Ipaheling an “Bilog na Kahoyoan sa Gabos na Tawo”

“Padagos na ipagirumdom sa sainda na . . . magin rasonable, nagpapaheling nin bilog na kahoyoan sa gabos na tawo.”—TITO 3:​1, 2.

1. Taano ta bako pirmeng madali na magpaheling nin kahoyoan?

“MAGIN kamong mga paraarog sa sako,” an isinurat ni apostol Pablo, “siring na ako paraarog ki Cristo.” (1 Corinto 11:1) An gabos na lingkod nin Dios ngonyan naghihingoa nin maigot na himateon an sadol na ini. Totoo, bako iyan madali, huli ta nagmana kita sa satong enot na mga magurang na tawo nin paslong mga kamawotan asin ugale na bakong kaoyon kan halimbawa ni Cristo. (Roma 3:23; 7:21-25) Minsan siring, pag-abot sa pagpaheling nin kahoyoan, kita gabos puedeng magin mapanggana kun kita maghihingoa. Alagad bakong igo an pagsarig sa sadiri sanang determinasyon. Ano pa an kaipuhan?

2. Paano niato ikapaheheling an “bilog na kahoyoan sa gabos na tawo”?

² An diosnon na kahoyoan kabtang kan bunga kan banal na espiritu. Mientras na orog kitang nagsusunod sa mga paggiya kan puersa aktiba nin Dios, orog man na maririsa an bunga kaiyan. Dangan sana niato ikapaheheling an “bilog na kahoyoan” sa gabos. (Tito 3:2) Siyasaton niato kun paano niato maaarog an halimbawa ni Jesus asin kun paano niato magigibo na ‘makakua nin kaginhawahan’ an mga nakikiasosyar sa sato.—Mateo 11:29; Galacia 5:22, 23.

 Sa Pamilya

3. Anong situwasyon sa pamilya an nagpapabanaag kan espiritu kan kinaban?

³ An sarong kamugtakan kun saen kaipuhan an kahoyoan iyo an sa laog kan pamilya. Tinatantsar kan World Health Organization na an kadahasan sa pamilya mas dakula an peligrong itinatao sa salud nin mga babae kisa pinagkombinar na mga aksidente sa trapiko asin malaria. Halimbawa, sa Londres, Inglaterra, an un-kuarto kan gabos na ibinaretang madahas na krimen nangyari sa laog kan pamilya. An mga pulis parateng may nakakaenkuentrong mga tawo na ilinuluwas an mga nasa boot ninda paagi sa “sirilyakan patin mapanlibak na pagtaram.” Mas maraot pa, an nagkapirang mag-agom tinogotan an “maraot an kamawotan na kapaitan” na maapektaran an saindang relasyon. An gabos na ini mamondong nagpapabanaag kan “espiritu kan kinaban” asin huli kaiyan mayo nin lugar sa Kristianong mga pamilya.​—Efeso 4:31; 1 Corinto 2:12.

4. Ano an puedeng magin epekto nin kahoyoan sa pamilya?

⁴ Tanganing maolang an kinabanon na mga tendensia, kaipuhan niato an espiritu nin Dios. “Kun saen an espiritu ni Jehova, yaon an katalingkasan.” (2 Corinto 3:17) Pinakokosog kan pagkamoot, kabootan, pagpopogol sa sadiri, asin pakatios an pagkakasaro nin bakong sangkap na mga mag-agom. (Efeso 5:33) An kahoyoan nin boot nagpapasinggaya sa kamugtakan asin sarong magayon na kabaliktaran sa iriwal asin pasuruhay na nagpapakanos sa dakol na pamilya. Mahalaga an sinasabi nin saro, alagad an paagi nin pagpahayag nia an nagpapaheling kun anong aktitud an nasa likod kan mga sinasabi. An mga kapurisawan asin kahaditan na ipinahahayag na may kahoyoan nagpapakalma sa mga tension. An madonong na si Hadeng Salomon nagsurat: “An simbag, kun mahoyo, nakapararayo  nin kaanggotan, tara an tataramon na makolog nakapaaanggot.”—Talinhaga 15:1.

