Sinseridad—Kawiliwili, Alagad Igo Na daw Iyan?

AN SINSERIDAD daw talagang kawiliwili sa satong pan-aroaldaw na buhay? Tinatawan nin kahulogan kan sarong diksionaryo an “sinseridad” bilang “kadaihan nin pagsaginsagin o ipokresiya; pagkaonesto; pagigin prangka; pagigin tunay.” Malinaw nanggad, an kualidad na ini kapakipakinabang sa pagpaoswag nin marahay na relasyon sa iba. Si apostol Pablo nagsadol: “Magin kamong makinuyog sa gabos na bagay sa saindong mga kagurangnan sa laman, bakong sa mga gibo nin paheling sanang paglilingkod, siring kan mga nagpapanigo sa mga tawo, kundi odok sa puso, na may takot ki Jehova.” (Colosas 3:22) Siisay an dai maoogmang magkaigwa nin siring na sinserong tawo na nagtatrabaho sa saiya? Ngonyan, an sinserong mga tawo tibaad may mas marahay na oportunidad na magkaigwa asin magdanay sa saindang trabaho.

Minsan siring, an nagpapagin kawiliwiling marhay sa sinseridad iyo an kun paano iyan nakaaapektar sa satong relasyon sa Dios. Nakamtan kan suanoy na mga Israelita an bendisyon nin Dios kan maingat nindang inootob an mga ley asin kapiestahan. Kan tinotokar an kalinigan kan kongregasyon, sinadol ni Pablo an mga Kristiano: “Otobon ta an kapiestahan, bakong sa daan na lebadura, ni sa lebadura nin karatan asin kabikoan, kundi sa daing lebadurang mga tinapay nin sinseridad asin katotoohan.” (1 Corinto 5:8) Tanganing akoon nin Dios an satong pagsamba, an sinseridad bako sanang kawiliwili kundi mahalaga man na marhay. Pero, mangnohon na bakong igo an sinseridad sana. Kaipuhan na ibanan iyan nin katotoohan.

An mga naggibo asin pasahero kan Titanic tibaad sinserong nagtutubod na an barkong iyan dai malulunod. Minsan siring, sa primerong biahe kaiyan kan 1912, buminangga iyan sa sarong dakulang tipak nin yelo na iinaanod asin 1,517 katawo an nagadan. An nagkapirang Judio kan enot na siglo tibaad sinserong nagtutubod sa saindang paagi nin pagsamba sa Dios, alagad an saindang kaigotan “bakong oyon sa tamang kaaraman.” (Roma 10:2) Tanganing akoon kita nin Dios, an satong sinserong mga paniniwala kaipuhan na basado sa tamang impormasyon. An mga Saksi ni Jehova sa saindong komunidad maoogmang tabangan kamo na siyasaton kun ano an kalabot sa paglilingkod sa Dios na may sinseridad asin katotoohan.