Gurano Kahalaga an Mamomoton na Kabootan?

“AN MAKAWIWILING bagay sa daganon na tawo iyo an saiyang mamomoton na kabootan,” an sabi kan Biblia. (Talinhaga 19:22) Tunay nanggad, an gibo nin kabootan na minomotibar nin pagkamoot totoong kawiliwili. Minsan siring, an terminong “mamomoton na kabootan” sa Biblia nanonongod sa kabootan na tibaad nakabasar sa dati nang relasyon, arog kan nakabasar sa naenot na gibo nin kabootan na ginibo nin saro. Sa siring, kaiba dian an ideya nin kaimbodan.

Dai napatalubo ni Hadeng Joas nin Juda an kawiliwiling kualidad na ini. Dakulaon an utang na boot nia sa saiyang inaon asin ki Joiada, na amaon nia. Kan si Joas mayo pang sangtaon, ginibo kan saiyang maraot na lola an sadiri kaini na reyna asin ginadan an gabos na tugang na lalaki ni Joas, na mga eredero kan trono. Pero, dai nia nagadan an sadit pang si Joas huli ta maingat siang itinago kan saiyang inaon asin amaon. Itinokdo man ninda saiya an Ley nin Dios. Kan si Joas siete anyos na, ginamit kan saiyang amaon an autoridad nia bilang halangkaw na saserdote tanganing gadanon an maraot na reyna asin patukawon sa trono si Joas.​—2 Cronica 22:10–23:15.

An hoben na si Joas namahala bilang hade sa marahay na paagi sagkod kan magadan an saiyang amaon, alagad ta sia nagpoon na sumamba sa idolo. Isinugo nin Dios si Zacarias, na aki ni Joiada, tanganing patanidan si Joas sa saiyang apostasiya. Ipinagapo ni Joas si Zacarias. Labi-labi karaot nanggad na gibo nin kadaihan nin kaimbodan sa pamilya na dakulaon an utang na boot nia!​—2 Cronica 24:17-21.

An Biblia nagsasabi: “Dai ginirumdom ni Joas na hade an mamomoton na kabootan na ginibo sa saiya [kan ama ni Zacarias], kaya ginadan nia an saiyang aki.” Kan naghihingagdan na, si Zacarias nagsabi: “Logod na bahala na si Jehova asin singilon nia iyan.” Naotob an mga tataramon ni Zacarias, si Joas naghelang nin grabe asin ginadan kan saiya mismong mga surugoon.—2 Cronica 24:17-25.

Imbes na magin arog ni Hadeng Joas, an gabos na masunod sa sadol na ini magkakaigwa nin maogmang ngapit: “Dai ka logod bayaan nin mamomoton na kabootan asin nin pagkasinsero. . . . Asin sa siring makakua nin pag-oyon . . . sa pagheling nin Dios asin nin daganon na tawo.”—Talinhaga 3:3, 4.