura.​​—w-E 10/15, pahina 22-6.

• Taano ta importante an pakanood na maghagad nin dispensasyon?

An sinserong paghagad nin dispensasyon sa parate sarong paagi sa paghirahay sa naraot na relasyon. An Biblia nagtatao nin mga halimbawa kan puedeng magin puersa kan paghagad nin dispensasyon. (1 Samuel 25:​2-​35; Gibo 23:​1-5) Sa parate, kun an duwang tawo magkakontra, igwa nin sala minsan paano an mag-ibong na lado. Kun siring, nangangaipo nin pagpahunod asin paghagad nin dispensasyon kan saro sa saro.​​—w-BI 11/1, pahina 4-7.

• Taano ta sala an paghuego dawa nin sadit na kantidad?

An paghuego puedeng makapukaw sa egotismo, espiritu nin pakipagdaogan, asin kahanaban, na kinokondenar kan Biblia. (1 Corinto 6:​9, 10) An dakol na adikto sa paghuego nagpoon sa amay pang edad paagi sa pagpusta nin kadikit na kantidad.​​—w-BI 11/1, pahina 30-1.

• Mantang an dakol na libro sa Biblia isinurat sa Griego, taano ta kinaipuhan na itradusir an Biblia sa Griego, asin may anong mga resulta?

An modernong Griego medyo laen sa Griego kan traduksion na Septuaginta kan Hebreong Kasuratan asin kan traduksion sa Kristianong Griegong Kasuratan. Sa nakaagi pa sanang mga siglo nagkaigwa nin dakol na pagprobar na itradusir sa itinataram na Griego an nagkapirang kabtang o an bilog na Biblia. Ngonyan, igwa nin mga 30 traduksion kan Biblia, bilog man o kabtang sana, na masasabotan nin ordinaryong Griego, na an sarong midbid iyo an New World Translation of the Holy Scriptures, na ipinublikar kan 1997.​​— w-E 11/15, pahina 26-9.

• Taano an pagtao nin tinagba ta bakong kahagadan sa mga Kristiano?

Segun sa Ley na itinao sa suanoy na Israel, an pagtao nin tinagba sarong paagi na masustentohan an tribo ni Levi asin maasikaso an mga nangangaipo. (Levitico 27:30; Deuteronomio 14:​28, 29) An kagadanan ni Jesus bilang atang an naghale kan Ley asin kan kahagadan kaiyan na magtao nin tinagba. (Efeso 2:​13-​15) Sa enot na kongregasyon, an kaugalean iyo na an lambang Kristiano magtao oyon sa saiyang kabuhayan asin sa napagdesisyonan nia sa saiyang puso. (2 Corinto 9:​5, 7)​​—w-BI 12/1, pahina 4-6.

• An Kapahayagan 20:8 daw nangangahulogan na kadakol kan malalagalag ni Satanas sa pangultimong pagbalo?

An teksto nagsasabi na an mga malalagalag “siring kadakol kan mga baybay kan dagat.” Sa Biblia, an mga pananaram na iyan sa parate nangangahulogan nin dai aram na kabilangan, na dai nagsusuherir na iyan grabe kadakula. An banhi ni Abraham, na magigin “siring kan mga baybay sa baybayon,” nagkaigwa nin kabilangan na 144,000 katawo, apuera ki Jesu-Cristo. (Genesis 22:17; Kapahayagan 14:1-4)​​—w-BI 12/1, pahina 29.