‘Magkaminorootmootan Kamo’

“Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—JUAN 13:35.

1. Anong kualidad an idinoon ni Jesus kaidtong madali na siang magadan?

“SARADIT na aki.” (Juan 13:33) Paagi sa mapagpadangat na pananaram na iyan, kinaolay ni Jesus an saiyang mga apostol kaidtong banggi bago sia magadan. Mayo kita nin rekord sa mga pagkasaysay sa Ebanghelyo na si Jesus naggamit na kaidto kan may pagkaludok na pag-apod na ini sa pakikipag-olay sa sainda. Minsan siring, kan espesyal na bangging idto, napahiro siang gumamit kan mamomoton na pananaram na ini tanganing ipahayag an hararom na pagkamoot na namatean nia para sa saiyang mga parasunod. Sa katunayan, an pagkamoot nasambitan ni Jesus nin mga 30 beses kan bangging idto. Taano ta siring kaiyan an pagkadoon nia sa kualidad na ini?

2. Taano ta mahalagang marhay sa mga Kristiano an pagpaheling nin pagkamoot?

² Ipinaliwanag ni Jesus kun taano ta mahalagang marhay an pagkamoot. “Paagi kaini,” sabi nia, “an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35; 15:​12, 17) An pagigin parasunod ni Cristo konektadong marhay sa pagpaheling nin sa tugang na pagkamoot. An tunay na mga Kristiano namimidbid, bakong paagi sa sarong partikular na klase nin gubing o paagi sa nagkapirang napapalaen na kostumbre, kundi paagi sa may init asin mapagpadangat na pagkamoot na ipinaheheling ninda sa lambang saro. An pagkaigwa kan marahayon na klaseng ini nin pagkamoot iyo an ikaduwa sa tolong pangenot na kahagadan sa sarong disipulo ni Cristo na nasambitan sa kapinonan kan naenot na artikulo. Ano an matabang sato na padagos na maabot an kahagadan na ini?

“Gibohon Iyan nin Orog”

3. Anong konseho mapadapit sa pagkamoot an itinao ni apostol Pablo?

³ Arog sa mga parasunod ni Cristo kan enot na siglo, an marahayon na pagkamoot na ini risang-risa ngonyan sa tunay na mga disipulo ni Cristo. Sa mga Kristiano kan enot na siglo, si apostol Pablo nagsurat: “Kun mapadapit sa pagkamoot sa magturugang, dai na kamo nangangaipo na suratan pa niamo, huli ta kamo mismo tinotokdoan nin Dios  na magkaminorootmootan; asin, an totoo, ginigibo nindo iyan sa gabos na tugang.” Dawa siring, idinugang ni Pablo: “Padagos na gibohon iyan nin orog.” (1 Tesalonica 3:12; 4:​9, 10) Dapat na isapuso man niato an konseho ni Pablo asin magmaigot na ipaheling “nin orog” an pagkamoot sa lambang saro.

4. Segun ki Pablo asin ki Jesus, siisay an maninigo niatong tawan nin espesyal na konsiderasyon?

⁴ Sa ipinasabong na surat man sanang iyan, inenkaminar ni Pablo an saiyang mga kapagtubod na “magtaram na may pagranga sa mga kalag na nagmomondo nin makuri” asin “suportaran an maluya.” (1 Tesalonica 5:14) Sa saro pang okasyon, ipinagirumdom nia sa mga Kristiano na an “mga makosog maninigong magpasan kan mga kaluyahan kaidtong mga bakong makosog.” (Roma 15:1) Nagtao man si Jesus nin mga instruksion may labot sa pagtabang sa mga maluya. Pakatapos ihula na babayaan sia ni Pedro sa banggi na sia aarestaron, sinabihan ni Jesus si Pedro: “Kun makabalik ka na, pakosoga an saimong mga tugang.” Taano? Huli ta babayaan man ninda si Jesus asin sa siring mangangaipo sinda nin tabang. (Lucas 22:32; Juan 21:15-17) Huli kaini, pinagbobotan kita kan Tataramon nin Dios na ipaheling an satong pagkamoot sa mga maluya sa espirituwal asin tibaad nawara sa Kristianong kongregasyon. (Hebreo 12:12) Taano ta maninigo niatong gibohon iyan? Duwang malinaw na ilustrasyon ni Jesus an nagtatao kan simbag.

Sarong Nawarang Karnero Asin Sarong Nawarang Sinsilyo

5, 6. (a) Anong duwang halipot na ilustrasyon an isinaysay ni Jesus? (b) Ano an ihinahayag kan mga ilustrasyon na ini manongod ki Jehova?

