Hula ni Isaias—Liwanag Para sa Bilog na Katawohan II

Kapitulo Dose: Karangahan Para sa Banwaan nin Dios

Isaias 51:1-23

1. Anong makamomondong tinatanaw an nakatagama para sa Jerusalem asin sa mga nag-eerok digdi, pero may anong paglaom?

SETENTANG taon​—sarong normal na lawig nin buhay nin tawo​—siring kaiyan kalawig magigin bihag sa Babilonya an nasyon nin Juda. (Salmo 90:10; Jeremias 25:11; 29:10) An kadaklan na Israelita na dinarang bihag magurang asin magagadan sa Babilonya. Isip-isipa an pagkapasupog ninda sa mga pagduhagi asin kantsaw kan saindang mga kaiwal. Isip-isipa man an katuyawan na ibubunga kaiyan sa saindang Dios, si Jehova, kun an siudad na binugtakan nia kan saiyang ngaran gaba sa halawig na panahon. (Nehemias 1:9; Salmo 132:13; 137:1-3) An namomotan na marhay na templo, na napano kan kamurawayan nin Dios kan idusay iyan ni Salomon, mawawara na. (2 Cronica 7:1-3) Kanigoan kamakamomondong tinatanaw! Alagad si Jehova, paagi ki Isaias, naghuhula nin pagbabalik sa dati. (Isaias 43:14; 44:26-28) Sa kapitulo 51 kan libro nin Isaias, manonompongan niato an dugang pang mga hula manongod sa pinakatemang ini nin karangahan asin pag-asegurar giraray.

2. (a) Kiisay sinasabi ni Jehova, paagi ki Isaias, an saiyang mensahe nin karangahan? (b) Paano “nagsusunod sa katanosan” an fiel na mga Judio?

² Sa mga nasa Juda na ikinikiling an saindang puso sa saiya, si Jehova nagsasabi: “Maghinanyog kamo sako, kamong nagsusunod sa katanosan, kamong naghihingoang manompongan si Jehova.” (Isaias 51:1a) An ‘pagsunod sa katanosan’ nagpaparisa nin paghiro. An mga “nagsusunod sa katanosan” bako sanang maghihingako na sinda an banwaan nin Dios. Sinda magmamaigot na magin matanos asin mamuhay kaoyon kan kabotan nin Dios. (Salmo 34:15; Talinhaga 21:21) Maasa sinda ki Jehova bilang an solamenteng Gikanan nin katanosan, asin sinda ‘maghihingoang manompongan si Jehova.’ (Salmo 11:7; 145:17) Dai man nangangahulogan na dai pa ninda midbid si Jehova o na dai ninda aram kun paano madolok sa saiya sa pamibi. Imbes, hihingoahon nindang mas rumani sa saiya, na sinasamba sia, namimibi sa saiya, asin nagpapagiya sa saiya sa gabos nindang ginigibo.

3, 4. (a) Siisay an “gapo” na sinapsapan sa mga Judio, asin siisay an “lukab kan kotkot” na kinalotan sa sainda? (b) Taano an paggirumdom sa saindang ginikanan ta makararanga sa mga Judio?

³ Minsan siring, an talagang nagsusunod sa katanosan medyo pipira sana sa Juda, asin ini puedeng magin dahelan na sinda mawaran nin kosog nin boot asin madesesperar. Kaya ginagamit an ilustrasyon nin pagsapsap nin gapo, pinarigon ni Jehova an saindang boot: “Humeling kamo sa gapo na sinapsapan sa saindo, asin sa lukab kan kotkot na kinalotan sa saindo. Humeling kamo ki Abraham na saindong ama asin ki Sara na nangaki sa saindo na may mga kolog nin pangangaki. Huli ta sia sasaro kan apodon ko sia, asin binendisyonan ko sia asin pinadakol ko sia.” (Isaias 51:1b, 2) An “gapo” na sinapsapan sa mga Judio iyo si Abraham, sarong historikong personahe na ipinag-oorgolyong marhay kan nasyon nin Israel. (Mateo 3:9; Juan 8:​33, 39) Sia an apoon, an tawong ginikanan, kan nasyon. An “lukab kan kotkot” iyo si Sara, na hale sa saiyang matris nagluwas an apoon kan Israel na si Isaac.

