Talaga daw na May Pagtubod Kamo sa Maogmang Bareta?

“An kahadean nin Dios harani na. Magsorolsol kamo, banwaan, asin magtubod kamo sa maogmang bareta.”—MARCOS 1:15.

1, 2. Paano mo ipaliliwanag an Marcos 1:​14, 15?

TAON 30 C.E. kaidto. Pinonan na ni Jesu-Cristo an saiyang dakulang ministeryo sa Galilea. Naghuhulit sia “kan maogmang bareta nin Dios,” asin dakol na taga Galilea an napahiro kan saiyang sinabi: “An itinalaan na panahon naotob na, asin an kahadean nin Dios harani na. Magsorolsol kamo, banwaan, asin magtubod kamo sa maogmang bareta.”—Marcos 1:14, 15.

² Nagdatong na “an itinalaan na panahon” tanganing ponan ni Jesus an saiyang ministeryo asin tanganing gumibo an mga tawo nin desisyon na magbubunga kan pag-oyon nin Dios sa sainda. (Lucas 12:54-56) “An kahadean nin Dios harani na” huli ta yaon si Jesus bilang Designadong Hade. An saiyang paghuhulit nagpahiro sa mga tama an kamugtakan nin puso na magsolsol. Alagad paano sinda nagpaheling—asin paano kita nagpapaheling—nin ‘pagtubod sa maogmang bareta’?

3. Paagi sa paggibo nin ano ipinaheheling nin mga tawo na sinda may pagtubod sa maogmang bareta?

³ Arog ni Jesus, sinadol ni apostol Pedro an mga tawo na magsolsol. Sa pagtaram sa mga Judio sa Jerusalem kan Pentecostes 33 C.E., si Pedro nagsabi: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan, asin aakoon nindo an daing bayad na balaog kan banal na espiritu.” Rinibo an nagsolsol, nabautismohan, asin nagin parasunod ni Jesus. (Gibo 2:​38, 41; 4:4) Kan 36 C.E., iyan man an ginibo kan nagsorolsol na Hentil. (Gibo 10:1-48) Sa satong kaaldawan, rinibo an pinahihiro kan pagtubod sa maogmang bareta na magsolsol sa saindang mga kasalan, magdusay sa Dios, asin magpabautismo. Inako ninda an maogmang bareta nin kaligtasan asin naggigibo nin pagtubod sa atang na pantubos ni Jesus. Dugang pa, isinasagibo ninda an katanosan asin naninindogan sa kampi kan Kahadean nin Dios.

4. Ano an pagtubod?

⁴ Alagad ano an pagtubod? Si apostol Pablo nagsurat: “An pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Dahel sa satong pagtubod segurado kita na an gabos na panuga nin Dios sa saiyang Tataramon garo man sana naotob na. Garo man sana igwa kita nin titulo na nagpapatunay na kita kagsadiri nin sarong propiedad. An pagtubod iyo man “an hayag na pagpapaheling,” o ebidensia nin pagigin kombensido, mapadapit sa mga bagay na dai naheheling. An nasa isip na pakamansay niato asin gikan sa pusong pagpapahalaga an minakombensir sa sato na an siring na mga bagay totoo, maski ngani dai niato iyan naheheling.—2 Corinto 5:7; Efeso 1:18.

Kaipuhan Niato an Pagtubod!

