Magtiwala Ka ki Jehova sa Bilog Mong Puso

“An mga nakamimidbid sa saimong ngaran magtitiwala sa saimo.”​—SALMO 9:10.

1, 2. Ano an nagkapirang bagay na daing saysay na pinagtitiwalaan nin mga tawo para sa seguridad?

NGONYAN, na kadakol kan nagsasapeligro sa satong ikararahay, natural sanang humanap nin sarong tawo o sarong bagay na matao nin seguridad. May mga naghohona na an pagkaigwa nin dakol na kuarta mapangyaring magin segurado an saindang ngapit, alagad an totoo, an kuarta sarong bako nanggad seguradong pailihan. An Biblia nagsasabi: “An saro na nananarig sa saiyang kayamanan—sia mismo mahoholog.” (Talinhaga 11:28) An iba nag-aasa sa namomoon na mga tawo, alagad dawa an pinakamatibay sa mga ini nasasala. Asin sa kahurihurihi, sinda gabos nagagadan. Madonong nanggad na an Biblia nagsasabi: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan.” (Salmo 146:3) An ipinasabong na mga tataramon na iyan nagpapatanid man sa sato tumang sa pagtitiwala sa satong sadiring mga paghihingoa na mayo nin tabang. Kita man ‘mga aki nin daganon na tawo’ sana.

² Krinitikar ni propeta Isaias an nasyonal na mga namomoon sa Israel kan saiyang kaaldawan huli ta sinda nagtiwala sa “pailihan na kaputikan.” (Isaias 28:15-17) Sa saindang paghanap nin seguridad, sinda naggibo nin politikal na pakikialyansa sa kataraed na nasyon. An siring na mga alyansa dai masasarigan​—sarong kaputikan. Sa kaagid na paagi, dakol na namomoon sa relihion ngonyan an may  koneksion sa politikal na mga namomoon. An mga alyansa man na iyan magigin “kaputikan.” (Kapahayagan 17:​16, 17) Dai iyan matao nin nagdadanay na seguridad.

An Marahay na Halimbawa ni Josue Asin Caleb

3, 4. Paano nagin magkalaen an bareta ni Josue asin Caleb saka kan sampulo pang espiya?

³ Kun siring, saen kita maninigong humanap nin seguridad? Sa kun saen nag-asa si Josue asin Caleb kan kaaldawan ni Moises. Dai nahaloy pagkatalingkas kan Israel sa Egipto, an nasyon andam nang lumaog sa Canaan, an Dagang Panuga. May 12 lalaki na isinugo tanganing espiyahan an daga, asin sa katapusan kan 40 aldaw, nagbalik sinda tanganing magbareta. Duwa sana, si Josue asin Caleb, an nagtaram nin paborable dapit sa mga malalaoman kan Israel sa Canaan. Kinompirmar kan iba na marahay an daga alagad nagsabi: “An mga katotoohan iyo na an mga tawong nag-iistar sa daga makokosog, asin an nakukutaan na mga siudad dakulaon na marhay . . . Dai niato kayang tumukad laban sa banwaan, huli ta mas makokosog sinda kisa sato.”—Bilang 13:27, 28, 31.

⁴ Dinangog kan mga Israelita an sampulong espiya asin nagkatarakot, sagkod na naggurumodgumod tumang ki Moises. Sa katapustapusi, si Josue asin Caleb nagsabi na makosogon an emosyon: “An daga na inagihan mi tanganing espiyahan iyan marahayon nanggad na daga. Kun si Jehova nawili sa satuya, kun siring sierto na ilalaog nia kita sa dagang ini asin itatao iyan sa satuya, daga na binubulosan nin gatas asin tangguli. Dai sana kamo magtumang ki Jehova; asin kamo, dai kamo matakot sa mga tawo kan daga.” (Bilang 14:6-9) Sa ibong kaiyan, an mga Israelita habong magdarangog asin, bilang resulta, dai tinogotan na makalaog sa Dagang Panuga kan panahon na idto.