⁴ Si Abraham asin Sara lihis na sa kakayahan na mangaki asin daing aki kaidto. Pero, si Jehova nanuga na bebendisyonan si Abraham asin ‘padadakolon sia.’ (Genesis 17:1-6, 15-17) Kan ibalik nin Dios an saindang kakayahan na mangaki, si Abraham asin Sara nagkaaki kan sinda gurang na, asin hale sa saiya guminikan an katipan na nasyon nin Dios. Sa siring ginibo ni Jehova an sarong iyan na mani ama nin sarong dakulang nasyon na nagin dai mabilang siring kan mga bitoon sa kalangitan. (Genesis 15:5; Gibo 7:5) Sa siring, kun nakayang kuanon ni Jehova si Abraham hale sa harayong daga asin gibohon siang sarong makosog na nasyon, kaya nanggad niang otobon an saiyang panuga na patalingkason an fiel na natatada sa kaoripnan sa Babilonya, ibalik sinda sa saindang dagang tinuboan, asin gibohon giraray sindang sarong dakulang nasyon. Naotob an panuga nin Dios ki Abraham; maootob man an saiyang panuga sa bihag na mga Judiong idto.

5. (a) Kiisay naglaladawan si Abraham asin Sara? Ipaliwanag. (b) Sa pangultimong kaotoban, siisay an naggikan sa “gapo”?

 ⁵ An simbolikong pagsapsap nin gapo sa Isaias 51:​1, 2 posibleng marhay na may dugang pang aplikasyon. Inaapod kan Deuteronomio 32:18 si Jehova na “an Gapo” na nagin ama kan Israel asin “an Saro na nangaki [sa Israel] na may mga kolog nin pangangaki.” Sa nahuring pananaram, ginamit an iyo man sanang berbo sa Hebreo na minalataw sa Isaias 51:2 mapadapit sa pangangaki ni Sara sa Israel. Huli kaini, si Abraham nagseserbing makahulang tipo ni Jehova, an Orog na Dakulang Abraham. An agom ni Abraham, si Sara, angay na naglaladawan sa unibersal na langitnon na organisasyon nin espiritung mga linalang ni Jehova, na irinerepresentar sa Banal na Kasuratan bilang agom o babae nin Dios. (Genesis 3:15; Kapahayagan 12:​1, 5) Sa pangultimong kaotoban kan mga tataramon na ini sa hula ni Isaias, an nasyon na naggikan sa “gapo” iyo an “Israel nin Dios,” an kongregasyon nin linahidan nin espiritu na mga Kristiano, na namundag kan Pentecostes 33 C.E. Siring kan ipinaliwanag sa nakaaging mga kabtang kan seryeng ini, an nasyon na iyan nag-agi nin pagkabihag sa Babilonya kan 1918 alagad ibinalik kan 1919 sa espirituwal na prosperidad.​—Galacia 3:26-29; 4:28; 6:16.

6. (a) Ano an natatagama para sa daga nin Juda, asin anong pagbabalik sa dati an kakaipuhanon? (b) An Isaias 51:3 nagpapagirumdom sa sato nin anong pagbabalik sa dati sa presenteng panahon?