5. Taano ta mahalagang marhay an pagtubod?

⁵ Namundag kita na may espirituwal na pangangaipo alagad bakong may pagtubod. Sa katunayan, “an pagtubod bakong sadiri nin gabos na tawo.” (2 Tesalonica 3:2) Minsan siring, an mga Kristiano dapat na may pagtubod tanganing magmana kan mga panuga nin Dios. (Hebreo 6:12) Pakasitar nin dakol na halimbawa nin pagtubod, si Pablo nagsurat: “Huli ta napalilibotan kita nin dakulaon na panganoron nin mga saksi, pabayaan ta man an gabos na kagabatan asin an kasalan na pasil sanang nakagagapos sa sato, asin dumalagan kita na may pakatagal sa paorumbasan na ibinugtak sa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si  Jesus.” (Hebreo 12:​1, 2) Ano “an kasalan na pasil sanang nakagagapos sa sato”? Iyan an kadaihan nin pagtubod, pati an pagkawara nin dating pagtubod. Tanganing mapagdanay an makosog na pagtubod, dapat kitang ‘magheling nin maingat’ ki Jesus asin sunodon an saiyang halimbawa. Kaipuhan man niatong isikwal an inmoralidad, labanan an mga gibo kan laman, asin likayan an materyalismo, kinabanon na mga pilosopiya, asin mga tradisyon na bakong sono sa Kasuratan. (Galacia 5:19-21; Colosas 2:8; 1 Timoteo 6:9, 10; Judas 3, 4) Apuera dian, dapat kitang tumubod na an Dios nasa kaibanan niato asin na an hatol na yaon sa saiyang Tataramon talagang epektibo.

6, 7. Taano ta tamang mamibi na logod tawan nin pagtubod?

⁶ Dai kita makapaluluwas nin pagtubod na hale mismo sato paagi sa satong sadiring determinasyon. An pagtubod kabtang kan bunga kan banal na espiritu, o puersa aktiba nin Dios. (Galacia 5:22, 23) Kaya, paano kun kaipuhan na pakosogon an satong pagtubod? Si Jesus nagsabi: “Kun kamo . . . tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:13) Iyo, ipamibi niato na logod tawan kita nin banal na espiritu, huli ta puede kaiyan na paluwason sa sato an pagtubod na kaipuhan tanganing gibohon an kabotan nin Dios dawa sa pinakamasakit na mga kamugtakan.—Efeso 3:20.

⁷ Tamang mamibi na logod tawan nin orog pang pagtubod. Kan paluluwason ni Jesus an sarong demonyo sa sarong aking lalaki, an ama kan aki nakimaherak: “May pagtubod ako! Tabangi ako kun saen ako nangangaipo nin pagtubod!” (Marcos 9:24) “Tawe kami nin orog pang pagtubod,” an sabi kan mga disipulo ni Jesus. (Lucas 17:5) Kun siring, mamibi kita na logod tawan nin pagtubod, na kompiado na sinisimbag nin Dios an siring na mga pamibi.—1 Juan 5:14.

Mahalagang Marhay an Pagtubod sa Tataramon nin Dios

8. Paano makatatabang sa sato an pagtubod sa Tataramon nin Dios?

⁸ Dai nahaloy bago kan saiyang kagadanan bilang atang, sinabihan ni Jesus an saiyang mga parasunod: “Dai mahadit an saindong puso. Tumubod kamo sa Dios, tumubod man kamo sa sako.” (Juan 14:1) Bilang mga Kristiano, may pagtubod kita sa Dios asin sa saiyang Aki. Alagad kumusta sa Tataramon nin Dios? Puedeng magkaigwa nin makosog na impluwensia sa ikararahay kan satong buhay kun pag-aadalan asin iaaplikar niato iyan na bilog an pagtubod na iyan nagtatao kan pinakamarahay na hatol asin paggiya na makukua niato.​—Hebreo 4:12.

9, 10. Paano nindo ipaliliwanag an sinasabi manongod sa pagtubod na yaon sa Santiago 1:5-8?

⁹ An satong buhay bilang bakong sangkap na mga tawo pano nin problema. Minsan siring, an pagtubod sa Tataramon nin Dios totoong makatatabang sa sato. (Job 14:1) Ipamugtak ta baga na dai niato aram kun paano aatubangon an sarong pagbalo. Itinatao sato kan Tataramon nin Dios an hatol na ini: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa, huli ta an nagduduwaduwa siring sa alon nin dagat na ipinapadpad nin doros asin iinaapwak minsan saen. Sa katunayan, dai maghona an siring na tawo na sia mag-aako nin ano man hale ki Jehova; sia tawong dai makadesisyon, bakong marigon sa gabos niang dalan.”—Santiago 1:5-8.

