Kun Paano Kukultibaron an Timbang na Pagmansay sa Trabaho

SA GRABE an tension na kinaban ngonyan nin lakop sa globong komersio, daing prinsipyong kompetensia, asin lagduan na produksion, dakol na tawo an dai na naoogmang maglaog sa trabaho kada aldaw. Pero, maninigong ikaogma niato an satong trabaho. Taano man? Huli ta linalang kita sa ladawan nin Dios—asin an Dios nawiwili sa saiyang trabaho. Halimbawa, kan sinisiyasat giraray an ginibo nia sa katapusan kan anom na “aldaw,” o halawig na panahon, nin paglalang, “naheling nin Dios an gabos niang ginibo asin, uya! idto marahayon,” an sabi sa Genesis 1:31.

Daing duda na an pagkamoot ni Jehova sa trabaho iyo an sarong rason kaya inaapod siang “maogmang Dios.” (1 Timoteo 1:11) Kun siring, bako daw na rasonable sana na mantang orog na inaarog niato sia, nagigin mas maogma man kita? Mapadapit digdi, si Hadeng Salomon kan suanoy na Israel, sarong bantog na konstruktor asin organisador, nagsurat: “An lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.”—Eclesiastes 3:13.

An pagkultibar nin timbang, nakararahay na pagmansay sa trabaho sa marikas na nagbabagong pinagtatrabawohan ngonyan puedeng magin sarong angat. Alagad binebendisyonan ni Jehova Dios an mga naghihimate sa saiyang mamomoton na paggiya. (Salmo 119:99, 100) An mga arog kaiyan nagigin mahalaga asin pinagtitiwalaan na mga empleyado asin kun siring dikit an posibilidad na mawaran kan saindang trabaho. Nanonodan man nindang mansayon an saindang buhay asin trabaho bako sanang sa materyal na punto de vista kundi sa espirituwal man. Pinapangyayari sinda kaini na makagibo nin responsableng mga desisyon sa buhay asin masabotan na an saindang kaogmahan asin pakamate nin seguridad bakong nakadepende sana sa saindang trabaho o sa parate nang pabarobagong kamugtakan nin malalaogan na trabaho. (Mateo 6:31-33; 1 Corinto 2:​14, 15) Nakatatabang iyan sainda na kultibaron an tunay na balanseng ugale sa trabaho.

Kultibaron an Diosnon na Ugale sa Trabaho

An nagkapirang tawo bangkag sa trabaho, na ipinaoorog an saindang trabaho sa gabos na iba pang bagay. An iba naghahalat sanang matapos an aldaw kan pagtrabaho na puede na sindang pumondo asin mag-uli. Ano an timbang na pagmansay? An Biblia nagsisimbag: “Mas marahay an sarong hakbot nin  pagpahingalo kisa duwang hakbot nin pagpapagal asin paglapag sa doros.” (Eclesiastes 4:6) Sa katunayan, an sobra kapagal o sobra kalawig na pagtrabaho nakaoolang logod sa gustong mangyari—sarong daing kamanungdanan na “paglapag sa doros.” Taano man? Huli ta tibaad madanyaran ta logod an mismong mga bagay na nagkokontribwir sa pinakadakulang kaogmahan niato: an satong relasyon sa pamilya asin mga katood, an satong espirituwalidad, an satong salud, asin an pagkaigwa pa ngani niato nin halawig na buhay. (1 Timoteo 6:9, 10) An timbang na pagmansay iyo na magin kontento sa dikit na nakukuang materyal na igwa nin tama sanang katoninongan imbes na magabatan sa sobrang pagpapagal sa trabaho na may kaibang iriwal asin sakit.

Mantang ineenkaminar an siring na timbang na pagmansay, an Biblia dai man inooyonan an kahugakan. (Talinhaga 20:4) Diit-diit na rinaraot kan kahugakan an paggalang sa sadiri asin an tibaad paggalang sa sato kan iba. Mas maraot pa ngani, rinaraot kaiyan an satong relasyon sa Dios. Prangkang sinasabi kan Biblia na an tawong habong magtrabaho dai maninigong magkakan sa pinagalan kan iba. (2 Tesalonica 3:10) Imbes, maninigo siang magbago asin maghigos, sa siring may onrang nasusustentohan an saiyang sadiri asin an mga binubuhay nia. Paagi sa paghigos tibaad makatabang pa ngani sia sa mga totoong nangangaipo—sarong ugale na ineenkaminar kan Tataramon nin Dios.—Talinhaga 21:25, 26; Efeso 4:28.

