Relihiosong Paglamag—Taano?

NAGTUTUBOD daw kamo na an mga tawo maninigong paglamagon huli sa saindang relihion? Seguro dai—minsan paano dai sagkod na dai sinda nag-eentremeter sa deretso kan iba. Pero, an relihiosong paglamag haloy nang nangyayari asin yaon pa man giraray. Halimbawa, dakol sa mga Saksi ni Jehova sa Europa asin sa iba pang parte kan kinaban an sa parate hinalean kan saindang deretso asin maringis na minaltrato durante kan ika-20 siglo.

Durante kan panahon na iyan, an mga Saksi ni Jehova nag-agi nin mabangis, sistematiko, asin halawig na paglamag sa irarom kan duwang pangenot na totalitaryong rehimen sa Europa. Ano an itinotokdo sato kan eksperyensia ninda manongod sa relihiosong paglamag? Asin ano an manonodan niato sa nagin reaksion ninda sa pagdusa?

“Bakong Kabtang kan Kinaban”

An Mga Saksi ni Jehova nagmamaigot na magin makinuyog sa ley, matoninong, asin tanos sa moral. Dai sinda nagkokontra sa mga gobyerno o naghihingoang lumaban sa sainda, ni nagpoprobokar man sinda nin paglamag huli ta gusto nindang magin mga martir. An mga Kristianong ini neutral sa politika. Kaoyon ini kan mga tataramon ni Jesus: “[An sakong mga parasunod] bakong kabtang kan kinaban, kun paanong ako bakong kabtang kan kinaban.” (Juan 17:16) Rinerekonoser kan kadaklan na gobyerno an neutral na paninindogan kan mga Saksi. Alagad dai iginagalang kan totalitaryong mga namamahala an kahagadan kan Biblia na an mga Kristiano maninigo na bakong kabtang kan kinaban.

Ipinaliwanag an dahelan kaini sa sarong  komperensia sa Unibersidad nin Heidelberg, sa Alemania, kan Nobyembre 2000. An komperensia may temang “Pan-aapi Asin Pag-insistir sa Deretso: An mga Saksi ni Jehova sa Irarom kan Sosyalista Nasyonal Asin Komunistang mga Diktadura.” Si Dr. Clemens Vollnhals kan Institusyon nin Hannah-Arendt Para sa Pagsiyasat sa Totalitaryanismo nagsabi: “An mga aktibidad kan totalitaryong mga rehimen bakong limitado sa politika sana. Hinahagad kaiyan an bilog na pagkatawo nin saro.”

Dai puedeng itao kan tunay na mga Kristiano an saindang “bilog na pagkatawo” sa gobyerno nin tawo, huli ta nanumpa sinda nin absolutong kaimbodan ki Jehova Dios sana. Nanompongan kan mga Saksi sa irarom kan totalitaryong mga diktadura na an mga hinahagad kan Estado asin an mga kahagadan kan saindang pagtubod kun beses magkakontra. Ano an ginibo ninda sa atubangan kan siring na mga pagkakontrahan? Dakol nang beses kan nakaagi, iinaplikar kan Mga Saksi ni Jehova sa saindang buhay an prinsipyo na ipinahayag kan mga disipulo ni Jesu-Cristo: “Dapat na kuyogon niamo an Dios bilang namamahala imbes na mga tawo.”—Gibo 5:29.

Rinibong Saksi an nagdanay na maimbod sa saindang pagtubod asin nagdanay na neutral sa mga bagay-bagay sa politika, sa ibong nin dawa pinakamaringis na paglamag. Paano sinda nakatagal? Saen ninda kinua an kosog tanganing magibo iyan? Sinda mismo an pasimbagon niato. Asin helingon niato kun ano an manonodan kan gabos, mga Saksi asin bakong mga Saksi, sa mga eksperyensia ninda.

[Blurb sa pahina 4]

An mga Saksi ni Jehova sa Alemania nag-agi nin mabangis asin halawig na paglamag sa irarom kan duwang totalitaryong rehimen kan ika-20 siglo

[Blurb sa pahina 4]

“An mga aktibidad kan totalitaryong mga rehimen bakong limitado sa politika sana. Hinahagad kaiyan an bilog na pagkatawo nin saro.”—Dr. Clemens Vollnhals

[Ritrato sa pahina 4]

Hinalean kan saindang katalingkasan an pamilya Kusserow huli ta habo nindang ikompromiso an saindang pagtubod

[Ritrato sa pahina 4]

Si Johannes Harms ginadan sa sarong bilanggoan nin Nazi huli sa saiyang tinutubod