Matatapos Pa daw an Kadukhaan?

“UYA! an mga luha kan mga inaapi, alagad mayo sindang pararanga; asin sa kampi kan saindang mga paraapi igwa nin kapangyarihan, kaya mayo sinda nin pararanga,” an sabi kan madonong na si Hadeng Salomon kan suanoy na Israel. (Eclesiastes 4:1) Daing duda, an dakol na inaapi na nasa isip nia mga dukha man.

An kadukhaan dai masosokol solamente sa paagi nin kuarta. Segun sa impormasyon na itinao kan World Bank kan Hunyo 2002, “kinalkulo na kan 1998 1.2 bilyones katawo sa bilog na kinaban an nabubuhay sa dai pang $1 kada aldaw . . . asin 2.8 bilyones an nabubuhay sa dai pang $2 kada aldaw.” Sinabi na maski ngani an siring na kabilangan mas hababa kisa mas naenot na mga pagkalkulo, “iyan nagdadanay pa man giraray na halangkawon kun manongod sa pagdusa nin tawo.”

Matatapos pa daw an kadukhaan? Sinabihan ni Jesu-Cristo an saiyang mga disipulo: “An mga dukha pirme nindong kaibanan.” (Juan 12:8) Alagad nangangahulogan daw ini na an kadukhaan asin an grabeng epekto kaiyan magpapadagos sagkod lamang? Dai, ta minsan ngani dai pinanugaan ni Jesus an saiyang mga parasunod na gabos sinda magigin mayaman sa materyal, maninigo na dai niato ikonklusyon base sa mga tataramon nia na mayo nang paglaom para sa mga dukha.

Sa ibong kan mga paghihingoa nin tawo asin kan katunayan na an mga pangako na tataposon an kadukhaan parateng nasusudya, an Tataramon nin Dios, an Biblia, nag-aasegurar sa sato na sa dai na mahahaloy mayo na nin mga tawo na daing sukat. Sa katunayan, ipinahayag ni Jesus an “maogmang bareta sa mga dukha.” (Lucas 4:18) Kaiba sa maogmang baretang ini an panuga na hahaleon an kadukhaan. Mangyayari ini kun ponan na kan Kahadean nin Dios an matanos na mga kamugtakan sa daga.

Laen nanggad na kinaban iyan! An langitnon na Hadeng si Jesu-Cristo “maheherak . . . sa hababa asin sa dukha, asin an kalag kan mga dukha saiyang ililigtas.” Tunay nanggad, “gikan sa pan-aapi asin sa kadahasan saiyang tutuboson an saindang kalag.”​—Salmo 72:13, 14.

Mapadapit sa panahon na iyan, an Miqueas 4:4 nagsasabi: “Sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.” Reresolberan kan Kahadean nin Dios an gabos na problema na nagpapasakit sa katawohan, na hahaleon pa ngani an helang asin kagadanan. “Totoong hahalonon [nin Dios] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon.”​—Isaias 25:8.

Mapananarigan nindo an mga panugang ini huli ta ipinasabong mismo iyan nin Dios. Taano ta dai siyasaton an mga ebidensia na nagpapatunay na an mga hula sa Biblia masasarigan?

[Picture Credit Line sa pahina 32]

Retrato kan FAO/M. Marzot