“Magdanay Kamong Mapagbantay”!

“An isinasabi ko sa saindo isinasabi ko sa gabos, Magdanay kamong mapagbantay.”—MARCOS 13:37.

1, 2. (a) Anong leksion an nanodan nin sarong lalaki manongod sa pagprotehir sa saiyang rogaring? (b) Base sa ilustrasyon ni Jesus manongod sa sarong parahabon, ano an manonodan niato manongod sa pagpuka?

ISINASARAY ni Juan sa harong an saiyang mahalagang mga bagay. Itinago nia iyan sa irarom kan saiyang kama—na paghona nia iyo an pinakaligtas na lugar sa harong. Minsan siring, sarong banggi mantang sinda kan agom nia natotorog, sarong parahabon an naglaog sa kuarto. Malinaw na aram kan parahabon kun saen nanggad iyan hahanapon. Daing ribok na hinale nia an gabos na mahalagang bagay sa irarom kan kama saka an kuarta na iwinalat ni Juan sa sulong-sulong kan lamesa sa kataed kan kama. Pagkaaga, naaraman ni Juan an paghabon. Haloy niang magigirumdoman an makolog na leksion na nanodan nia: Dai mababantayan nin tawong torog an saiyang mga rogaring.

² Totoo man iyan sa espirituwal na sentido. Dai niato mapoprotehiran an satong paglaom asin an satong pagtubod kun kita makatorog. Kaya an sadol ni Pablo: “Dai kita magkatorog arog kan ginigibo kan iba, kundi magpuka kita asin papagdanayon niato an toltol na pag-iisip.” (1 Tesalonica 5:6) Tanganing ipaheling kun gurano kahalaga an magpuka, ginamit ni Jesus an ilustrasyon nin sarong parahabon. Ilinadawan nia an mga pangyayari na masagkod sa  pagdatong nia bilang Hokom, dangan nagpatanid sia: “Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan. Alagad sabota nindo an sarong bagay, na kun naaraman kan kagharong kun sa anong pagbantay madatong an parahabon, nagpuka kutana sia asin dai pinabayaan na salakaton an saiyang harong. Huli kaini kamo man magin andam, huli ta sa oras na dai nindo pinaghohona, an Aki nin tawo madatong.” (Mateo 24:42-44) Dai patienot na ipinapaisi nin parahabon kun noarin sia madatong. Gusto niang dumatong sa panahon na mayo nin siisay man na naghahalat sa saiya. Kaagid kaiyan, siring kan sabi ni Jesus, an katapusan kan sistemang ini madatong sa ‘oras na dai niato pinaghohona.’

“Magpuka Kamo, Manindogan na Marigon sa Pagtubod”

3. Sa paggamit kan ilustrasyon kan mga oripon na naghahalat sa pagbalik kan saindang kagurangnan hale sa kasal, paano ipinaheling ni Jesus an importansia kan pagpuka?

³ Sa mga tataramon na nakasurat sa Ebanghelyo ni Lucas, an mga Kristiano ibinaing ni Jesus sa mga oripon na naghahalat sa pagbalik kan saindang kagurangnan hale sa kasal. Kaipuhan sindang magdanay na listo tanganing kun sia umabot sinda mata, andam na sabaton sia. Sa kaagid na paagi, si Jesus nagsabi: “Sa oras na dai nindo pinaghohona madatong an Aki nin tawo.” (Lucas 12:40) An nagkapira na dakol nang taon na naglingkod ki Jehova tibaad mawaran kan saindang pakamate nin pagkaapurado mapadapit sa mga panahon na nabubuhayan niato. Tibaad magkonklusyon pa ngani sinda na haloy pa an katapusan. Alagad an siring na kaisipan puedeng irayo an satong atension sa espirituwal na mga bagay asin ibalyo sa materyal na mga pasohan, mga pagkadisturbo na puedeng magpatungka sa sato sa espirituwal.—Lucas 8:14; 21:34, 35.

4. Anong kombiksion an mamotibar sa sato na magdanay na mapagbantay, asin paano ini ipinaheling ni Jesus?

⁴ May manonodan kitang saro pang leksion sa ilustrasyon ni Jesus. Minsan ngani dai aram kan mga oripon an oras kan pagdatong kan saindang kagurangnan, minalataw na aram ninda kun noarin na banggi. Masakit kutanang magpuka sa bilog na bangging idto kun iniisip ninda na an saindang kagurangnan tibaad magdatong sa ibang banggi. Alagad dai, aram ninda kun noarin na banggi sia madatong, asin iyan nagin makosog na dahelan para sa sainda na magpuka. Sa medyo kaagid na paagi, malinaw na ihinahayag kan mga hula sa Biblia na kita nabubuhay na sa panahon kan katapusan; alagad dai kaiyan sinasabi sa sato an aldaw o an oras kan katapusan mismo. (Mateo 24:36) An pagtubod niato na an katapusan madatong nakatatabang sa sato na magpuka, alagad kun kombensido kita na an aldaw ni Jehova talagang harani na, orog pa kitang mamomotibar na magin mapagbantay.​—Sofonias 1:14.

