‘Dios Ko, Taano ta Tinogotan Mo na Mangyari Ini?’
‘Dios Ko, Taano ta Tinogotan Mo na Mangyari Ini?’
NAGIGIRUMDOMAN pa ni Ricardo kan kaiba niang nagtutukaw sa kuartong halatan sa doktor an saiyang agom na si Maria. * Ni saro sainda daing kosog nin boot na basahon an mga resulta kan pinakahuring medikal na pag-eksamin ki Maria. Dangan, binukasan ni Ricardo an sobre, asin dali-dali nindang binasa nin marikas an mga termino sa medisina na yaon sa report. Nariparo ninda an terminong “kanser,” asin parehong nagpoon na humibi kan marealisar ninda an bilog na kahulogan kan terminong iyan.
“An doktor maboot na marhay,” an nagigirumdoman ni Ricardo, “alagad malinaw na aram nia an pagigin seryoso kan situwasyon huli ta pigpaparasabi nia samo na kami kaipuhan na magsarig sa Dios.”
Bago pinonan an pagbolong paagi sa radyasyon, narisa kan doktor ni Maria na dai nia makontrol an paghiro kan saiyang toong bitis. Ihinayag kan dugang pang mga pag-eksamin na an kanser luminakop na sa saiyang hotok. Pakalihis nin saro sanang semana nin pagbolong, ipinondo an radyasyon. Si Maria nakoma asin nagadan pakalihis nin duwang bulan. “Naogma ako ta natapos na an saiyang pagdusa,” an paliwanag ni Ricardo, “alagad napupungaw akong marhay sa saiya kaya minawot ko man na magadan na. Sa parate, nag-aagrangay ako sa Dios: ‘Taano ta tinogotan mo na mangyari ini?’”
Kun May Trahedya, Minalataw an Dakol na Hapot
Arog ni Ricardo, napipiritan an dai mabilang na mga tawo sa bilog na kinaban na atubangon an katunayan nin pagdusa. Sa dakol na pangyayari, an mga inosente an nagdudusa. Isip-isipon an makolog sa boot na kamondoan huli sa daing ontok na armadong ralaban na nagpapasakit sa katawohan. O konsideraron an kolog na namatean kan kadakol na biktima nin panlulupig, pagmaltrato sa aki, kadahasan sa laog kan pamilya, asin iba pang karatan na nakomiter nin tawo. Sa bilog na kasaysayan garo baga mayong sagkodan an inhustisya asin kolog na gustong ipasapar kan mga lalaki asin babae sa lambang saro. (Eclesiastes 4:1-3) Dangan yaon an labi-labing kamondoan kan mga biktima nin natural na mga kalamidad o nin emosyonal, mental, asin pisikal na mga helang. Bakong makangangalas na dakol an naghahapot, “Taano ta tinotogotan nin Dios an siring na pagdusa?”
Dawa sa mga may relihiosong kombiksion, an pagdusa dai noarin man nagin pasil na atubangon. Tibaad nag-iisip-isip man kamo kun ano an posibleng dahelan na tinotogotan nin sarong mamomoton, makapangyarihan sa gabos na Dios an pagdusa nin tawo. An pakanompong nin nakakokontento asin sadiosan na simbag sa hapot na ini na masakit simbagon mahalagang marhay sa katoninongan nin isip niato asin sa satong relasyon sa Dios. An Biblia nagtatao nin siring na simbag. Pensara tabi an sinasabi kaiyan na iprinesentar sa masunod na artikulo.
[Nota sa Ibaba]
^ par. 2 Sinanglian an mga ngaran.
[Mga Ritrato sa pahina 3]
Pigpaparasabi samo kan doktor na kami kaipuhan na magsarig sa Dios