5. Paano makatatabang an kahoyoan sa sarong pamilya na nababanga huli sa relihion?

⁵ An kahoyoan nangorognang importante sa sarong pamilya na nababanga huli sa relihion. Kun iniibanan nin mga gibo nin kabootan, makakatabang iyan na madara ki Jehova an mga minatumang. Hinatolan ni Pedro an mga agom na Kristiana: “Magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang. Asin an saindong samno dai magin an panluwas na pagsalapid kan buhok asin an pagsulot nin mga alahas na bulawan o an pagsolog nin pan-ibabaw na mga gubing, kundi magin an natatagong persona kan puso sa dai nalalapang gubing kan toninong asin mahoyong espiritu, na may dakulang halaga sa mga mata nin Dios.”—1 Pedro 3:1-4.

6. Paano mapapakosog kan pagpaheling nin kahoyoan an bogkos nin mga magurang asin mga aki?

⁶ Puedeng maraot an relasyon nin mga magurang asin mga aki, nangorogna kun mayo an pagkamoot ki Jehova. Alagad sa gabos na Kristianong pamilya, kaipuhan an pagpaheling nin kahoyoan. Hinatolan ni Pablo an mga ama: “Dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” (Efeso 6:4) Kun nangingibabaw an kahoyoan sa sarong pamilya, nagkokosog an dayupot na bogkos nin mga magurang asin mga aki. Si Dean, saro sa limang aki, may nagigirumdoman manongod sa saiyang ama: “Mahoyo si Tatay. Mayo lamang akong nagigirumdoman na nakasimbagan ko sia—dawa kan ako tinedyer pa. Pirme siang mahoyo na gayo, dawa kun sia anggot. Kun minsan dai nia ako pinapaluwas sa kuarto ko o hinahalean ako nin nagkapirang pribilehio, alagad nungka kaming nagdiskutiran. Sia bako sanang samuyang ama. Katood man niamo sia, asin habo mi siang pamondoon.” An kahoyoan talagang nakakatabang na mapasarig an bogkos nin mga magurang asin mga aki.

Sa Satong Ministeryo

7, 8. Taano ta mahalagang marhay an pagpaheling nin kahoyoan sa ministeryo sa langtad?

⁷ An saro pang kamugtakan na mahalaga an kahoyoan iyo an sa ministeryo sa langtad. Mantang ipinapaabot niato sa iba an maogmang bareta kan Kahadean, nakakanompong kita nin mga tawo na laen-laen an ugale. An nagkapira naoogmang maghinanyog sa mensahe nin paglaom na dara niato. An iba, huli sa laen-laen na dahelan, tibaad bakong marahay an reaksion. Digdi dakulang tabang sa sato an kualidad na kahoyoan sa pag-otob sa sugo sa sato na magin mga saksi sagkod sa kaporoporohi kan daga.—Gibo 1:8; 2 Timoteo 4:5.

⁸ Nagsurat si apostol Pedro: “Santipikaron nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) Huling sinsero niatong minimidbid si Cristo bilang satong Arogan, maingat niatong ipinaheheling an kahoyoan sagkod an paggalang kun naghuhulit sa mga nagtataram na may kaisogan. An paggaweng ini parateng nagbubunga nin pambihirang mga resulta.

9, 10. Isaysay an sarong eksperyensia tanganing ipaheling an halaga nin kahoyoan sa ministeryo sa langtad.

⁹ Kan buksan kan agom nia an nagtotoktok sa pinto kan saindang apartment, dai lang nakiaram si Keith. Kan maaraman na saro sa Mga Saksi ni Jehova an saindang bisita, an agom ni Keith anggot na nagsahot na an mga Saksi maringis sa mga aki. An tugang na lalaki nagdanay na kalmado. Sia may kahoyoan na nagsimbag: “Namomondo ako na siring kaiyan an iniisip nindo. Puede daw po na ipaheling ko sa saindo kun ano an pagtubod kan Mga Saksi ni Jehova?” Naghihinanyog si Keith sa pag-oolay asin ngonyan nagrani sa pinto tanganing putolon na an pagdalaw kan tugang.

