‘Padagos na Magbunga nin Dakol’

‘Padagos kamong magbunga nin dakol asin patunayan nindo na kamo sakong mga disipulo.’—JUAN 15:8.

1. (a) Anong kahagadan sa pagkadisipulo an sinambit ni Jesus sa saiyang mga apostol? (b) Ano an maninigo niatong ihapot sa satong sadiri?

BANGGI kaidto bago kan saiyang kagadanan. Nagtao si Jesus nin bastanteng panahon tanganing parigonon an boot kan saiyang mga apostol paagi sa puso sa pusong pakikipag-olay. Siertong lampas na sa matanga kaidto, alagad si Jesus, na napahiro nin pagkamoot sa saiyang dayupot na mga katood, nagpadagos pa sa pagtaram. Dangan, sa katahawan kan saiyang pakikipag-olay, ipinagirumdom nia sa sainda an saro pang kahagadan na kaipuhan nindang maabot tanganing magdanay na mga disipulo nia. Sia nagsabi: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo.” (Juan 15:8) Naaabot ta daw ngonyan an kahagadan na ini sa pagkadisipulo? Ano an boot sabihon kan ‘pagbunga nin dakol’? Tanganing maaraman iyan, balikan niato an orolay kan bangging idto.

2. Anong ilustrasyon manongod sa bunga an isinaysay ni Jesus kan banggi bago sia magadan?

² An sadol na magbunga kabtang nin sarong ilustrasyon na isinaysay ni Jesus sa saiyang mga apostol. Sia nagsabi: “Ako iyo an tunay na poon nin ubas, asin an sakong Ama iyo an paraataman. An lambang sanga sa sako na dai nagbubunga hinahale  nia, asin an lambang nagbubunga linilinig nia, tanganing iyan magbunga nin orog. Kamo mga malinig na huli kan tataramon na ipinagtaram ko sa saindo. Magdanay kamong kasaro ko, asin ako kasaro nindo. Kun paanong an sanga dai makakapagbunga sa saiya man sana kun dai iyan magdanay sa poon nin ubas, ni kamo man, kun dai kamo magdanay na kasaro ko. Ako an poon nin ubas, kamo an mga sanga. . . . An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo. Kun paanong namomotan ako kan Ama asin namomotan ko kamo, magdanay kamo sa sakong pagkamoot. Kun otobon nindo an sakong mga togon, magdadanay kamo sa sakong pagkamoot.”—Juan 15:1-10.

3. Ano an dapat na gibohon kan mga parasunod ni Jesus tanganing magbunga?

³ Sa ilustrasyon na ini si Jehova an Paraataman, si Jesus an poon nin ubas, asin an mga apostol na kaolay ni Jesus iyo an mga sanga. Sagkod na hinihingoa kan mga apostol na ‘magdanay na kasaro’ ni Jesus, sinda magbubunga. Dangan ipinaliwanag ni Jesus kun paano magigin mapanggana an mga apostol sa pagpapadanay kan mahalagang marhay na pagkakasarong ini: “Kun otobon nindo an sakong mga togon, magdadanay kamo sa sakong pagkamoot.” Kan huri, nagsurat si apostol Juan nin kaagid na mga tataramon sa mga kapwa Kristiano: “An nagkukuyog sa . . . mga pagboot [ni Cristo] nagdadanay na kasaro nia.” * (1 Juan 2:24; 3:24) Huli kaini, paagi sa pag-otob sa mga togon ni Cristo, an saiyang mga parasunod nagdadanay na kasaro nia, asin an pagkakasaro na iyan man an nagpapangyari sa sainda na magbunga. Anong klase an kaipuhan na ibunga niato?

Oportunidad Para sa Pagdakol

4. Ano an manonodan ta sa bagay na “hinahale” ni Jehova an lambang sanga na dai nagbubunga?

⁴ Sa ilustrasyon kan poon nin ubas, “hinahale” o pinuputol ni Jehova an sarong sanga kun dai iyan nagbubunga. Ano an sinasabi kaini sa sato? Bako sanang sinasabi kaiyan sato na an gabos na disipulo hinagadan na magbunga kundi siring man na an gabos may kakayahan na magbunga, ano man an tibaad mga kamugtakan o limitasyon ninda. Total, kontra sa mamomoton na pamamaagi ni Jehova na ‘haleon,’ o idiskualipikar, an sarong disipulo ni Cristo huli sa dai pakahimo sa sarong bagay na dai nia kaya.—Salmo 103:14; Colosas 3:23; 1 Juan 5:3.