¹⁰ Dai kita babasolon ni Jehova Dios huli sa kadaihan nin kadonongan asin pamimibi na logod tawan kaiyan. Imbes, tatabangan nia kita na mansayon nin tama an pagbalo. An nakatatabang na mga teksto puedeng iapod sa atension niato nin mga kapagtubod o mantang kita nag-aadal sa Biblia. O puedeng giyahan kita kan banal na espiritu ni Jehova sa ibang paagi. Itatao sa sato kan satong langitnon na Ama an kadonongan tanganing mapangganahan an mga pagbalo kun kita “padagos na maghagad sa pagtubod, na dai nin ano man na pagduwaduwa.” Kun kita arog sa alon nin dagat na ipinapadpad nin doros, dai kita makaaasang mag-ako nin ano man hale sa Dios. Taano? Huli ta nangangahulogan ini na kita dai makadesisyon asin bakong marigon sa pamibi o sa iba pang paagi​—iyo, pati sa paggibo nin pagtubod. Kun siring kaipuhan na kita may marigon na pagtubod sa Tataramon nin Dios asin sa giyang itinatao kaiyan. Estudyaran niato an nagkapirang halimbawa kun paano iyan nagtatao nin tabang asin giya.

Pagtubod Asin Ikabubuhay

11. An pagtubod sa Tataramon nin Dios nagtatao sato nin anong asegurasyon mapadapit sa satong pangaroaldaw na mga pangangaipo?

¹¹ Paano kun kita kinukulang nin ikabubuhay o  dukha? An pagtubod sa Tataramon nin Dios nagtatao sato kan siertong paghalat na aasikasohon ni Jehova an satong pangaroaldaw na mga pangangaipo asin pag-abot nin panahon matao sia nin abundang probisyon para sa gabos na namomoot sa saiya. (Salmo 72:16; Lucas 11:2, 3) Puedeng makaparigon sa boot niato na horophoropon kun paano tinawan ni Jehova nin kakanon an saiyang propetang si Elias sa panahon nin tiggutom. Kan huri, milagrosong pinahaloy nin Dios an suplay na harina asin lana na nagpadanay na buhay sa sarong babae, sa saiyang aki, asin ki Elias. (1 Hade 17:2-16) Itinao man ni Jehova an pangangaipo ni propeta Jeremias durante kan pagsalikop kan Babilonya sa Jerusalem. (Jeremias 37:21) Minsan ngani dikit an kakanon ni Jeremias asin Elias, inataman sinda ni Jehova. Ginigibo man nia iyan para sa mga nagtutubod sa saiya ngonyan.—Mateo 6:11, 25-34.

12. Paano makatatabang an pagtubod na makua an pundamental na ikabubuhay?

¹² An pagtubod na may kaibang pag-aplikar kan mga prinsipyo sa Biblia dai mapayaman sato sa materyal, alagad matabang iyan sato na makua an pundamental na ikabubuhay. Sa pag-ilustrar: Hinahatolan kita kan Biblia na magin onesto, may kakayahan, mahigos na mga indibiduwal. (Talinhaga 22:29; Eclesiastes 5:18, 19; 2 Corinto 8:21) Nungka niatong baliwalaon an halaga nin pagkaigwa nin marahay na dangog bilang trabahador. Dawa sa mga lugar na depisil makakua nin marahay na trabaho, an onesto, may abilidad, mahigos na mga trabahador an may mas marahay na oportunidad kisa iba. Minsan ngani an siring na mga trabahador tibaad tikapo sa materyal, sa parate igwa sinda kan pundamental na mga pangangaipo asin kan pagkakontento na kumakan hale sa ginanar mismo ninda.—2 Tesalonica 3:11, 12.

Tinatabangan Kita kan Pagtubod na Makaya an Kamondoan

13, 14. Paano kita tinatabangan kan pagtubod na makaya an kamondoan?