⁵ Tanganing itokdo sa mga naghihinanyog sa saiya an pagmansay ni Jehova sa mga naparayo, nagtao si Jesus nin duwang halipot na ilustrasyon. An saro manongod sa sarong pastor. Sabi ni Jesus: “Siisay saindo na may sanggatos na karnero, kun mawara an saro sainda, an dai mabaya sa siyam na polo may siyam sa kaawagan asin hahanapon an sarong nawara sagkod na manompongan nia iyan? Asin kun manompongan nia iyan saiyang papasanon iyan asin maggagayagaya. Asin kun makapuli na sia aapodon nia an saiyang mga katood asin kataraed, na sinasabi sainda, ‘Makigayagaya kamo sa sako, huli ta nanompongan ko an sakong nawarang karnero.’ Sinasabi ko sa saindo na magkakaigwa nin siring na orog na kagayagayahan sa langit huli sa sarong parakasala na nagsosolsol kisa sa siyam na polo may siyam na matanos na dai nangangaipong magsolsol.”—Lucas 15:4-7.

⁶ An ikaduwang ilustrasyon manongod sa sarong babae. Nagsabi si Jesus: “Siisay na babae na may sampulong pirak na dracma, kun mawara nia an sarong pirak na dracma, an dai mag-iilaw asin maninighid sa saiyang harong asin maingat na maghahanap sagkod na manompongan na nia iyan? Asin kun manompongan na nia iyan aapodon nia an mga babae na mga katood asin kataraed nia, na sinasabi, ‘Makigayagaya kamo sa sako, huli ta nanompongan ko an pirak na dracma na nawara ko.’ Sa siring, sinasabi ko sa saindo, nagkakaigwa nin kagayagayahan an mga anghel nin Dios huli sa sarong parakasala na nagsosolsol.”—Lucas 15:8-10.

7. Ano an duwang leksion para sa sato kan ilustrasyon kan nawarang karnero asin kan nawarang sinsilyo?

⁷ Ano an manonodan ta sa halipot na mga ilustrasyon na ini? Ipinaheheling kaiyan sa sato (1) kun ano an maninigo na magin pagmate niato manongod sa mga nanluya asin (2) kun ano an maninigo niatong gibohon tanganing tabangan sinda. Pag-olayan niato an mga puntong ini.

Nawara Alagad Pinahalagahan

8. (a) Ano an reaksion kan pastor asin kan babae dapit sa nawara sa sainda? (b) Ano an sinasabi sa sato kan saindang reaksion manongod sa kun paano ninda minansay an nawarang pagsadiri?

⁸ May nawara sa duwang ilustrasyon, alagad mangnoha an reaksion kan mga kagsadiri. An pastor dai nagsabi: ‘Sarong karnero man sana iyan, may 99 pa ako. Bakong problema iyan.’ An babae dai nagsabi: ‘Taano ta poproblemahon ko an sarong sinsilyo na iyan? Kontento na ako sa siyam pang yaon sako.’ Imbes, hinanap kan pastor an nawarang karnero nia na garo baga iyo sana iyan an yaon sa saiya. Asin an pagmate kan babae sa nawarang sinsilyo nia garo baga mayo na siang ibang sinsilyo. Sa duwang kaso an nawara mahalagang marhay pa man giraray sa isip kan kagsadiri. Ano an ipinaheheling kaini?

9. Ano an ipinaheheling kan pagmakolog na ipinaheling kan pastor asin kan babae?

⁹ Mangnoha an konklusyon ni Jesus sa duwang kasong iyan: “Magkakaigwa nin siring na orog na kagayagayahan sa langit huli sa sarong parakasala na nagsosolsol” asin “sa siring, sinasabi ko sa saindo,  nagkakaigwa nin kagayagayahan an mga anghel nin Dios huli sa sarong parakasala na nagsosolsol.” Kun siring, an pagmakolog kan pastor asin kan babae nagpapabanaag, sa sadit na paagi, kan mga pagmate ni Jehova asin kan saiyang langitnon na mga linalang. Kun paanong an nawara mahalagang marhay pa man giraray sa pagheling kan pastor asin kan babae, an mga naparayo asin nawara sa banwaan nin Dios mahalagang marhay pa man giraray sa pagheling ni Jehova. (Jeremias 31:3) An siring na mga indibiduwal tibaad maluya sa espirituwal, alagad ta bako man talaga sindang rebelde. Sa ibong kan saindang pagigin maluya, maski paano tibaad sinusunod pa man giraray ninda an mga kahagadan ni Jehova. (Salmo 119:176; Gibo 15:29) Huli kaini, arog kaidtong mga panahon na nakaagi, si Jehova maluway sa ‘pag-alaw sa sainda na humale sa atubangan kan saiyang lalauogon.’—2 Hade 13:23.

