Kamo daw Naghahapot, “Haen si Jehova?”

“Sinda ruminayo sa sako . . . Asin dai ninda sinabi, ‘Haen si Jehova?’”—JEREMIAS 2:5, 6.

1. Kun an mga tawo naghahapot, “Haen an Dios?,” ano an tibaad nasa isip ninda?

“HAEN an Dios?” Dakol nang tawo an naghapot kaiyan. An nagkapira sa sainda nagmamaigot sanang masabotan an sarong pundamental na katotoohan manongod sa Kaglalang, arin na baga, yaon sia saen? An iba ihinapot iyan pakatapos nin sarong lakop na kalamidad o kan sinda mismo magsakit asin dai masabotan kun taano ta dai nangunlabot an Dios. An iba dai lamang naghahapot huli ta habo ninda kan mismong ideya na an Dios nag-eeksister.—Salmo 10:4.

2. Sairisay an mapanggana sa saindang paghanap sa Dios?

² Siempre, dakol an nagrerekonoser sa abundang prueba na igwang Dios. (Salmo 19:1; 104:24) An iba kaini kontento na sa basta pagkaigwa nin sarong porma nin relihion. Alagad an makosog na pagkamoot sa katotoohan nagpahiro sa minilyon na iba pa, sa gabos na kadagaan, na hanapon an tunay na Dios. Dai nasayang an saindang paghihingoa huli ta sia “bakong harayo sa lambang saro sa sato.”​—Gibo 17:26-28.

3. (a) Saen an erokan nin Dios? (b) Ano an ipinasesentido kan hapot sa Kasuratan na, “Haen si Jehova?”

³ Kun an saro talagang nanompongan si Jehova, naaaraman nia na “an Dios Espiritu,” dai naheheling kan mga mata nin tawo. (Juan 4:24) An tunay na Dios inapod ni Jesus na “sakong Ama na nasa langit.” Ano an boot sabihon kaiyan? Na an rona na ineerokan kan satong langitnon na Ama, sa espirituwal na sentido, halangkawon, kun paanong an pisikal na kalangitan sa espasyo halangkaw sa daga. (Mateo 12:50; Isaias 63:15) Minsan siring, maski ngani dai niato naheheling an Dios paagi sa satong pisikal na mga mata, ginigibo niang posible na mamidbid niato sia asin na dakol kitang manodan manongod sa saiyang mga katuyohan. (Exodo 33:20; 34:6, 7) Sinisimbag nia an mga hapot kan sinserong mga tawo na gustong maaraman an kahulogan nin buhay. Dapit sa mga bagay na nakaaapektar sa satong buhay, nagtatao sia nin masasarigan na basehan tanganing maaraman niato an saiyang punto de vista, an boot sabihon, kun ano an pagmansay nia sa siring na mga bagay asin kun baga an satong mga mawot kaoyon kan saiyang mga katuyohan. Boot niang maghapot kita manongod sa siring na mga bagay asin maghingoa nin odok na makua an simbag. Paagi ki propeta Jeremias, sinagwe ni Jehova an banwaan kan suanoy na Israel huli ta dai ninda nagibo ini. Aram ninda an ngaran nin Dios, alagad dai sinda naghapot, “Haen si Jehova?” (Jeremias 2:6) An katuyohan ni Jehova bakong pangenot sa sainda. Dai ninda hinahanap an saiyang paggiya. Kun napapaatubang sa mga pagdesisyon, dakula asin sadit, kamo daw naghahapot, “Haen si Jehova?”