5. (a) Paano ipinaririsa kan ilustrasyon ni Jesus na puede niatong padakolon an satong bunga? (b) Anong duwang klase nin bunga an pag-oolayan niato?

⁵ Ipinaheheling man kan ilustrasyon ni Jesus kan poon nin ubas na segun sa itinotogot kan satong mga kamugtakan, dapat kitang humanap nin oportunidad na dumakol an satong aktibidad bilang sarong disipulo. Mangnoha an pagkasabi kaiyan ni Jesus: “An lambang sanga sa sako na dai nagbubunga hinahale nia, asin an lambang nagbubunga linilinig nia, tanganing iyan magbunga nin orog.” (Juan 15:2) Sa huring kabtang kan ilustrasyon, sinadol ni Jesus an saiyang mga parasunod na “magbunga nin dakol.” (Bersikulo 8) Ano an ipinapasabot kaiyan? Bilang mga disipulo, maninigo na nungka kitang magin kontento na sa sadiri. (Kapahayagan 3:14, 15, 19) Imbes, maninigo kitang humanap nin mga paagi na dumakol an bunga. Anong klase an maninigo na hingoahon niatong ibunga nin mas dakol pa? Yaon (1) “an bunga kan espiritu” asin (2) an bunga kan Kahadean.—Galacia 5:​22, 23; Mateo 24:14.

An Bunga na Kristianong mga Kualidad

6. Paano idinoon ni Jesu-Cristo an halaga kan enot na sinambit na bunga kan espiritu?

⁶ Enot sa lista kan “bunga kan espiritu” an pagkamoot. Pinatatalubo kan banal na espiritu nin Dios an pagkamoot sa laog kan mga Kristiano, ta kinukuyog ninda an pagboot na itinao ni Jesus bago nia sinabi an ilustrasyon kan nagbubungang poon nin ubas. Sinabihan nia an saiyang mga apostol: “Tinatawan ko kamo nin bagong togon, na kamo magkaminorootmootan.” (Juan 13:34) Sa katunayan, durante kan saiyang pakikipag-olay kan ultimong bangging idto kan saiyang buhay sa daga, paorootrong ipinagirumdom ni Jesus sa mga apostol an pangangaipong ipaheling an kualidad na pagkamoot.—Juan 14:15, 21, 23, 24; 15:12, 13, 17.

7. Paano ipinaheling ni apostol Pedro na an pagbunga konektado sa pagpaheling nin arog-Cristong mga kualidad?

⁷ Nasabotan ni Pedro, na presente kan bangging idto, na an arog-Cristong pagkamoot asin konektadong mga kualidad dapat na maheling sa tunay na mga disipulo ni Cristo. Pakalihis nin dakol na taon,  inenkaminar ni Pedro an mga Kristiano na kultibaron an mga kualidad na arog kan pagpopogol sa sadiri, kapadangatan sa tugang, asin pagkamoot. Sinabi pa nia na an paggibo kaiyan mag-iingat sa sato na “dai magin inaktibo o daing bunga.” (2 Pedro 1:5-8) Ano man an satong mga kamugtakan, mahihimo niatong ikapaheling an bunga kan espiritu. Kun siring, logod na magmaigot kitang ipaheling nin orog an pagkamoot, kabootan, kahoyoan, asin iba pang arog-Cristong kualidad, huli ta “tumang sa mga siring dai nin ley,” o limite. (Galacia 5:23) Tunay nanggad, “magbunga [kita] nin orog.”

Magbunga kan Bunga kan Kahadean

8. (a) Ano an koneksion kan bunga kan espiritu asin kan bunga kan Kahadean? (b) Anong hapot an maninigo niatong pensaron?

