“Kosogan Nindo an Boot! Nadaog Ko an Kinaban”

AN ALDAW kan kagadanan ni Jesus—an ika-14 aldaw kan Judiong bulan nin Nisan—nagpoon pagkasolnop kan saldang kan Huebes, Marso 31, 33 C.E. Kan bangging iyan, si Jesus asin an saiyang mga apostol nagtiripon sa sarong kuarto sa itaas nin sarong harong sa Jerusalem tanganing iselebrar an Paskua. Mantang nag-aandam na siang “humale sa kinaban na ini pasiring sa Ama,” ipinaheling ni Jesus na namomotan nia an saiyang mga apostol sagkod sa katapusan. (Juan 13:1) Paano? Paagi sa pagtokdo sa sainda nin magagayon na leksion, na sa siring iinaandam sinda sa mangyayari sa ngapit.

Mantang nagpapadagos an banggi, sinabihan ni Jesus an saiyang mga disipulo: “Kosogan nindo an boot! Nadaog ko an kinaban.” (Juan 16:33) Ano an gusto niang sabihon sa pusoan na mga tataramon na iyan? Sa sarong kabtang, ini: ‘An karatan sa kinaban dai nagin dahelan na ako maanggot na marhay ni nagin dahelan na ako magbalos. Dai ako nagpamolde sa kinaban. Puedeng magin totoo man ini sa kamugtakan nindo.’ An itinokdo ni Jesus sa saiyang fiel na mga apostol sa huring mga oras kan saiyang buhay digdi sa daga makatatabang man sainda na daogon an kinaban.

Siisay an madehar na labi-labi an karatan sa kinaban ngonyan? Ano an reaksion niato sa mga inhustisya asin daing saysay na mga gibo nin kadahasan? Ini daw nagpapaanggot na marhay sa sato o nagsusugot sa sato na magbalos? Paano kita naiimpluwensiahan kan pagruro sa moral na nakapalibot sa sato? Idagdag pa digdi an satong pagkabakong sangkap bilang tawo asin an makasalan na mga tendensia, asin igwa kita nin duwang klaseng pakikilaban: tumang sa maraot na kinaban sa luwas asin tumang sa maraot na mga tendensia sa laog niato. Talaga daw na makalalaom kitang manggana na mayong tabang nin Dios? Paano niato maaako an saiyang tabang? Anong mga kualidad an maninigo niatong kultibaron tanganing makatabang sato na labanan an makalaman na mga inklinasyon? Para sa mga simbag, estudyaran niato an itinokdo ni Jesus sa saiyang namomotan na mga disipulo sa huring aldaw kan saiyang buhay digdi sa daga.

Daogon an Kapalangkawan nin Kapakumbabaan

Halimbawa, estudyare an problema nin kapalangkawan, o kaabhawan. May labot dian, an Biblia nagsasabi: “An kapalangkawan naeenot sa kapahamakan, asin an espiritu nin kapaabaw-abawan naeenot sa pagkapukan.” (Talinhaga 16:18) An Kasuratan naghahatol man sato: “Kun an siisay man nag-iisip na sia may halaga mantang sia daing halaga, dinadaya nia an saiyang sadiring isip.” (Galacia 6:3) Iyo, an kapalangkawan mapanlaglag asin mapandaya. Kita madonong na ikaongis an “pagpamuraway sa sadiri asin kapalangkawan.”—Talinhaga 8:13.

An mga apostol daw ni Jesus may problema sa pagpamuraway sa sadiri asin kapalangkawan? Sa kisuerra sarong okasyon, pinagdiskutiran ninda kun siisay an mas dakula. (Marcos 9:33-37) Sa saro pang okasyon, hinagad ni Santiago asin Juan an prominenteng posisyon sa Kahadean. (Marcos 10:35-45) Minawot ni Jesus na tabangan an saiyang mga disipulo na mahale an tendensiang ini. Kaya mientras  na kinakakan an pamanggihan nin Paskua, sia tuminindog, naghagkos nin tuwalya, asin nagpoon na hanawan an mga bitis kan saiyang mga disipulo. Lininaw nia kun anong leksion an gusto niang manodan ninda. “Kun ako, minsan Kagurangnan asin Paratokdo, naghanaw kan saindong mga bitis,” sabi ni Jesus, “dapat na hanawan man nindo an bitis kan lambang saro.” (Juan 13:14) An kapalangkawan kaipuhan na salidahan kan kabaliktaran kaiyan​—an kapakumbabaan.

