Aprobetsaran an Nagbabagong mga Kamugtakan

Si Pum, Jan, Dries, asin Otto, apat na Kristianong kamagurangan na nag-iistar sa Netherlands, magkakapareho sa dakol na bagay. Sindang apat gabos may agom asin mga aki. Dugang pa, nagkapirang taon na an nakaagi, gabos sinda may bilog na panahon na sekular na trabaho asin nag-iistar sa komportableng harong. Minsan siring, gabos sinda puminondo sa sekular na trabaho asin nagpoon na idusay an gabos nindang panahon asin kosog sa pagpaoswag kan intereses kan Kahadean. Ano an nagpangyari sainda na gibohon an pagliliwat na ini? Inaprobetsaran kan apat an nagbabagong mga kamugtakan.

PAG-ABOT nin panahon an kadaklan sato maaapektaran kan nagbabagong mga kamugtakan. Dakol na pagbabago, arog kan pag-agom, pagkaigwa nin mga aki, o pag-ataman sa gurang nang mga magurang, an nagtatao nin dugang na mga paninimbagan. Minsan siring, an nagkapirang pagbabago nagtatao sato nin dugang na katalingkasan tanganing pahiwason an satong Kristianong ministeryo. (Mateo 9:37, 38) Halimbawa, an satong mga aki na nasa edad na tibaad humale na sa harong, o tibaad magretiro na kita sa trabaho.

Dugang pa, mantang totoo na an satong mga kamugtakan tibaad magbago baga man gusto niato iyan o dai, an nagkapirang Kristiano mapangganang nakagibo nin mga pagbabago sa saindang mga kamugtakan na nagbukas nin mga oportunidad tanganing madugangan an saindang pakikikabtang sa ministeryo. Iyan mismo an ginibo ni Pum, Jan, Dries, asin Otto. Paano?

Kun an mga Aki Humale Na sa Harong

Si Pum nagtrabaho bilang bookkeeper sa sarong kompanya nin mga bolong. Sia asin an agom nia, si Anny, parateng naglilingkod bilang auxiliary payunir na ministro kaiba kan duwa nindang aking babae. Inaareglo man ni Pum asin Anny an pagpahorohayahay kaiba kan ibang nasa ministeryo bilang payunir. “Nagtao ini nin proteksion tumang sa mga problema na tibaad ibunga kan iba pang klase nin pakikiasosyar,” an pagsaysay ninda. Napahiro kan halimbawa kan saindang mga magurang, an duwang aking babae nagin regular payunir kan sinda makatapos sa haiskul.

Kan humale na sa harong an saindang mga aki, narealisar ni Pum asin Anny na an pagbagong ini nin mga kamugtakan nagtao sainda nin dugang na katalingkasan asin kuarta na puede nindang aprobetsaran tanganing makabiahe sa interesanteng mga lugar o ikaogma an iba pang klase nin paglibang. Minsan siring, nagdesisyon imbes an mag-agom na gamiton an saindang nagbagong mga kamugtakan tanganing pahiwason an saindang Kristianong ministeryo. Kaya nakiolay si Pum sa saiyang among na inaan nin sarong aldaw kada semana an pagtrabaho nia. Sa huri, guminibo si Pum nin areglo na nagpangyaring pumoon sia sa trabaho nin alas 7:00 n.a. asin matapos nin alas 2:00 n.h. Siempre, an pagtrabaho nin halipot na oras nangahulogan nin pamumuhay sa mas kadikit na entrada. Pero, napangganahan ninda iyan, asin kan 1991, inibanan ni Pum an saiyang agom bilang regular payunir.

Sunod, inimbitaran si Pum na magin katabang na tumatawo sa Assembly Hall kan Mga Saksi ni Jehova. An imbitasyon na iyan nangahulogan na  kaipuhan na bayaan kan mag-agom an harong na inistaran ninda sa laog nin 30 taon asin bumalyo sa sarong apartment sa solar kan Assembly Hall. Sinda buminalyo. Depisil daw iyan? Si Anny suminimbag na basta napupungaw sia, hinahapot nia an saiyang sadiri, ‘Ako daw agom ni Lot?’ Habo niang ‘sumalingoy.’​—Genesis 19:26; Lucas 17:32.

