Mga Hoben—Kamo daw Nag-ooswag sa Espirituwal?

“MINSAN ngani nag-aatender ako kaidto sa Kristianong mga pagtiripon, mayo akong makosog na pagmawot na maglingkod ki Jehova,” sabi ni Hideo mantang ginigirumdom nia an mga aldaw kan sia nasa tersera anyo sa haiskul. “Sa parate iniimahinar ko na ako popular sa sakong mga kaklase asin nagpapasadpasad sa tinampo na may kaibang kailusyon. Bakong malinaw an sakong mga pasohan, asin mayo akong pagmawot na umoswag sa espirituwal.” Arog ni Hideo, dakol na hoben an garo baga daing direksion, na mayong pagmawot na aboton an ano man na kapakipakinabang na mga pasohan o umoswag.

Kun ika hoben, ganado ka gayod kun imbuelto ka sa mga isport o aling-alingan. Minsan siring, kun mapadapit sa espirituwal na mga aktibidad, tibaad bako nang arog kaiyan an pagmate mo. Posible daw na magin ganado manongod sa espirituwal na mga pasohan? Estudyare an mga tataramon na ini kan salmista: “An pagirumdom ni Jehova mapagtitiwalaan, na nagpapadonong sa daing eksperyensia. . . . An togon ni Jehova malinig, na nakapakikinang kan mga mata.” (Salmo 19:7, 8) An Tataramon nin Dios puedeng gumiya sa “daing eksperyensia” na gumawe nin madonong, na ‘pinakikinang an saiyang mga mata.’ Iyo, puede kang mabangkag asin maogmang marhay sa espirituwal na mga bagay. Alagad ano an kaipuhan tanganing magin arog kaiyan an pagmate mo? Saen ka maninigong pumoon?

Mamotibar na Maglingkod sa Dios

Enot, dapat na ika mamotibar. Estudyare an pangyayari sa hoben na si Hadeng Josias kan Juda. Kan makua sa templo an libro kan Ley ni Jehova, ipinabasa iyan ni Josias asin napahirong marhay an saiyang boot sa nadangog nia. Bilang resulta, “hinale ni Josias an gabos na makauuyam nin makuring bagay sa gabos na daga na rogaring kan mga aki ni Israel.” (2 Cronica 34:14-21, 33) Pinahiro si Josias kan pagbasa kan Tataramon nin Dios na gumibo nin orog pa sa pagsuportar sa dalisay na pagsamba.

Puede mo man na makultibar an pagmawot na maglingkod ki Jehova kun regular mong babasahon an Biblia asin hohorophoropon an nabasa mo. Iyan an nakamotibar ki Hideo. Nagpoon siang dayupot na makiasosyar sa sarong mas may edad nang payunir, na sarong pambilog na panahon na ministro kan Mga Saksi ni Jehova. An payunir sarong mahigos na estudyante sa Biblia asin naghihingoang iaplikar an mga katokdoan kaiyan sa saiyang buhay. Huling naparigon na marhay an boot sa halimbawa kan payunir, pinonan ni Hideo na gibohon man iyan asin napatalubo an makosog na pagmawot na maglingkod sa Dios asin sa ibang mga tawo. An saiyang espirituwal na pag-oswag nagresulta sa buhay na may katuyohan.

An aroaldaw na pagbasa kan Biblia puedeng magin nakamomotibar sa mga hoben. Si Takahiro nagpapaliwanag: “Basta ako naghigda na asin narealisar ko na dai ko pa nagibo an sakong pagbasa kan Biblia  para sa aldaw na iyan, minabuhat ako asin ginigibo ko iyan. Bilang resulta, namatean ko an paggiya ni Jehova. An pangaroaldaw na pagbasa kan Biblia nakatabang na marhay sa sakong espirituwal na pag-oswag. Huling determinadong makikabtang nin orog pa sa paglilingkod ki Jehova, nagpoon akong maglingkod bilang regular payunir dai nahaloy pagkagradwar ko sa haiskul. Asin ikinaoogma kong marhay iyan.”