An mga Nakihumapot sa Dios

4. Paano kita makikinabang sa halimbawa ni David sa paghapot ki Jehova?

⁴ Kan hoben pa, si David, na aki ni Jese, nakapatalubo nin makosog na pagtubod ki Jehova. Midbid nia si Jehova bilang an “nabubuhay na Dios.” Personal na naeksperyensiahan ni David an proteksion ni Jehova. Napahiro nin pagtubod asin nin pagkamoot sa “ngaran ni Jehova,” ginadan ni David an kompleto sa armas na Filisteong higante na si Goliat. (1 Samuel 17:26, 34-51) Minsan siring, dai nagin kompiado sa sadiri si David huli sa saiyang kapangganahan. Dai nia ipinangatanosan na ano man an gibohon nia ngonyan, bebendisyonan sia ni Jehova. Paorootro durante kan suminunod na mga taon, si David nakihumapot ki Jehova kun napapaatubang sa mga pagdesisyon.  (1 Samuel 23:2; 30:8; 2 Samuel 2:1; 5:19) Padagos siang namibi: “Paaraman sa sako an saimong mga dalan, O Jehova; tokdoi ako kan saimong mga dana. Palakawa ako sa saimong katotoohan asin tokdoi ako, huli ta ika an sakuyang Dios nin kaligtasan. Sa saimo ako naglaom sa bilog na aldaw.” (Salmo 25:​4, 5) Kanigoan karahay na halimbawa na dapat niatong arogon!

5, 6. Paano hinanap ni Josafat si Jehova sa laen-laen na panahon sa saiyang buhay?

⁵ Kan kaaldawan ni Hadeng Josafat, an ikalimang hade sa linahe nin mga hade na gikan ki David, an pinagsararong hukbo nin tolong nasyon nakipaglaban sa Juda. Napapaatubang sa nasyonal na emerhensiang ini, si Josafat “nagdesisyon na hanapon si Jehova.” (2 Cronica 20:1-3) Bako ini an enot na paghanap ni Josafat ki Jehova. Isinikwal kan hade an pagsamba ki Baal na ngana-nganang ginibo kan apostatang kahadean nin Israel sa amihanan asin pinili an paglakaw sa mga dalan ni Jehova. (2 Cronica 17:3, 4) Kaya ngonyan na sia napapaatubang sa sarong krisis, paano ‘hinanap ni Josafat si Jehova’?

⁶ Sa sarong pampublikong pamibi na ginibo nia sa Jerusalem sa kritikal na panahon na ini, sinabi ni Josafat na nagirumdoman nia an makakamhan sa gabos na kapangyarihan ni Jehova. Pinag-isipan nia nin odok an katuyohan ni Jehova na nahayag paagi sa pagpahale Nia sa ibang mga nasyon asin pagtao nin sarong daga sa Israel bilang mana. Rinekonoser kan hade an saiyang pangangaipo sa tabang ni Jehova. (2 Cronica 20:6-12) Itinogot daw ni Jehova na manompongan sia kan okasyon na idto? Iyo nanggad. Paagi ki Jahaziel, sarong Levita, nagtao si Jehova nin espesipikong paggiya, asin kan sumunod na aldaw tinawan Nia nin kapangganahan an Saiyang banwaan. (2 Cronica 20:14-28) Paano nindo maseseguro na itotogot man ni Jehova na sia manompongan nindo kun kamo minahagad sa saiya nin paggiya?

7. Kiisay na mga pamibi an dinadangog nin Dios?

⁷ Si Jehova mayong ipinaoorog. Inaagda nia an mga tawo sa gabos na nasyon na hanapon sia paagi sa pamibi. (Salmo 65:2; Gibo 10:34, 35) Aram nia an nasa puso kan mga nakikimaherak sa saiya. Inaasegurar nia kita na dinadangog nia an mga pamibi kan mga matanos. (Talinhaga 15:29) Itinotogot niang manompongan sia kan nagkapira na dati mayo nin interes sa saiya alagad ngonyan mapakumbabang hinahagad an saiyang paggiya. (Isaias 65:1) Dinadangog ngani nia an mga pamibi kan mga dai nakasunod sa saiyang ley alagad ngonyan mapakumbabang nagsosolsol. (Salmo 32:​5, 6; Gibo 3:19) Pero, kun an puso nin saro dai nagpapasakop sa Dios, daing kamanungdanan an mga pamibi kan sarong iyan. (Marcos 7:​6, 7) Estudyare an nagkapirang halimbawa.