Naniniwala si Pum asin Anny na an saindang desisyon nagbunga nin dakol na bendisyon. Kabilang sa dakol na iba pang bagay, ikinaogma ninda an saindang paglilingkod sa Assembly Hall, an pag-andam para sa pandistritong mga kombension, asin an pakikiasosyar sa mga paraataman sa sirkito (nagbibiaheng mga ministro) na nagpapahayag sa hall. Paminsanminsan, nagdadalaw sinda sa laen-laen na kongregasyon kun si Pum naglilingkod bilang kasalihid na paraataman sa sirkito.

Ano an nagpangyari sa mag-agom na ini na magin mapanggana sa pagpahiwas kan saindang paglilingkod? Si Pum nagsabi: “Kun nagkakaigwa nin dakulang pagbabago sa saindong buhay, kaipuhan na magin determinado kamong aprobetsaran sagkod sa mapupuede an bagong mga kamugtakan.”

Paggibo na Magin Mas Simple an Buhay

Si Jan asin an agom nia, si Woth, igwa nin tolong aki. Arog ni Pum asin kan saiyang pamilya, madonong na ginamit ni Jan an nagbagong mga kamugtakan. Sa laog nin dakol na taon, si Jan may trabaho na halangkaw an sueldo sa sarong bangko asin nagtao nin maginhawang estilo nin pamumuhay sa saiyang pamilya. Minsan siring, nag-oorog an saiyang pagmawot na pahiwason an saiyang ministeryo. Sia nagpaliwanag: “Sa sakong buhay, an pag-apresyar ko sa katotoohan ruminarom, asin an sakong pagkamoot ki Jehova tuminalubo.” Kaya kan 1986, guminibo si Jan nin pagbabago sa saiyang kamugtakan. Sabi nia: “Inaprobetsaran ko kan magkaigwa nin reorganisasyon sa opisina asin nagpoon akong magtrabaho nin mas dikit na oras. An napangalas na kairiba ko binansagan akong Diwodo huli ta nagtatrabaho sana ako kun dinsdag [Martes], woensdag [Mierkoles], asin donderdag [Huebes]. An sakong sueldo nainaan nin 40 porsiento. Ipinabakal ko an samong harong asin nagbakal ako nin harong na baroto tanganing puede kaming maglingkod kun saen mas dakula an pangangaipo nin mga parahayag kan Kahadean. Sa huri, inaprobetsaran ko an amay na pagretiro; an sakong entrada buminaba pa nin 20 porsiento, alagad kan 1993, nakaya kong pumoon na maglingkod bilang regular payunir.”

Ngonyan, si Jan miembro kan Hospital Liaison Committee asin regular na naglilingkod bilang paraataman sa kombension. Sa ibong kan saiyang maluyang salud, si Woth naglilingkod bilang auxiliary  payunir sa panapanahon. An tolong aki gabos na may agom ngonyan asin, kaiba an saindang mga agom, maigot na mga ministro kan Kahadean.

Paano nahimo ni Jan asin Woth na makaadaptar sa klase nin pamumuhay na kadikit an entrada? “Kan panahon na kami abunda,” an simbag ni Jan, “sinegurado mi na daing gayo magakod sa materyal na mga bagay. Ngonyan na mga aldaw medyo bakong kombenyente na maghalat nin kadikit bago makua an sarong bagay, alagad an espirituwal na mga bendisyon asin pribilehio na naako mi sulit na marhay.”

Arog ni Jan asin Woth, si Dries asin an saiyang agom, si Jenny, nagdesisyon man na pagdanayon na simple an saindang buhay tanganing matawan nin dakol na panahon an intereses kan Kahadean. Si Dries asin Jenny naglingkod bilang mga payunir sagkod na sinda nagkaaki. Dangan, tanganing masustentohan an saiyang pamilya, nagtrabaho si Dries bilang administrador sa sarong dakulang kompanya. Inapresyar kan mga among nia an saiyang trabaho asin inalok sia nin halangkaw na puesto. Minsan siring, sinayumahan ni Dries an halangkaw na puesto huling an pag-ako kaiyan mangangahulogan nin dikit na panahon para sa Kristianong mga aktibidad.