10, 11. (a) Paano niato boot na mansayon an mga naparayo sa kongregasyon? (b) Segun sa duwang ilustrasyon ni Jesus, paano niato ikapahahayag an satong pagmakolog sa sainda?

¹⁰ Arog ki Jehova asin ki Jesus, odok man an pagmakolog niato sa mga maluya asin nawawara sa Kristianong kongregasyon. (Ezequiel 34:16; Lucas 19:10) An sarong indibiduwal na maluya sa espirituwal minamansay niato bilang nawarang karnero—bakong dai nang paglaom na rumahay pa. Dai niato ipinangangatanosan: ‘Taano ta poproblemahon mo pa an sarong maluya? Ayos man an kongregasyon maski mayo sia.’ Imbes, kapareho ni Jehova, ibinibilang niato na mahalaga an mga naparayo alagad boot na bumalik.

¹¹ Pero paano niato ikapahahayag an satong mga pagmate nin pagmakolog? Ipinaheheling kan duwang ilustrasyon ni Jesus na magigibo niato iyan (1) paagi sa paggibo nin inisyatiba, (2) paagi sa pagigin maboot, asin (3) paagi sa pagigin maigot. Saro-saro niatong estudyaran an mga aspektong ini.

Gumibo nin Inisyatiba

12. Ano an sinasabi sa sato kan mga tataramon na “hahanapon an sarong nawara” kun dapit sa aktitud kan pastor?

¹² Sa enot kan duwang ilustrasyon, sinasabi ni Jesus na ‘hahanapon kan pastor an sarong nawara.’ An pastor naggibo nin inisyatiba asin odok na paghihingoa na hanapon an nawawarang karnero. An sakit, peligro, asin rayo dai nakapopogol sa saiya. Al kontraryo, nagprosegir an pastor “sagkod na manompongan nia iyan.”​—Lucas 15:4.

13. Ano an ginibo kan fiel na mga lalaki kan suanoy tanganing asikasohon an mga pangangaipo kan mga maluya, asin paano niato maaarog an siring na mga halimbawa sa Biblia?

¹³ Kaagid kaiyan, an pagtabang sa sarong nangangaipo nin pagparigon sa boot sa parate nagkakaipo na an mas makosog an gumibo nin inisyatiba. Nasabotan ini kan fiel na mga lalaki kan suanoy. Halimbawa, kan marisa ni Jonatan, aki ni Hadeng Saul, na an saiyang dayupot na katood na si David nangangaipo nin pagparigon sa boot, si Jonatan “tuminindog asin nagduman ki David sa Hores, tangani na mapakosog nia an saiyang kamot manongod sa Dios.” (1 Samuel 23:15, 16) Dakol na siglo an nag-agi, kan maheling ni Gobernador Nehemias na nanluluya na an nagkapira sa saiyang mga tugang na Judio, sia man ‘tolos-tolos na tuminindog’ asin pinarigon an boot ninda na ‘papagdanayon sa isip si Jehova.’ (Nehemias 4:14) Boot man niato ngonyan na ‘tumindog’—gumibo nin inisyatiba—tanganing pakosogon an mga maluya. Alagad siisay sa kongregasyon an maninigong gumibo kaiyan?

14. Siisay sa Kristianong kongregasyon an maninigong tumabang sa mga maluya?

¹⁴ An Kristianong kamagurangan, partikularmente, igwa nin paninimbagan na ‘pakosogon an  maluyang mga kamot asin paposogon an nagkokobogkobog na mga tuhod’ asin na ‘sabihan an may naghahadit na puso: “Magpakakosog kamo. Dai kamo matakot.”’ (Isaias 35:​3, 4; 1 Pedro 5:​1, 2) Minsan siring, mangnohon na an sadol ni Pablo na “magtaram na may pagranga sa mga kalag na nagmomondo nin makuri” asin na “suportaran an maluya” bakong sa kamagurangan sana itinao. Imbes, an mga tataramon ni Pablo ipinanongod sa bilog na “kongregasyon kan mga taga Tesalonica.” (1 Tesalonica 1:1; 5:14) Sa siring an pagtabang sa mga maluya trabaho kan gabos na Kristiano. Arog kan pastor sa ilustrasyon, an lambang Kristiano maninigong ‘maghanap sa sarong nawara.’ Siempre, magigibo ini nin pinakaepektibo paagi sa pakipagkooperar sa kamagurangan. Puede daw kamong gumibo nin pirang paagi na tabangan an sarong maluya sa saindong kongregasyon?