5. Taano ta paborable an ibinareta ni Josue asin Caleb?

⁵ Taano ta marahay an ibinareta ni Josue asin Caleb, mantang an sa sampulong espiya maraot? Naheling gabos kan 12 an iyo man sanang makokosog na siudad asin establisadong mga nasyon. Asin tama an sampulo sa pagsabi na bakong igo an kosog kan Israel tanganing daogon an daga. Aram man iyan ni Josue asin Caleb. Minsan siring, minansay kan sampulo an situwasyon basado sa makalaman na punto de vista. Sa ibong na lado, si Josue asin Caleb nagtiwala ki Jehova. Naheling na ninda an saiyang makapangyarihan na mga gibo sa Egipto, sa Dagat na Pula, asin sa pamitisan kan Bukid nin Sinai. Tara, pakalihis nin mga dekada an bareta sana kan mga gibong iyan igo na tanganing pahiroon si Rahab na taga Jerico na isapeligro an saiyang buhay para sa banwaan ni Jehova! (Josue 2:1-24; 6:22-25) Bilog an kompiansa ni Josue asin Caleb, na mga nakaheling mismo sa mga gibo ni Jehova, na an Dios padagos na makikilaban para sa saiyang banwaan. Pakalihis nin 40 taon, natawan nin katanosan an saindang pagtitiwala kan an sarong bagong kapag-arakian nin mga Israelita, sa pangengenot ni Josue, naglaog sa Canaan asin sinakop an daga.

Kun Taano ta Maninigo Kitang Magtiwala nin Lubos ki Jehova

6. Taano ta nagigipit an mga Kristiano ngonyan, asin kiisay sinda maninigong magtiwala?

⁶ Sa “delikadong mga panahon [na ini] na masakit pakibagayan,” kita, arog kan mga Israelita, napapaatubang sa mga kalaban na mas makosog sa sato. (2 Timoteo 3:1) Kita ginigipit sa moral, espirituwal asin, sa nagkapirang kamugtakan, pati sa pisikal. Kun kita sana, dai niato kayang labanan an mga pangigipit na iyan, huli ta nakalalabi sa tawo an gikanan kaiyan, si Satanas na Diablo. (Efeso 6:12; 1 Juan 5:19) Kun siring, saen kita makakaasa? Sa pamibi ki Jehova, an sarong fiel na lalaki kan suanoy nagsabi: “An mga nakamimidbid sa saimong ngaran magtitiwala sa saimo.” (Salmo 9:10) Kun talagang midbid niato si Jehova asin kun nasasabotan niato an kahulogan kan saiyang ngaran, kita seguradong magtitiwala sa saiya arog ki Josue asin Caleb.—Juan 17:3.

7, 8. (a) Paano kita tinatawan kan paglalang nin mga dahelan na magtiwala ki Jehova? (b) Anong mga dahelan an itinatao kan Biblia para sa pagtitiwala ki Jehova?

⁷ Taano ta maninigo kitang magtiwala ki Jehova? Sa sarong kabtang nagtiwala si Josue asin Caleb huli ta nakaheling sinda nin mga prueba kan saiyang kapangyarihan. Iyo man kita. Halimbawa, isipa nindo an mga gibo nin paglalang ni Jehova, kabale an uniberso, pati na an binilyon na galaksia kaiyan. An grabe kakosog na pisikal na mga puersa na kapot ni Jehova nagpapaheling na sia nanggad an Makakamhan sa Gabos. Mantang hinohorophorop niato an mga ngangalasan nin paglalang, maoyon kita ki Job, na nagsabi dapit ki Jehova: “Siisay  an makaoolang sa saiya? Siisay an masabi sa saiya, ‘Ano an ginigibo mo?’” (Job 9:12) Totoo nanggad, kun si Jehova nasa kampi niato, mayo nin siisay man na dapat niatong katakotan sa bilog na uniberso.​—Roma 8:31.