An pagbuhay nin pamilya​—saka an pag-ataman sa may helang na ina ni Jenny​—nangaipo nin dakol na panahon asin kosog kan mag-agom. Pero, padagos nindang kinultibar an espiritu nin pagpapayunir. Ano an nakatabang sainda na gibohon ini? Si Jenny nagpaliwanag: “May mga payunir na nag-iistar samo, iniimbitaran mi an mga payunir sa pagkakan, asin pinapaistar mi sa harong an mga paraataman sa sirkito.” Idinugang ni Dries: “Pinagdanay mi na simple an buhay asin linikayan na magkautang. Nagdesisyon kami na dai noarin man maimbuelto sa darakulang transaksion sa negosyo o magbakal nin harong, tanganing sa maabot na mga aldaw dai kami maolang kan siring na mga bagay.”

An desisyon ni Dries asin Jenny na gumibo nin mga kamugtakan na matao sainda nin dugang na panahon para sa intereses kan Kahadean nagkaigwa nin kapakipakinabang na mga resulta. An duwa nindang aking lalaki naglilingkod ngonyan bilang mga magurang sa kongregasyon, asin an saro payunir kaiba an saiyang agom. Si Dries asin Jenny naglingkod bilang espesyal payunir, asin sa huri inibanan ni Jenny si Dries sa gibohon sa sirkito. Ngonyan mga boluntaryo sinda sa Bethel, kun saen naglilingkod si Dries bilang miembro kan Komite kan Sanga.

Amay na Pagretiro

Kapareho ni Dries asin Jenny, si Otto asin an saiyang agom, si Judy, nagpayunir bago sinda nagkaigwa nin duwang aking babae. Kan ibinabados ni Judy an enot nindang aki, si Otto nagkua nin trabaho bilang maestro.

Mantang nagdadakula an mga aki, parateng iniimbitaran ni Otto asin Judy an mga payunir sa saindang harong tanganing maheling kan saindang mga aki an kagayagayahan kan bilog na panahon na Kristianong mga trabahador. Pag-abot nin  panahon, an matua nindang aki nagpayunir. Kan huri, nag-atender sia sa Paadalan nin Gilead asin, kaiba kan saiyang agom, naglilingkod ngonyan bilang misyonero sa sarong nasyon sa Aprika. Nagpoon na magpayunir an saindang nguhod na aki kan 1987, asin inibanan sia ni Judy.

Kan an nagbagong mga kamugtakan magtogot ki Otto na magtrabaho nin mas dikit na oras sa eskuelahan, ginamit nia an ekstrang panahon tanganing magpayunir. Pag-abot nin panahon, biyo na siang puminondo sa saiyang trabaho. Ngonyan, sa gibohon na pagbibiahe, ginagamit na ni Otto an saiyang abilidad bilang paratokdo tanganing pakosogon sa espirituwal an mga kongregasyon.”

Ano an sadol ni Otto sa mga amay na nagreretiro sa saindang sekular na trabaho? “Kun kamo magretiro, dai magpaturotrangkilo sa laog nin sangtaon o labi pa. Madali sanang matuod sa ‘pagpaturotrangkilo.’ Dai mahahaloy, malilingawan na nindo an pagpapayunir. Imbes, ponan tolos-tolos an saindong dinugangan na mga aktibidad sa ministeryo asin sa kongregasyon.

Ginagamit sa Marahay an Saindong Eksperyensia sa Buhay

Totoo, an mga tugang na arog ki Pum, Jan, Dries, asin Otto mayo na ngonyan kan bagsik asin kosog na yaon sa sainda kan hoben pa sinda. Alagad igwa sinda nin orog na pagkamaygurang, eksperyensia, asin kadonongan. (Talinhaga 20:29) Aram ninda kun paano magin ama, asin huli sa pakikipagtabangan sa saindang mga agom, may ideya sinda kun gurano kadakol na bagay an imbuelto sa pagigin sarong ina. Kaiba an saindang agom, nakapagresolber na sinda nin mga problema sa pamilya asin guminibo nin teokratikong mga pasohan para sa saindang mga aki. Sabi ni Otto: “Kun nagtatao ako nin hatol bilang sarong paraataman sa sirkito mapadapit sa pamilya, nakatatabang na ako mismo nagpamilya.” Siring man, an eksperyensia ni Dries bilang sarong ama nagpangyari ngonyan na sia magin mahalagang miembro kan pamilyang Bethel, na igwang dakol na hoben na trabahador.