¹³ Realistikong ipinaheheling kan Tataramon nin Dios na normal sanang magmondo kun magadanan nin namomotan. An fiel na patriarkang si Abraham nagtangis sa pagkagadan kan saiyang namomotan na agom, si Sara. (Genesis 23:2) Makuri an pagmondo ni David kan mabaretaan na gadan na an aki niang si Absalon. (2 Samuel 18:33) Maski an sangkap na tawong si Jesus naghibi sa pagkagadan kan katood niang si Lazaro. (Juan 11:​35, 36) Kun magadan an sarong namomotan, tibaad haros magmondo kita nin grabe, alagad an pagtubod sa mga panuga na yaon sa Tataramon nin Dios makatatabang sato na makaya an siring na kamondoan.

¹⁴ ‘May paglaom ako sa Dios,’ sabi ni Pablo, ‘na magkakaigwa nin pagkabuhay liwat an mga matanos asin an mga bakong matanos.’ (Gibo 24:15) Kaipuhan na kita may pagtubod sa probisyon nin Dios na pagbuhay liwat sa kadakoldakol na tawo. (Juan 5:​28, 29) Magigin kabilang sa sainda si Abraham asin Sara, Isaac asin Rebeca, Jacob asin Lea​—na gabos natotorog ngonyan sa kagadanan asin naghahalat nin pagkabuhay liwat sa bagong kinaban nin Dios. (Genesis 49:29-32) Magkakaigwa nanggad nin kagayagayahan kun an mga namomotan pukawon na sa  pagkatorog sa kagadanan tanganing mabuhay digdi sa daga! (Kapahayagan 20:11-15) Mientras tanto, dai hahaleon kan pagtubod an gabos na kamondoan, alagad pagdadanayon kita kaiyan na dayupot sa Dios, na tinatabangan kitang makaya an pagkagadan nin namomotan.—Salmo 121:1-3; 2 Corinto 1:3.

Pinakokosog kan Pagtubod an mga Nagmomondo nin Makuri

15, 16. (a) Taano ta masasabi niato na igwa nin kapareho an makuring kamondoan kan mga nagtutubod? (b) Ano an puedeng gibohon tanganing makaya an makuring kamondoan?

¹⁵ Ipinaheheling man kan Tataramon nin Dios na maski idtong mga nagtutubod puedeng magin biktima nin makuring kamondoan. Durante kan grabeng pagbalo sa saiya, an pagmate ni Job binayaan na sia nin Dios. (Job 29:2-5) An gabang kamugtakan kan Jerusalem asin kan mga lanob kaiyan nagpamondo ki Nehemias. (Nehemias 2:1-3) Pinanluyahan na marhay nin boot si Pedro pakatapos na paindahan si Jesus kaya sia “nagtangis nin mapait.” (Lucas 22:62) Asin sinadol ni Pablo an mga kapagtubod sa kongregasyon sa Tesalonica na “magtaram na may pagranga sa mga kalag na nagmomondo nin makuri.” (1 Tesalonica 5:14) Kun siring, igwa nin kapareho an makuring kamondoan kan mga nagtutubod ngonyan. Ano, kun siring, an puede niatong gibohon tanganing makaya an makuring kamondoan?

¹⁶ Tibaad magmondo kita nin makuri huli ta may inaatubang kitang nagkapirang magabat na problema. Imbes na mansayon an mga iyan bilang sarong dakulaon na problema, tibaad makaya niatong resolberan iyan nin pasarosaro paagi sa pag-aplikar kan mga prinsipyo sa Biblia. Puedeng makatabang ini na mainaan an makuring kamondoan niato. An balanseng aktibidad asin hustong pahingalo puede man na makatabang. Sarong bagay an segurado: An pagtubod sa Dios asin sa saiyang Tataramon nagpapaoswag sa espirituwal na ikararahay huli ta pinakokosog kaiyan an satong kombiksion na talagang may pagmakolog sia sa sato.