⁶ An pagranga ni Jehova sa Sion, o Jerusalem, bako sanang panuga na mamumundag an sarong matawong nasyon. Mababasa niato: “Rarangahon nanggad ni Jehova an Sion. Rarangahon nia nanggad an gabos niang gabang mga lugar, asin gigibohon nia an saiyang kaawagan na magin siring sa Eden asin an saiyang desiertong kaplanodohan na magin siring sa tatamnan ni Jehova. An paggayagaya asin pag-ogma manonompongan dian sa saiya, an pagpasalamat asin an tingog nin pag-awit.” (Isaias 51:3) Durante kan 70 taon nin pagkagaba, an daga nin Juda magigin kaawagan, mapapano nin mga kilitis, binit, asin iba pang mga pananom na kadlaganon. (Isaias 64:10; Jeremias 4:26; 9:10-12) Kaya apuera sa pag-erok liwat sa Juda, magigin kaiba sa pagbabalik sa dati an pagbalik sa dating kamugtakan kan daga, na gigibohon na Edenikong hardin na may matubig na matubang na mga oma asin mabungang mga tatamnan. An daga maluwas na garo naggagayagaya. Kun ikokomparar sa mapungaw na kagabaan kaiyan durante kan pagkadistiero, an daga magigin paraiso. An linahidan na natatada kan Israel nin Dios naglaog sa siring nanggad na paraiso sa espirituwal na sentido kan 1919.​—Isaias 11:6-9; 35:1-7.

Mga Dahelan nin Pagkompiar ki Jehova

7, 8. (a) Nangangahulogan nin ano an pangapodan ni Jehova na magdangog sa saiya? (b) Taano ta mahalaga na maghimate an Juda ki Jehova?

⁷ Nangangapodan na ibalik an pag-atento, si Jehova nagsasabi: “Magtaong atension ka sa sako, O banwaan ko; asin ika na sakong grupo nasyonal, dangoga ako. Huli ta maluwas hale sako an sarong ley, asin an sakong hudisyal na desisyon padadanayon ko ngani bilang liwanag sa mga banwaan. Harani an sakuyang katanosan. Siertong maluwas an sakuyang pagliligtas, asin an sakuyang mga takyag maghohokom minsan sa mga banwaan. Sa sakuya an mga isla mismo maglalaom, asin sinda maghahalat sa sakuyang takyag.”​—Isaias 51:​4, 5.

⁸ An pangapodan ni Jehova na dangogon sia nangangahulogan nin labi pa kisa pagdangog sana sa saiyang mensahe. Iyan nangangahulogan nin pagtaong atension sa katuyohan na humiro oyon sa nadangog. (Salmo 49:1; 78:1) Dapat na masabotan kan nasyon na si Jehova an Gikanan nin instruksion, hustisya, asin kaligtasan. Sia sana an Gikanan nin espirituwal na kaliwanagan. (2 Corinto 4:6) Sia an pangultimong Hokom kan katawohan. An mga ley asin hudisyal na desisyon na hale ki Jehova liwanag para sa mga minatogot na giyahan kaiyan.​—Salmo 43:3; 119:105; Talinhaga 6:23.

9. Apuera sa katipan na banwaan nin Dios, siisay pa an makikinabang sa mga pagliligtas ni Jehova?

⁹ Ini gabos magigin totoo bako sanang para sa katipan na banwaan nin Dios kundi siring man sa mga tawo na tama an inklinasyon sa gabos na lugar, dawa sa pinakahararayong isla kan dagat. Dai masusudya an saindang kompiansa sa Dios asin sa saiyang kakayahan na humiro sa kapakanan kan saiyang fiel na mga lingkod asin iligtas sinda. Segurado an saiyang kosog, o kapangyarihan, na irinerepresentar kan saiyang takyag; dai iyan kayang pogolan nin siisay man. (Isaias 40:10; Lucas 1:​51, 52) Kaagid kaiyan ngonyan, an maigot na paghuhulit kan natatadang mga miembro kan Israel nin Dios naggiya sa minilyon, na an dakol hale sa puerang mga isla kan dagat, na dumolok ki Jehova asin magtubod sa saiya.

10. (a) Anong katotoohan an pirit na manonodan ni Hadeng Nabucodonosor? (b) Anong “kalangitan” asin “daga” an tataposon?