Magin Maboot

15. Tadaw ta siring kaiyan an ginibo kan pastor?

¹⁵ Ano an gigibohon kan pastor kun sa katapustapusi manompongan nia an nawarang karnero? “Saiyang papasanon iyan.” (Lucas 15:5) Abaa kanakapupukaw sa boot asin makahulogan na detalye! An karnero tibaad pirang aldaw asin bangging naglagawlagaw sa dai nia kabisadong lugar, tibaad nameligro pa ngani sa nanlalapag na mga leon. (Job 38:39, 40) Daing duda na nanluya an karnero sa kakulangan nin pagkakan. Talagang maluya na an hawak kaiyan tanganing makaya sa sadiring kosog kaiyan an mga kaolangan na aatubangon kaiyan pabalik sa aripompon. Kun siring, duminuko an pastor, maboot na inalsa an karnero, asin kinarga iyan tanganing lampasan an gabos na kaolangan pasiring sa aripompon. Paano niato ikapababanaag an pag-asikasong ipinaheling kan pastor na ini?

16. Taano ta maninigo niatong ipabanaag an kabootan na ipinaheling kan pastor sa nalagalag na karnero?

¹⁶ An saro na nawara sa kongregasyon tibaad pagal-pagal na sa espirituwal na sentido. Arog kan karnero na napasuhay sa pastor, an siring na indibiduwal tibaad naglagawlagaw na daing direksion sa lugar kan masakit na kinaban na ini. Kun mayo kan proteksion na itinatao kan toril, an Kristianong kongregasyon, sia nameligrong marhay kisa noarin man sa mga pagsalakay kan Diablo, na “naglalakaw na siring sa nagngangarob na leon, na naghahanap nin masisiba.” (1 Pedro 5:8) Saro pa, nanluluya sia dahelan sa kadaihan nin espirituwal na pagkakan. Huli kaini, kun solo sia posibleng marhay na maluyahon na sia tanganing makaya an mga kaolangan na aatubangon nia sa saiyang pagbalik sa kongregasyon. Kun siring, kaipuhan kitang dumuko, sabi ngani, maboot na alsahon an maluya, asin kargahon sia pabalik. (Galacia 6:2) Paano daw niato iyan magigibo?

17. Paano niato maaarog si apostol Pablo kun igwa kita nin dinadalaw na maluya?

¹⁷ Si apostol Pablo nagsabi: “Kun an siisay man maluya, bako daw na ako maluya man?” (2 Corinto 11:29, The New English Bible; 1 Corinto 9:22) May empatiya si Pablo sa mga tawo, kabale na an mga maluya. Boot niatong ipaheling an kaparehong pakikipagkapwa sa mga maluya. Kun dinadalaw an sarong Kristianong maluya sa espirituwal, aseguraron giraray sia na sia mahalaga sa pagheling ni Jehova asin hinahanaphanap na gayo  kan saiyang mga kapwa Saksi. (1 Tesalonica 2:17) Ipaaram sa saiya na sinda andam na suportaran sia asin gustong magin “tugang [nia] na namundag manongod sa panahon nin kasakitan.” (Talinhaga 17:17; Salmo 34:18) An satong odok sa pusong mga kapahayagan tibaad maboot asin luway-luway na makaenkaminar sa saiya sagkod na mahimo na niang bumalik sa aripompon. Ano an maninigo na sunod niatong gibohon? An ilustrasyon kan babae asin kan nawarang sinsilyo nagtatao sa sato nin giya.

Magin Maigot

18. (a) Taano ta dai nawaran nin paglaom an babae sa ilustrasyon? (b) Anong maigot na paghihingoa an ginibo kan babae, asin may anong resulta?

¹⁸ An babaeng nawaran nin sinsilyo nakakaaram na an kamugtakan masakit alagad bakong dai nang paglaom. Kun an sinsilyo naholog kutana sa sarong dakula, mapalongpong na kaomahan o sa sarong hararom, malapok na danaw, posibleng iisipon nia na imposible nang makua pa iyan. Minsan siring, sa pakaaram na an sinsilyo yaon man sana kun saen sa saiyang harong, na manonompongan pa, pinonan nia an maingat asin maigot na paghanap. (Lucas 15:8) Enot, sinoloan nia an sarong lampara tanganing ilawan an saiyang madiklom na harong. Dangan, nagsighid sia sa salog, na naglalaom na makadangog nin karagting. Sa katapustapusi, maingat siang naghanap sa gabos na lugar sagkod na masinagan kan lampara an sarong sinsilyong pirak. Binalosan an maigot na paghihingoa kan babae!