Apuera sa pagbasa kan Biblia, ano pa an puedeng makatabang saimo na mapakosog an saimong motibasyon na omawon si Jehova? Itinokdo ki Tomohiro kan saiyang ina an katotoohan sa Biblia. Sia nagsasabi: “Kaidto sanang pinag-adalan kong biyo an librong Life Does Have a Purpose sa edad na 19 anyos na napahirong marhay an sakong boot kan pagkamoot ni Jehova asin kan atang na pantubos ni Jesus. An pag-apresyar na iyan sa pagkamoot nin Dios an nagmotibar sa sako na gumibo nin orog pa sa paglilingkod ki Jehova.” (2 Corinto 5:​14, 15) Arog ni Tomohiro, dakol na hoben an naenkaminar na umoswag sa espirituwal paagi sa pagmamaigot na gibohon an utitok na personal na pag-adal sa Biblia.

Dawa siring, paano kun mayo ka pa man giraray nin odok sa pusong pagmawot na maglingkod ki Jehova? Igwa ka pa daw na puedeng dolokon tanganing hagadan nin tabang? Si apostol Pablo nagsurat: “Huli ta an Dios an . . . naghihiro dian sa saindo tanganing kamo bumoot asin humiro.” (Filipos 2:13) Kun aarangon mo an tabang ni Jehova, suelto niang itatao sa saimo an saiyang banal na espiritu, na iyo an matao sa saimo nin kosog na bako sanang “humiro” kundi “bumoot” man. Nangangahulogan ini na dudugangan kan banal na espiritu nin Dios an saimong pagmawot na gibohon an pinakamakakaya mo sa paglilingkod ki Jehova asin tatabangan ka na tumalubo sa espirituwal. Tunay nanggad, magtiwala ka sa kapangyarihan ni Jehova asin parigonon an saimong puso!

Magbugtak kan Sadiri Mong mga Pasohan

Oras na makadesisyon ka nang orog pang maglingkod ki Jehova, kaipuhan na magbugtak ka nin personal na mga pasohan tanganing umoswag sa espirituwal. Si Mana, sarong hoben na Kristiana, nagsabi: “An pagbugtak nin mga pasohan dakulang tabang sa sako. Imbes na sumibog, nakakaabante ako na may kosog nin boot. Nasa isip ko an sakong mga pasohan, odok sa boot akong namibi ki Jehova para sa paggiya, asin nakaya kong umoswag na dai nadidisturbo.”

An saimong mga pasohan maninigong magin realistiko asin kayang aboton. An pagbasa nin sarong kapitulo sa Biblia kada aldaw sarong rasonableng pasohan. Puede mo man na ponan an sarong proyekto sa pagsiyasat. Sa pag-ilustrar kaini sa materyales na makukua sa Ingles, puede mong pag-adalan an manongod sa mga kualidad ni Jehova na nakalista sa irarom kan subtemang “Qualities by Name” sa irarom kan “Jehovah” sa Watch Tower Publications Index. Mga 40 an nakalista na puede mong estudyaran, asin an pagsiyasat na iyan daing duda na mapadayupot saimo ki Jehova asin mapahiro saimo na gumibo nin orog pa para sa saiya. An iba pang pasohan na kayang aboton iyo an pagkomento kisuerra sarong beses sa kada Kristianong pagtiripon na naghahagad nin pakikikabtang kan mga nagdadangog, pakamidbid nin orog pa sa kisuerra sarong miembro kan kongregasyon sa kada pagtiripon, asin dai pagpabayang makalihis an aldaw na dai namimibi ki Jehova asin ipinakikipag-olay sa iba an manongod saiya.

Kun dai ka pa nagpalista sa Teokratikong Paadalan sa Pagmiministro, iyan magigin sarong marahay na pasohan para saimo. Nakikikabtang ka na daw sa pampublikong ministeryo? Kun dai pa, tibaad boot mong pagmaigotan na magin sarong dai pa bautisadong parahayag. An seryosong pag-isip-isip kan saimong relasyon ki Jehova asin pagdusay kan saimong sadiri sa saiya natural sanang iyo an masunod na tangga. Dakol na hoben an naghihingoang otobon an saindang pagdusay paagi sa paghingoang maabot an bilog na panahon na ministeryo.

Mantang marahay an magkaigwa nin mga pasohan sa buhay, mag-ingat na mapatalubo an espiritu nin pakikompetensia. Makanonompong ka nin  orog na kagayagayahan sa saimong ginigibo kun dai mo ikokomparar an saimong sadiri sa iba.​—Galacia 5:26; 6:4.

