‘Magmakosog an Boot Asin Magpakakosog Kamo!’

“Kosogan nindo an boot! Nadaog ko an kinaban.”—JUAN 16:33.

1. Huli sa naghahalat sa mga Israelita sa Canaan, anong pagparigon sa boot an inako ninda?

KAN an mga Israelita mabalyo na sa Salog nin Jordan pasiring sa Dagang Panuga, sinabihan sinda ni Moises: “Magmakosog an boot asin magpakakosog kamo. Dai ka matakot o magtakig sa atubangan ninda, ta si Jehova na saimong Dios iyo an naglalakaw kaiba mo.” Dangan inapod ni Moises si Josue, na iyo an mangengenot sa mga Israelita pasiring sa Canaan, asin personal na inotro sa saiya an hatol na magmakosog an boot. (Deuteronomio 31:6, 7) Kan huri, pinarigon mismo ni Jehova an boot ni Josue, na sinasabi: “Magmakosog an saimong boot asin magpakakosog ka . . . Magmakosog sana an saimong boot asin magpakakosog kang marhay.” (Josue 1:​6, 7, 9) Napapanahon kaidto an mga tataramon na iyan. Kakaipuhanon kan mga Israelita an kosog nin boot na atubangon an makokosog na kaiwal na naghahalat sa sainda sa ibong kan Jordan.

2. Nasa anong situwasyon kita ngonyan, asin ano an kaipuhan niato?

² Ngonyan, an tunay na mga Kristiano madali nang bumalyo pasiring sa ipinanugang bagong kinaban asin, arog ki Josue, kaipuhan na magmakosog an boot. (2 Pedro 3:13; Kapahayagan 7:14) Pero an satong situwasyon laen kan ki Josue. Si Josue nakilaban paagi sa mga espada asin budyak. Espirituwal an satong pakilaban asin nungka kitang minabingat nin literal na mga armas. (Isaias 2:2-4; Efeso 6:11-17) Apuera dian, dakol na maringis na ralaban an kinaipuhan na atubangon ni Josue dawa pagkatapos na lumaog sa Dagang Panuga. Alagad naeeksperyensiahan niato an satong pinakamaringis na pakikilaban ngonyan​—bago kita bumalyo sa bagong kinaban. Helingon niato an nagkapirang situwasyon na nagkakaipo nin kosog nin boot.

Taano ta Kaipuhan Kitang Makilaban?

3. Ano an ihinahayag kan Biblia manongod sa pangenot na paratumang sa sato?

³ Si apostol Juan nagsurat: “Aram niato na kita gikan sa Dios, alagad an bilog na kinaban namumugtak sa kapangyarihan kan maraot.” (1 Juan 5:19) An mga tataramon na iyan nagpapaheling nin sarong pundamental na dahelan kun taano an mga Kristiano ta kaipuhan na makilaban tanganing papagdanayon an saindang pagtubod. Kun an sarong Kristiano nagdadanay na may integridad, sa sarong kabtang kadaogan iyan ki Satanas na Diablo. Huli kaini, si Satanas naglalakaw na siring sa “nagngangarob na leon” na naghihingoa na takoton asin sibaon an fiel na mga Kristiano. (1 Pedro 5:8) Tunay nanggad, sia nakikilaban sa linahidan na mga Kristiano asin sa saindang kairiba. (Kapahayagan 12:17) Sa pakikilaban na ini, naggagamit sia nin mga tawo na tuyo o dai tinutuyong ginigibo an saiyang mga obheto. Kaipuhan an kosog nin boot tanganing manindogan nin marigon tumang ki Satanas asin sa gabos niang kampon.