Sinda Nag-arang Alagad Dai Sinimbag

8. Taano ta dai inako ni Jehova an mga pamibi ni Hadeng Saul?

⁸ Kan si Hadeng Saul sabihan ni propeta Samuel na sia hinaboan nin Dios huli sa saiyang pakisuway, si Saul naglaob ki Jehova. (1 Samuel 15:​30, 31) Alagad idto pasale sana. An mawot ni Saul, bakong magin makinuyog sa Dios, kundi mag-ako nin onra sa pagheling kan mga tawo. Kan huri, kan an mga Filisteo nakikilaban sa Israel, ginibo ni Saul an pormalidad na makihumapot ki Jehova. Minsan siring, kan sia mayong naakong simbag, nagkonsulta sia sa sarong patagolainan, minsan ngani aram nia na kinokondenar ini ni Jehova. (Deuteronomio 18:10-12; 1 Samuel 28:6, 7) Bilang sumaryo kaiyan, an 1 Cronica 10:14 nagsasabi dapit ki Saul: “Dai sia nakihumapot ki Jehova.” Taano? Huli ta an mga pamibi ni Saul dai  nakabasar sa pagtubod. Huli kaini, garo man sana dai sia namibi.

9. Ano an sala sa paghagad ni Zedequias kan paggiya ni Jehova?

⁹ Kaagid kaiyan, mantang nagdadangadang an katapusan kan kahadean nin Juda, dakol na pamibi an ginibo asin kinonsulta an mga propeta ni Jehova. Minsan siring, isinasalak kan banwaan an idolatriya sa soboot reberensia ki Jehova. (Sofonias 1:4-6) Minsan ngani sagin man ngaya sinda nakikihumapot sa Dios, dai ninda inandam an saindang puso na sumunod sa saiyang kabotan. Si Hadeng Zedequias nakimaherak ki Jeremias na ipakihumapot sia ki Jehova. Sinabi na ni Jehova sa hade an dapat niang gibohon. Alagad huling mayo nin pagtubod asin napadadaog sa pagkatakot sa tawo, dai kinuyog kan hade an tingog ni Jehova, asin si Jehova mayo nang itinaong simbag sa saiya na mas magugustohan kan hade.—Jeremias 21:1-12; 38:14-19.

10. Ano an sala sa paagi nin paghagad ni Johanan kan paggiya ni Jehova, asin ano an manonodan niato sa saiyang sala?

¹⁰ Kan laglag na an Jerusalem asin naghale na an hukbo nin Babilonya dara an desterradong mga Judio, nag-andam si Johanan na darahon sa Egipto an sadit na grupo nin mga Judio na nawalat sa Juda. Haman na an saindang mga plano, alagad bago naghale hinagad ninda ki Jeremias na ipamibi sinda asin hagadon an paggiya ni Jehova. Minsan siring, kan dai ninda makua an simbag na gusto ninda, ipinadagos pa man giraray ninda an plano ninda. (Jeremias 41:16–​43:7) Naheheling daw nindo sa mga pangyayaring ini an mga leksion na mapakikinabangan nindo tangani na kun hinahanap nindo si Jehova, itotogot nia na sia manompongan nindo?

“Padagos na Segurohon”

11. Taano ta kaipuhan niatong iaplikar an Efeso 5:10?

¹¹ An kalabot sa tunay na pagsamba bako sanang pagsimbolisar kan satong pagdusay paagi sa bautismo sa tubig, pag-atender sa mga pagtiripon kan kongregasyon, asin pakikikabtang sa pampublikong ministeryo. Kalabot an satong bilog na pamumuhay. Aroaldaw nakakaeksperyensia kita nin mga pangigipit​—an nagkapira daing gayo risa, an nagkapira risang-risa—na puedeng makaparayo sa sato sa dalan na kaoyon kan diosnon na debosyon. Ano an magigin reaksion niato sa mga ini? Kan magsurat sa fiel na mga Kristiano sa Efeso, si apostol Pablo nagsadol sa sainda: “Padagos na segurohon kun ano an inaako kan Kagurangnan.” (Efeso 5:10) An kadonongan sa paggibo kaiyan ipinaheheling kan dakol na situwasyon na ibinareta sa Kasuratan.