Sinanay Poon sa Pagkaniaki na Pahalagahan an Trabaho

An marahay na ugale sa pagtrabaho dai nagkakanorongod sana; nanonodan iyan sa pagkaniaki. Huli kaini, sinasadol kan Biblia an mga magurang: “Patoodon mo an aki oyon sa dalan para sa saiya; minsan kun sia maggurang dai sia masiko dian.” (Talinhaga 22:6) Apuera sa pagpaheling nin marahay na halimbawa bilang mga trabahador mismo, an madonong na mga magurang pinoponan na sanayon an saindang saradit pang aki paagi sa pagtao sainda nin gibohon sa harong na tama sa saindang edad. Dawa ngani an mga aki tibaad magreklamo sa nagkapirang gibohon, marerealisar ninda na mahalaga sindang miembro kan pamilya—espesyalmente kun inoomaw sinda ni Nanay asin ni Tatay kun marahay an pagkagibo sa trabaho. Makamomondo, may mga magurang na haros ginigibo na an gabos na bagay para sa saindang mga aki, tibaad huli sa napasalang kabootan. Maninigong pensaron kan siring na mga magurang an Talinhaga 29:21, na nagsasabi: “Kun sinusunodsunod nin saro an saiyang oripon [o aki] magpoon sa pagkaaki, sa huri niang buhay sia magigin daing utang na boot.”

An responsableng mga magurang nagpapaheling man nin odok na interes sa pag-eskuela kan saindang mga aki, na ineenkaminar sindang makanood asin magmahigos mantang nag-eeskuela.  Makatatabang ini sa mga aki sa huri kun sinda magtatrabaho na man.

Magin Madonong sa Pagpili Nindo nin Trabaho

Minsan ngani dai man sinasabi sato kun anong klaseng trabaho an hahanapon, an Biblia nagtatao sa sato nin marahay na mga giya tanganing an satong espirituwal na pag-oswag, paglilingkod sa Dios, asin an iba pang importanteng paninimbagan dai ikakompromiso. Halimbawa, si apostol Pablo nagsurat: “Nainaan na an panahon na natatada. Magpoon ngonyan an mga . . . minagamit kan kinaban [magin] siring sa mga dai naggagamit kaiyan nin lubos; huli ta an kamugtakan kan kinaban na ini nagbabago.” (1 Corinto 7:29-31) Mayo nin permanente o biyong dai nagbabago sa presenteng sistema nin mga bagay. An pagtao dian kan gabos niatong panahon asin kosog garo pagpundar kan gabos na kuartang tinipon sa bilog niatong buhay sa harong na nakatogdok sa lugar na pirmeng binabaha. Kamangmangan nanggad na pagpundar iyan!

Trinadusir kan ibang traduksion nin Biblia an fraseng “dai naggagamit kaiyan nin lubos” na “dai nababangkag dian” asin “dai nasisibot nin lubos dian.” (The Jerusalem Bible; Today’s English Version) Dai noarin man linilingawan kan madonong na mga tawo an bagay na an panahon “nainaan” na para sa presenteng sistema asin na an ‘pagkabangkag,’ o ‘pagkasibot nin lubos,’ dian seguradong maresulta sa pagkadesganar asin pagbasol.—1 Juan 2:15-17.

‘Sa Ano Man na Paagi Dai Ka Pababayaan nin Dios’

Mas aram ni Jehova an satong mga pangangaipo kisa niato mismo. Aram man nia kun yaon na kita saen sa pagkahaman kan saiyang katuyohan. Huli kaini, ipinagigirumdom nia sato: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay. Huli ta [an Dios] nagsabi: ‘Sa ano man na paagi dai taka babayaan ni sa ano man na paagi pababayaan taka.’” (Hebreo 13:5) Nakararanga nanggad an mga tataramon na iyan! Huling inaarog an mamomoton na pagmakolog nin Dios sa saiyang banwaan, ginamit ni Jesus an dakulang kabtang kan saiyang bantog na Sermon sa Bukid sa pagtotokdo sa saiyang mga disipulo kan tamang pagmansay sa trabaho asin sa materyal na mga bagay.​—Mateo 6:19-33.