¹⁰ Sunod nagtaram si Jehova manongod sa sarong katotoohan na pirit na manonodan ni Nabucodonosor nin Babilonya. Mayong makapopogol ki Jehova sa langit man o sa daga sa pag-otob nia kan saiyang kabotan. (Daniel 4:​34, 35) Mababasa niato: “Itingkalag nindo an saindong mga mata sa kalangitan mismo, asin masdan an daga sa ibaba. Huli ta an mismong kalangitan magkakawararak na siring kan aso, asin an daga mismo maluluma na siring sa sarong gubing,  asin an mga nag-eerok mismo dian magkakagaradan na siring sana sa nuknuk. Alagad kun dapit sa sakong pagliligtas, iyan magigin sagkod sa panahon na daing talaan pa ngani, asin an sakong sadiring katanosan dai mararaot.” (Isaias 51:6) Minsan ngani tumang sa palakaw kan mga monarka sa Babilonya na togotan na pumuli an mga bihag, an pagliligtas ni Jehova sa saiyang banwaan dai maoolang. (Isaias 14:​16, 17) An Babilonyong “kalangitan,” o namamahalang mga kapangyarihan, magkakasuruhaysuhay sa pagkadaog. An Babilonyong “daga,” an mga nasasakopan kan namamahalang mga kapangyarihan na idto, luway-luway na matatapos. Iyo, dawa an pinakadakulang kapangyarihan kan aldaw na idto dai makatitindog tumang sa kosog ni Jehova o makaoolang sa saiyang pagliligtas.

11. Taano ta nakaparirigon sa boot nin mga Kristiano ngonyan an biyong pagkaotob kan hula na tataposon an Babilonyong “kalangitan” asin “daga”?

¹¹ Nakaparirigon nanggad sa boot kan mga Kristiano ngonyan na maaraman na an makahulang mga tataramon na ini biyong naotob! Taano? Huli ta si apostol Pedro naggamit nin kaagid na mga pananaram mapadapit sa saro pang pangyayari sa ngapit. Nasambitan nia an manongod sa marikas na nagdadangadang na aldaw ni Jehova, “na paagi kaiyan an kalangitan mantang nagkakalayo matutunaw asin an mga elemento mantang labi-labi kainit matutunaw!” Dangan sinabi nia: “Igwa nin bagong kalangitan asin sarong bagong daga na satong hinahalat segun sa saiyang panuga, asin sa mga ini magdadanay an katanosan.” (2 Pedro 3:​12, 13; Isaias 34:4; Kapahayagan 6:12-14) Dawa pa an makosog na mga nasyon asin an saindang harohalangkawon na garo mga bitoon na mga namamahala tumindog laban ki Jehova, sa saiyang itinalaan na panahon sinda magigin daing kamanungdanan​—madaling ronoton na siring sana sa sarong nuknuk. (Salmo 2:1-9) An matanos na gobyerno sana nin Dios an mamamahala sagkod lamang, sa sarong matanos na sosyedad nin tawo.​—Daniel 2:44; Kapahayagan 21:1-4.

12.Taano ta dai dapat matakot an mga lingkod nin Dios kun sinda binabalobagi kan mga kalaban na tawo?

¹² Kinakaolay an mga “nagsusunod sa katanosan,” sinasabi ngonyan ni Jehova: “Maghinanyog kamo sa sako, kamong mga nakaaaram nin katanosan, an banwaan na sa puso yaon an sakong ley. Dai nindo katakotan an pag-olog-olog kan magagadanon na mga tawo, asin dai kamo masindak huli sana sa saindang mapanlibak na mga tataramon. Huli ta kakakanon sinda nin polilya na siring sa sarong gubing, asin kakakanon sinda na siring sa lana nin polilya sa bado. Alagad kun dapit sa sakong katanosan, iyan magdadanay sagkod sa panahon na daing talaan, asin an sakong pagliligtas sagkod sa dai mabilang na mga kapag-arakian.” (Isaias 51:​7, 8) An mga nagtitiwala ki Jehova babalobagion asin oolog-ologon huli sa saindang makosog an boot na paninindogan, alagad ini dai dapat katakotan. An mga paraolog-olog mga magagadanon na tawo sana na “kakakanon,” kun paanong an gubing na de lana inuubos nin polilya. * Arog kan fiel na mga Judio kan suanoy, an tunay na mga Kristiano ngonyan mayo nin dahelan na matakot sa siisay man na nagkokontra sa sainda. Si Jehova, an Dios na daing sagkod, iyo an saindang kaligtasan. (Salmo 37:​1, 2) An pag-olog-olog kan mga kaiwal nin Dios nagseserbing ebidensia na yaon sa banwaan ni Jehova an saiyang espiritu.​—Mateo 5:​11, 12; 10:24-31.