4. Anong patanid an itinao ni Jesus, alagad anong kualidad an ipinaheling kan tunay na mga Kristiano?

⁴ Huling aram ni Jesus na si Satanas asin an mga kampon kaini maigot na kokontrahon an maogmang bareta, pinatanidan Nia an saiyang mga parasunod: “Dadarahon kamo nin mga tawo sa kahorasaan asin gagadanon kamo, asin ikaoongis kamo kan gabos na nasyon huli sa ngaran ko.” (Mateo  24:9) Nangyari an mga tataramon na iyan kan enot na siglo, asin nangyayari man iyan ngonyan. Tunay nanggad, an paglamag na tinios kan nagkapirang Saksi ni Jehova sa presenteng aldaw nagin maringis man kapareho kan ano man na paglamag sa bilog na kasaysayan. Pero, an tunay na mga Kristiano makosog an boot sa atubangan nin siring na pangigipit. Aram ninda na “an pagtakig sa mga tawo sarong siod,” asin habo nindang masiod.​—Talinhaga 29:25.

5, 6. (a) Anong mga situwasyon an nagkakaipo nin kosog nin boot niato? (b) Ano an reaksion nin fiel na mga Kristiano kun nababalo an saindang kosog nin boot?

⁵ Igwa nin iba pang mga angat apuera sa paglamag na nagkakaipo nin kosog nin boot niato. Para sa nagkapira, sarong angat an ipakipag-olay an maogmang bareta sa mga dai kamidbid. Nababalo an kosog nin boot kan nagkapirang aki na nag-eeskuela kun sinda pinapanunumpa sa nasyon o sa bandera. Huling an siring na panunumpa garo man sana relihiosong kapahayagan, an mga aking Kristiano pusoan na nagdesisyon na humiro sa paagi na makapaoogma sa Dios, asin nakaoogma an saindang marahay na rekord.

⁶ Nagkakaipo man kita nin kosog nin boot kun minamaniobra kan mga paratumang an media na magpalakop nin maraot na bareta manongod sa mga lingkod nin Dios o kun hinihingoa ninda na ibawal an tunay na pagsamba paagi sa pagpakana nin “karibokan paagi sa dekreto.” (Salmo 94:20) Halimbawa, ano an maninigo niatong mamatean kun pigbiribid o biyong kaputikan an sarong bareta sa peryodiko, radyo, o telebisyon manongod sa Mga Saksi ni Jehova? Maninigo daw kitang mabigla? Dai. Linalaoman na niato an siring na mga bagay. (Salmo 109:2) Asin dai kita napapangalas kun may mga naniniwala sa ipinublikar na mga kaputikan asin pagbiribid, huling “an siisay man na daing kabatidan nagtutubod sa lambang tataramon.” (Talinhaga 14:15) Pero, an maimbod na mga Kristiano habong maniwala sa basta ano man na sinasabi manongod sa mga tugang ninda, asin dai nanggad ninda tinotogotan an maraot na publisidad na magin dahelan na sinda dai mag-atender sa Kristianong mga pagtiripon, magluya sa ministeryo sa langtad, o manluya an saindang pagtubod. Sa kabaliktaran, “irinerekomendar [ninda an saindang sadiri] bilang mga ministro nin Dios . . . paagi sa kamurawayan asin kadaihan nin onra, paagi sa maraot na bareta asin marahay na bareta; siring sa [segun sa mga kalaban] mga paradaya alagad ta [an totoo] sadiosan.”—2 Corinto 6:4, 8.

7. Anong nagsisiyasat na mga hapot an puede niatong ihapot sa satong sadiri?

⁷ Si Pablo, kan magsurat ki Timoteo, nagsabi: “An Dios nagtao sato bakong nin espiritu nin pagkamatalaw, kundi nin kapangyarihan . . . Kun siring dai mo ikasupog an patotoo dapit sa satong Kagurangnan.” (2 Timoteo 1:7, 8; Marcos 8:38) Pakabasa kan mga tataramon na iyan, puede niatong ihapot sa satong sadiri: ‘Ikinasusupog ko daw an sakong pagtubod, o makosog daw an sakong boot? Sa pinagtatrabawohan (o eskuelahan) ko, ipinamimidbid ko daw sa kairiba ko na ako Saksi ni Jehova, o hinihingoa ko daw na itago iyan? Nasusupog daw akong mapaiba, o ipinag-oorgolyo ko daw na mapalaen huli sa sakong relasyon ki Jehova?’ Kun an siisay man may negatibong saboot manongod sa paghuhulit kan maogmang bareta o sa pagkaigwa nin bakong popular na kombiksion, girumdomon nia an hatol ni Jehova ki Josue: “Magmakosog an saimong boot asin magpakakosog ka.” Nungkang paglingawan, bakong an opinyon kan satong mga katrabaho o  satong mga kaeskuela an mahalaga kundi an punto de vista ni Jehova asin ni Jesu-Cristo.—Galacia 1:10.

