Mga Hoben na Pinagagayagaya an Puso ni Jehova

“Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”​—TALINHAGA 27:11.

An mga artikulong ini na pag-aadalan espesyalmenteng inandam para sa mga hoben na kabilang sa Mga Saksi ni Jehova. Kun siring, ineenkaminar mi an mga hoben na pag-adalan ini nin maingat asin sueltong magkomento kun tinotokar na iyan sa Pag-adal sa Torrengbantayan sa kongregasyon.

1, 2. (a) Ipaliwanag kun baga an pagkaakit sana sa mga bagay sa kinaban nangangahulogan na bako kang angay na magin Kristiano. (Roma 7:21) (b) Ano an manonodan mo sa halimbawa ni Asaf? (Helingon an kahon, pahina 13.)

IMAHINARA na namamakal ka nin bado. Mantang naghehelingheling, naheling mo an sarong bado na tolos na nagustohan mo. An kolor asin estilo garo tamang-tama saimo, asin iyan talagang menos presyo. Alagad ta hineling mo iyan sa harani. Sa pagkabigla mo, narisa mo na inas na an gilid kan tela, asin medyo bakong magayon an pagkatahi. An bado, minsan ngani nakaaakit, maluyang klase an pagkagibo. Gagastoson mo daw an kuarta mo sa siring na maluyang klaseng produkto?

² Ikomparar mo ini sa sarong situwasyon na puedeng mapaatubang sa saimo bilang hoben na Kristiano. Sa enot na heling, an mga bagay sa kinaban na ini​—na arog na gayo kan bado na iyan—tibaad garo baga nakaaakit na marhay. Halimbawa, an mga kaklase mo tibaad nagduduman sa nakaoogmang mga parti, nagdodroga, nag-iinom, nakiki-date nin basta na sana, asin nagdodorog bago kasalon. Ika daw, kun minsan, naaakit sa siring na estilo nin pamumuhay? Hinihimuyawot mo daw na manamitan man lamang an saindang katalingkasan daa? Kun iyo, dai tolos-tolos magkonklusyon na ika talagang maraot asin bakong angay na magin Kristiano. Total, rinerekonoser kan Biblia na an kinaban puedeng magin makosogon an pan-akit​—dawa sa sarong tawo na gustong paogmahon an Dios.​—2 Timoteo 4:10.

3. (a) Taano ta basang sana na pagmaigotan na kamtan an mga bagay sa kinaban? (b) Paano ilinaladawan nin sarong Kristiano an pagkadaing kamanungdanan nin kinabanon na mga pinag-aaabot?

³ Magheling kang marhay ngonyan, kun paanong hehelingon mong marhay an sarong bado na gusto mong bakalon. Hapota an saimong sadiri, ‘Ano an kalidad kan tela asin pagkatahi kan sistemang ini nin mga bagay?’ An Biblia nagsasabi na “an kinaban maagi sana.” (1 Juan 2:17) An ano man na kasingawan na nakukua dian temporaryo sana sa pinakamarahay na kamugtakan. Apuera kaini, an maraot na gawe-gawe halangkaw an presyo. Bako nanggad iyan menos presyo. An sarong Kristiano, na nagtios kan inaapod niang “mga kakologan na bunga nin sinayang na pagkahoben,” nagsasabi: “An kinaban tibaad kawiliwiling marhay asin nakaeenganyong paghelingon. Asin gusto kang patubodon kaiyan na puedeng mapasaimo an kaalingan kaiyan na mayo nin kakologan. Alagad bako man talagang posible  ini. Gagamiton ka kan kinaban, asin kun tapos na iyan, iaapon ka kaiyan.” * Taano ta sasayangon mo an saimong pagkahoben sa siring na maluyang klase nin buhay?

Proteksion Tumang sa “Maraot”

4, 5. (a) Kan madali na an saiyang kagadanan, ano an hinagad ni Jesus ki Jehova sa pamibi? (b) Taano ta angay na kahagadan ini?

⁴ Huling narerealisar na an sistemang ini nin mga bagay daing ikatataong ano man na may kalidad, an mga hoben na kabilang sa Mga Saksi ni Jehova nagmamaigot na likayan an pakikatood sa kinaban na ini. (Santiago 4:4) Saro ka daw sa fiel na mga hoben na ini? Kun iyo, dapat kang komendaran. Totoo, dai madaling labanan an pangigipit nin kairiba asin magin napapalaen, alagad may tabang sa saimo.