Iyo, nakatatabang sa siring na mga tugang na lalaki an personal na kaaraman tanganing maasikaso an manlaenlaen na pangangaipo sa kongregasyon. An saindang eksperyensia, sabi ngani, nagpatarom sa mga kasangkapan na ginagamit ninda, kaya ginagamit ninda an saindang kosog sa pinakamarahay na paagi. (Eclesiastes 10:10) Sa katunayan, sa sarong espesipikong lawig nin panahon, an magigibo ninda sa parate mas dakol kisa mga mas makosog sa pisikal alagad kulang sa eksperyensia.

An arog kaiyan na mga tugang na lalaki, kaiba an saindang agom, marahayon na mga halimbawa para sa mga hoben na kabilang sa banwaan ni Jehova. Naheheling kan mga hoben na personal na naeksperyensiahan kan mga mag-agom na arog kan mga ini an dakol na kadepisilan asin bendisyon na ibinabareta sa satong Kristianong mga publikasyon. Nakaparirigon sa boot na maheling an mga lalaki asin babae na nagpapaheling nin espiritu na arog kan ki Caleb na, minsan ngani halangkaw na an edad, naghagad nin masakit na asignasyon.—Josue 14:10-12.

Arogon an Saindang Pagtubod

Puede daw gayod nindong arogon an pagtubod asin ginibo kan mga mag-agom na nasambitan sa artikulong ini? Girumdomon, ginibo nindang paagi nin pamumuhay an katotoohan. Pinatalubo ninda sa saindang mga aki an pagmawot na magpayunir. Ginibo ninda iyan, arog kan pagkasabi ni Jan, “paagi sa pagigin halimbawa sa pagkamoot ki Jehova asin sa saiyang organisasyon, paagi sa pag-areglo nin marahay na pakikiasosyar, asin paagi sa pagtotokdo sa mga aki na sustentohan an sadiri.” Magkairiba man sindang nagtatrabaho asin nagkakawat bilang sarong pamilya. “Kun bakasyon,” an nagigirumdoman ni Pum, “an bilog na pamilya sa parate minaluwas sa paghuhulit sa aga asin sa hapon nagpapaharohayahay na magkairibanan.”

Dugang pa, an mga Kristianong ini patienot na nagplano, kaya kan nagbago an saindang mga kamugtakan, nagin andam sindang aprobetsaran an bagong situwasyon. Naggibo sinda nin mga pasohan asin mga desisyon na nagparikas kan paggibo kan saindang mga pasohan. Naghanap sinda nin mga paagi na mainaan an sekular na pagtrabaho asin andam sindang mabuhay sa dikit na entrada. (Filipos 1:10) Biyong sinuportaran kan mga agom na babae an saindang mga agom na lalaki. Magkaibanan, sinda may makosog na pagmawot na lumaog sa “dakulang tata na pasiring sa gibohon” asin, bilang resulta, nagkamit nin nagsosopay na mga bendisyon hale ki Jehova.​—1 Corinto 16:9; Talinhaga 10:22.

Nagmamawot man daw kamong pahiwason an pakikikabtang nindo sa ministeryo? Kun iyo, an pag-aprobetsar sa nagbabagong mga kamugtakan tibaad iyo an liabe tanganing magibo nanggad iyan.

[Ritrato sa pahina 20]

Si Pum asin Anny nag-aasikaso sa Assembly Hall

[Ritrato sa pahina 20]

Si Jan asin Woth nakikikabtang sa paghuhulit

[Ritrato sa pahina 21]

Si Dries asin Jenny naglilingkod sa Bethel

[Ritrato sa pahina 21]

Si Otto asin Judy nag-aandam sa pagdalaw sa sunod na kongregasyon