Karangahan Para sa mga Nagdudusa
Karangahan Para sa mga Nagdudusa
SA NAG-AGING mga siglo, an hapot na taano ta itinotogot nin Dios an pagdusa nagin dakulang iisipon sa dakol na pilosopo asin teologo. An nagkapira positibong nagsasabi na mantang an Dios makapangyarihan sa gabos, seguradong sia an pinakaresponsable sa pagdusa. An kagsurat kan The Clementine Homilies, sarong apokripal na libro kan ikaduwang siglo, naghingako na pinamamahalaan nin Dios an kinaban na ginagamit an duwang kamot. Paagi sa saiyang “walang kamot,” an Diablo, sia nagpapangyari nin pagdusa asin makuring sakit, asin paagi sa saiyang “toong kamot,” si Jesus, sia nagliligtas asin nagtatao nin bendisyon.
An iba pa, na dai kayang akoon na itotogot nin Dios an pagdusa dawa kun bako sia an nagpangyari kaiyan, piniling deharan na igwa nin pagdusa. “An karatan imahinasyon sana, asin mayo iyan nin tunay na basehan,” an isinurat ni Mary Baker Eddy. “Kun an kasalan, helang, asin kagadanan sinasabot bilang pagigin mayo, iyan mawawara.”—Science and Health With Key to the Scriptures.
Bilang resulta kan makaturotristeng mga pangyayari sa kasaysayan, nangorogna poon kan enot na guerra mundial sagkod sa kapanahonan niato, dakol an nagkonklusyon na talagang dai kaya nin Dios na olangon an pagdusa. “Sa opinyon ko, pinatunayan kan Holocaust na dai puedeng gamiton an pagigin may daing sagkod na kapangyarihan bilang kualidad na angay sa Dios,” an isinurat kan Judiong intelektuwal na si David Wolf Silverman. “Tanganing masabotan an Dios,” an idinugang nia, “kun siring an Saiyang karahayan kaipuhan na kaoyon kan pag-eksister nin karatan, asin ini totoo sana kun Sia bakong makapangyarihan sa gabos.”
Minsan siring, an mga paghingako na an Dios maski paano kasapakat sa pagkaigwa nin pagdusa, na dai nia kayang olangon iyan, o na an pagdusa imbento sana kan satong imahinasyon nagtatao nin kakadikit na karangahan sa mga nagdudusa. Asin mas mahalaga, an siring na mga paniniwala biyong kabaliktaran kan makatanosan, mapuersa, asin may pagmakolog na Dios na ihinahayag sa mga pahina kan Biblia. (Job 34:10, 12; Jeremias 32:17; 1 Juan 4:8) Kun siring, ano an sinasabi kan Biblia manongod sa dahelan kun taano ta tinogotan an pagdusa?
Paano Nagpoon an Pagdusa?
Dai linalang nin Dios an mga tawo tanganing magdusa. Al kontraryo, tinawan nia an enot na tawong mag-agom, si Adan asin Eva, nin sangkap na isip asin hawak, inandaman nin nakaoogmang marhay na hardin tanganing magin istaran ninda, asin tinawan sinda nin makahulogan, nakakokontentong trabaho. (Genesis 1:27, 28, 31; 2:8) Minsan siring, an saindang nagdadanay na kaogmahan nakadepende sa saindang pagmidbid sa pamamahala nin Dios asin sa saiyang deretso na magdesisyon kun ano an marahay asin kun ano an maraot. An pagboot na iyan nin Dios irinepresentar nin sarong kahoy na inaapod na “kahoy kan pakamidbid sa marahay asin maraot.” (Genesis 2:17) Patutunayan ni Adan asin Eva an saindang pagpasakop sa Dios kun kukuyogon ninda an saiyang pagboot na dai magkakan sa kahoy na iyan. *
Makaturotriste nanggad, si Adan asin Eva nasudyang kumuyog sa Dios. Kinombensir si Eva nin sarong rebeldeng espiritung linalang, na sa huri namidbid bilang si Satanas na Diablo, na bakong sa pinakaikararahay nia an pagsunod sa Dios. Sa katunayan, ipinangunguri daa nin Dios sa saiya an sarong bagay na kawiliwiling Genesis 3:1-6; Kapahayagan 12:9) Naakit sa posibilidad na magkaigwa nin independensia, kinakan ni Eva an ipinangangalad na prutas, asin dai nahaloy kuminakan man si Adan.