¹⁰ Kan huri, nagbasol an mag-agom sa nagin maisog na pagtratar ninda sa saindang bisita. An mahoyong boot nia an nakatudok sa boot ninda. Sa pagkabigla ninda, pakalihis nin sarong semana nagbalik an tugang, asin tinogotan na sia ni Keith asin kan agom kaini na ipaliwanag an basehan  sa Kasuratan kan saiyang pagtubod. “Sa suminunod na duwang taon, naghihinanyog na kaming marhay sa sinasabi nin iba pang mga Saksi,” an sabi ninda kan huri. Uminoyon sinda na magkaigwa nin pag-adal sa Biblia, asin sa kahurihurihi an duwa nabautismohan bilang simbolo kan saindang pagdusay ki Jehova. Kanigoan na balos para sa Saksing idto na enot na nagsongko ki Keith asin sa saiyang agom! Nanuparan kan Saksi an mag-agom pakalihis nin dakol na taon asin naaraman nia na sinda espirituwal na mga tugang na nia ngonyan. Nanggana an kahoyoan.

11. Sa anong paagi puedeng magbukas nin dalan an kahoyoan tanganing akoon nin saro an Kristianong katotoohan?

¹¹ An mga naeksperyensiahan ni Harold bilang sarong soldados ikinaraot na marhay kan saiyang boot asin nagduda sia sa pag-eksister nin Dios. Nakadagdag pa sa saiyang mga problema an pagkabunggo sa saiya nin sarong burat na drayber na nagresulta sa permanenteng pagkabaldado ni Harold. Kan sumongko sa harong nia an mga Saksi ni Jehova, sinabihan sinda ni Harold na dai na ninda sia pagparadalawon. Alagad sarong aldaw, an sarong Saksi na an ngaran Bill dinalaw an sarong interesado na duwang pinto sana an distansia sa harong ni Harold. Nasala si Bill, an pinto ni Harold an natoktok nia. Kan an pinto buksan ni Harold, na nakasogkod, si Bill tolos-tolos na naghagad nin dispensasyon, na nagpaliwanag na an tuyo niang dalawon iyo an sarong karaning harong. Ano an nagin reaksion ni Harold? Dai aram ni Bill, si Harold nakadalan nin sarong bareta sa telebisyon na ipinapaheling an mga Saksi na nagtatarabang sa pagtogdok nin sarong bagong Kingdom Hall sa laog nin halipot na gayong panahon. Naghanga sa naheling niang kadakol na tawong nagtatrabaho na may pagkasararo, binago nia an saiyang aktitud dapit sa mga Saksi. Napahiro kan maboot na paghagad ni Bill nin dispensasyon asin kan saiyang marahay asin mahoyong ugale, nagdesisyon si Harold na akoon an mga pagdalaw kan mga Saksi. Nag-adal sia sa Biblia, nag-oswag, asin nagin bautisadong lingkod ni Jehova.

Sa Kongregasyon

12. Anong kinabanon na mga ugale an maninigong labanan kan mga miembro kan Kristianong kongregasyon?

¹² An ikatolong kamugtakan kun saen mahalagang marhay an kahoyoan iyo an sa Kristianong kongregasyon. Ordinaryo na sana sa presenteng sosyedad an mga komprontasyon. Mga debate, argumento, asin diskusyon an parateng ginigibo kan mga tawong makalaman an pananaw sa buhay. Kun minsan, an siring na kinabanon na mga ugale nakakalaog sa Kristianong kongregasyon asin naheheling sa berbal na mga diriskutiran asin iriwal. Namomondo an may paninimbagan na mga tugang kun nagkakaipong asikasohon ninda an mga situwasyon na ini. Minsan siring, an pagkamoot ki Jehova asin sa saindang mga tugang an nagpapahiro sa sainda na hingoahon na ikabalik an mga napapasala.—Galacia 5:25, 26.

13, 14. Ano an puedeng ibunga kan ‘pagtotokdo na may kahoyoan duman sa mga minatumang’?

 ¹³ Kan enot na siglo, si Pablo asin an kaibaiba niang si Timoteo napaatubang sa mga problema na itinatao nin nagkapira sa laog kan kongregasyon. Pinatanidan ni Pablo si Timoteo na magmaan sa mga tugang na kaagid nin mga lalagan para sa “katuyohan na mayong onra.” “An oripon kan Kagurangnan dai kaipuhan na makiiwal,” an ipinangatanosan ni Pablo, “kundi kaipuhan na magin maboot sa gabos, kualipikadong magtokdo, padagos na nagpopogol sa irarom nin karatan, nagtotokdo na may kahoyoan duman sa mga minatumang.” Kun pinagdadanay niato an mahoyong ugale dawa kun pinoprobokar, an mga nagkokontra sa parate napapahiro na ebalwaron liwat an saindang mga kritisismo. Dangan, siring kan padagos na isinurat ni Pablo, tibaad “tawan [sinda ni Jehova] nin pagsolsol na magiya sa tamang kaaraman kan katotoohan.” (2 Timoteo 2:20, 21, 24, 25) Mangnoha na ikinonektar ni Pablo an kahoyoan sa pagkakalmado asin pagpopogol.