⁸ Estudyare man an Tataramon ni Jehova, an Biblia. An dai nauubosan na gikanan na ini nin kadonongan nin Dios epektibong marhay sa pagtabang sa sato na mahale an salang mga gibo asin ioyon an satong buhay sa kabotan ni Jehova. (Hebreo 4:12) Paagi sa Biblia namidbid niato si Jehova sa ngaran asin nasabotan an kahulogan kan saiyang ngaran. (Exodo 3:14) Aram niato na si Jehova puedeng magin ano man na booton nia—sarong mamomoton na Ama, matanos na Hokom, ganador na Guerrero—tanganing maotob an saiyang mga katuyohan. Asin naheheling niato kun paano pirmeng nagkakatotoo an saiyang tataramon. Mantang pinag-aadalan niato an Tataramon nin Dios, makakasabi kita, arog kan salmista: “Nagtiwala ako sa saimong tataramon.”—Salmo 119:42; Isaias 40:8.

9. Paano pinakokosog kan pantubos asin kan pagkabuhay liwat ni Jesus an satong pagtitiwala ki Jehova?

⁹ An pantubos saro pang dahelan na magtiwala ki Jehova. (Mateo 20:28) Kanigoan karahay na isinugo nin Dios an saiya mismong Aki tanganing magadan bilang pantubos sa sato! Asin an pantubos totoong epektibong marhay. Tinatahoban kaiyan an mga kasalan kan bilog na katawohan na nagsosolsol asin minarani ki Jehova na may sadiosan na puso. (Juan 3:16; Hebreo 6:10; 1 Juan 4:​16, 19) An sarong kabtang kan proseso nin pagbayad sa pantubos iyo an pagkabuhay liwat ni Jesus. An milagrong iyan, na pinatunayan nin ginatos na nakaheling mismo, saro pang dahelan na magtiwala ki Jehova. Garantiya iyan na an satong mga paglaom dai masusudya.​—Gibo 17:31; Roma 5:5; 1 Corinto 15:3-8.

10. Ano an personal na mga dahelan niato na magtiwala ki Jehova?

¹⁰ Nagkapira sana ini sa mga dahelan kun taano ta kita makapagtitiwala asin maninigo na magtiwala nin lubos ki Jehova. Kadakol pang iba, an nagkapira kaiyan personal. Halimbawa, paminsanminsan kita gabos napapaatubang sa masakit na mga kamugtakan sa satong buhay. Mantang hinahagad niato an paggiya ni Jehova sa pag-atubang kaiyan, naheheling man niato kun gurano kapraktikal an paggiyang iyan. (Santiago 1:5-8) Mientras na orog kitang nagsasarig ki Jehova sa satong pan-aroaldaw na buhay asin naheheling an marahay na mga ibinubunga kaini, orog man na magigin makosog an satong pagtitiwala sa saiya.

Si David Nagtiwala ki Jehova

11. Sa ibong nin anong mga kamugtakan nagtiwala si David ki Jehova?

¹¹ Si David kan suanoy na Israel saro na nagtiwala ki Jehova. Napaatubang si David sa huma ni Hadeng Saul, na gusto siang gadanon, asin kan makosog na hukbo nin mga Filisteo, na naghihingoang sakopon an Israel. Sa ibong kaiyan, sia nakaligtas asin nagin mapanggana pa ngani. Taano? Si David mismo nagpapaliwanag: “Si Jehova an sakuyang ilaw asin an sakuyang kaligtasan. Siisay an matatakotan ko? Si Jehova an kasarigan kan sakuyang buhay. Sa kiisay ako matatakot?” (Salmo 27:1) Kita  man magigin mapanggana kun kita magtitiwala man ki Jehova.

12, 13. Paano ipinaheling ni David na maninigo kitang magtiwala ki Jehova dawa kun ginagamit kan mga paratumang an saindang dila bilang armas laban sa sato?