Kun Paano Kukultibaron an Kosog nin Boot

8, 9. (a) Sa sarong okasyon, paano nabalo an kosog nin boot kan enot na mga Kristiano? (b) Ano an nagin reaksion ni Pedro asin Juan sa atubangan nin mga huma, asin ano an naeksperyensiahan ninda asin kan saindang mga tugang?

⁸ Paano niato makukultibar an klase nin kosog nin boot na mapangyari sa sato na magdanay sa satong integridad durante kan masakit na mga panahon na ini? Bueno, paano kinultibar kan enot na mga Kristiano an kosog nin boot? Estudyare an nangyari kan si Pedro asin Juan sabihan kan poon na mga saserdote asin kamagurangan na lalaki sa Jerusalem na pumondo sa paghuhulit sa ngaran ni Jesus. An mga disipulo nagsayuma asin hinuma dangan pinaluwas. Kaidto mismo, nakiiba liwat sinda sa mga tugang, asin sinda gabos iribang namibi, na nagsasabi: “Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon sa bilog na pagkapusoan.” (Gibo 4:13-29) Bilang simbag, pinakosog sinda ni Jehova paagi sa banal na espiritu, asin siring kan sa huri pinatunayan nin mga namomoon na Judio, “pinano na [ninda] an Jerusalem” kan saindang katokdoan.—Gibo 5:28.

⁹ Analisaron niato an nangyari kan okasyon na idto. Kan an mga disipulo hinuhuma kan mga namomoon na Judio, dai ninda inisip na magpadaog sa pangigipit. Imbes, namibi an mga disipulo na logod tawan sinda nin kosog nin boot tanganing padagos na maghulit. Dangan huminiro sinda kaoyon kan saindang pamibi, asin pinakosog sinda ni Jehova paagi sa saiyang espiritu. An saindang eksperyensia nagpapaheling na an isinurat ni Pablo sa laen na konteksto pakalihis nin pirang taon aplikado sa mga Kristiano kun sinda pinaglalamag. Nagsabi si Pablo: “Igwa ako kan kosog para sa gabos na bagay huli sa saiya na nagtatao nin puersa sa sako.”​—Filipos 4:13.

10. Paano an eksperyensia ni Jeremias nakatatabang sa mga natural na masusupgon?

¹⁰ Pero ipamugtak ta baga na an saro natural na masusupgon. Makapaglilingkod pa man daw giraray sia ki Jehova nin pusoan sa atubangan nin pagtumang? Iyo nanggad! Girumdoma an reaksion ni Jeremias kan nombrahan sia ni Jehova bilang propeta. An hoben na lalaki nagsabi: “Aki pa ako.” Malinaw nanggad, nakamate sia nin kakulangan. Pero, pinarigon ni Jehova an saiyang boot paagi sa mga tataramon na ini: “Dai ka magsabing, ‘Aki pa ako.’ Kundi sa gabos na sobolan ko sa saimo, ika maninigong magduman; asin an gabos na ipagboot ko sa saimo, maninigong itaram mo. Dai ka matakot huli sa saindang lalauogon, huli ta ‘ako nasa saimo tanganing iligtas ka.’” (Jeremias 1:6-10) May kompiansa si Jeremias ki Jehova, asin bilang resulta, paagi sa kosog na hale ki Jehova nadaog nia an saiyang pagigin mapag-alangan asin nagin pambihira kakosog an boot na saksi sa Israel.