Pero, bakong pasil na daogon an kapalangkawan. Pagtaodtaod kan bangging idto pakapahalea ni Jesus ki Judas Iscariote, na madali nang magpasaloib sa saiya, biglang nagkaigwa nin sarong mainit na diriskutiran an 11 apostol. An nasa isip ninda? Kun siisay sainda an garo baga pinakadakula! Imbes na anggotan sinda, sa giraray mapasensiang idinoon ni Jesus an importansia nin paglilingkod sa iba. Sinabi nia: “An mga hade kan mga nasyon nagpapakangkagurangnan ninda, asin an mga igwa nin kapangyarihan sa sainda inaapod na mga Mapagbiyaya. Alagad kamo dai magigin siring. Kundi an pinakadakula sa saindo iyo an magin pinakanguhod, asin an namomoon bilang an naglilingkod.” Ipinagigirumdom sa sainda an saiyang halimbawa, idinugang nia: “Ako nasa tanga nindo bilang an sarong naglilingkod.”—Lucas 22:24-27.

Nasabotan daw iyan kan mga apostol? Minalataw na iyo. Pakalihis nin dakol na taon si apostol Pedro nagsurat: “Kamo gabos magin parareho an isip, nagpapaheling nin pakikipagkapwa, may kapadangatan na sa magturugang, madinamayon sa mapagpadangat na paagi, mapakumbaba sa isip.” (1 Pedro 3:8) Mahalagang marhay na daogon man niato an kapalangkawan nin kapakumbabaan! Kita madonong na dai mabangkag sa pagmamaigot na kamtan an kabantogan, kapangyarihan, o posisyon. “An Dios minatumang sa mga maabhaw,” an sabi kan Biblia, “alagad sia minatao nin dai na kutana maninigong kabootan sa mga mapakumbaba.” (Santiago 4:6) Siring man, an sarong suanoy na madonong na talinhaga nagsasabi: “An bunga nin kapakumbabaan asin pagkatakot ki Jehova kayamanan asin kamurawayan patin buhay.”—Talinhaga 22:4.

Daogon an Pagkaongis—Paano?

Estudyare an saro pang karakteristiko na lakop sa kinaban—an pagkaongis. Baga man an dahelan takot, pagkaignorante, prehuwisyo, pan-aapi, inhustisya, nasyonalismo, tribalismo, o rasismo, an pagkaongis garo baga yaon sa gabos na lugar. (2 Timoteo 3:1-4) An pagkaongis lakop man kan kaaldawan ni Jesus. An mga parasingil nin buwis ikinaoongis na mga isinikwal sa Judiong sosyedad. An mga Judio dai nangungunlabot sa mga Samaritano. (Juan 4:9) Asin tinutuyatuya man kan mga Judio an mga Hentil, o bakong Judio. Minsan siring, pag-abot nin panahon an pagsamba na inestablisar ni Jesus inako an mga tawo hale sa gabos na nasyon. (Gibo 10:​34, 35; Galacia 3:28) Kaya mamomoton niang itinao sa saiyang mga disipulo an sarong bagay na bago.

Ipinahayag ni Jesus: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan.” Kaipuhan na manodan nindang ipaheling an pagkamoot na ini, huli ta sia nagpadagos: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:​34, 35) An togon bago huli ta iyan labi pa sa pagkamoot sana sa “saimong kapwa nin siring sa saimo man sana.” (Levitico 19:18) Sa anong paagi? Lininaw iyan ni Jesus, na sinasabi: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na namoot nin orog pa kaini, na itao nin saro an saiyang kalag para sa saiyang mga katood.” (Juan 15:​12, 13) Kaipuhan na andam sindang isakripisyo an sainda mismong buhay para sa lambang saro asin para sa iba.