marhay: an independensia, an deretso na magsadiring pumili kun ano an marahay asin kun ano an maraot. Naghingako si Satanas na kun si Eva makakan sa kahoy, ‘mabubuklat an saiyang mga mata asin sia magigin arog nin Dios, na nakamimidbid kan marahay asin maraot.’ (Sa aldaw man sanang iyan, nagpoon nang mamatean ni Adan asin Eva an mga resulta kan saindang pagrebelde. Sa paghabo sa pamamahala nin Dios, iwinara ninda an proteksion asin bendisyon na itinao sa sainda kan pagpasakop sa Dios. Pinalayas sinda nin Dios sa Paraiso asin sinabihan si Adan: “Sumpaon an daga huli sa saimo. Sa kolog makakan ka kan bunga kaiyan sa gabos na aldaw kan saimong buhay. Sa ganot kan saimong lalauogon makakan ka nin tinapay sagkod na ika bumalik sa daga.” (Genesis 3:17, 19) Si Adan asin Eva napairarom sa helang, kolog, paggurang, asin kagadanan. An pagdusa nagin kabtang na kan eksperyensia nin tawo.—Genesis 5:29.
Pagresolber sa Isyu
Tibaad may maghapot, ‘Puede daw na palampason na sana kutana nin Dios an kasalan ni Adan asin Eva?’ Dai, huli ta orog na paluluyahon kaiyan an paggalang sa saiyang autoridad, tibaad mag-enkaminar iyan nin mga pagrebelde sa ngapit asin magresulta sa mas dakula pa nganing pagdusa. (Eclesiastes 8:11) Dugang pa, an pagkonsinte sa siring na pakisuway gigibohon an Dios na kasapakat sa salang ginibo. Ipinagigirumdom sa sato kan kagsurat sa Biblia na si Moises: “An mga gibo nin Dios sangkap, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 32:4, nota sa ibaba) Tanganing humiro kaoyon kan saiyang mga prinsipyo, tinogotan nin Dios na saparon ni Adan asin Eva an mga resulta kan saindang pagsuway.
Taano ta dai tolos ginadan nin Dios an enot na tawong mag-agom kaiba ni Satanas, an dai naheheling na parasutsut kan pagrebelde ninda? May kapangyarihan siang gibohon iyan. Si Adan asin Eva dai na kutana nagkaigwa nin mga aki na nagmana nin pagdusa asin kagadanan. Minsan siring, an arog kaiyan na pagpaheling kan kapangyarihan nin Dios dai man mapatunay kan pagigin lehitimo kan autoridad nin Dios sa saiyang madonong na mga linalang. Apuera kaini, kun nagadan si Adan asin Eva na mayong aki, nagpapaheling sana iyan na nasudya an katuyohan nin Dios na panoon an daga kan saindang sangkap na mga gikan. (Genesis 1:28) Asin “an Dios bakong arog nin tawo . . . Ano man an ipanuga nia, inootob nia; sinasabi nia, asin iyan ginigibo nia.”—Bilang 23:19, Today’s English Version.
Sa saiyang sangkap na kadonongan, nagdesisyon si Jehova Dios na togotan na magpadagos an pagrebelde sa limitadong panahon. An mga rebelde magkakaigwa nin bastanteng oportunidad na maeksperyensiahan an mga epekto kan independensia sa Dios. Malinaw nanggad na patutunayan kan kasaysayan na kaipuhan kan katawohan an paggiya nin Dios asin na nakalalabi an pamamahala nin Dios kisa kan sa tawo o ki Satanas. Kadungan kaiyan, an Dios naggibo nin mga lakdang tanganing seguradohon na maootob an saiyang orihinal na katuyohan para sa daga. Ipinanuga nia na maabot an sarong “banhi,” o “aki,” na ‘malugad ki Satanas sa payo,’ na hahaleon nin sararoan sana an saiyang pagrebelde asin an nakadadanyar na mga epekto kaiyan.—Genesis 3:15, nota sa ibaba.
Si Jesu-Cristo an ipinanugang Banhing iyan. Sa 1 Juan 3:8, mababasa niato na “an Aki nin Dios ipinahayag . . . tanganing laglagon an mga gibo kan Diablo.” Ginibo nia ini paagi sa pagtao kan saiyang sangkap na buhay bilang tawo asin pagbayad kan pantubos na halaga tanganing balukaton an mga aki ni Adan hale sa minanang kasalan asin kagadanan. (Juan 1:29; 1 Timoteo 2:5, 6) An mga totoong nagsasagibo nin pagtubod sa atang ni Jesus pinanunugaan nin permanenteng pakaginhawa sa pagdusa. (Juan 3:16; Kapahayagan 7:17) Noarin mangyayari ini?