17. Paano niato naaaraman na si Jehova may pagmakolog sa sato?

¹⁷ Itinao sato ni Pedro an nakararangang asegurasyon na ini: “Magpakumbaba kamo sa irarom kan poderosong kamot nin Dios, tanganing ilangkaw nia kamo sa itinalaan na panahon; mantang ibinubugtak nindo an gabos nindong kahaditan sa saiya, huli ta sia may pagmakolog sa saindo.” (1 Pedro 5:6, 7) An salmista nag-awit: “Si Jehova nagtatabang sa gabos na napupukan, asin binabangon an gabos na napapalaob.” (Salmo 145:14) Maninigo niatong tubodon an mga asegurasyon na ini, ta yaon iyan sa Tataramon nin Dios. Minsan ngani tibaad magpadagos an makuring kamondoan, nakapakokosog nanggad sa pagtubod na maaraman na puede niatong ibugtak sa satong mamomoton na langitnon na Ama an gabos niatong kahaditan!

Pagtubod Asin Iba Pang Pagbalo

18, 19. Paano kita tinatabangan kan pagtubod na makaya an helang asin rangahon an may helang na mga kapagtubod?

¹⁸ Tibaad maeksperyensiahan niato an dakulang pagbalo sa satong pagtubod kun kita o an satong mga namomotan maghelang nin grabe. Minsan ngani daing sinasabi sa Biblia na milagrosong pinaomayan an mga Kristianong arog ki Epafrodito, Timoteo, asin Trofimo, daing duda na tinabangan sinda ni Jehova na makatagal. (Filipos 2:25-30; 1 Timoteo 5:23; 2 Timoteo 4:20) Apuera dian, mapadapit sa “siisay man na minahirong may  konsiderasyon sa dukha,” an salmista nag-awit: “Si Jehova mismo magpapakosog sa saiya sa ibabaw nin sopa nin kahelangan; an gabos niang higdaan sasalidahan mo sa panahon kan saiyang paghelang.” (Salmo 41:1-3) Paano makatatabang sa sato an mga tataramon kan salmista tanganing rangahon an may helang na mga kapagtubod?

¹⁹ An sarong paagi nin pagtao nin espirituwal na tabang iyo an pagpamibi kaiba kan asin para sa mga naghehelang. Minsan ngani dai man naghahagad nin milagrosong pagpaomay ngonyan, puede niatong hagadon na logod tawan sinda nin Dios nin sarig nin boot na makaya an saindang kamatean asin nin espirituwal na kosog na kaipuhan tanganing matagalan an siring na mga panahon nin panluluya. Sususteniran sinda ni Jehova, asin mapapakosog an saindang pagtubod paagi sa pagtanaw sa panahon na “mayo [na] nin nag-eerok na masabi: ‘Naghehelang ako.’” (Isaias 33:24) Kanigoan na karangahan an maaraman na paagi sa binuhay liwat na si Jesu-Cristo asin paagi sa Kahadean nin Dios, an makinuyog na katawohan permanente nang makatatalingkas sa kasalan, helang, asin kagadanan! Huli sa marahayon na mga paglaom na ini, pinasasalamatan niato si Jehova, ‘na mapaomay kan gabos niatong kamatean.’—Salmo 103:1-3; Kapahayagan 21:1-5.

20. Taano ta masasabi na matatabangan kita kan pagtubod na tioson “an kapahapahamak na mga aldaw” nin pagkagurang?

²⁰ Matatabangan man kita kan pagtubod na tioson “an kapahapahamak na mga aldaw” nin pagkagurang, an panahon na nagrururo na an salud asin kosog. (Eclesiastes 12:1-7) Kaya an kaiba niatong mga may edad na puedeng mamibi nin arog kan naggugurang nang salmista na nag-awit: “Ika an sakong paglaom, O Soberanong Kagurangnan na Jehova . . . Dai mo man logod ako ipagsikwal sa panahon nin kagurangan; kun an sakuyang kosog nawawara na, dai mo ako pagpabayaan.” (Salmo 71:5, 9) Namatean kan salmista na kaipuhan nia an pagsuportar ni Jehova, siring kan dakol niatong kapwa Kristiano na guminurang na sa paglilingkod sa Dios. Huli sa saindang pagtubod, makaseseguro sinda na yaon sa sainda an seguradong pagsuportar kan daing katapusan na takyag ni Jehova.​—Deuteronomio 33:27.

