“Tama Ka, Makawiwili an Buhay!”

GUSTO daw nindong manodan an tunay na kahulogan nin buhay? Tinabangan kan 18 anyos na si Magdalena, saro sa Mga Saksi ni Jehova na nag-iistar sa Szczecin, Polandia, an saiyang kaklase sa haiskul na si Katarzyna na gibohon mismo iyan. Si Katarzyna sarong nag-aadmitir na ateista, alagad kan makipag-olay sa saiya si Magdalena manongod sa Biblia, nagpaheling sia nin tunay na interes.

Minsan ngani nagugustohan ni Katarzyna an ihiniras sa saiya ni Magdalena hale sa Biblia, dai nia iyan maako nin biyo. Kan sia nakikipag-olay ki Magdalena manongod sa tunay na mga katood, sarong beses si Katarzyna nagsabi: “May Biblia ka; aram mo kun anong mga prinsipyo an dapat sunodon asin kun saen makakakua nin mga katood. Alagad kumusta an mga, kisuerra ngonyan, dai maako an mga prinsipyong iyan?”

Nagdatong an panahon nin dakulang pagbago kan si Katarzyna magbiahe pasiring sa Londres, Inglaterra. Nagpasyar sia sa sangang opisina kan Mga Saksi ni Jehova duman, asin napahiro sia sa kabootan na ipinaheling sa saiya. An simpleng mga akto na arog nin pagbukas nin pinto para sa saiya asin pagpaheling nin tunay na interes sa saiyang sinasabi nakaakit sa saiya.

Kan pumoon an bagong taon nin ereskuelahan kan Setyembre 2001, si Katarzyna nagdesisyon na akoon an sarong regular na pag-adal sa Biblia. Pinatatalubo nia an saiyang pagpahalaga sa mga prinsipyo sa Biblia asin nagpoon na iaplikar iyan sa saiyang buhay sa aroaldaw. Kasuarin pa sana, nagtuga sia ki Magdalena, na nagsasabi: “An pagmate ko garo ako nagpopoon nin bagong buhay.” Nagpadara man sia ki Magdalena nin halipot na mensahe paagi sa cellular phone: “Salamat na marhay sa satong pag-adal ngonyan na aldaw! Tama ka, makawiwili an buhay! Marahayon nanggad na maaraman kun siisay an maninigo tang pasalamatan para dian.”