11. Ano an nagtatabang sa mga Kristiano ngonyan na magin arog ki Jeremias?

¹¹ An linahidan na mga Kristiano ngonyan igwa  nin sugo na kapareho kan ki Jeremias, asin paagi sa pagsuportar kan “dakulang kadaklan” nin “ibang karnero,” padagos nindang ibinabalangibog an mga katuyohan ni Jehova, dawa sa ibong nin pagkaindiperente, pag-olog-olog, asin paglamag. (Kapahayagan 7:9; Juan 10:16) Naparirigon an boot ninda kan mga tataramon ni Jehova ki Jeremias: “Dai ka matakot.” Dai ninda noarin man linilingawan na sinda isinugo nin Dios asin na mensahe nia an saindang ihinuhulit.​—2 Corinto 2:17.

Mga Halimbawa nin Kosog nin Boot na Maninigong Arogon

12. Anong marahayon na halimbawa nin kosog nin boot an ipinaheling ni Jesus, asin paano nia pinarigon an boot kan saiyang mga parasunod?

¹² Matatabangan kita sa satong paghihingoa na magkaigwa nin kosog nin boot kun hohorophoropon niato an mga halimbawa nin iba na, arog ki Jeremias, huminiro na may kosog nin boot. (Salmo 77:12) Halimbawa, mantang sinisiyasat niato an ministeryo ni Jesus, naghahanga kita sa saiyang pagkapusoan kan sugotan sia ni Satanas asin kan mapaatubang sia sa desididong pagtumang kan mga namomoon na Judio. (Lucas 4:1-13; 20:19-47) Paagi sa kosog na hale ki Jehova, si Jesus dai natanyog, asin kan madali na siang magadan, sinabi nia sa saiyang mga disipulo: “Sa kinaban nagkakaigwa kamo nin kahorasaan, alagad kosogan nindo an boot! Nadaog ko an kinaban.” (Juan 16:33; 17:16) Kun susunodon kaidto kan mga disipulo ni Jesus an saiyang halimbawa, sinda man magigin mga ganador. (1 Juan 2:6; Kapahayagan 2:7, 11, 17, 26) Alagad kaipuhan nindang ‘kosogan an saindang boot.’

13. Anong pagparigon sa boot an itinao ni Pablo sa mga taga Filipos?

¹³ Mga pirang taon pagkagadan ni Jesus, si Pablo asin Silas nabilanggo sa Filipos. Kan huri, pinarigon ni Pablo an boot kan kongregasyon sa Filipos na padagos na ‘marigon na manindogan sa sarong espiritu, na sa sarong kalag daramay na naghihingoa para sa pagtubod sa maogmang bareta, asin dai napatatakot sa ano man na bagay kan saindang mga kaiwal.’ Tanganing pakosogon sinda sa bagay na ini, si Pablo nagsabi: “An mismong bagay na ini [an paglamag sa mga Kristiano] sarong prueba sa kalaglagan para sa [mga paralamag], alagad sa kaligtasan para sa saindo; asin an tandang ini hale sa Dios, huli ta sa saindo itinao an pribilehio na manongod ki Cristo, bako sanang tangani na kamo tumubod sa saiya, kundi tangani man na magdusa manongod sa saiya.”—Filipos 1:27-29.

14. Ano an nagin resulta sa Roma kan pagkapusoan ni Pablo?

¹⁴ Kan suratan ni Pablo an kongregasyon sa Filipos, nasa bilanggoan giraray sia, ngonyan sa Roma. Pero, sia padagos na pusoan na naghulit sa iba. Na may anong resulta? Sia nagsurat: “An sakong mga gapos nahayag sa publiko mapadapit ki Cristo sa tahaw kan gabos na Bantay sa Pretorio asin sa gabos na iba pa; asin an kadaklan na tugang sa Kagurangnan, huling napakosog an boot sa sakong mga gapos, nagpapaheling nin orog pang kosog nin boot na itaram an tataramon nin Dios na dai nin takot.”—Filipos 1:13, 14.