13, 14. Ano an ilinaladawan kan mga pananaram na “Rahab” asin “higanteng hayop sa dagat ,” asin paanong iyan ‘pinagputolputol’ asin ‘tinusok’?

¹³ Sa paaging garo baga inaapodan si Jehova na humiro sa kapakanan kan Saiyang bihag na banwaan, si Isaias nagsasabi: “Magmata ka, magmata ka, maggubing ka nin kakosogan, O takyag ni Jehova! Magmata ka siring kan mga aldaw kan suanoy, siring kan panahon kan mga kapag-arakian kaidtong haloy nang nakalihis. Bakong ika an nagputolputol sa Rahab, na nagtusok sa higanteng hayop sa dagat? Bakong ika an nagmara sa dagat, an katubigan kan mahiwas na kararoman? An nagpangyaring magin dalan an mga kararoman kan dagat tanganing makabalyo an mga tinubos?”​—Isaias 51:​9, 10.

¹⁴ Tamang-tama an pagkapili sa historikong mga halimbawa na sinasabi ni Isaias. Aram kan gabos na Israelita an manongod sa pagliligtas kan nasyon hale sa Egipto asin an pagbalyo sa Dagat na Pula. (Exodo 12:24-27; 14:26-31) An ekspresyon na “Rahab” asin “higanteng hayop sa dagat” nanonongod sa Egipto na sakop kan Faraon na nagkontra sa lagdoan na pagharale kan Israel sa Egipto. (Salmo 74:13; 87:4; Isaias 30:7) Mantang an pinakapayo kaini nasa Masalog na Kaplanodohan nin Nilo asin an palabang hawak kaini nakaunat nin ginatos na kilometro sagkod sa mabungang Kababan nin Nilo, an suanoy na Egipto garo sarong higanteng halas. (Ezequiel 29:3) Alagad an higanteng hayop na ini natadtad kan iula dian ni Jehova an Sampulong Damat. Iyan tinusok, nalugadan nin grabe, asin nanluya kan an hukbo kaiyan linaglag sa katubigan kan Dagat na Pula. Iyo, ipinaheling ni Jehova an kapangyarihan kan saiyang takyag sa saiyang ginibo sa Egipto. Dai daw sia magigin andam man na ipakipaglaban an saiyang banwaan na nadistiero sa Babilonya?

15. (a) Noarin asin paano madurulag an kamondoan asin pag-agagha kan Sion? (b) Kasuarin nagdurulag an kamondoan asin pag-agagha sa Israel nin Dios sa presenteng panahon?

 ¹⁵ Mantang tinatanaw ngonyan an pagliligtas kan Israel hale sa Babilonya, an hula nagpapadagos: “Dangan an mismong mga binalukat ni Jehova mabalik asin madatong sa Sion na may magayagayang kurahaw, asin an paggayagaya sagkod sa panahon na daing katapusan mamumugtak sa saindang payo. Makakamtan ninda an labi-labing kagayagayahan asin paggayagaya. An kamondoan asin pag-agagha madurulag nanggad.” (Isaias 51:11) Gurano man tibaad kamondo kan saindang kamugtakan sa Babilonya, an mga naghahanap sa katanosan ni Jehova may mamuraway na tinatanaw. Madatong an panahon na mawawara na an kamondoan asin pag-agagha. An magayagayang kurahaw, paggayagaya, labi-labing kagayagayahan​—an mga ini madadangog sa mga ngabil kan mga binalukat o tinubos. Bilang kaotoban sa presenteng panahon kan makahulang mga tataramon na idto, an Israel nin Dios binutasan hale sa Babilonikong pagkabihag kan 1919. Nagbalik sinda sa saindang espirituwal na kamugtakan na may dakulang paggayagaya​—paggayagayang nagpapadagos sagkod ngonyan.