⁵ Kan madali na an saiyang kagadanan, ipinamibi ni Jesus na logod “bantayan” ni Jehova an saiyang mga disipulo “huli sa maraot.” (Juan 17:15) May marahay na dahelan si Jesus sa paghagad kaini. Aram nia na an pagpaheling nin integridad bakong madali para sa mga parasunod nia, ano man an saindang edad. Taano? An sarong dahelan, siring kan inadmitir ni Jesus, an saiyang mga disipulo mapapaatubang sa sarong makapangyarihan asin dai naheheling na kaiwal​—an “maraot,” si Satanas na Diablo. Sinasabi kan Biblia na an maraot na espiritung linalang na ini “naglalakaw na siring sa nagngangarob na leon, na naghahanap nin masisiba.”—1 Pedro 5:8.

6. Paano niato naaaraman na si Satanas mayo nin pagkaludok sa mga hoben?

⁶ Sa bilog na kasaysayan, si Satanas may pagkasadistikong naoogmang marhay sa paggibo kan pinakamaringis na mga karatan sa mga tawo. Isip-isipa an makatatakot na mga kalamidad na ginibo ni Satanas ki Job asin sa pamilya nia. (Job 1:13-19; 2:7) Tibaad nagigirumdoman mo an mga bareta na nangyari sa panahon kan saimo mismong buhay na nagpapamidbid sa espiritu nin kadahasan ni Satanas. Nanhihikap an Diablo, asin sa saiyang paghanap nin masisiba, mayo siang pagkaherak sa mga hoben. Halimbawa, sa kapinonan kan enot na siglo C.E., si Herodes nagpakana na ipagadan an gabos na aking lalaki sa Betlehem na dos anyos pababa. (Mateo 2:16) Posibleng marhay na si Satanas an nagmotibar ki Herodes—na gabos sa paghihingoang gadanon an aki na pag-abot nin panahon iyo an magigin ipinanugang Mesiyas nin Dios asin masagibo kan paghokom nin Dios ki Satanas! (Genesis 3:15) Malinaw nanggad, si Satanas mayo nin pagmakolog sa mga hoben. An solamenteng intension nia sibaon an pinakadakol na mapupuede. Nangorognang totoo ini ngonyan, ta si Satanas pinalayas na sa langit asin ihinolog digdi sa daga, “na may dakulang kaanggotan, sa pakaaram na halipot na sana an saiyang panahon.”​—Kapahayagan 12:9, 12.

7. (a) Paano biyong kabaliktaran ni Jehova si Satanas? (b) Ano an saboot ni Jehova manongod sa pagkaogma mo sa buhay?

 ⁷ Biyong kabaliktaran ki Satanas, na may “dakulang kaanggotan,” si Jehova may “mamomoton na pagkaludok.” (Lucas 1:78) Sia an mismong personipikasyon nin pagkamoot. Sa katunayan, an satong Kaglalang midbid na gayo sa marahayon na kualidad na ini kaya an Biblia nagsasabi: “An Dios pagkamoot.” (1 Juan 4:8) Kanigoan na kalaenan kan dios kan sistemang ini nin mga bagay asin kan Dios na pribilehio mong paglingkodan! Mantang si Satanas naghahanap nin masisiba, ‘dai mawot ni Jehova na an siisay man malaglag.’ (2 Pedro 3:9) Mahalagang marhay an pagheling nia sa buhay nin lambang tawo—kabale an buhay mo. Kun sinasadol ka ni Jehova sa saiyang Tataramon na dai magin kabtang kan kinaban, dai nia hinihingoang pogolan an saimong pagkaogma sa buhay o limitaran an saimong katalingkasan. (Juan 15:19) Sa kabaliktaran, binabantayan ka nia huli kan maraot. Gusto kan saimong langitnon na Ama na mapasaimo an sarong bagay na orog karahay kisa madaling mawarang kasingawan sa kinaban na ini. An kamawotan nia iyo na kamtan mo an “tunay na buhay”—an buhay na daing katapusan sa sarong paraisong daga. (1 Timoteo 6:17-19) Gusto ni Jehova na ika mapakarhay, asin sinasadol ka nia na aboton an pasohan na iyan. (1 Timoteo 2:4) Apuera kaini, si Jehova may ipinaaabot sa saimong espesyal na imbitasyon. Ano iyan?

“Pagayagayaha an Sakong Puso”

8, 9. (a) Anong regalo an puede mong itao ki Jehova? (b) Paano dinuduhagi ni Satanas si Jehova, siring kan ipinaheling sa nangyari ki Job?