Paano mahihimo nin bakong sangkap na mga tawo na haleon sa buhay ninda an may maraot na intension na pagkaongis? Paagi sa pagsalida kaiyan  nin mapagsakripisyong pagkamoot. Minilyon na sinserong indibiduwal hale sa gabos na rasa, kultura, relihion, asin politika an naggigibo mismo kaiyan. Sinda ngonyan tinitiripon sa sarong nagkakasararo, mayong pagkaongis na komunidad—an pambilog na globong kasararoan nin magturugang kan Mga Saksi ni Jehova. Isinasapuso ninda an ipinasabong na mga tataramon ni apostol Juan: “An lambang naoongis sa saiyang tugang paragadan, asin kamo nakakaaram na mayo nin paragadan na igwa pa dian sa saiya nin buhay na daing katapusan.” (1 Juan 3:15) An tunay na mga Kristiano bako sanang nagsasayumang kumapot nin armas sa ano man na guerra kundi maigot man na naghihingoang magpaheling nin pagkamoot sa lambang saro.

Pero, ano an maninigo na magin nasa isip na aktitud niato sa bako niatong mga kapagtubod asin sa tibaad nagpapaheling nin pagkaongis sa sato? Mantang nakabitay sa sarong harigi, si Jesus namibi para sa mga magadan sa saiya, na nagsasabi: “Ama, patawada sinda, huli ta dai ninda naaaraman an saindang ginigibo.” (Lucas 23:34) Kan ginapo sagkod na magadan kan mga tawo na pano nin pagkaongis an disipulong si Esteban, ini an huring mga tataramon nia: “Jehova, dai mo ibilang na sainda an kasalan na ini.” (Gibo 7:60) An gusto ni Jesus asin ni Esteban iyo an pinakamarahay dawa sa mga naoongis sa sainda. Mayong pagkaongis sa puso ninda. “Gumibo kita kan marahay sa gabos,” an isinasadol sato kan Biblia.​—Galacia 6:10.

‘Sarong Paratabang Sagkod Lamang’

Mantang nagpapadagos an pagtiripon kaiba kan saiyang 11 fiel na apostol, ipinaaram sainda ni Jesus na sa dai na mahahaloy dai na ninda sia makakaibanan sa pisikal. (Juan 14:28; 16:28) Alagad inasegurar nia sinda: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang.” (Juan 14:16) An ipinanugang paratabang iyo an banal na espiritu nin Dios. Itotokdo kaiyan sainda an hararom na mga bagay sa Kasuratan asin ipapagirumdom sa sainda an itinokdo ni Jesus durante kan saiyang ministeryo digdi sa daga.—Juan 14:26.

Paano puedeng makatabang sa sato ngonyan an banal na espiritu? Bueno, an Biblia iyo an ipinasabong na Tataramon nin Dios. An mga tawong ginamit na maghula asin magsurat kan Biblia ‘pinahiro kan banal na espiritu.’ (2 Pedro 1:20, 21; 2 Timoteo 3:16) An pag-adal niato sa Kasuratan asin pag-aplikar kan nanonodan niato nagtatao sato nin kaaraman, kadonongan, pakasabot, pakarorop, pakamansay, asin kakayahan sa pag-iisip. Bako daw na mas andam kitang atubangon an mga pangigipit kan maraot na kinaban na ini?

An banal na espiritu paratabang sa saro pa nganing paagi. An banal na espiritu nin Dios sarong makapangyarihan na puersa para sa ikararahay, na pinapangyaring magpaheling nin diosnon na mga kualidad an mga naiimpluwensiahan kaiyan. “An bunga kan espiritu iyo an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri,” an sabi kan Biblia. Bako daw na ini an mismong mga kualidad na kaipuhan niato tanganing madaog an makalaman na mga inklinasyon sa inmoralidad, iriwal, pangimon, mga pagputok nin kaanggotan, asin an mga kapareho kaiyan?—Galacia 5:19-23.

Paagi sa pagsarig sa espiritu nin Dios, puede man niatong akoon an “puersa na labi sa ordinaryo” tanganing atubangon an ano man na problema o kapurisawan. (2 Corinto 4:7) Minsan ngani tibaad dai man haleon kan banal na espiritu an mga pagbalo o sugot, seguradong makatatabang iyan sa sato na matagalan iyan. (1 Corinto 10:13) “Igwa ako kan kosog para sa gabos na bagay huli sa saiya na nagtatao nin puersa sa sako,” an isinurat ni apostol Pablo. (Filipos 4:13) Nagtatao an Dios kan siring na puersa paagi sa saiyang banal na espiritu. Nagpapasalamat nanggad kita huli sa banal na espiritu! Ipinanuga iyan sa mga ‘namomoot ki Jesus asin nag-ootob kan saiyang mga togon.’—Juan 14:15.