12. Taano ta naanggot si Jehova kan an kaban kan tipan ipabalyo ni David sa Jerusalem?

¹² Pakatapos na an kaban kan tipan makabalik sa Israel asin sarayon sa Kiryat-jearim sa laog nin dakol na taon, minawot ni Hadeng David na ibalyo iyan sa Jerusalem. Nagkonsulta sia sa mga namomoon sa banwaan asin nagsabi na an Kaban ibabalyo ‘kun garo baga marahay para sa sainda asin puede ki Jehova.’ Alagad napabayaan niang magsiyasat nin igo tanganing siertohon an kabotan ni Jehova dapit sa bagay na iyan. Kun ginibo kutana nia iyan, an Kaban nungka kutanang ilinunad sa karreta. Pinasan kutana iyan kan mga Levitang Coatita, segun sa malinaw na instruksion nin Dios. Minsan ngani si David parateng nakikihumapot ki Jehova, dai nia iyan nagibo sa tamang paagi sa okasyon na ini. Kapahapahamak an resulta. Sa huri inadmitir ni David: “Si Jehova na satong Dios naanggot tumang sa sato, huli ta dai niato sia hinanap segun sa kaugalean.”​—1 Cronica 13:1-3; 15:11-13; Bilang 4:4-6, 15; 7:1-9.

13. Sa sarong awit na inawit kan an Kaban mapangganang ibalyo, anong pagirumdom an kaiba?

 ¹³ Kan sa katapustapusi darahon kan mga Levita an Kaban hale sa harong ni Obed-edom pasiring sa Jerusalem, sarong awit na kinomponer ni David an inawit. Kaiba dian an odok sa pusong pagirumdom: “Hanapa nindo si Jehova asin an saiyang kosog, hanapa nindo nin dayaday an saiyang lalauogon. Girumdoma nindo an saiyang makangangalas na mga ginigibo, an saiyang mga milagro asin an hudisyal na mga desisyon kan saiyang ngoso.”—1 Cronica 16:11, 12.

14. Paano kita makikinabang sa marahay na halimbawa ni Salomon asin sa saiyang mga sala kan huring kabtang kan saiyang buhay?

¹⁴ Bago sia nagadan, hinatolan ni David an aki niang si Salomon: “Kun hanapon mo [si Jehova], itotogot nia na sia manompongan mo.” (1 Cronica 28:9) Kan makatukaw na sa trono, si Salomon nagduman sa Gabaon, na namumugtakan kan tolda nin katiriponan, asin nag-atang ki Jehova. Duman inagda ni Jehova si Salomon: “Maghagad ka! Ano an itatao ko sa saimo?” Bilang simbag sa kahagadan ni Salomon, suelto siang tinawan ni Jehova nin kadonongan asin kaaraman sa paghokom sa Israel, asin dinagdagan Nia iyan nin mga kayamanan asin onra. (2 Cronica 1:3-12) Ginagamit an arkitektural na plano na itinao ni Jehova ki David, si Salomon nagtogdok nin kahangahangang templo. Alagad kun dapit sa saiya mismong pag-agom, dai hinanap ni Salomon si Jehova. Si Salomon nag-agom nin mga babae na dai nagsasamba ki Jehova. Sa saiyang huring mga taon, irinayo ninda ki Jehova an saiyang puso. (1 Hade 11:1-10) Gurano man an garo baga pagigin prominente, madonong, o intelihente niato, mahalaga na “padagos na segurohon kun ano an inaako kan Kagurangnan”!