5. Paano niato puedeng himateon an sadol ni Pablo na “magpuka”?

⁵ Kan magsurat sa mga taga Corinto, si Pablo nagsadol: “Magpuka kamo, manindogan na marigon sa pagtubod.” (1 Corinto 16:13) Iyo, an pagpuka konektado sa satong marigon na paninindogan sa Kristianong pagtubod. Paano kita makakapagpuka? Paagi sa pagkua nin mas hararom na kaaraman sa Tataramon nin Dios. (2 Timoteo 3:​14, 15) An marahay na ugale nin personal na pag-adal asin pag-atender nin regular sa mga pagtiripon nakatatabang  na mapakosog an satong pagtubod, asin an pagpapadanay na harani sa isip an aldaw ni Jehova sarong mahalagang aspekto kan satong pagtubod. Kaya an satong pagrepaso sa panapanahon kan prueba sa Kasuratan na kita harani na sa katapusan kan sistemang ini makatatabang sa sato na dai malingawan an mahalagang mga katotoohan mapadapit sa nagdadangadang na katapusan. * Marahay man na tawan nin atension an mga pangyayari sa kinaban na nakaootob sa hula kan Biblia. Sarong tugang sa Alemania an nagsurat: “Kada magdalan ako kan mga bareta​—an mga guerra, an mga linog, an kadahasan, asin an pag-ati sa planeta niato—idinodoon kaiyan sa sako an kaharanihan kan katapusan.”

6. Sa anong paagi iinilustrar ni Jesus an tendensiang mawara an espirituwal na pagkalisto mantang nag-aagi an panahon?

⁶ Sa Marcos kapitulo 13, maheheling niato an saro pang pagkasaysay kan sadol ni Jesus sa saiyang mga parasunod na sinda magpuka. Segun sa kapitulong ini, an kamugtakan ninda ibinaing ni Jesus sa kamugtakan nin sarong parabantay sa tata na naghahalat sa pagbalik kan saiyang kagurangnan hale sa pagbiahe sa ibang daga. Dai aram kan parabantay sa tata an oras kan pagbalik kan saiyang kagurangnan. Kaipuhan sana niang magdanay na mapagbantay. Sinambit ni Jesus an apat na laen-laen na pagbantay na durante kaiyan tibaad mag-abot an kagurangnan. An lawig kan ikaapat na pagbantay nagpoon kan mga alas tres nin aga sagkod sa pagsirang kan saldang. Sa pangultimong pagbantay na iyan, an parabantay sa tata puedeng madaling madaog nin pagtungka. Para sa mga soldados an oras daa nin mag-aagahon an pinakatamang oras tanganing biglaon an kalaban. Kaagid kaiyan, sa ultimong kabtang na ini kan huring mga aldaw, an panahon na sa espirituwal na sentido nanok na natotorog an kinaban sa palibot niato, tibaad kaipuhan niatong maghingoa nin maigot kisa kasuarin man na magpuka. (Roma 13:​11, 12) Huli kaini, sa saiyang ilustrasyon, si Jesus paorootrong nagsasadol: “Magdanay kamong mapagmasid, magpuka kamo . . . Kun siring magdanay kamong mapagbantay . . . An isinasabi ko sa saindo isinasabi ko sa gabos, Magdanay kamong mapagbantay.”—Marcos 13:32-37.

7. Igwa nin anong totoong peligro, asin huli kaini, anong pagparigon sa boot an parate niatong mababasa sa Biblia?

⁷ Dakol na beses durante kan saiyang ministeryo asin pagkabuhay nia liwat, nagsadol si Jesus na magin puka. Sa katunayan, haros kada nasasambitan kan Kasuratan an katapusan kan sistemang ini nin mga bagay, maheheling niato an patanid na magpuka o magdanay na mapagbantay. * (Lucas 12:​38, 40; Kapahayagan 3:2; 16:14-16) Malinaw nanggad, an  espirituwal na pagtungka totoong gayong peligro. Kaipuhan niato gabos an mga patanid na iyan!​—1 Corinto 10:12; 1 Tesalonica 5:​2, 6.