16. Ano an ibinayad tanganing mabalukat an mga Judio?

¹⁶ Ano an magigin pambayad sa pagbalukat sa mga Judio? Ihinayag na kan hula ni Isaias na itatao ni Jehova “an Egipto bilang pantubos sa saimo, an Etiopia asin Seba na karibay mo.” (Isaias 43:1-4) Mangyayari ini sa huri. Pakatapos makongkistar an Babilonya asin butasan an Judiong mga bihag, kokongkistaron kan Imperyo nin Persia an Egipto, Etiopia, asin Seba. An mga ini itatao karibay kan kalag kan mga Israelita. Kaoyon ini kan prinsipyo na sinabi sa Talinhaga 21:18: “An maraot pambalukat para sa matanos; asin an nagtatraydor karibay kan mga tanos.”

Dugang Pang mga Pag-asegurar Giraray

17. Taano ta dai kaipuhan na matakot an mga Judio sa kabangisan kan Babilonya?

¹⁷ Nagtao si Jehova nin dugang pang mga pag-asegurar giraray sa saiyang banwaan: “Ako​—ako an Saro na nagraranga sa saindo. Siisay ka tanganing ika matakot sa sarong tawong magagadanon, asin sa aki nin tawo na ibibilang na berdeng doot sana? Asin na lingawan mo si Jehova na Kaggibo sa saimo, an Saro na nag-uunat kan kalangitan asin nagbubugtak kan pasisikadan kan daga, kaya ika danay na natatakot nin grabe sa bilog na aldaw huli sa kabangisan kan nangigipit sa saimo, na garo baga andam na nanggad siang laglagon ka? Asin haen an kabangisan kan nangigipit sa saimo?” (Isaias 51:​12, 13) An mga taon nin pagkadistiero maabot sa ngapit. Pero, mayo nin dahelan na matakot sa kabangisan nin Babilonya. Minsan ngani kokongkistaron kan nasyon na iyan, na ikatolong kapangyarihan pankinaban sa rekord kan Biblia, an banwaan nin Dios asin maghihingoang ‘gipiton sinda,’ o olangon an saindang pagdulag, aram kan fiel na mga Judio na ihinula na ni Jehova an pagbagsak kan Babilonya sa kamot ni Ciro. (Isaias 44:​8, 24-28) Bakong arog kan Kaglalang​—an Dios na daing katapusan, si Jehova​—an mga taga Babilonya magagadan na siring sa doot na naaalang sa grabeng sinag kan saldang durante nin tigmara. Kun siring ano an kaaabtan kan saindang mga huma asin kabangisan? Kanigoan na pagkadaing kadonongan na matakot sa tawo asin lingawan si Jehova, an kaggibo kan langit asin daga!

18. Minsan ngani an saiyang banwaan magigin bilanggo sa harohalawig na panahon, anong asegurasyon an itinatao sa sainda ni Jehova?

¹⁸ Minsan ngani an banwaan ni Jehova magigin bihag sa harohalawig na panahon, “na nakaduko na may mga kadena,” sabi ngani, an pagbutas sa sainda magigin biglaan. Dai sinda mapopoho sa Babilonya o magagadan sa gutom bilang mga bilanggo​—na nagigin daing buhay sa Sheol, an kotkot. (Salmo 30:3; 88:3-5) Inaasegurar sinda ni Jehova: “An saro na nakaduko na may mga kadena marikas na huhubadan nanggad, tanganing dai sia magadan pasiring sa kotkot asin tanganing an saiyang tinapay dai magkulang.”​—Isaias 51:14.