15. Kan si Zera na Etiope makilaban sa Juda, taano ta may kompiansang makakapamibi si Asa na ililigtas ni Jehova an Juda?

¹⁵ An pangangaipo kaini orog pang idinodoon kan rekord kan paghade ni Asa, sarong makoapo sa tuhod ni Salomon. Onseng taon pakalihis na magin hade si Asa, sarong hukbo na kompuesto nin sarong milyon katawo an pinangenotan ni Zera na Etiope laban sa Juda. Ililigtas daw ni Jehova an Juda? Labing 500 na taon bago kaini, malinaw na sinabi ni Jehova kun ano an maaasahan kan saiyang banwaan kun sinda mahinanyog sa saiya saka kukuyogon an saiyang mga togon asin kun ano an maaasahan ninda kun dai. (Deuteronomio 28:1, 7, 15, 25) Sa kapinonan kan saiyang pagreynar, hinale ni Asa sa saiyang rona an mga altar asin harigi na ginagamit sa falsong pagsamba. Sinadol nia an banwaan na “hanapon si Jehova.” Dai na naghalat si Asa na mapaatubang sa kalamidad bago iyan gibohon. Kaya may pagtubod ki Jehova, si Asa puedeng mamibi sa saiya na humiro para sa sainda. An resulta? An Juda tinawan nin lubos na kapangganahan.—2 Cronica 14:2-12.

16, 17. (a) Minsan ngani nanggana si Asa, anong pagirumdom an itinao saiya ni Jehova? (b) Kan si Asa humirong may kamangmangan, anong tabang an itinao saiya, alagad ano an nagin reaksion nia? (c) Paano kita makikinabang sa pag-estudyar sa iginawe ni Asa?

¹⁶ Minsan siring, kan bumalik si Asa na nanggana, isinugo ni Jehova si Azarias na sabaton an hade asin sabihon: “Dangoga nindo ako, O Asa asin bilog na Juda asin Benjamin! Si Jehova nasa saindo sagkod na kamo nasa saiya; asin kun sia hahanapon nindo, itotogot nia na sia manompongan nindo, alagad kun bayaan sia nindo babayaan man nia kamo.” (2 Cronica 15:2) May bagong kaigotan, sinuportaran ni Asa an tunay na pagsamba. Alagad pakalihis nin 24 taon, kan mapaatubang giraray sa guerra, dai hinanap ni Asa si Jehova. Dai sia nagkonsulta sa Tataramon nin Dios, asin dai nia ginirumdom an ginibo ni Jehova kan sakyadahon kan hukbo nin Etiopia an Juda. May kamangmangan na nakialyansa sia sa Siria.—2 Cronica 16:1-6.

¹⁷ Huli kaini, si Asa ipinasagwe ni Jehova ki Hanani na parahula. Dawa sa puntong iyan, kan ipaliwanag an punto de vista ni Jehova dapit sa bagay na iyan, puede kutanang makinabang si Asa. Imbes, naanggot sia asin ibinugtak si Hanani sa harong kan mga pandog. (2 Cronica 16:7-10) Makamomondo nanggad! Kumusta man kita? Hinahanap daw niato an Dios alagad ta habo niatong umako nin hatol? Kun an sarong nagmamalasakit asin may pagmakolog na magurang sa kongregasyon ginagamit an Biblia tanganing hatolan kita huli ta kita nasisiod na sa kinaban, kita daw nagpapaheling nin pag-apresyar sa  mamomoton na tabang na itinatao sa sato tanganing maaraman “kun ano an inaako kan Kagurangnan”?