Tolong Apostol na Dai Nakapagpuka

8. Sa hardin nin Getsemani, ano an ginibo kan tolong apostol ni Jesus sa saiyang pakiolay na sinda magdanay na mapagbantay?

⁸ Bako sanang marahay na mga intension an kaipuhan sa pagpuka, siring kan maheheling niato sa halimbawa ni Pedro, Santiago, asin Juan. Sinda tolong espirituwal na mga tawo na maimbod na nagsunod ki Jesus asin may hararom na kapadangatan sa saiya. Minsan siring, kan banggi nin Nisan 14, 33 C.E., dai sinda nakapagpuka. Paghale sa kuarto sa itaas na pinagselebraran ninda kan Paskua, an tolong apostol uminiba ki Jesus sa hardin nin Getsemani. Sinabihan sinda duman ni Jesus: “An sakong kalag mamondong gayo, sagkod sa kagadanan. Pawalat kamo digdi asin magdanay kamong mapagbantay kaiba ko.” (Mateo 26:38) Tolong beses na namibi nin odok si Jesus sa saiyang langitnon na Ama, asin tolong beses niang binalikan an saiyang mga katood, tangani sanang abotan sinda na natotorog.​—Mateo 26:40, 43, 45.

9. Ano an tibaad dahelan kan pagtungka kan mga apostol?

⁹ Taano ta sinudya kan fiel na mga lalaking ini an linalaoman sa sainda ni Jesus kan bangging idto? Sarong dahelan an pagkapagal sa pisikal. Banggihon na kaidto, posibleng lampas na sa matanga, asin “magabat na an saindang mga mata” sa pirot. (Mateo 26:43) Pero, sinabi ni Jesus: “Magdanay kamong mapagbantay asin padagos na mamibi, tanganing dai kamo makalaog sa sugot. Siempre, an espiritu nagmamawot na gayo, alagad an laman maluya.”—Mateo 26:41.

10, 11. (a) Apisar kan saiyang kapagalan, ano an nakatabang ki Jesus na magdanay na mapagbantay sa hardin nin Getsemani? (b) Ano an manonodan niato sa nangyari sa tolong apostol kan pakiolayan sinda ni Jesus na magdanay na mapagbantay?

¹⁰ Daing duda, si Jesus pagal man kan importanteng bangging idto. Minsan siring, imbes na magtorog, ginamit nia sa odok na pamimibi an mahalagang marhay na huring mga oras na idto nin katalingkasan. Pirang aldaw bago kaini, sinadol nia an saiyang mga parasunod na mamibi, na sinasabi: “Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.” (Lucas 21:36; Efeso 6:18) Kun satong hihimateon an hatol ni Jesus asin aarogon an saiyang marahayon na halimbawa kun dapit sa pamimibi, an satong odok sa pusong mga pagngayongayo ki Jehova makatatabang sa sato na magpuka sa espirituwal.

¹¹ Siempre, nasasabotan ni Jesus​—baga man kan panahon na iyan dai nasasabotan kan saiyang mga disipulo​—na madali na siang arestaron asin kondenaron na magadan. An saiyang mga pagsakit masagkod sa makologon na kulminasyon sa hariging pasakitan. Pinatanidan na ni Jesus an saiyang mga apostol dapit kan mga bagay na ini, alagad dai ninda nasabotan an sinasabi nia. Huli kaini, nakatorog sinda mantang sia nagpupuka na namimibi. (Marcos 14:27-31; Lucas 22:15-18) Siring kan totoo sa mga apostol, an satong laman maluya man asin may mga bagay na dai pa niato aram. Pero, kun lilingawan niato an pagkaapurado kan mga panahon na nabubuhayan niato, kita puedeng makatorog sa espirituwal na sentido. Paagi sana sa pagigin listo na kita makakapagpuka.

Tolong Mahalagang Marhay na Kualidad

12. Anong tolong kualidad an ikinonektar ni Pablo sa pagpapadanay niato kan toltol na pag-isip?

¹² Paano niato mapagdadanay an pakamate niato nin pagkaapurado? Naheling na niato an kahalagahan nin pamibi asin an pangangaipo na papagdanayon sa isip an aldaw ni Jehova. Apuera kaiyan, nasambitan ni Pablo an tolong mahalagang marhay na kualidad na maninigo niatong kultibaron. Sabi nia: “Kun para sa sato na manongod sa aldaw, papagdanayon niato an toltol na pag-isip asin isolog an takop sa daghan na pagtubod asin pagkamoot asin bilang takop sa payo an paglaom sa kaligtasan.” (1 Tesalonica 5:8) Pag-olayan niato sa halipot an kabtang nin pagtubod, paglaom, asin pagkamoot sa pagdadanay niato na puka sa espirituwal.