⁸ An makolor asin matagok na mga bunga adorno nin sarong tinanom. Minsan siring, an halaga nin siring na mga bunga nakalalabi pa sa halaga nin adorno. An mga bunga mahalaga man na marhay tanganing magdakol an tinanom paagi sa mga banhi kaiyan. Kaagid kaiyan, an bunga kan espiritu bako sanang adorno sa satong Kristianong personalidad. An mga kualidad na arog kan pagkamoot asin pagtubod nagmomotibar man sa sato na palakopon an arog sa banhi na mensahe kan Kahadean na yaon sa Tataramon nin Dios. Mangnoha kun paano idinodoon ni apostol Pablo an mahalagang marhay na koneksion na ini. Sabi nia: “Kami man nagtutubod [sarong kabtang kan bunga kan espiritu] asin kun siring kami man nagtataram.” (2 Corinto 4:13) Sa paaging ini, an paliwanag pa ni Pablo, kita ‘nagdodolot sa Dios nin atang nin pag-omaw, na iyo, an bunga nin mga ngabil’​—an ikaduwang klase nin bunga na kaipuhan niatong ipaheling. (Hebreo 13:15) Igwa daw nin mga oportunidad sa satong buhay tanganing magin mas mabunga, tangani nanggad na “magbunga nin orog,” bilang mga parabalangibog kan Kahadean nin Dios?

9. An pagbunga daw kapareho man sana nin paggibo nin mga disipulo? Ipaliwanag.

⁹ Tanganing makasimbag nin tama, kaipuhan nguna niatong masabotan kun ano an bunga kan Kahadean. Tama daw na ikonklusyon na an pagbunga nangangahulogan nin paggibo nin mga disipulo? (Mateo 28:19) An bunga daw niato pangenot na nanonongod sa mga indibiduwal na tinatabangan niato na magin bautisadong mga parasamba ki Jehova? Dai. Kun arog kaiyan, an kamugtakan makapanluluyang marhay sa boot kan gabos na mahal niatong Saksi na dakol na taon nang fiel na nagbabalangibog kan mensahe kan Kahadean sa mga teritoryo na mayong gayong nag-aako. Tara, kun an ibinubunga niatong bunga kan Kahadean irinerepresentar sana nin bagong mga disipulo, an mahihigos na Saksing iyan magigin siring sa dai nagbubungang mga sanga sa ilustrasyon ni Jesus! Siempre, bakong siring kaiyan. Kaya, ano an pangenot na bunga kan Kahadean sa satong ministeryo?

Mabunga Paagi sa Pagpalakop kan Banhi kan Kahadean

10. Paano ipinaheheling kan ilustrasyon ni Jesus kan parasabwag asin kan laen-laen na klase nin daga kun ano an bunga kan Kahadean asin kun ano an bakong kahulogan kaiyan?

¹⁰ An ilustrasyon ni Jesus kan parasabwag asin kan laen-laen na klase nin daga an nagsasabi kan simbag​—sarong nakapakokosog sa boot na simbag para sa mga nagpapatotoo sa mga teritoryo na bakong gayong mabunga. Sinabi ni Jesus na an banhi iyo an mensahe kan Kahadean na yaon sa Tataramon  nin Dios asin na an daga nagrerepresentar sa piguratibong puso nin tawo. An nagkapirang banhi “naholog sa marahay na daga, asin, pagsupang, iyan namunga.” (Lucas 8:8) Anong bunga? Bueno, pakatapos na magsupang asin magtalubo an poon nin trigo, iyan nagkakaigwa bilang bunga, bakong nin saradit na poon nin trigo, kundi nin bagong banhi. Kaagid kaiyan, an sarong Kristiano nagkakaigwa bilang bunga, bako man talaga nin bagong mga disipulo, kundi nin bagong banhi kan Kahadean.

11. Paano puedeng ipaliwanag an kahulogan kan bunga kan Kahadean?

¹¹ Kun siring, an bunga sa kamugtakan na ini bakong bagong mga disipulo ni marahay na Kristianong mga kualidad. Huling an banhi na isinabwag iyo an tataramon kan Kahadean, an bunga siertong nanonongod sa orog pang pagdakol kan banhi na iyan. An pagbunga sa kamugtakan na ini nanonongod sa paggibo nin mga kapahayagan manongod sa Kahadean. (Mateo 24:14) Mahihimo daw niato na magbunga kan siring na bunga kan Kahadean​—an pagbalangibog kan maogmang bareta kan Kahadean—ano man an tibaad mga kamugtakan niato? Iyo! Sa ilustrasyon man sanang iyan, ipinaliliwanag ni Jesus kun taano.

