“Nanompongan Ko an Gabos na Kaipuhan Ko”

AN DEPRESYON, oyon sa sarong report kan World Health Organization, kinakalkulo sa presente na nakaaapektar sa labing 120 milyones katawo sa bilog na kinaban. Kada taon, sarong milyon katawo an naghuhugot asin nasa 10 sagkod 20 milyones an nagpoprobar na taposon an saindang buhay. Anong tabang an makukua kan mga nag-aagi nin depresyon? An medikal na pagbolong puedeng makaina sa pagdusa, asin an emosyonal na suporta mahalagang marhay. Dugang pa, an nagkapira na nakaeeksperyensia kan siring na pagmate nakanompong nin dugang pang tabang sa praktikal asin basado sa Biblia na mga publikasyon kan Mga Saksi ni Jehova, arog kan ipinaheheling kan minasunod na surat hale sa Pransia.

“Dai pa sana nahahaloy, mayo na akong naheheling na dahelan para mabuhay pa. Namibi ako sa Dios na togotan na akong magadan. An pagmate ko garo man sana ako gadan na. Huling naghahagad nin paggiya, maigot akong namibi ki Jehova. Nagdesisyon man akong basahon an 2002 Yearbook of Jehovah’s Witnesses asin natapos ko iyan sa laog nin tolong aldaw. Masasabi ko na pinarigon na marhay kaiyan an sakong boot asin pinakosog an sakong pagtubod.

“Naggibo ako nin mga pagsiyasat sa mga magasin na Torrengbantayan asin Awake!, asin nasorpresa nanggad ako! Regular kong binabasa an mga magasin na ini sa laog nin labing 15 taon na, alagad nungka kong narealisar kun gurano man nanggad kanakaparirigon sa boot asin kanakaaanimar an mga artikulo. Pano iyan nin pagkamoot​—sarong kualidad na bihira nang marhay sa mga aldaw na ini. Nanompongan ko an gabos na kaipuhan ko.”

An Biblia nagsasabi: “Si Jehova harani sa mga laglag an puso; asin an mga nasasakitan an espiritu saiyang iliniligtas.” (Salmo 34:18) Daing duwa-duwa, an gabos na “laglag an puso” o “nasasakitan an espiritu” puedeng makanompong sa Biblia nin pagparigon sa boot asin paglaom para sa ngapit. An Mga Saksi ni Jehova nagdidistribwir nin mga babasahon na basado sa Biblia tanganing tabangan an mga nangangaipo na makinabang sa ipinasabong nin Dios na gikanan na iyan nin karangahan.