¹⁴ Ginibo ni Pablo an saiyang ihinuhulit. Kan inaaksionan an manongod sa “labi-labi karahay na mga apostol” sa kongregasyon sa Corinto, sinadol nia an mga tugang: “Ngonyan ako mismo, si Pablo, nakikimaherak sa saindo sono sa kahoyoan asin kabootan kan Cristo, baga man ako may kababaan paghelingon sa tahaw nindo, mantang kun mayo dian ako pusoan sa saindo.” (2 Corinto 10:1; 11:5) Talagang inarog ni Pablo si Cristo. Mangnoha na nakimaherak sia sa mga tugang na ini “sono sa kahoyoan” kan Cristo. Sa siring linikayan nia an pagigin dominante asin diktador. An saiyang sadol daing duda na nagustohan kan mga nasa kongregasyon na igwa nin pusong naghihimate. Hinusay nia an naraot na mga relasyon asin ibinugtak an basehan para sa katoninongan asin pagkasararo sa kongregasyon. Bako daw na ini an dapat na pagmaigotan niato gabos na arogon? An kamagurangan nangorognang kaipuhan na arogon an ginibo ni Cristo asin ni Pablo.

15. Taano ta mahalaga an kahoyoan kun nagtatao nin hatol?

¹⁵ An paninimbagan na tabangan an iba bako nanggad sa mga panahon sana na namemeligro an katoninongan asin pagkasararo kan kongregasyon. Haloy pa bago may maraot na relasyon, an mga tugang nangangaipo nin mamomoton na paggiya. “Mga tugang, minsan kun an sarong tawo gumibo nin sala bago nia iyan maaraman, kamo na igwang espirituwal na mga kualipikasyon pagmaigotan nindo na pakarhayon giraray an tawong iyan,” an sadol ni Pablo. Alagad paano? “Sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man.” (Galacia 6:1) An pagpadanay nin “espiritu nin kahoyoan” bako pirmeng madali, nangorogna huli ta an gabos na Kristiano, kabale an nombradong mga lalaki, apektado nin makasalan na mga tendensia. Minsan siring, an kahoyoan an matabang na magin mas pasil an pagpakarhay giraray kan napasala.

16, 17. Ano an puedeng makatabang na labanan an ano man na pagduwaduwang iaplikar an hatol?

¹⁶ Sa orihinal na Griego, an termino na trinadusir  na “pakarhayon giraray” napapanongod man sa pagpakarhay o pagsulit nin nalapong tolang, sarong makolog na proseso. An nagpapakosog liwat sa boot na doktor na nagsusulit nin nalapong tolang positibo an pagtaram dapit sa mga pakinabang kan prosesong iyan. Nakararanga an saiyang kalmadong boot. An pirang enot na tataramon nakakaina sa pinakang kolog kaiyan. Kaagid kaiyan, an espirituwal na pagpakarhay giraray puedeng makolog. Alagad an kahoyoan magpapagin mas pasil na akoon iyan, sa siring ikinababalik an marahay na relasyon asin nag-aandam kan dalan na magbakle an napasala. Dawa kun sa primero sinasayumahan an hatol, an kahoyoan sa parte kan nagtatao nin tabang puedeng makahale kan ano man na pagduwaduwang kuyogon an tamang hatol sa Kasuratan.​—Talinhaga 25:15.

¹⁷ Kun tinatabangan an iba na mapakarhay giraray, yaon pirme an peligro na an hatol tibaad isipon na kritisismo. Siring kaini an pagkasabi kaiyan nin sarong parasurat: “Sa pagsagwe sa iba, makosog an tendensia niato na magin sobra kaasertado, asin kun siring orog na kinakaipuhan an kahoyoan.” An pagkultibar sa kahoyoan na naggigikan sa kapakumbabaan matabang sa Kristianong nagtatao nin hatol na malikayan an peligrong ini.