Pagtao kan Satong Pinakamakakaya sa Ikamumuraway nin Dios

12. Mahihimo daw kan gabos na Kristiano na magbunga kan bunga kan Kahadean? Ipaliwanag.

¹² An “nakasabwag sa marahay na daga,” sabi ni Jesus, “nagbubunga, an sarong ini mananggatos, an sarong iyan manganom na polo, an saro pa manolong polo.” (Mateo 13:23) An mga tipasi na isinabwag sa sarong oma puedeng magkakalaen an  kadakolan nin ani segun sa mga kamugtakan. Kaagid kaiyan, an mahihimo niato sa pagbalangibog kan maogmang bareta puedeng magkakalaen segun sa satong mga kamugtakan, asin ipinaheling ni Jesus na rinerekonoser nia ini. An nagkapira tibaad mas dakol an oportunidad; an iba tibaad mas marahay an salud asin mas makosog. Sa siring, an nahihimo niato tibaad mas dakol o tibaad mas dikit kisa nagigibo nin iba, alagad sagkod na iyo iyan an satong pinakamakakaya, naoogma si Jehova. (Galacia 6:4) Dawa kun nalilimitaran an satong kabtang sa paghuhulit dahel sa pagkagurang o nakapanluluyang helang, daing duda na an satong maheherakon na Ama, si Jehova, minamansay kita bilang saro sa mga “padagos na nagbubunga nin dakol.” Taano? Huli ta itinatao niato sa saiya ‘an gabos na yaon sa sato’—an satong bilog na kalag na paglilingkod. *—Marcos 12:​43, 44; Lucas 10:27.

13. (a) Ano an pangenot na dahelan na kita “magpadagos” na magbunga kan bunga kan Kahadean? (b) Ano an makatatabang sa sato na padagos na magbunga sa mga teritoryo na mayong gayong nag-aako? (Helingon an kahon sa pahina 21.)

¹³ Ano man an makakaya niato na magbunga kan bunga kan Kahadean, mapahihiro kitang “magpadagos asin padagos na magbunga” kun padagos niatong isinasaisip kun taano ta ginigibo niato iyan. (Juan 15:16) Sinabi ni Jesus an pangenot na dahelan: “An sakong Ama napapamuraway kaini, na kamo padagos na nagbubunga nin dakol.” (Juan 15:8) Iyo, sinasantipikar kan satong paghuhulit an ngaran ni Jehova sa atubangan kan bilog na katawohan. (Salmo 109:30) Si Honor, sarong fiel na Saksi na mga 75 anyos na, nagsabi: “Dawa sa mga teritoryo na mayong gayong nag-aako, sarong pribilehio na irepresentar an Kaharohalangkawe.” Kan hapoton si Claudio, na sarong maigot na Saksi poon pa kan 1974, kun taano ta padagos siang naghuhulit dawa ngani dikit an naghihinanyog sa saiyang teritoryo, kinotar nia an Juan 4:34, kun saen mababasa niato an mga tataramon ni Jesus: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” Sinabi pa ni Claudio: “Arog ni Jesus, boot ko na bako sanang ponan kundi patin taposon an sakong gibohon bilang parabalangibog kan Kahadean.” (Juan 17:4) Minaoyon an mga Saksi ni Jehova sa bilog na kinaban.—Helingon an kahon na “Kun Paano ‘Magbubunga na May Pakatagal,’” sa pahina 21.

Maghulit Asin Magtokdo

14. (a) Ano an duwang katuyohan kan gibohon ni Juan na Bautisador asin ni Jesus? (b) Paano mo ilaladawan an Kristianong aktibidad ngonyan?

¹⁴ An enot na parabalangibog kan Kahadean na nasambitan sa mga Ebanghelyo iyo si Juan na Bautisador. (Mateo 3:​1, 2; Lucas 3:18) An pangenot niang katuyohan “magpatotoo,” asin ginibo nia iyan na may odok sa pusong pagtubod asin naglalaom na “an gabos na klase nin tawo magtubod.” (Juan 1:6, 7) Sa katunayan, an nagkapira sa nahulitan ni Juan nagin mga disipulo ni Cristo. (Juan 1:35-37) Huli kaini, si Juan sarong parahulit saka paragibo nin disipulo. Si Jesus parahulit asin paratokdo man. (Mateo 4:23; 11:1) Kun siring, bakong makangangalas na pinagbotan ni Jesus an saiyang mga parasunod na bako sanang maghulit kan mensahe kan Kahadean kundi patin tabangan an mga indibiduwal na nag-aako kaiyan na magin saiyang mga disipulo. (Mateo 28:19, 20) Sa siring an gibohon niato ngonyan kombinasyon nin paghuhulit asin pagtotokdo.