19. Taano ta puedeng magkaigwa nin lubos na kompiansa sa mga tataramon ni Jehova an fiel na mga Judio?

¹⁹ Sa pagranga pa sa Sion, si Jehova nagpapadagos: “Alagad ako, si Jehova, an saimong Dios, an Saro na nagbubukag kan dagat tanganing maghagobohob an mga alon kaiyan. Jehova nin mga hukbo an saiyang ngaran. Asin ibubugtak ko an sakong mga tataramon sa saimong ngoso, asin sa limpoy kan sakong kamot tatahoban taka, tanganing ikaestablisar an kalangitan asin ikabugtak an pasisikadan kan daga patin sabihon sa Sion, ‘Ika sakong banwaan.’ ” (Isaias 51:​15, 16) Paorootrong nasasambitan kan Biblia an kakayahan nin Dios na gamiton an saiyang kapangyarihan sa dagat asin kontrolon iyan. (Job 26:12; Salmo 89:9; Jeremias 31:35) Lubos niang kontrolado an mga puersa nin naturalesa, siring kan ipinaheling nia kan iligtas nia an saiyang banwaan hale sa Egipto. Siisay an ikakokomparar, minsan sa pinakasadit na paagi, ki “Jehova nin mga hukbo”?​—Salmo 24:10.

20. Anong “kalangitan” asin “daga” an maeksister kun ibalik na sa dati ni Jehova an Sion, asin anong nakararangang mga tataramon an sasabihon nia?

²⁰ An mga Judio nagdadanay na katipan na banwaan nin Dios, asin inaasegurar sinda ni Jehova na sinda mabalik sa saindang dagang tinuboan, tanganing sa giraray mamuhay sa irarom kan saiyang Ley. Duman itotogdok  liwat ninda an Jerusalem asin an templo asin ipagpapadagos an saindang mga paninimbagan sa irarom kan tipan na ginibo nia sa sainda paagi ki Moises. Kun an daga istaran na liwat kan mga Israelita na pinapuli sa sadiring daga asin kan saindang ataman na mga hayop, maeksister an “sarong bagong daga.” Sa ibabaw kaiyan ibubugtak an “bagong kalangitan,” sarong bagong sistema nin gobyerno. (Isaias 65:17-19; Haggeo 1:​1, 14) Sasabihon liwat ni Jehova sa Sion: “Ika sakong banwaan.”

Sarong Pangapodan na Humiro

21. Anong pangapodan na humiro an ipinaluwas ni Jehova?

²¹ Pakatapos aseguraron giraray an Sion, si Jehova nagpaluwas nin sarong pangapodan na humiro. Nagtataram na garo baga naabot na kaini an katapusan kan saiyang pagdusa, sia nagsasabi: “Magmata ka, magmata ka, bumangon ka, O Jerusalem, ika na umininom hale sa kamot ni Jehova kan saiyang kopa nin kabangisan. An kalis, an kopa na nagpaparipaydipay, ininoman mo, inubos mo.” (Isaias 51:17) Iyo, dapat bumangon an Jerusalem sa saiyang kapahapahamak na kamugtakan asin bumalik sa saiyang dating posisyon asin kagayonan. Maabot an panahon na mauubos nia an laog kan simbolikong kopa nin pamamalos nin Dios. Mayo nang matatadang kaanggotan an Dios sa saiya.

22, 23. Ano an maeeksperyensiahan kan Jerusalem kun inomon na nia an kopa kan kaanggotan ni Jehova?