⁸ Nagbakal ka na daw nin sarong regalo para sa sarong dayupot na katood dangan minasdan mo an lalauogon kan katood mo na nasorpresa asin nagpasalamat kan akoon iyan? Tibaad haloy mong pinag-isipan na marhay kun anong klaseng regalo an angay para sa saiya. Ngonyan isip-isipa an hapot na ini: Anong klaseng regalo an puede mong itao sa saimong Kaglalang, si Jehova Dios? Sa primero, an mismong ideyang iyan tibaad garo makangingisi. Ano an kaipuhan kan Makakamhan sa Gabos hale sa sarong tawo sana? Ano an puede mong itao sa saiya na mayo pa sia? An Biblia minasimbag sa Talinhaga 27:11: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”

⁹ Siring kan posibleng marhay na aram mo base sa pag-adal mo sa Biblia, si Satanas na Diablo an nagduduhagi ki Jehova. Iniinsistir nia na an siisay man na naglilingkod sa Dios ginigibo iyan, bakong huli sa pagkamoot, kundi huli sa paslong mga dahelan. Pabayae sindang magsakit, an hinihingako ni Satanas, asin tolos nindang babayaan an tunay na pagsamba. Halimbawa, isip-isipa an sinabi ni Satanas ki Jehova mapadapit sa matanos na tawong si Job: “Bako daw na ika mismo nagbugtak nin proteksion sa palibot nia asin sa palibot kan saiyang harong asin sa palibot kan gabos niang sadiri? Binendisyonan mo an gibo kan saiyang mga kamot, asin an saiya mismong kahayopan nakalakop sa daga. Alagad ngonyan tabi unata an saimong kamot asin dotdota an gabos niang sadiri asin helinga kun baga dai ka nia sumpaon nin atubangan.”—Job 1:​10, 11.

10. (a) Paano niato naaaraman na kinuestion ni Satanas an integridad bako sanang ni Job? (b) Paano ka imbuelto sa isyu nin soberaniya?

¹⁰ Siring kan ihinahayag sa pagkasaysay sa Biblia, kinuestion ni Satanas bako sana an kaimbodan ni Job kundi pati kan gabos na iba pang naglilingkod sa Dios—kabale ka. Sa katunayan, sa pagtaram manongod sa katawohan sa pankagabsan, si Satanas nagsabi ki Jehova: “An gabos na sadiri nin tawo [bako sana si Job kundi an siisay man] itatao nia para sa saiyang kalag.” (Job 2:4) Naheheling mo daw an papel mo sa mahalagang marhay na isyung ini? Siring kan ipinaririsa sa Talinhaga 27:​11, sinasabi ni Jehova na igwa kang puedeng itao sa saiya—sarong basehan tanganing masimbag nia an paratuya sa saiya, si Satanas. Imahinaron mo​—an Unibersal na Soberano nangangapodan sa saimo na makikabtang sa pagsimbag sa pinakadakulang isyu sa gabos na panahon. Pambihira nanggad na paninimbagan asin pribilehio an nasa saimo! Kaya mo daw na otobon an hinahagad sa saimo ni Jehova? Naotob iyan ni Job. (Job 2:9, 10) Iyo man si Jesus saka an dai mabilang na iba pa sa bilog na kasaysayan, kabale an dakol na hoben. (Filipos 2:8; Kapahayagan 6:9) Magigibo mo man iyan. Pero, dai ka masala, mayo nin neutral na posisyon digdi. Paagi sa saimong ginigibo, ipaheheling mo na sinusuportaran  mo magsalang an pagduhagi ni Satanas o an simbag ni Jehova. Arin an pipilion mong suportaran?

Si Jehova May Pagmakolog sa Saimo!

11, 12. May dakulang epekto daw ki Jehova kun baga pipilion mong maglingkod sa saiya o dai? Ipaliwanag.

¹¹ Talaga daw na mahalaga ki Jehova kun arin an pinipili mo? Dai pa daw igo an mga tawong nagdanay na fiel tanganing makatao sia nin igong simbag ki Satanas? Totoo, ininsistir kan Diablo na mayo nin naglilingkod ki Jehova huli sa pagkamoot, sarong sahot na napatunayan nang sala. Pero, boot ni Jehova na kumampi ka sa saiya sa isyu nin soberaniya huli ta sia may pagmakolog sa saimo bilang indibiduwal. Si Jesus nagsabi: “Bakong kawiliwili para sa sakong Ama na nasa langit na an saro kaining saradit na ini mapahamak.”​—Mateo 18:14.