13. Ano an kabtang nin pagtubod sa pagdadanay niato na listo?

¹³ Dapat kitang magkaigwa nin dai nanluluyang pagtubod na si Jehova nag-eeksister asin na “sia nagigin an parabalos sa mga maigot na naghahanap sa saiya.” (Hebreo 11:6) An primero asin enot na siglong kaotoban kan hula ni Jesus manongod sa katapusan nagpapakosog sa satong pagtubod sa mas dakulang kaotoban kaiyan durante kan panahon  niato. Asin an satong pagtubod pinagdadanay kita na galagang naghahalat kan aldaw ni Jehova, na nakasesegurado na “[an makahulang bisyon] daing salto na maootob. Dai iyan mahuhuri.”—Habacuc 2:3.

14. Gurano kahalaga an paglaom tanganing kita makapagpuka?

¹⁴ An satong seguradong paglaom siring sa “angkla para sa kalag” na nagpapangyari sa sato na matagalan an mga kasakitan dawa kun kaipuhan niatong halaton an seguradong kaotoban kan mga panuga nin Dios. (Hebreo 6:​18, 19) Si Margaret, sarong tugang na babae na linahidan nin espiritu na labi nang 90 anyos asin nabautismohan kaidtong labi nang 70 taon an nakaagi, nag-aadmitir: “Kan an agom ko madali nang magadan sa kanser kan 1963, inisip ko na marahayon pang dumatong na tolos an katapusan. Alagad ngonyan narealisar ko na an inisip ko sana iyo an sadiri kong kapakanan. Mayo kaming ideya kan panahon na idto kun sagkod saen pa an paghiwas kan gibohon sa bilog na kinaban. Dawa ngonyan, dakol pa an lugar na napoponan pa sana an gibohon. Kaya naoogma ako na nagin mapasensia si Jehova.” Sinisierto sa sato ni apostol Pablo: “An pakatagal [nagbubunga] nin pagkainooyonan; dangan, an pagkainooyonan, nin paglaom, asin an paglaom dai nagbubunga nin pagkadesganar.”—Roma 5:3-5.

15. Paano mamotibar sa sato an pagkamoot dawa kun garo baga haloy na kitang naghahalat?

 ¹⁵ An Kristianong pagkamoot sarong marahayon na kualidad huli ta iyan an pinakamotibo sa gabos niatong ginigibo. Naglilingkod kita ki Jehova huli ta namomotan ta sia, ano man an saiyang iskedyul. An pagkamoot sa kataed an nagpapahiro sa sato na ihulit an maogmang bareta kan Kahadean, gurano man tibaad kahaloy na gigibohon niato iyan segun sa kabotan nin Dios asin gurano man kadakol na beses kitang bumalik sa iyo man sanang mga harong. Siring kan isinurat ni Pablo, “nagdadanay an pagtubod, paglaom, pagkamoot, an tolong ini; alagad an nakalalabi sa gabos kaini iyo an pagkamoot.” (1 Corinto 13:13) Pinagdadanay kita kan pagkamoot na magpadagos asin tinatabangan kitang magdanay na puka. “[An pagkamoot] naglalaom kan gabos na bagay, nagtatagal kan gabos na bagay. An pagkamoot nungka na nasusudya.”—1 Corinto 13:7, 8.

“Padagos Mong Pangaptan nin Higot an Nasa Saimo Na”

16. Imbes na manluya, anong aktitud an maninigo niatong kultibaron?

¹⁶ Nabubuhay kita sa importanteng mga panahon na an mga pangyayari sa kinaban danay na nagpapagirumdom sa sato na kita yaon na sa ultimong kabtang kan huring mga aldaw. (2 Timoteo 3:1-5) Bako ngonyan an panahon na manluya kundi ‘padagos na pangaptan nin higot an nasa sato na.’ (Kapahayagan 3:11) Paagi sa pagigin “puka sa pagpamibi” asin paagi sa pagkultibar nin pagtubod, paglaom, asin pagkamoot, kita magigin andam sa oras nin pagbalo. (1 Pedro 4:7) Dakol kitang gigibohon sa gibohon kan Kagurangnan. An pagigin sibot sa mga gibo nin diosnon na debosyon magpapadanay sa sato na biyong puka.—2 Pedro 3:11.