¹² Sa sarong pangyayari namibi si David: “Hinanyoga, O Dios, an sakong tingog sa sakong kahaditan. Ilikay mo logod an sakuyang buhay sa pagkatakot sa kaiwal. Itago mo logod ako sa hilom na orolay nin mga maraot, sa kadahasan kan mga naggigiribo nin katampalasanan, na nagpatarom kan saindang dila nin siring sa minasbad, na nagpunteriya kan saindang pana, an mapait na tataramon, tanganing panaon hale sa tagong mga lugar an saro na dai nin kanawayan.” (Salmo 64:1-4) Dai niato sierto kun ano an nagpahiro ki David na isurat an mga tataramon na ini. Alagad aram niato na ngonyan, an mga paratumang ‘pinatatarom [man] an saindang dila,’ na ginagamit an pagtaram bilang armas sa pakikilaban. ‘Pinapana’ ninda an dai nin kanawayan na mga Kristiano, na ginagamit an pagtaram o nasusurat na mga tataramon bilang “mga pana” nin misrepresentasyon. Kun kita marigon na nagtitiwala ki Jehova, ano an magigin resulta?

¹³ Si David padagos na nagsasabi: “Sinda papanaon nin bigla nin Dios. Sinda nagkarulugad, asin naniningkog sinda. Alagad an saindang dila tumang sa sainda man sana. . . . An matanos maggagayagaya dian ki Jehova asin magpapaili nanggad sa saiya.” (Salmo 64:7-10) Iyo, minsan ngani pinatatarom kan mga kaiwal an saindang dila laban sa sato, sa katapustapusi ‘an saindang dila magigin tumang sa sainda man sana.’ Sa kahurihurihi ginigibo ni Jehova na magin positibo an kaabtan nin mga bagay-bagay, tangani na an mga nagtiwala sa saiya maggayagaya sa saiya.

Natawan nin Katanosan an Pagtitiwala ni Ezequias

14. (a) Sa atubangan nin anong grabeng situwasyon nagtiwala si Ezequias ki Jehova? (b) Paano ipinaheling ni Ezequias na dai nia pinaniwalaan an mga kaputikan kan Asirio?

¹⁴ Si Hadeng Ezequias saro man na an pagtitiwala ki Jehova natawan nin katanosan. Durante kan pagreynar ni Ezequias, hinuma kan poderosong hukbo nin Asiria an Jerusalem. Dakol nang iba pang nasyon an dinaog kan hukbong iyan. Sinakop na ngani kaiyan an mga siudad nin Juda sagkod sana kan an Jerusalem talingkas pa, asin ipinaghambog ni Senaquerib na sasakopon man nia an siudad na iyan. Paagi ki Rabsaces, sinabi nia—na tama man—na an pagtiwala sa Egipto para sa tabang magigin basang sana. Minsan siring, sinabi nia kaidto: “Dai ka magpadaya sa saimong Dios na pinagtitiwalaan mo, na nagsasabi: ‘An Jerusalem dai itatao sa kamot kan hade sa Asiria.’” (Isaias 37:10) Minsan siring, aram ni Ezequias na dai sia dadayaon ni Jehova. Kaya namibi sia, na sinasabi: “O Jehova na samuyang Dios, iligtas mo kami sa . . . kamot [kan Asirio], tanganing an gabos na kahadean sa daga makamidbid na ika, O Jehova, iyo sana an Dios.” (Isaias 37:20) Dinangog ni Jehova an pamibi ni Ezequias. Sa sarong banggi, ginadan nin sarong anghel an 185,000 na soldados na Asirio. Nakaligtas an Jerusalem, asin binayaan ni Senaquerib an daga nin Juda. An gabos na nakabareta sa pangyayaring ini nakanood dapit sa kadakulaan ni Jehova.

15. Ano sana an makatatabang sato na magin andam para sa ano man na tibaad magin masakit na kamugtakan niato sa daing kasegurohan na kinaban na ini?

 ¹⁵ Ngonyan, arog ki Ezequias, kita nasa garo ralaban na situwasyon. Sa kamugtakan niato, an pakikilaban espirituwal. Pero, bilang espirituwal na mga parapakilaban, kaipuhan niatong magkaigwa nin mga kakayahan na kaipuhan tanganing makaligtas. Kaipuhan niatong antisiparon an mga pagsalakay asin mangandam tanganing masagang iyan. (Efeso 6:11, 12, 17) Sa daing kasegurohan na kinaban na ini, an mga situwasyon puedeng bigla na sanang magbago. An karibokan sibil puedeng lumataw nin dai linalaoman. An mga nasyon na dating midbid na nagpapabaya sa relihion puedeng magin bako na. Kita magigin preparado sa ano man na tibaad mangyari solamente kun kita, arog ki Ezequias, mangangandam paagi sa pagkaigwa nin dai nanluluyang pagtitiwala ki Jehova.

