Maogma Kamong Iniimbitaran

AN Huring Pamanggihan, na inintrodusir kan Kagurangnan na si Jesu-Cristo mga 2,000 na taon na an nakaagi, bako sanang sarong interesanteng pangyayari sa kasaysayan. Nagkaigwa iyan nin mapuersang epekto sa mga tawo poon pa kan iintrodusir iyan. Napahiro kan nabasa ninda sa mga pagkasaysay sa Ebanghelyo mapadapit sa nangyari kan bangging idto, dakol an naghingoang selebraron an Pamanggihan nin Kagurangnan sa manlaenlaen na paagi.

Natural sana an gabos na ini, huli ta ipinagboot mismo ni Jesu-Cristo na iselebrar kan saiyang mga parasunod an okasyon na ini asin gibohon ninda iyan nin regular. Espesipikong sinabihan nia sinda: “Padagos na gibohon nindo ini sa paggirumdom sa sako.”​—Lucas 22:19; 1 Corinto 11:23-25.

Siempre, tanganing an selebrasyon magin talagang kapakipakinabang na eksperyensia, an saro kaipuhan na igwa nin tamang pakasabot sa kahulogan kaiyan, na makukua sa Tataramon nin Dios, an Biblia. Dugang pa, mahalagang maaraman kun ano an sinasabi kan Biblia manongod sa kun noarin asin kun paano seselebraron an okasyon na iyan.

Bilang pagkuyog sa pagboot ni Jesus, an Mga Saksi ni Jehova sa bilog na kinaban magtitiripon sa Mierkoles na banggi, Abril 16, 2003, tanganing girumdomon an kagadanan ni Jesus. Iyan magigin sarong okasyon tanganing siyasaton an Kasuratan asin pakosogon giraray an saindang pagtubod asin pagkamoot sa Kagurangnan na si Jesu-Cristo, na nagsabi: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Maogma kamong iniimbitaran na makipagtipon sa sainda sa bangging iyan tanganing mapakosog man nindo an saindong pagtubod asin pagkamoot ki Jesu-Cristo asin sa langitnon na Ama, si Jehova Dios.