Nagmamaigot an Mga Saksi ni Jehova na himateon an mga katokdoan na iyan. Halimbawa, kan imbitaran nin sarong among an sarong Saksi, na sarong elektrisista, na regular na mag-obertaim sa trabaho, sa pangyayaring ini an empleyado nagsayuma. Taano? Huli ta habo niang makaolang an saiyang sekular na trabaho sa panahon na itinatagama nia sa saiyang pamilya asin sa espirituwal na mga bagay. Huling sia sarong marahayon asin mapagtitiwalaan na trabahador, iginalang kan saiyang among an saiyang gusto. Siempre, bako pirmeng arog kaiyan an nangyayari, asin an saro tibaad kaipuhan na humanap nin ibang trabaho tanganing mapagdanay an timbang na estilo nin pamumuhay. Minsan siring, parateng nadidiskobre kan mga nagtitiwala nin lubos ki Jehova na nakukua ninda an pabor kan saindang among huli sa saindang marahay na gawe-gawe asin marahay na ugale sa trabaho.—Talinhaga 3:5, 6.

Kun Magin Nakakokontento Na an Gabos na Trabaho

Sa presente asin bakong sangkap na sistema nin mga bagay, an empleyo asin oportunidad para sa empleyo dai noarin man magigin libre sa mga problema asin kadaihan nin kasegurohan. Sa katunayan, an situwasyon tibaad lalong magruro mantang an kinaban nagigin mas daing kasegurohan asin an mga ekonomiya nagpapabarobago o minabagsak pa  ngani. Alagad temporaryo an situwasyon na ini. Dai mahahaloy, mayo na nin siisay man na mayong trabaho. Apuera kaiyan, an gabos na trabaho magigin talagang kawiliwili asin nakakokontento. Paano iyan posible? Ano an magpapangyari sa siring na pagbabago?

Paagi sa propeta niang si Isaias, itinokdo ni Jehova an siring na panahon. “Ako naglalalang nin bagong kalangitan asin sarong bagong daga,” sabi ni Jehova, “asin an dating mga bagay dai na magigirumdoman, ni masabong pa iyan sa puso.” (Isaias 65:17) Sinasabi nia an manongod sa bagong gobyerno na gigibohon nia, na sa irarom kaiyan magigin totoo an sarong biyong bago asin laen na sosyedad nin tawo.—Daniel 2:44.

Mapadapit sa magigin pamumuhay asin trabaho nin mga tawo sa panahon na iyan, an hula nagpapadagos: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan; huli ta sinda an mga aki na kompuesto kan mga binendisyonan ni Jehova, asin an saindang mga aki kaiba ninda.”—Isaias 65:21-23.

Kanigoan kadakulang pagbabago an gigibohon kan bagong kinaban na iyan na dinisenyo nin Dios! Bako daw na gusto man nindong mag-istar sa arog kaiyan na kinaban, na dian dai na kamo “magpapagal na mayong kapakanan” kundi lubos na kakamtan an “bunga” kan saindong pagpapagal? Pero, mangnohon kun siisay an magkakamit kan siring na mga bendisyon: “Sinda an mga aki na kompuesto kan mga binendisyonan ni Jehova.” Puede kamong magin saro sa “mga binendisyonan” na iyan paagi sa pag-adal manongod ki Jehova asin pag-abot sa saiyang mga kahagadan. Si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An Mga Saksi ni Jehova maoogmang tabangan kamo na makua an nagtatao nin buhay na kaaraman na iyan paagi sa sistematikong pag-adal sa Tataramon nin Dios, an Biblia.

[Kahon sa pahina 6]

“PIRMENG HINAHANAP”

“Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo,” an sabi kan Biblia. (Colosas 3:23) Siempre pa, dakol an naghahanap kan sarong empleyado na an tamang ugale sa trabaho ginigiyahan kan marahayon na prinsipyong ini. Sa dahelan na iyan, sinasadol ni J. J. Luna, sa saiyang librong How to Be Invisible, an potensial na mga among na maghanap nin aktibong mga miembro nin sarong relihiosong grupo, alagad idinugang nia: “Sa totoo an napipili niato sa parate iyo an mga Saksi [ni Jehova].” Kabilang sa mga dahelan na itinatao nia iyo na midbid na marhay sinda sa saindang pagkaonesto, asin iyan an dahelan kaya sinda “pirmeng hinahanap” sa manlaenlaen na linya nin trabaho.

[Mga Ritrato sa pahina 5]

An trabaho na binabalansehan nin espirituwal na mga aktibidad asin pag-aling-aling nagbubunga nin pagkakontento