Ano an Boot Sabihon kan Magtiwala ki Jehova?

16, 17. Paano niato ipinaheheling na kita nagtitiwala ki Jehova?

¹⁶ An pagtitiwala ki Jehova dai sana basta sinasabi. Kalabot dian an satong puso asin ipinaheheling iyan paagi sa satong mga paghiro. Kun kita nagtitiwala ki Jehova, kita lubos na magtitiwala sa saiyang Tataramon, an Biblia. Babasahon niato iyan aroaldaw, hohorophoropon iyan, asin totogotan iyan na giyahan an satong buhay. (Salmo 119:105) Kalabot man sa pagtitiwala ki Jehova an pagtitiwala sa kapangyarihan kan banal na espiritu. Sa tabang kan banal na espiritu, makukultibar niato an bunga na nakapaoogma ki Jehova asin mahihimo niatong haleon an nakatadom nang maraot na mga ugale. (1 Corinto 6:11; Galacia 5:22-24) Sa siring, sa tabang kan banal na espiritu, dakol an nakayang haleon an pagsigarilyo o pagdroga. An iba binayaan an inmoral na estilo nin pamumuhay. Iyo, kun kita nagtitiwala ki Jehova, kita minahiro sa kosog na hale sa saiya, bakong sa sato.—Efeso 3:14-18.

¹⁷ Dugang pa, an pagtitiwala ki Jehova nangangahulogan nin pagtitiwala sa mga pinagtitiwalaan nia. Halimbawa, inareglo ni Jehova na “an fiel asin may diskresion na oripon” an mag-asikaso kan daganon na intereses kan Kahadean. (Mateo 24:45-47) Dai kita naghihingoang humiro nin independiente dian, asin dai niato iniignoro an nombramientong iyan, ta kita nagtitiwala sa areglo ni Jehova. Dugang pa, an kamagurangan naglilingkod sa lokal na Kristianong kongregasyon asin, segun ki apostol Pablo, ninombrahan kan banal na espiritu. (Gibo 20:28) Paagi sa pakipagkooperar sa areglo na pagkaigwa nin kamagurangan sa kongregasyon, ipinaheheling man niato na kita nagtitiwala ki Jehova.​—Hebreo 13:17.

Arogon an Halimbawa ni Pablo

18. Paano inaarog kan mga Kristiano ngonyan an halimbawa ni Pablo, alagad sa ano sinda dai nagtitiwala?

¹⁸ Si apostol Pablo napaatubang sa dakol na pangigipit sa saiyang ministeryo, kun paanong kita iyo man. Kan saiyang kaaldawan an Kristianismo minisrepresentar sa mga autoridad, asin kun minsan hinihingoa nia na itama an salang mga impresyon na iyan o patunayan sa legal na paagi an paghuhulit. (Gibo 28:19-22; Filipos 1:7) Ngonyan, inaarog kan mga Kristiano an saiyang halimbawa. Saen man posible, tinatabangan niato an iba na maliwanagan manongod sa satong gibohon, na ginagamit an ano man na paaging yaon. Asin hinihingoa niato na idepensa asin patunayan sa legal na paagi an maogmang bareta. Minsan siring, dai kita nagtitiwala nin lubos sa siring na mga paghihingoa, sa bagay na dai niato minamansay na an kapangganahan o pagkasudya nakadepende sa panggagana niato sa mga kaso sa korte o pagkaigwa nin paborableng publisidad. Imbes, kita nagtitiwala ki Jehova. Ginigirumdom niato an pagparigon nia sa boot kan suanoy na Israel: “Yaon sana sa pagtoninong asin pananarig an saindong pagigin poderoso.”—Isaias 30:15.