¹² Malinaw nanggad, interesado si Jehova sa pinipili mong gibohon. Orog pa dian, apektado sia kaiyan. Linilinaw kan Biblia na si Jehova may makosog na mga pagmate na napahihiro kan marahay o maraot na mga ginigibo nin mga tawo. Halimbawa, kan paorootrong magrebelde an mga Israelita, ‘kuminolog an boot’ ni Jehova. (Salmo 78:​40, 41) Bago kan Delubyo kan kaaldawan ni Noe, kan “an karatan nin tawo abunda na,” ‘nakolgan an puso’ ni Jehova. (Genesis 6:​5, 6) Isip-isipa an boot sabihon kaini. Kun sala an ginigibo mo, makokolgan mo an boot kan saimong Kaglalang. Dai boot sabihon kaini na an Dios maluya o nadadaog nin emosyon. Imbes, namomotan ka nia asin may pagmakolog sia sa kapakanan mo. Sa ibong na lado, kun ginigibo mo an tama, naggagayagaya an puso ni Jehova. Naoogma sia bako sanang huli ta may ikasisimbag na naman sia ki Satanas kundi huli man ta puede sia ngonyan na magin Parabalos sa saimo. Asin sarong bagay iyan na gusto niang magin. (Hebreo 11:6) Kanigoan kamamomoton na Ama mo si Jehova Dios!

Abundang mga Bendisyon Ngonyan

13. Paano nagbubunga nin mga bendisyon an paglilingkod ki Jehova ngonyan mismo?

¹³ An mga bendisyon na ibinubunga kan paglilingkod ki Jehova bakong sa ngapit sana mananamitan. An dakol na hoben na kabilang sa Mga Saksi ni Jehova binebendisyonan nin kagayagayahan asin pagkakontento ngonyan mismo, asin may tamang dahelan. “An mga pagboot ni Jehova tanos, nagpapagayagaya sa puso,” an isinurat kan salmista. (Salmo 19:8) Mas marahay kisa siisay man na tawo, aram ni Jehova kun ano an marahay para sa sato. Paagi ki propeta Isaias, si Jehova nagsabi: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan. O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong  katanosan siring sa mga alon kan dagat.”​—Isaias 48:​17, 18.

14. Paano ka matatabangan kan mga prinsipyo sa Biblia na malikayan an kakologan nin pagkautang?

¹⁴ An pagsunod sa mga prinsipyo kan Biblia matabang sa saimo na malikayan an dakol na kakologan asin kamondoan. Halimbawa, an Biblia nagsasabi na an mga nagkaigwa nin pagkamoot sa kuarta “sinaksak an bilog nindang sadiri nin dakol na kakologan.” (1 Timoteo 6:9, 10) May kairiba ka daw na nakaeksperyensia na kan makolog na katunayan kan tekstong ini? An nagkapirang hoben na lalaki asin babae nagkautang nin dakula huli sana ta inisip ninda na dapat sindang magkaigwa kan pinakabagong may tatak na mga bado asin mga gamit na sunod sa teknolohiya. An pagigin napagagabatan nin halawig asin halangkaw an porsientong mga bayad sa mga bagay na dai mo man talaga kayang bakalon sarong makolog na porma nin kaoripnan!—Talinhaga 22:7.

15. Sa anong mga paagi pinoprotehiran ka kan mga prinsipyo sa Biblia sa kolog na bunga nin seksuwal na inmoralidad?

¹⁵ Isip-isipa man an dapit sa seksuwal na inmoralidad. Sa bilog na kinaban kada taon, dai mabilang na daing agom na mga tinedyer an nagbabados. An nagkapira nagkakaaki na magsalang dai ninda gusto o dai ninda kayang padakulaon. An iba nagpapaaborsion asin bilang resulta riniribok kan konsensia. Dangan yaon man an mga hoben na lalaki asin babae na nagkakaigwa nin helang na ikinaoolakit paagi sa pagdodorog, arog baga nin AIDS. Siempre, para sa saro na nakamimidbid ki Jehova, an pinakagrabeng resulta sa gabos iyo an pagkaraot nin relasyon ki Jehova. * (Galacia 5:19-21) May marahay na dahelan na an Biblia nagsasabi: ‘Dumulag ka sa pakikisaro.’​—1 Corinto 6:18.

Paglilingkod sa “Maogmang Dios”

16. (a) Paano niato naaaraman na boot ni Jehova na mag-ogma ka sa saimong pagkahoben? (b) Taano ta nagtao si Jehova nin mga giya na dapat mong sunodon?