Tibaad nagsasaboot ka na mayo ka nin eksperyensia asin nadedepisilan kang magbugtak nin rasonableng mga pasohan. Kun siring sunodon mo an hatol kan Biblia: “Ikiling mo an saimong talinga asin maghinanyog ka sa mga tataramon kan mga madonong.” (Talinhaga 22:17) Hagadon mo an tabang kan saimong mga magurang o iba pang maygurang na Kristiano. Siempre, an mga magurang asin an iba pa kaipuhan na magin rasonable asin nakaparirigon sa boot sa bagay na ini. An pakamate na ginigipit sa pagmamaigot na maabot an sarong pasohan na ibinugtak kan iba para sa sainda puedeng magin dahelan na mawaran nin kagayagayahan an mga hoben asin tibaad makaolang na maotob an katuyohan kan pagbugtak nin mga pasohan. Iyan an nangyari sa sarong daragita, na nagsabi: “An sakong mga magurang nagbugtak nin sunod-sunod na pasohan para sa sako, arog baga nin pagpalista sa Teokratikong Paadalan sa Pagmiministro, pakikikabtang sa paglilingkod sa langtad, pagpabautismo, asin pagigin sarong payunir. Maigot kong hiningoa na maabot an kada saro kaiyan. Kun naaabot ko an sarong pasohan, dai ako inoomaw kan sakong mga magurang kundi, imbes, tinatawan na naman ako nin ibang pasohan na pagmamaigotan kong aboton. Bilang resulta, namamate ko pirme na pinupuersa akong aboton an mga pasohan. Napapagal akong marhay asin an pagmate ko garo mayong kamanungdanan an sakong nagibo.” Ano an nagin problema? Balido an gabos na pasohan, alagad iyan bako niang sadiring mga pasohan. Tanganing mapakarhay, kaipuhan na mamotibar kang ika mismo an magbugtak kan sadiri mong pasohan!

Isipon si Jesu-Cristo. Kan sia nagdigdi sa daga, aram nia kun ano an linalaoman sa saiya kan saiyang Ama, si Jehova. An paggibo kan kabotan ni Jehova bako sanang sarong pasohan para ki Jesus kundi sarong misyon na kaipuhan otobon. Paano minansay ni Jesus an saiyang asignasyon? Sia nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:34) Si Jesus naogmang marhay sa paggibo kan kabotan ni Jehova asin inotob an linalaoman kan saiyang Ama. Iyan garo kakanon para ki Jesus—sia nakamate nin kawilihan asin satispaksion sa pagtapos kan gibohon na linalaoman sa saiya. (Hebreo 10:5-10) Makakamate ka man nin dakulang kaogmahan kun tama an pakamotibar saimo na gibohon an ineenkaminar kan mga magurang mo na gibohon mo.

Dai Mag-ontok sa Paggibo nin Karahayan

Oras na may nasa isip ka nang pasohan, magmaigot na magibo iyan. An Galacia 6:9 nagsasabi: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.” Dai magsarig sa sadiri mo sanang kosog o abilidad. Seguradong mapapaatubang ka sa mga olang asin kun beses tibaad makaeksperyensia ka ngani nin temporaryong pakamate nin pagkasudya. Alagad ta inaasegurar kita kan Biblia: “Sa gabos mong dalan girumdomon mo [an Dios], asin itatanos nia mismo an saimong mga dana.” (Talinhaga 3:6) Si Jehova an masustenir saimo mantang maigot mong inaabot an saimong espirituwal na mga pasohan.

Iyo, paagi sa pagkultibar kan pagmawot na maglingkod ki Jehova asin paagi sa paghihingoang maabot an espirituwal na mga pasohan, mahihimo mo na “an saimong pag-oswag mahayag sa gabos.” (1 Timoteo 4:15) Dangan makakamit mo an sarong makahulogan na buhay sa paglilingkod sa Dios.

[Ritrato sa pahina 9]

An pagbasa kan Biblia asin paghorophorop sa nabasa mo mamotibar sa saimo na maglingkod ki Jehova

[Ritrato sa pahina 10]

Inotob ni Jesus an mga linalaoman kan saiyang Ama