Katapusan nin Pagdusa
An paghabo sa autoridad nin Dios an nagin dahelan nin dai masokol na pagdusa. Kun siring, angay sanang gamiton nin Dios an saiyang autoridad sa espesyal na paagi tanganing taposon an pagdusa asin otobon an saiyang orihinal na katuyohan para sa daga. Sinambit ni Jesus an probisyon na ini nin Dios kan tokdoan nia an saiyang mga parasunod na mamibi: “Ama niamo na nasa langit, . . . Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:9, 10.
An panahon na itinogot nin Dios tanganing an mga tawo mag-eksperimento sa pamamahala sa saindang sadiri madali nang matapos. Bilang kaotoban kan hula sa Biblia, an saiyang Kahadean naestablisar na sa kalangitan kan 1914 asin si Jesu-Cristo an Hade kaiyan. * Sa dai na mahahaloy, roronoton asin tataposon kaiyan an gabos na gobyerno nin tawo.—Daniel 2:44.
Durante kan saiyang halipot na ministeryo digdi sa daga, itinao ni Jesus an patanaw sa ngapit kan mga bendisyon na itatao sa katawohan kan pagbabalik kan pamamahala nin Dios. Itinatao kan mga Ebanghelyo an prueba na si Jesus nagpaheling nin pagkaludok sa mga miembro kan sosyedad nin tawo na dukha asin tinatratar na may diskriminasyon. Nagpaomay sia nin mga may helang, nagpakakan nin mga nagugutom, asin nagbuhay nin mga gadan. Dawa an puersa nin naturalesa nagkukuyog sa saiyang tingog. (Mateo 11:5; Marcos 4:37-39; Lucas 9:11-16) Imahinara nanggad an magigibo ni Jesus kun gamiton na nia an naglilinig na epekto kan saiyang atang na pantubos tanganing makinabang an gabos na makinuyog na katawohan! An Biblia nanunuga na paagi sa pamamahala ni Cristo, ‘papahidon nin Dios an gabos na luha sa mga mata kan katawohan, asin an kagadanan mawawara na, dai na sagkod magkakaigwa nin pagmondo ni pagtangis ni kolog.’—Kapahayagan 21:4.
Karangahan Para sa mga Nagdudusa
Kanigoan kanakaparirigon sa boot na maaraman na an satong mamomoton asin makapangyarihan sa gabos na Dios, si Jehova, nagmamakolog sa sato asin na sa dai na mahahaloy pagiginhawahon nia an katawohan! Sa parate, an sarong pasyente na grabe an helang andam na aakoon an pagbolong na maparahay sa saiya dawa makologon iyan. Sa kaparehong paagi, kun aram niato na an paagi nin Dios sa pagresolber sa mga bagay-bagay matao nin daing sagkod na mga bendisyon, an kaaraman na iyan puedeng magsustenir sa sato sa ano man na temporaryong kadepisilan na inaatubang niato.
Si Ricardo, na nasambitan sa naenot na artikulo, saro sa nakanood na magkua nin karangahan sa mga panuga sa Biblia. “Pagkagadan kan sakong agom, nakamate ako nin makosog na pagmawot na isuway an sakong sadiri sa iba,” an nagirumdoman nia, “alagad dai nahaloy narealisar ko na dai man ikakabalik kaini an sakong agom asin mapagrabe sana ini kan sakuyang kamugtakan sa emosyon.” Imbes, nagdanay si Ricardo sa saiyang kaugalean na pag-atender sa Kristianong mga pagtiripon asin paghiras sa iba kan mensahe sa Biblia. “Mantang namamatean ko an mamomoton na pagsuportar ni Jehova asin naririsa kun paano nia sinimbag an sakong mga pamibi sa garo baga saradit na bagay, mas nagin dayupot ako saiya,” an sabi ni Ricardo. “An pakaaram na ini sa pagkamoot nin Dios an nagpangyaring matagalan ko an pinakagrabe nanggad na pagbalo na naagihan ko kasuarin
man.” Inaadmitir nia: “Napupungaw pa man giraray akong marhay sa sakong agom, alagad marigon akong nagtutubod ngonyan na mayong tinotogotan na mangyari si Jehova na matao sato nin nagdadanay na danyos.”Kamo daw, arog ni Ricardo asin kan minilyon pang iba, naghihimuyawot sa panahon na an presenteng mga pagdusa kan katawohan “dai na magigirumdoman, ni masabong pa iyan sa puso”? (Isaias 65:17) Makasisierto kamo na an mga bendisyon kan Kahadean nin Dios puede nindong makamtan kun susunodon nindo an sadol kan Biblia: “Hanapa nindo si Jehova . . . mantang sia makukua pa. Mag-apod kamo sa saiya mantang sia harani pa.”—Isaias 55:6.