¹⁶ Sinasabi kan Biblia na si Jehova “maogmang Dios.” (1 Timoteo 1:11) Boot nia na ika magin maogma man. Sa katunayan, an mismong Tataramon nia nagsasabi: “Mag-ogma ka sa saimong pagkahoben. Mag-ogma ka mantang ika hoben pa.” (Eclesiastes 11:​9, Today’s English Version) Alagad lampas pa sa presente an naheheling ni Jehova asin namamansayan nia an panhaloyan na mga epekto nin marahay sagkod maraot na gawe-gawe. Iyan an dahelan na sinasadol ka nia: “Girumdoma, ngonyan,  an saimong Kaharohalangkaweng Kaglalang sa mga aldaw kan saimong pagkahoben na lalaki, bago umabot an kapahapahamak na mga aldaw, o dumatong an mga taon na ika masabi: ‘Mayo ako nin kawilihan sa sainda.’”—Eclesiastes 12:1.

17, 18. Paano ipinahayag nin sarong hoben na Kristiana an saiyang kaogmahan sa paglilingkod ki Jehova, asin paano mo man maeeksperyensiahan an kagayagayahan na iyan?

¹⁷ Ngonyan, dakol na hoben an nakanompong nin dakulang kaogmahan sa paglilingkod ki Jehova. Halimbawa, an 15 anyos na si Lina nagsasabi: “Ikatitingag ko an sakong payo. Marahay an salud ko huli sa paglikay sa paninigarilyo asin pagdroga. Igwa ako nin mahalagang giya na itinatao sa sako paagi sa kongregasyon na nagtatabang sa sako na labanan an makatatakot na pangigipit ni Satanas. Maogma an sakong lalauogon huli sa nakapakokosog na pakikiasosyar sa Kingdom Hall. An pinakamarahay sa gabos, igwa ako kan dai nang maorog pang paglaom na buhay na daing sagkod digdi sa daga.”

¹⁸ Arog ki Lina, dakol na Kristianong hoben an nakikipaglaban nin maigot para sa pagtubod, asin nagtatao ini sa sainda nin kagayagayahan. Aram ninda na an saindang buhay​—minsan ngani masakit kun minsan​—igwa nin tunay na katuyohan asin tunay na ngapit. Kun siring, padagos na paglingkodan an Dios na an nasa puso iyo an pinakaikararahay mo. Pagayagayahon an saiyang puso, asin pagagayagayahon ka nia ngonyan asin sa panahon na daing talaan!—Salmo 5:11.

[Mga Nota sa Ibaba]

Nagigirumdoman Mo daw?

• Anong peligro an inaatubang mo huli sa “maraot,” si Satanas?

• Paano mo mapagagayagaya an puso ni Jehova?

• Paano ipinaheheling kan Biblia na si Jehova may pagmakolog sa saimo?

• Ano an nagkapirang bendisyon na bunga nin paglilingkod ki Jehova?

[Mga Hapot Para sa Pag-adal]

[Kahon/Ritrato sa pahina 13]

Dikit Pang Magkasala an Sarong Tawong Matanos

Si Asaf sarong prominenteng Levitang musikero sa templo ni Jehova sa suanoy na Israel. Nagkomponer pa ngani sia nin mga awit na ginamit sa pampublikong pagsamba. Pero sa ibong kan saiyang daing kaagid na mga pribilehio, may panahon na si Asaf naakit sa daing Dios na gawe-gawe kan saiyang kairiba, na garo baga nagbabalga sa mga ley nin Dios na dai napapadusahan. “An sakong mga bitis haros nagtalikod na, kadikit na sanang mapadalinas an sakuyang mga lakad,” an inadmitir ni Asaf kan huri. “Nauri ako sa mga hambogon, kun naheheling ko an katoninongan kan mga maraot.”​—Salmo 73:2, 3.

Kan huri, si Asaf nagduman sa santuaryo nin Dios asin namibi dapit kaiyan. Ngonyan na igwa na giraray nin espirituwal na pananaw, nasabotan nia na ikinaoongis ni Jehova an karatan asin na, pag-abot nin panahon, aanihon kan mga maraot sagkod kan mga matanos an saindang itinanom. (Salmo 73:17-20; Galacia 6:7, 8) Tunay nanggad, an mga maraot nasa mahalnas na daga. Sa katapustapusi, mapupukan sinda kun laglagon na ni Jehova an maraot na sistemang ini.—Kapahayagan 21:8.

[Mga Ritrato sa pahina 15]

An nasa puso ni Jehova iyo an pinakaikararahay mo, mantang an pasohan ni Satanas sibaon ka

[Ritrato sa pahina 16]

Dakol na hoben an nakaeeksperyensia kan pinakadakulang kaogmahan paagi sa paglilingkod ki Jehova kaiba kan mga kapwa Kristiano