Dai Paglingawan na Maghapot

18. Paano kita makikinabang sa mga tataramon ni Eliu ki Job?

¹⁸ Kun nagsasakit, dawa an saro na nagkaigwa na nin marahay na rekord sa paglilingkod ki Jehova puedeng magkulang. Kan si Job magkaigwa nin helang na nakaririmarima nin makuri, mawaran kan saiyang mga aki asin materyal na mga rogaring, asin pinagsahotan nin putik kan saiyang kairibaiba, anas na sana sadiri nia an nasa isip nia. Pinagirumdom sia ni Eliu: “Mayo nin siisay man na nagsabi, ‘Haen an Dios na Kaharohalangkaweng Kaggibo sa sakuya?’ ” (Job 35:10) Kinaipuhan ni Job na ipokus an saiyang atension ki Jehova asin pensaron kun ano an pagheling Nia sa situwasyon. Mapakumbabang inako ni Job an pagirumdom na iyan, asin an saiyang halimbawa makatatabang sa sato na gibohon man iyan.

19. Ano an parateng dai nagigibo kan banwaan nin Israel?

¹⁹ Aram kan banwaan nin Israel an rekord kan mga ginibo nin Dios sa saindang nasyon. Alagad parateng gayo na dai ninda iyan ginigirumdom kun may rineresolberan sindang espesipikong mga situwasyon sa saindang buhay. (Jeremias 2:5, 6, 8) Kun napapaatubang sa mga pagdesisyon sa buhay, sinusunod ninda an saindang sadiring mga kasingawan imbes na maghapot, “Haen si Jehova?”—Isaias 5:11, 12.

Padagos na Maghapot, “Haen si Jehova?”

20, 21. (a) Siisay ngonyan an nagpaheling kan espiritu ni Eliseo sa paghagad kan paggiya ni Jehova? (b) Paano kita makakaarog asin makikinabang sa saindang halimbawa nin pagtubod?

²⁰ Kan matapos an pampublikong ministeryo ni Elias, an katabang niang si Eliseo kinua an opisyal na gubing na naholog hale ki Elias, nagduman sa Jordan, pinakol an tubig, asin naghapot: “Haen si Jehova na Dios ni Elias, Sia mismo?” (2 Hade 2:14) Suminimbag si Jehova paagi sa pagpaheling na an saiyang espiritu yaon na ngonyan ki Eliseo. Ano an manonodan niato digdi?

 ²¹ May kaagid na nangyari sa presenteng mga panahon. An nagkapirang linahidan na Kristiano na nangenot sa paghuhulit nawara na sa daga. An mga pinaniwalaan kaidto nin pangangataman siniyasat an Kasuratan asin namibi ki Jehova para sa paggiya. Pirme sindang naghahapot, “Haen si Jehova?” Bilang resulta, padagos na giniyahan ni Jehova an saiyang banwaan asin pinapanggana an saindang aktibidad. Inaarog daw niato an saindang pagtubod? (Hebreo 13:7) Kun iyo, kita magdadanay na dayupot sa organisasyon ni Jehova, masunod sa paggiya kaiyan, asin lubos na makikikabtang sa gibohon na ginigibo kaiyan sa irarom kan paggiya ni Jesu-Cristo.—Zacarias 8:23.

Ano an Isisimbag Nindo?

• May anong motibo na kita maninigong maghapot, “Haen si Jehova?”

• Paano niato ngonyan makukua an simbag sa hapot na, “Haen si Jehova?”

• Taano ta dai sinisimbag an nagkapirang pamibi para sa paggiya nin Dios?

• Anong mga halimbawa sa Biblia an nagpapaheling kan pangangaipo na “padagos na segurohon kun ano an inaako kan Kagurangnan”?

[Mga Hapot Para sa Pag-adal]

[Ritrato sa pahina 9]

Paano hinanap ni Hadeng Josafat si Jehova?

[Ritrato sa pahina 10]

Taano ta nagkonsulta si Saul sa patagolainan?

[Mga Ritrato sa pahina 12]

Mamibi, mag-adal, asin maghorophorop tanganing maseguro ‘kun haen si Jehova’