19. Kan umagi nin paglamag, paano natawan nin katanosan an pagtitiwala ki Jehova kan satong mga tugang?

¹⁹ May mga panahon durante kan satong modernong kasaysayan na an satong gibohon ipinagbawal o linimitaran sa Sirangan asin Solnopan na Europa, sa mga parte kan Asia asin Aprika, asin sa mga nasyon sa Amerika del Sur asin Norte. Boot sabihon daw kaini na napasala an satong pagtitiwala ki Jehova? Dai. Minsan ngani kun beses tinotogotan nia an makuring paglamag huli sa saiya mismong marahay na katuyohan, mamomoton na pinakosog ni Jehova an mga nagtios sa paglamag na iyan. Sa irarom nin paglamag, dakol na Kristiano an nakagibo nin makangangalas na rekord nin pagtubod asin pagtitiwala sa Dios.

20. Minsan ngani puedeng makinabang kita sa legal na mga katalingkasan, sa anong mga bagay kita nungkang makikikompromiso?

²⁰ Sa ibong na lado, sa kadaklan na kadagaan  kita may legal na pagrekonoser, asin kun beses nag-aako kita nin paborableng publisidad sa media. Nagpapasalamat kita huli kaini asin minimidbid niato na ini nakatatabang man na mahaman an katuyohan ni Jehova. Paagi sa saiyang bendisyon, ginagamit niato an mas dakulang katalingkasan, bakong tanganing pakarhayon an satong personal na estilo nin pamumuhay, kundi tanganing maglingkod ki Jehova nin hayagan asin lubos. Minsan siring, tangani sanang magin paborable sa pagheling kan mga autoridad, nungka niatong ikokompromiso an satong neutralidad, iinaan an satong paghuhulit, o maluya sa satong paglilingkod ki Jehova sa ano man na iba pang paagi. Mga sakop kita kan Mesiyanikong Kahadean asin marigon na nasa kampi kan soberaniya ni Jehova. Kita naglalaom, bakong sa sistemang ini nin mga bagay, kundi sa bagong kinaban, kun saen an langitnon na Mesiyanikong Kahadean iyo an magigin solamenteng namamahalang gobyerno sa ibabaw kan dagang ini. Mayong mga bomba, ni mga misil, ni nuklear na mga pag-atake pa ngani na makatatanyog sa gobyernong iyan o makakapabagsak kaiyan hale sa langit. Iyan daing kadaogan asin ootobon kaiyan an katuyohan ni Jehova para dian.​—Daniel 2:44; Hebreo 12:28; Kapahayagan 6:2.

21. Ano an determinado niatong gibohon?

²¹ Si Pablo nagsasabi: “Bako kita an klase na minasibog pasiring sa kalaglagan, kundi an klase na may pagtubod sa ikapagdadanay na buhay kan kalag.” (Hebreo 10:39) Kun siring, logod na kita gabos fiel na maglingkod ki Jehova sagkod sa katapusan. Makosog an dahelan niato na magtiwala nin lubos ki Jehova ngonyan asin sa gabos na panahon na madatong.—Salmo 37:3; 125:1.

Ano an Nanodan Nindo?

• Taano ta paborable an darang bareta ni Josue asin Caleb?

• Ano an nagkapirang dahelan kun taano ta maninigo kitang magtiwala nin lubos ki Jehova?

• Ano an boot sabihon kan magtiwala ki Jehova?

• Huling nagtitiwala ki Jehova, ano an determinadong paninindogan niato?

[Mga Hapot Para sa Pag-adal]

[Ritrato sa pahina 15]

Taano ta paborable an ibinareta ni Josue asin Caleb?

[Mga Ritrato sa pahina 16]

An paglalang nagtatao sa sato nin makosog na dahelan na magtiwala ki Jehova

[Credit Line]

An tolong retrato: Sa karahayan nin boot kan Anglo-Australian Observatory, rinetrato ni David Malin

[Ritrato sa pahina 18]

An pagtitiwala ki Jehova nangangahulogan nin pagtitiwala sa mga pinagtitiwalaan nia