“Magdanay Kamo sa Sakong Pagkamoot”

Sa huring banggi nia bilang tawo, sinabihan man ni Jesus an saiyang mga apostol: “An igwa kan sakong mga togon asin minaotob kaiyan, an sarong iyan iyo an namomoot sa sako. An namomoot man sa sako mamomotan kan sakong Ama.” (Juan 14:21) “Magdanay kamo sa sakong pagkamoot,” an sadol nia sa sainda. (Juan 15:9) Paanong an pagdadanay sa pagkamoot kan Ama asin kan Aki makatatabang sa sato sa pakikipaglaban niato sa makasalan na mga inklinasyon sa laog niato asin sa maraot na kinaban sa luwas?

Bueno, talaga daw na kaya niatong kontrolon an maraot na mga tendensia kun mayo kitang makosog na motibasyon na gibohon iyan? Igwa daw nin maorog pang dahelan kisa pagmawot na magkaigwa nin marahay na relasyon ki Jehova Dios asin  sa saiyang Aki? Si Ernesto, * sarong hoben na lalaki na maigot na nakipaglaban tumang sa inmoral na estilo nin pamumuhay nia poon kan sia bago pa sanang magtinedyer, nagpapaliwanag: “Gusto kong paogmahon an Dios, asin nanodan ko sa Biblia na dai sia oyon sa pamumuhay ko. Kaya nagdesisyon ako na magin ibang klaseng tawo, na kumuyog sa mga paggiya nin Dios. Aroaldaw, kinaipuhan na labanan ko an negatibo, malaswang mga kaisipan na minasabong pa sa isip ko. Alagad determinado akong ganahon an pakikilaban na ini, asin namibi ako nin daing ontok para sa tabang nin Dios. Pakalihis nin duwang taon natapos na an pinakagrabe, minsan ngani sagkod ngonyan estrikto pa ako sa sadiri ko.”

Kun manongod sa pakikipaglaban sa kinaban sa luwas, pensaron an pantapos na pamibi ni Jesus bago naghale sa kuartong idto sa itaas sa Jerusalem. Para sa saiyang mga disipulo, sia namibi sa saiyang Ama asin nakiolay: “Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.” (Juan 17:​15, 16) Kanigoan kanakaaasegurar giraray sa boot! Binabantayan ni Jehova an mga namomotan nia asin pinakokosog sinda mantang nagpapadagos sindang siblag sa kinaban.

“Tumubod Kamo”

An pag-otob sa mga togon ni Jesus puede nanggad na makatabang sa sato na magin mapanggana sa satong pakipagtusayan tumang sa maraot na kinaban asin sa satong makasalan na mga tendensia. Pero baga man importante an siring na mga kapangganahan, dai kaiyan puedeng haleon an kinaban ni an minanang kasalan. Alagad dai kita kaipuhan na mawaran nin paglaom.

“An kinaban maagi sana asin siring man an mawot kaiyan,” an sabi kan Biblia, “alagad an naggigibo kan kabotan nin Dios magdadanay sagkod lamang.” (1 Juan 2:17) Itinao ni Jesus an saiyang buhay tanganing iligtas sa kasalan asin kagadanan an “lambang nagtutubod sa saiya.” (Juan 3:16) Mantang nagtatalubo kita sa satong kaaraman manongod sa kabotan asin katuyohan nin Dios, kun siring, isapuso niato an konseho ni Jesus: “Tumubod kamo sa Dios, tumubod man kamo sa sako.”—Juan 14:1.

[Nota sa Ibaba]

[Ritrato sa pahina 6, 7]

“Magdanay kamo sa sakong pagkamoot,” an sadol ni Jesus sa saiyang mga apostol

[Ritrato sa pahina 7]

An katalingkasan sa kasalan asin sa mga epekto kaiyan madali nang magin katunayan