17. (a) Taano ta dai maninigong magpadesganar sa sato an paminsanminsan na pagkasudya nin mga linalaoman? (Helingon an kahon sa pahina 21.) (b) Paano niato maaarog si Jehova, asin anong bendisyon an naghahalat sa mga naggigibo kaiyan?

¹⁷ “Si Jehova an sakuyang kahirasan,” an isinurat ni Jeremias, “kaya ngani mapaheling ako nin mapaghalat na kaisipan sa saiya. Marahay si Jehova sa naglalaom sa saiya, sa kalag na padagos na naghahanap sa saiya. Marahay na an saro maghalat, na dai naggigirong, para sa pagliligtas ni Jehova.” (Lamentacion 3:24-26) An nagkapira sa sato halipot na panahon pa sanang naghahalat. An iba dakol na taon nang naghahalat na maheling an pagliligtas ni Jehova. Pero halipot nanggayod an paghalat na ini kun ikokomparar sa panahon na daing sagkod sa ngapit! (2 Corinto 4:16-18) Asin mientras na hinahalat niato an itinalaan na panahon ni Jehova, puede niatong kultibaron an mahalagang marhay na Kristianong mga kualidad asin tabangan an iba na aprobetsaran an pagpapasensia ni Jehova asin akoon an katotoohan. Kun siring, logod na kita gabos magdanay na mapagbantay. Arogon niato si Jehova asin magin mapasensia, na nagpapasalamat sa paglaom na itinao nia sa sato. Asin mantang kita fiel na nagdadanay na listo, logod na pangaptan niato nin higot an paglaom na buhay na daing katapusan. Sa siring, an makahulang mga panuga na ini seguradong maaplikar sa kamugtakan niato: “Ika ilalangkaw [ni Jehova] na makasadiri kan daga. Kun pohoon na an mga maraot, maheheling mo iyan.”—Salmo 37:34.

[Mga Nota sa Ibaba]

Ano an Isisimbag Nindo?

• Paano niato mapakokosog an satong kombiksion na an katapusan kan sistemang ini nin mga bagay harani na?

• Ano an manonodan sa halimbawa ni Pedro, Santiago, asin Juan?

• Anong tolong kualidad an matabang sa sato na magdanay na puka sa espirituwal?

• Taano ta ini na an panahon na ‘padagos na pangaptan nin higot an nasa sato na’?

[Mga Hapot Para sa Pag-adal]

[Kahon/Ritrato sa pahina 21]

“Maogma an Saro na Padagos na Naghahalat.”—Daniel 12:12

Imahinara na an sarong bantay may suspetsang an sarong parahabon nagpaplanong manhabon sa solar na binabantayan nia. Kan banggi na, an bantay atentong naghihinanyog sa ano man na ribok na puedeng mag-indikar na igwa nin parahabon. Oras-oras niang pinaririgmat an saiyang pagdangog asin pagheling. Madaling masabotan kun paano sia puedeng madaya nin bakong totoong alarma​—an tanog nin huyop nin doros sa mga kahoy o ikos na may natumbang bagay.—Lucas 12:​39, 40.

May kaagid na puedeng mangyari sa mga “galagang naghahalat kan pagkahayag kan satong Kagurangnan na si Jesu-Cristo.” (1 Corinto 1:7) An mga apostol naghona na ‘ibabalik ni Jesus an kahadean sa Israel’ pagkatapos tolos kan saiyang pagkabuhay liwat. (Gibo 1:6) Pakalihis nin dakol na taon, an mga Kristiano sa Tesalonica kinaipuhan na pagirumdomon na an presensia ni Jesus mahahaloyhaloy pa sa ngapit. (2 Tesalonica 2:3, 8) Pero, an bakong totoong mga alarma manongod sa aldaw ni Jehova dai nagin dahelan na humale an enot na mga parasunod na idto ni Jesus sa dalan pasiring sa buhay.​—Mateo 7:13.

Sa satong kaaldawan, an pagkadesganar sa garo baga mga pagkaatraso kan pagdatong kan katapusan kan sistemang ini nin mga bagay dai maninigong magin dahelan na kita magpabaya. An listong bantay puedeng madaya nin bakong totoong alarma, pero dapat siang magpuka! Iyan an trabaho nia. Iyo man an mga Kristiano.

[Ritrato sa pahina 18]

Kombensido daw kamo na an aldaw ni Jehova harani na?

[Mga Ritrato sa pahina 19]

An mga pagtiripon, pamibi, asin marahay na ugale sa pag-adal nakatatabang sa sato na magpuka

[Ritrato sa pahina 22]

Arog ki Margaret, logod na kita mapasensia asin aktibong magpuka