Tanganing tabangan kamong magibo ini, gibohon na prioridad sa saindong buhay an pagbasa asin maingat na pag-adal sa Tataramon nin Dios. Midbidon an Dios asin an isinugo nia, si Jesu-Cristo. Magmaigot na mamuhay kaoyon kan mga pamantayan nin Dios asin sa siring ipaheling na andam kamong magpasakop sa saiyang soberaniya. An siring na paghiro matao saindo nin orog na kaogmahan ngonyan sa ibong nin mga pagbalo na tibaad aatubangon pa nindo. Asin sa ngapit, maresulta iyan sa pagkamit nindo nin buhay sa sarong kinaban na mayo na nin pagdusa.—Juan 17:3.
[Mga Nota sa Ibaba]
^ par. 7 Sa nota kaiyan sa ibaba sa Genesis 2:17, an The Jerusalem Bible nagpapaliwanag na “an pakamidbid sa marahay asin maraot” iyo an “kapangyarihan na magdesisyon . . . kun ano an marahay asin kun ano an maraot saka paghiro kaoyon kaiyan, sarong deretso nin pagkaigwa nin lubos na independensia sa moral kun saen an tawo habong midbidon an saiyang posisyon bilang linalang na persona.” Idinudugang kaiyan: “An enot na kasalan sarong pag-atake sa soberaniya nin Dios.”
^ par. 17 Para sa detalyadong pagtokar kan hula sa Biblia na may koneksion sa 1914, helingon tabi an kapitulo 10 asin 11 kan librong Kaaraman na Minagiya Pasiring sa Buhay na Daing Katapusan, na ipinublikar kan Mga Saksi ni Jehova.
[Kahon sa pahina 6, 7]
PAANO NIATO MAKAKAYA AN PAGDUSA?
‘Ibugtak nindo an gabos nindong kahaditan sa Dios.’ (1 Pedro 5:7) An pakamate nin karibarawan, kaanggotan, asin pagigin inabandonar natural sana kun kita nag-aagi nin pagdusa o naheheling niato an sarong namomotan niato na nagdudusa. Pero, makaseseguro kita na nasasabotan ni Jehova an satong namamatean. (Exodo 3:7; Isaias 63:9) Arog kan fiel na mga tawo kan suanoy, puede niatong buksan an satong puso sa saiya asin ipahayag an satong mga pagduda asin kahaditan. (Exodo 5:22; Job 10:1-3; Jeremias 14:19; Habacuc 1:13) Tibaad dai man nia haleon sa milagrosong paagi an satong mga kasakitan, alagad bilang simbag sa satong odok sa pusong mga pamibi, puede niang itao sato an kadonongan asin kosog tanganing maatubang iyan.—Santiago 1:5, 6.
“Dai kamo magngalas sa makolog na pagbalo na inaagihan nindo, na garo baga may pambihirang bagay na nangyayari sa saindo.” (1 Pedro 4:12, New International Version) Si Pedro nagtataram digdi manongod sa paglamag, alagad an saiyang mga tataramon minaaplikar man na gayo sa ano man na pagdusa na tibaad inaagihan nin sarong may pagtubod. An mga tawo nag-aagi nin kakulangan nin ikabubuhay, naghehelang, asin nagagadanan. An Biblia nagsasabi na “an panahon asin pagkanorongod” nangyayari sa gabos. (Eclesiastes 9:11) An siring na mga bagay kabtang kan kamugtakan nin tawo sa presente. An pakaaram kaini matabang sato na maatubang an pagdusa asin remalaso pagnangyari iyan. (1 Pedro 5:9) Orog sa gabos, an paggirumdom sa pagpasarig sa boot na “an mga mata ni Jehova nakaturuhok sa mga matanos, asin an saiyang mga talinga nagdadangog sa saindang mga paghagad nin tabang” espesyalmenteng magigin gikanan nin karangahan.—Salmo 34:15; Talinhaga 15:3; 1 Pedro 3:12.
“Maggayagaya sa paglaom sa ngapit.” (Roma 12:12) Imbes na pagparagirumdomon an nakaaging kaogmahan, puede niatong horophoropon an panuga nin Dios na pagtapos sa gabos na pagdusa. (Eclesiastes 7:10) An masarig an basehan na paglaom na ini maprotehir sato na garo kupya na nagpoprotehir sa payo. Pinagigian kan paglaom an epekto nin mga remalaso sa buhay asin nagtatabang na masegurado na dai iyan magdadara nin permanenteng danyos sa satong mental, emosyonal, o espirituwal na salud.—1 Tesalonica 5:8.
[Ritrato sa pahina 5]
Hinaboan ni Adan asin Eva an pamamahala nin Dios
[Ritrato sa pahina 7]
Nanunuga an Dios nin sarong kinaban na mayo na nin pagdusa