“Sa Gabos na Tawo”

18, 19. (a) Taano ta tibaad madepisilan an mga Kristiano na magpaheling nin kahoyoan may relasyon sa sekular na mga autoridad? (b) Ano an matabang sa mga Kristiano na magpaheling nin kahoyoan sa mga nasa autoridad, asin may anong posibleng resulta?

¹⁸ An sarong kamugtakan kun saen dakol an nadedepisilan na magpaheling nin kahoyoan iyo an may relasyon sa sekular na mga autoridad. Totoo, an paghiro kan nagkapirang nasa autoridad nagpapaheling nin kaisogan asin kadaihan nin pakikipagkapwa. (Eclesiastes 4:1; 8:9) Minsan siring, tatabangan kita kan pagkamoot niato ki Jehova na rekonoseron an saiyang supremong autoridad asin itao sa mga autoridad sa gobyerno an relatibong pagpasakop na maninigo sa sainda. (Roma 13:1, 4; 1 Timoteo 2:1, 2) Dawa kun an mga nasa katongdan maghingoang limitaran an pampublikong kapahayagan kan satong pagsamba ki Jehova, naoogma kitang humanap nin mga paagi na bukas pa tanganing ikatao an satong atang nin pag-omaw.—Hebreo 13:15.

¹⁹ Nungka kitang nagigin maluminaban. Pinagmamaigotan niatong magin rasonable minsan ngani nungkang ikinokompromiso an matanos na mga prinsipyo. Paagi kaini, an satong mga tugang nagigin mapanggana sa pagpadagos kan saindang ministeryo sa 234 kadagaan sa bilog na kinaban. Hinihimate niato an hatol ni Pablo na “magpasakop asin magkuyog sa mga gobyerno asin autoridad bilang mga namamahala, na magin andam para sa gabos na marahay na gibo, na dai magtaram nin nakararaot manongod sa kiisay man, dai magin maluminaban, magin rasonable, nagpapaheling nin bilog na kahoyoan sa gabos na tawo.”—Tito 3:1, 2.

20. Ano an mga balos para sa mga nagpapaheling nin kahoyoan?

²⁰ Abundang bendisyon an nakatagama para sa gabos na nagpapaheling nin kahoyoan. “Maogma an mga mahoyo,” an sabi ni Jesus, “mantang mamanahon ninda an daga.” (Mateo 5:5) Para sa linahidan nin espiritung mga tugang ni Cristo, an pagpapadanay nin kahoyoan naggagarantiya kan saindang kaogmahan asin kan pribilehio na mamahala sa daganon na rona kan Kahadean. Kun dapit sa “dakulang kadaklan” nin “ibang karnero,” padagos nindang ipinaheheling an kahoyoan asin inaantisipar an buhay sa Paraiso digdi sa daga. (Kapahayagan 7:9; Juan 10:16; Salmo 37:11) Kanigoan karahay na mga tinatanaw sa ngapit! Kun siring, nungka niatong paglingawan an pagirumdom ni Pablo sa mga Kristiano sa Efeso: “Ako, kun siring, an bilanggo dian sa Kagurangnan, nakikimaherak sa saindo na kamo maglakaw nin angay sa pag-apod na iinapod sa saindo, na igwa nin lubos na kababaan nin isip asin kahoyoan.”​—Efeso 4:1, 2.

Bilang Repaso

• Anong mga bendisyon an ibinubunga nin pagpaheling nin kahoyoan

• sa pamilya?

• sa ministeryo sa langtad?

• sa kongregasyon?

• Anong mga balos an ipinanuga sa mga mahoyo?

[Mga Hapot Para sa Pag-adal]

[Ritrato sa pahina 21]

An kahoyoan nangorognang importante sa sarong pamilya na nababanga huli sa relihion

[Ritrato sa pahina 21]

Pinakokosog nin kahoyoan an bogkos nin pamilya

[Ritrato sa pahina 23]

Gumibo nin pagdepensa na may kahoyoan asin hararom na paggalang

[Ritrato sa pahina 24]

An kahoyoan kan nagtatao nin hatol puedeng makatabang sa napasala