Papagdanayon an Pagtubod sa Tataramon nin Dios

21, 22. Kun kita may pagtubod, ano an epekto kaiyan sa satong relasyon sa Dios?

²¹ An pagtubod sa maogmang bareta asin sa bilog na Tataramon nin Dios nakatatabang sa sato na pirmeng orog na dumayupot ki Jehova. (Santiago 4:8) Totoo, sia an satong Soberanong Kagurangnan, alagad sia man an satong Kaglalang asin Ama. (Isaias 64:8; Mateo 6:9; Gibo 4:24) “Ika an sakong Ama, an sakong Dios asin an Gapo kan sakong kaligtasan,” an awit kan salmista. (Salmo 89:26) Kun kita nagtutubod ki Jehova asin sa saiyang ipinasabong na Tataramon, puede man niato siang ibilang na ‘Gapo kan satong kaligtasan.’ Kanigoan kanakaoogmang pribilehio!

²² Si Jehova an Ama kan mga Kristianong pinaniaki nin espiritu asin kan saindang kairiba na may daganon na paglaom. (Roma 8:15) Asin an pagtubod sa satong langitnon na Ama nungkang minaresulta sa pagkadesganar. Si David nagsabi: “Enkaso bayaan ako kan sakong sadiring ama asin kan sakong sadiring ina, si Jehova mismo an maampon sa sako.” (Salmo 27:10) Dugang pa, ini an asegurasyon sa sato: “Si Jehova dai mapabaya sa saiyang banwaan huli sa saiyang dakulang ngaran.”—1 Samuel 12:22.

23. Ano an kaipuhan tanganing kamtan niato an nagdadanay na relasyon ki Jehova?

²³ Siempre, tanganing kamtan an nagdadanay na relasyon ki Jehova, dapat na kita may pagtubod sa maogmang bareta asin akoon an Kasuratan siring sa iyo man nanggad​—an Tataramon nin Dios. (1 Tesalonica 2:13) Dapat na kita may bilog na pagtubod ki Jehova asin togotan an saiyang Tataramon na ilawan an satong dalan. (Salmo 119:105; Talinhaga 3:​5, 6) Matalubo an satong pagtubod mantang kita namimibi sa saiya na may kompiansa sa saiyang pagkaludok, pagkaherak, asin pagsuportar.

24. Anong nakararangang kaisipan an iinaatubang sa Roma 14:8?

 ²⁴ An pagtubod an nagpapahiro sato na magdusay sa Dios sa bilog na panahon na daing sagkod. Huling may makosog na pagtubod, dawa kun kita magadan, kita an saiyang nagdusay na mga lingkod na may paglaom na pagkabuhay liwat. Iyo, “baga man kita mabuhay o magadan, sadiri kita ni Jehova.” (Roma 14:8) Papagdanayon niato sa satong puso an nakararangang kaisipan na iyan mantang pinapagdadanay niato an satong kompiansa sa Tataramon nin Dios asin padagos na may pagtubod sa maogmang bareta.

Ano an Isisimbag Nindo?

• Ano an pagtubod, asin taano ta kaipuhan niato an kualidad na ini?

• Taano ta mahalagang marhay na kita magkaigwa nin pagtubod sa maogmang bareta asin sa enterong Tataramon nin Dios?

• Paano kita tinatabangan kan pagtubod na atubangon an manlaenlaen na pagbalo?

• Ano an matabang sa sato na mapagdanay an pagtubod?

[Mga Hapot Para sa Pag-adal]

[Mga Ritrato sa pahina 12]

Inataman ni Jehova si Jeremias asin Elias huli ta sinda may pagtubod

[Mga Ritrato sa pahina 13]

Si Job, Pedro, asin Nehemias may makosog na pagtubod

[Mga Ritrato sa pahina 15]

Tanganing kamtan an nagdadanay na relasyon ki Jehova, dapat na kita may pagtubod sa maogmang bareta