15. Saen kita makakukua nin marahayon na mga halimbawa nin pagtubod na mapakosog sa satong determinasyon na kosogan an satong boot?

¹⁵ An halimbawa ni Pablo nagpaparigon sa boot niato. Iyo man an marahayon na mga halimbawa nin presenteng aldaw na mga Kristiano na nagtios nin paglamag sa mga nasyon na pinamamahalaan nin diktador o klero. An estorya kan dakol sa mga ini ibinareta sa mga magasin na Torrengbantayan asin Awake! saka sa mga Yearbook of Jehovah’s Witnesses. Mantang binabasa nindo an mga pagkasaysay na iyan, girumdomon na an mga indibiduwal sa mga estoryang iyan ordinaryong mga tawo na arog niato; alagad kan sinda nasa masakiton na mga kamugtakan, tinawan sinda ni Jehova nin puersa na labi sa ordinaryo asin nakatagal sinda. Makasesegurado kita na iyan man an gigibohon nia sa sato kun hagadon iyan nin mga kamugtakan.

 An Satong May Kosog nin Boot na Paninindogan Nakapaoogma Asin Nagtataong Onra ki Jehova

16, 17. Paano kita ngonyan puedeng magkaigwa nin kosog nin boot?

¹⁶ Kun an saro marigon na naninindogan para sa katotoohan asin katanosan, iyan kosog nin boot. Kun ginigibo iyan nin saro sa ibong nin pakamate nin takot sa boot nia, iyan orog pa nganing kosog nin boot. Tunay nanggad, an siisay man na Kristiano puedeng magin makosog an boot kun talagang boot nia na gibohon an kabotan ni Jehova, kun desidido siang magdanay na fiel, kun sia dayaday na nagsasarig sa Dios, asin kun pirme niang ginigirumdom na may dai mabilang na mga indibiduwal na arog nia na pinakosog na kaidto ni Jehova. Dugang pa, kun narerealisar niato na an satong may kosog nin boot na paninindogan nakapaoogma asin nagtatao nin onra ki Jehova, kita orog pa nganing determinado na dai manluya. Andam kitang tagalan an pan-oolog-olog o mas grabe pa dian huli ta odok an pagkamoot niato sa saiya.—1 Juan 2:5; 4:18.

¹⁷ Nungkang paglingawan na kun kita nagdudusa dahel sa satong pagtubod, dai boot sabihon kaiyan na may nagibo kitang sala. (1 Pedro 3:17) Nagdudusa kita dahel sa pagsuportar sa soberaniya ni Jehova, dahel sa paggibo nin marahay, asin dahel sa pagigin bakong kabtang kan kinaban. Mapadapit digdi, si apostol Pedro nagsabi: “Kun, mantang kamo naggigibo nin marahay kamo nagdudusa, tinatagalan nindo iyan, ini nakakapaogma sa Dios.” Sinabi man ni Pedro: “[An] mga nagdudusa sono sa kabotan nin Dios padagos na magdolot kan saindang kalag sa fiel na Kaglalang mantang sinda naggigibo nin marahay.” (1 Pedro 2:20; 4:19) Iyo, an satong pagtubod nakapaoogma sa satong mamomoton na Dios, si Jehova, asin nagtatao nin onra sa saiya. Makosog nanggad na dahelan na magmakosog an boot!

Pakikipag-olay sa mga Autoridad

18, 19. Kun kita may kosog nin boot na naninindogan sa atubangan nin sarong huwes, anong mensahe an garo man sana ipinaaabot niato?