19. Anong leksion sa pagtabang sa mga maluya an manonodan niato sa mga ginibo kan babae sa ilustrasyon kan nawarang sinsilyo?

¹⁹ Siring kan ipinagigirumdom sa sato kan detalyeng ini sa ilustrasyon, kaya niatong gibohon an sono sa Kasuratan na obligasyon na tabangan an sarong maluyang Kristiano. Kadungan kaiyan, aram ta na nagkakaipo iyan nin paghihingoa. Total, si apostol Pablo nagsabi sa kamagurangan sa Efeso: “Paagi sa siring na pagpagal dapat nindong tabangan an mga maluya.” (Gibo 20:35a) Tandaan na dai nanompongan kan babae an sinsilyo paagi sa basta sana pagkalagkalag sa saiyang harong, kun saen-saen sana, o insidental sana, patibasang sana. Dai, nakua nia iyan huli ta sia sistematikong naghanap “sagkod na manompongan nia iyan.” Kaagid kaiyan, kun hinihingoa niato na ikabalik an indibiduwal na maluya sa espirituwal, an satong paagi kaipuhan na magin maigot asin makatuyohan. Ano an puede niatong gibohon?

20. Ano an magigibo tanganing tabangan an mga maluya?

²⁰ Paano niato matatabangan an sarong maluya na mapatalubo an pagtubod asin pagpapahalaga? An personal na pag-adal sa Biblia sa sarong angay na Kristianong publikasyon tibaad iyo sana an kaipuhan. Tunay nanggad, an pamamayo nin pag-adal sa Biblia sa sarong indibiduwal na maluya nagpapangyari sa sato na matabangan sia sa dagos-dagos asin lubos na paagi. Posibleng marhay na an paraataman sa paglilingkod an makakadeterminar kun siisay an puedeng makatao kan kinakaipuhan na tabang. Puede siang magsuherir kun anong mga tema an puedeng pag-adalan asin kun arin na publikasyon an pinakamakatatabang. Kun paanong an babae sa ilustrasyon naggagamit nin nakatatabang na mga kasangkapan tanganing  gibohon an saiyang trabaho, igwa man kita ngonyan nin mga kasangkapan na nagtatabang sa sato na mahaman an tao nin Dios na paninimbagan niato na tabangan an mga maluya. Duwa sa satong bagong mga kasangkapan, o mga publikasyon, an espesyalmenteng makatatabang sa paghihingoang ini. Iyan an librong Worship the Only True God asin Rumani ki Jehova. *

21. Paano nagtatao nin mga bendisyon sa gabos an pagtabang sa mga maluya?

²¹ An pagtabang sa mga maluya nagtatao nin bendisyon sa gabos. Namamatean kan saro na tinabangan an kaogmahan na makaibanan giraray an tunay na mga katood. Naeeksperyensiahan niato an odok sa pusong kagayagayahan na ibinubunga solamente nin pagtatao. (Lucas 15:​6, 9; Gibo 20:35b) Nag-ooswag an mainit na pakikiiba kan kongregasyon sa kabilogan mantang an lambang miembro nagpapaheling nin mamomoton na interes sa iba. Asin orog sa gabos, natatawan nin onra an satong mapagmakolog na mga Pastor, si Jehova asin si Jesus, mantang an pagmawot ninda na suportaran an mga maluya nababanaag sa saindang mga lingkod digdi sa daga. (Salmo 72:12-14; Mateo 11:28-30; 1 Corinto 11:1; Efeso 5:1) Kun siring, kanigoan karahay kan dahelan niato na padagos na ‘kita magkaminorootmootan’!

[Nota sa Ibaba]

Ikapaliliwanag daw Nindo?

• Taano ta mahalagang marhay sa lambang saro sa sato an pagpaheling nin pagkamoot?

• Taano ta maninigo niatong ipaheling an satong pagkamoot sa mga maluya?

• Anong leksion an itinotokdo sa sato kan ilustrasyon kan nawarang karnero asin kan nawarang sinsilyo?

• Anong praktikal na mga paagi an puede niatong gibohon tanganing tabangan an sarong maluya?

[Mga Hapot Para sa Pag-adal]

[Mga Ritrato sa pahina 16, 17]

Sa pagtabang sa mga maluya, kita naggigibo nin inisyatiba asin na kita maboot patin maigot

[Ritrato sa pahina 16, 17]

An pagtabang sa mga maluya nagtatao nin mga bendisyon sa gabos