15. Ano an pagkakapareho kan reaksion sa paghuhulit kaidtong enot na siglo C.E. asin sa ngonyan?

¹⁵ Sa mga nakadangog kan enot na siglo C.E. sa paghuhulit asin pagtotokdo ni Pablo, “an nagkapira nagpoon na tumubod sa mga bagay na isinabi; an iba habong tumubod.” (Gibo 28:24) Ngonyan, parehong-pareho an reaksion. Makamomondo, an kadaklan na banhi kan Kahadean nahoholog sa daga na dai nag-aako. Dawa siring, an nagkapirang banhi nahoholog pa man giraray sa marahay na daga, nagkakagamot, asin nagsusupang, siring kan  ihinula ni Jesus. Sa katunayan, sa bilog na kinaban, may promedyong labing 5,000 katawo an nagigin tunay na disipulo ni Cristo kada semana kan taon! An bagong mga disipulong ini ‘nagtutubod sa mga bagay na isinabi,’ minsan ngani an kadaklan na iba pa dai. Ano an nakatabang sa paggibo kan saindang puso na mag-ako kan mensahe kan Kahadean? Sa parate may dakulang epekto an personal na interes na ipinaheheling kan mga Saksi​—an pagbaribi sa bagong isabwag na banhi, sabi ngani. (1 Corinto 3:6) Estudyare an duwa sana sa dakol na halimbawa.

May Dakulang Epekto an Personal na Interes

16, 17. Taano ta mahalaga na magpaheling nin personal na interes sa mga nanonompongan niato sa satong ministeryo?

¹⁶ Sinongko ni Karolien, sarong hoben na Saksi sa Belhika, an sarong may edad nang babae na mayo nin interes sa mensahe kan Kahadean. Huling may benda an kamot kan babae, si Karolien asin an kaiba nia nag-alok na tumabang, alagad nagsayuma an babae. Pakalihis nin duwang aldaw binalikan kan mga Saksi man sanang iyan an harong kan babae asin kinumusta ini. “Dakula an nagin epekto kaini,” sabi ni Karolien. “Napangalas sia na maheling na kami interesado talaga sa saiya bilang tawo. Pinadagos nia kami, asin naponan an sarong pag-adal sa Biblia.”

¹⁷ Si Sandi, sarong Saksi sa Estados Unidos, nagpapaheling man nin personal na interes sa mga hinuhulitan nia. Hineheling nia sa sarong lokal na peryodiko an mga anunsio dapit sa bagong mamundag na mga aki dangan sinosongko an mga bagong magin magurang na dara an My Book of Bible Stories. * Huling an ina sa parate nasa harong na asin ogmahon na ipinaheheling an aki nia sa mga bisita, sa parate nagkakaigwa nin pag-oolay. “Ipinakikipag-olay ko sa mga magurang an halaga nin pagkaigwa nin dayupot na relasyon sa bagong mamundag na aki paagi sa pagbasa,” an paliwanag ni Sandi. “Pagkatapos ipinakikipag-olay ko an manongod sa mga angat nin pagpadakula sa aki sa presenteng sosyedad.” Kasuarin pa sana, bilang resulta kan siring na pagsongko, sarong ina asin anom na aki an nagpoon nang maglingkod ki Jehova. An pagpaheling nin inisyatiba asin personal na interes puedeng magbunga nin kaagid na magayagayang mga resulta sa satong ministeryo.

18. (a) Taano ta mahihimo niato gabos na maabot an kahagadan na ‘magbunga nin dakol’? (b) Anong tolong kahagadan sa pagkadisipulo na sinambit sa Ebanghelyo ni Juan an determinado nindong aboton?