¹⁸ Kan sabihon ni Jesus sa saiyang mga parasunod na sinda paglalamagon, sinabi man nia: “Kamo dadarahon [nin mga tawo] sa lokal na mga hokoman, asin hahampakon ninda kamo sa saindang mga sinagoga. Tara, dadarahon kamo sa atubangan nin mga gobernador asin hade huli sako, sa pagpatotoo sainda asin sa mga nasyon.” (Mateo 10:17, 18) Nagkakaipo nin kosog nin boot an pag-atubang sa sarong huwes o namamahala huli sa putik na mga sahot. Pero, kun pusoan niatong ginagamit an siring na mga okasyon tanganing magpatotoo sa mga indibiduwal na iyan, an sarong depisil na situwasyon ginigibo niatong oportunidad na makagibo nin sarong bagay na mahalaga. Garo man sana ipinaaabot niato sa mga naghohokom sa sato an mga tataramon ni Jehova, na nakasurat sa ika-2 Salmo: “Ngonyan, O mga hade, maggibo kamo nin pakarorop; pabayae nindo na kamo itanos, O mga hokom kan daga. Maglingkod ki Jehova na may pagkatakot.” (Salmo 2:10, 11) Sa parate, kun an mga Saksi ni Jehova putik na inaakusar sa korte, sinusuportaran kan mga huwes an katalingkasan nin pagsamba, asin pinasasalamatan niato iyan. Minsan siring, may mga huwes na nagpaimpluwensia sa mga paratumang. Sa mga siring, an Kasuratan nagsasabi: “Pabayae nindo na kamo itanos.”

¹⁹ Maninigo na maaraman nin mga huwes na an  pinakahalangkaw na ley iyo an ley ni Jehova Dios. Maninigo nindang girumdomon na an gabos na tawo, kabale an mga huwes, maninimbag ki Jehova Dios asin ki Jesu-Cristo. (Roma 14:10) Kun manongod sa sato, baga man kita mag-ako nin hustisya sa kamot nin sarong huwes na tawo o dai, igwa kita nin makosog na dahelan na magmakosog an boot huli ta sinusuportaran kita ni Jehova. An Biblia nagsasabi: “Maogma an gabos na minapaili sa saiya.”—Salmo 2:12.

20. Taano ta puede kitang magin maogma kun magtitios kita nin paglamag asin pagbalobagi?

²⁰ Sa Sermon sa Bukid, si Jesus nagsabi: “Maogma kamo kun an mga tawo pinakakaraot kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan; huli ta sa paaging iyan pinaglamag ninda an mga propeta na naenot sa saindo.” (Mateo 5:​11, 12) Siempre, an paglamag mismo dai nakaoogma, alagad an paninindogan niato nin marigon sa ibong nin paglamag, kabale an mapagbalobaging mga bareta sa media, sarong dahelan nin paggayagaya. Nangangahulogan iyan na napaoogma niato si Jehova asin maako kita nin balos. An satong may kosog nin boot na paninindogan nagpapaheling na igwa kita nin tunay na pagtubod asin nag-aasegurar sa sato kan pag-oyon nin Dios. Tunay nanggad, ipinaheheling kaiyan na bilog an satong pagtitiwala ki Jehova. An siring na pagtitiwala mahalagang marhay sa sarong Kristiano, siring sa ipaheheling kan sunod na artikulo.

Ano an Nanodan Nindo?

• Anong mga situwasyon ngonyan an nagkakaipo nin kosog nin boot?

• Paano niato makukultibar an kualidad na kosog nin boot?

• Sairisay an nagkapirang marahayon na halimbawa nin kosog nin boot?

• Taano ta mawot niatong humiro na may kosog nin boot?

[Mga Hapot Para sa Pag-adal]

[Mga Ritrato sa pahina 9]

Si Simone Arnold (ngonyan Liebster) sa Alemania, si Widdas Madona sa Malawi, saka si Lydia asin Oleksii Kurdas sa Ukraine nagpaheling nin kosog nin boot asin linabanan an maraot

[Mga Ritrato sa pahina 10]

Dai niato ikinasusupog an maogmang bareta

[Ritrato sa pahina 11]

An kosog nin boot ni Pablo sa bilanggoan nakatabang nin dakula sa maogmang bareta

[Ritrato sa pahina 12]

Kun may kosog nin boot na ipinaliliwanag niato sa sarong huwes an satong sono sa Kasuratan na paninindogan, kita nagpapaabot nin sarong mahalagang mensahe