²² Minsan siring, mantang kinakastigo an Jerusalem, mayo nin siisay man sa mga nag-iistar sa saiya, an saiyang “mga aki,” an makaoolang sa nangyayari. (Isaias 43:5-7; Jeremias 3:14) An hula nagsasabi: “Mayo nin siisay man sa gabos na aki na ipinangaki nia an naggigiya sa saiya, asin mayo nin siisay man sa gabos na aki na pinadakula nia an nagkakabit sa saiyang kamot.” (Isaias 51:18) Kanigoan na pagdusa an aagihan nia sa kamot kan mga Babilonyo! “An duwang bagay na idto nangyari sa saimo. Siisay an makikidamay sa saimo? Pananamsam asin pagkalaglag, asin gutom saka espada! Siisay an maranga sa saimo? An saimong mga aki nadismayo. Naghirigda sinda sa pinagkasangahan kan gabos na tinampo siring sa layas na mga karnero na nasa hikot, siring sa mga pano nin kabangisan ni Jehova, an pagsaway kan saimong Dios.”​—Isaias 51:​19, 20.

²³ Kaherakherak na Jerusalem! Titioson nia an “pananamsam asin pagkalaglag” siring man an “gutom saka espada.” Mantang dai ninda sia kayang giyahan asin pakosogon, an saiyang “mga aki” magigin daing maginibo, maluya, daing kosog na pasibogon an nananakyadang mga Babilonyo. Risang-risa nanggad, sa pinagkasangahan, o kanto, nin mga tinampo, sinda mahigda na nanluluya, daing kosog, asin pagal-pagal. (Lamentacion 2:19; 4:​1, 2) Sinda mainom sa kopa kan kabangisan nin Dios asin magigin siring kadaing kosog nin mga hayop na nadakop sa hikot.

24, 25. (a) Ano an dai na maootro para sa Jerusalem? (b) Pakatapos kan Jerusalem, siisay an sunod na mainom sa kopa kan kabangisan ni Jehova?

²⁴ Alagad matatapos an mamondong kamugtakan na ini. Nakararangang nagsasabi si Isaias: “Kun siring dangoga tabi ini, O babaeng nagsasakit nin makuri asin burat, alagad bako sa arak. Ini an sinabi kan saimong Kagurangnan, ni Jehova, na saimo nganing Dios, na nakikipaglaban para sa saiyang banwaan: ‘Uya! Kukuanon ko sa saimong kamot an kopa na dahelan nin pagripaydipay. An kalis, an sakong kopa nin kabangisan​—dai mo na ootrohon an pag-inom dian. Asin ibubugtak ko iyan sa kamot kan mga nan-iiritar sa saimo, na nagsabi sa saimong kalag, “Magduko ka ta maagi kami,” kaya ginibo mong siring sa daga an saimong likod, asin siring kan tinampo para sa mga minabalyo.’ ” (Isaias 51:21-23) Pakatapos disiplinahon an Jerusalem, si Jehova andam nang humiro na may pagkaherak asin magpaheling sa saiya nin mapagpatawad na aktitud.

²⁵ Hahaleon na ngonyan ni Jehova an saiyang kaanggotan sa Jerusalem asin ibabalyo iyan sa Babilonya. Ginaba na kan Babilonya an Jerusalem asin sinupog ini. (Salmo 137:7-9) Alagad dai na kaipuhan na uminom liwat an Jerusalem sa kopang iyan sa kamot kan Babilonya o kan saiyang mga kaalyado. Imbes, an kopa hahaleon sa kamot kan Jerusalem asin itatao sa mga naggagayagaya huli sa saiyang kasusupgan. (Lamentacion 4:​21, 22) An Babilonya mabagsak, na burat-burat. (Jeremias 51:6-8) Mientras tanto, an Sion mabuhat! Kanigoan na pagkabaliktad nin mga kamugtakan! Tunay nanggad, an Sion mararanga kan siring na tinatanaw. Asin makasisierto an mga lingkod ni Jehova na an saiyang ngaran masasantipikar paagi sa saiyang mga pagliligtas.

[Nota sa Ibaba]

[Mga Hapot Para sa Pag-adal]