¹⁸ Nakapakokosog nanggad liwat sa boot na maaraman na mahihimo niatong maabot an kahagadan na ‘padagos na magbunga nin dakol’! Baga man kita hoben o gurang, baga man marahay o maluya an satong salud, baga man kita naghuhulit sa mga teritoryo na dakol an o mayong gayong nag-aako, kaya niato gabos na magbunga nin dakol. Paano? Paagi sa mas lubos na pagpaheling kan bunga kan espiritu asin paagi sa pagpalakop kan mensahe kan Kahadean nin Dios sa pinakamakakaya niato. Kadungan kaiyan, pinagmamaigotan niatong ‘magdanay sa tataramon ni Jesus’ asin ‘magkaminorootmootan.’ Iyo, paagi sa pakaabot sa tolong mahalagang kahagadan na ini sa pagkadisipulo na sinambit sa Ebanghelyo ni Juan, pinatutunayan niato na kita ‘tunay na mga disipulo’ ni Cristo.—Juan 8:31; 13:35.

[Mga Nota sa Ibaba]

Mga Hapot Para sa Repaso

• Anong klaseng bunga an kaipuhan niatong ibunga nin abunda?

• Taano ta mahihimo niatong maabot an pasohan na ‘magbunga nin dakol’?

• Anong tolong mahalagang kahagadan sa pagkadisipulo na sinambit sa Ebanghelyo ni Juan an tinokar niato?

[Mga Hapot Para sa Pag-adal]

[Kahon/Ritrato sa pahina 21]

KUN PAANO ‘MAGBUBUNGA NA MAY PAKATAGAL’

ANO an nakatatabang sa saindo na fiel na magpadagos sa paghuhulit kan mensahe kan Kahadean sa mga teritoryo na mayong gayong nag-aako? Uya an nagkapirang nakatatabang na simbag sa hapot na ini.

“An pakaaram na yaon sa sato an bilog na suporta ni Jesus nakaiinspirar na magin positibo asin magpadagos, ano man an reaksion sa teritoryo.”—Harry, 72 anyos; nabautismohan kan 1946.

“An teksto sa 2 Corinto 2:17 pirmeng nagpaparigon sa boot ko. Sinasabi kaiyan na kita nakikikabtang sa ministeryo ‘na naheheling nin Dios, kaiba ni Cristo.’ Kun ako nasa ministeryo, naoogma akong makaibanan an sakong pinakadayupot na mga katood.”​—Claudio, 43 anyos; nabautismohan kan 1974.

“An totoo, para sa sako personalmenteng masakit an paghuhulit. Pero, naeeksperyensiahan ko an pagigin totoo kan mga tataramon na yaon sa Salmo 18:29: ‘Sa kaibahan kan sakuyang Dios makakasakat ako sa lanob.’”—Gerard, 79 anyos; nabautismohan kan 1955.

“Kun nakakabasa ako nin saro sanang teksto sa ministeryo, naoogma ako na may saro na nasiyasat kan Biblia an saiyang puso.”​—Eleanor, 26 anyos; nabautismohan kan 1989.

“Pirme kong hinihingoang gamiton an laen-laen na presentasyon. Kadakol iyan kaya dai ko iyan gabos magagamit sa natatada pang mga taon kan sakong buhay.”​—Paul, 79 anyos; nabautismohan kan 1940.

“Dai ko pinepersonal an negatibong mga reaksion. Hinihingoa kong magin relaks sa pagdolok, na kinakaolay an mga tawo asin hinihinanyog an saindang mga punto de vista.”—Daniel, 75 anyos; nabautismohan kan 1946.

“May nakaolay akong bagong mga mabautismohan na nagsabi sa sako na an sakong paghuhulit nakatabang na sinda magin Saksi. Dai ko aram, may iba palan na kan huri namayo nin pag-adal sa sainda sa Biblia asin tinabangan sindang umoswag. Nakagagayagaya para sa sako na maaraman na an satong ministeryo pagtitinarabangan bilang grupo.”—Joan, 66 anyos; nabautismohan kan 1954.

Ano an nakatatabang sa saindo na ‘magbunga na may pakatagal’?​—Lucas 8:15.

[Mga Ritrato sa pahina 20]

Paagi sa pagpaheling kan bunga kan espiritu asin paagi sa pagbalangibog kan mensahe kan Kahadean, kita nagbubunga nin dakol

[Ritrato sa pahina 23]

Ano an boot sabihon ni Jesus kan sabihon nia sa saiyang mga apostol: ‘Padagos na magbunga nin dakol’?