Kun Paano Sinimbag an Nagkapira

MINILYON na tawo an namimibi. An nagkapira kombensido na sinimbag an saindang mga pamibi. An iba nag-iisip-isip kun baga dinadangog man lamang an saindang mga pamibi. An iba pa naghahanap nin mga simbag alagad dai inisip na iatubang an saindang mga kahagadan sa Dios sa pamibi.

Ipinamimidbid kan Biblia an tunay na Dios bilang an “Paradangog nin pamibi.” (Salmo 65:2) Kun namimibi kamo, segurado daw kamo na an saindong mga pamibi nakadirekto sa tunay na Dios? An saindo daw na mga pamibi an klase na sisimbagon nia?

Para sa dakol na tawo sa gabos na parte kan daga, an simbag nagin iyo! Paano sinda sinimbag? Ano an nanodan ninda?

An Dios—Siisay Sia?

An sarong maestra sa Portugal na inedukar nin mga madre asin padi sinserong inotob an saiyang relihion. Kan magbago asin bayaan kan iglesia an mga gibo na itinokdo sa saiya na mahalaga, sia naribaraw. Naaraman nia an mga paagi nin pagsamba sa Oriente sa mga pagbiahe nia, asin nagpoon siang mag-isip-isip kun baga igwa nin sarong tunay na Dios. Paano daw sia maninigong sumamba? Kan hapoton nia an saiyang padi manongod sa mga bagay sa Biblia, dai inintindi an saiyang mga hapot, asin sia nadesganar.

An iglesia Katolika nagsirkular nin pulyeto sa siudad kan maestrang ini na nagpapatanid sa mga miembro kan parokya na dai makipag-olay sa mga Saksi ni Jehova. Alagad nagdanay an saiyang mga hapot. Sarong aldaw kan an mga Saksi magsongko sa saiya, sia naghinanyog asin nagpaheling nin interes sa nadangog nia. Idto an kaenot-enoteng pakipag-olay nia sa sainda.

Tanganing masimbag an dakol niang hapot, an babaeng ini nagpoon na mag-adal kan Biblia kaiba kan mga Saksi. Kada semana, igwa sia nin halabang lista nin mga hapot na naghahalat sa sainda. Gusto niang maaraman an ngaran nin Dios, kun baga may saro sanang tunay na Dios, kun baga inooyonan nia an paggamit nin mga imahen sa pagsamba, asin kadakol pang iba. Narisa nia na an gabos na isinisimbag sa saiya hale sa Biblia, bakong personal na mga opinyon, kaya sia napangalas asin naogmang marhay sa mga nanonodan nia. Luway-luway  na nasimbag an dakol niang hapot. Ngonyan, sinasamba nia si Jehova sa espiritu asin katotoohan, arog kan sinabi ni Jesu-Cristo na gigibohon kan “tunay na mga parasamba.”​—Juan 4:23.

Sa Sri Lanka, an sarong pamilya iribang binabasa nin regular an Biblia, alagad dai nasisimbag an dakol na hapot na mahalaga sainda. Maski kaipuhan ninda an tabang, dai iyan ikinakatao kan saindang padi. Minsan siring, nagsongko an mga Saksi ni Jehova asin nagwalat nin nakatatabang na mga babasahon sa Biblia sa pamilyang iyan. Sa huri, kan ikatao kan mga Saksi ni Jehova sa pamilya an nakakokontentong mga simbag sa mga hapot ninda sa Biblia, uminoyon sinda sa sarong pag-adal sa Biblia. An mga nanodan ninda sa pag-adal ninda nakapukaw na marhay sa saindang interes.

An pagdoktrina kan iglesia poon sa pagkaniaki nakaolang pa man giraray sa agom na babae na masabotan na an Ama ni Jesu-Cristo an “iyo sanang tunay na Dios,” siring kan sinabi mismo ni Jesus. (Juan 17:1, 3) Itinokdo saiya na si Jesus kapantay kan Ama asin na an “misteryong” ini dai dapat kuestionon. May sinseridad asin pagkadesesperar na namibi ki Jehova an agom na babae, na ginagamit an ngaran nia, asin hinagad sa saiya na itokdo kun siisay si Jesus. Dangan maingat na siniyasat giraray kan agom na babae an konektadong mga teksto. (Juan 14:28; 17:21; 1 Corinto 8:5, 6) Garo baga naholog an mga kiskis na nakatatahob sa saiyang mga mata, malinaw na niang naheheling ngonyan na si Jehova​—an Kaglalang kan langit asin daga saka an Ama ni Jesu-Cristo​—iyo an tunay na Dios.​—Isaias 42:8; Jeremias 10:10-12.

Pagdusa—Taano?

An tawong si Job nagdusa nin makuri. An gabos niang aki nagadan sa sarong bagyo, asin sia nagin dukha. Nagkaigwa man sia nin makologon na helang asin tinios nia an pasakit kan saiyang falsong mga katood. Sa tahaw kan gabos na ini, si Job nakataram nin ragap. (Job 6:3) Alagad kinonsiderar nin Dios an mga sirkunstansia. (Job 35:15) Aram nia an nasa puso ni Job asin itinao an hatol na kaipuhan ni Job. Ginigibo man nia iyan para sa mga tawo ngonyan.

Sa Mozambique, si Castro dies anyos sana kan magadan an saiyang ina. Sia nalunosan. “Taano ta kaipuhan niang magadan asin bayaan kami?” an hapot nia. Minsan ngani pinadakula sia nin mga magurang na matatakton sa Dios, nariribaraw sia ngonyan. Ano daw an makararanga sa saiyang isip asin puso? Nanompongan nia an karangahan sa pagbasa nin sarong sadit na Bibliang Chichewa asin pakikipag-olay dapit dian sa matua niang mga tugang na lalaki.

Luway-luway, nasabotan ni Castro na an saiyang ina nagadan, bakong huli sa inhustisya nin Dios, kundi huli sa minanang pagkabakong sangkap. (Roma 5:12; 6:23) An panuga kan Biblia na pagkabuhay liwat nagtao sa saiya kan pinakadakulang karangahan huli ta iyan an nagin basehan nia sa pagkompiar na maheheling nia giraray an saiyang ina. (Juan 5:28, 29; Gibo 24:15) Makamomondo, pakalihis sana nin apat na taon, an saiyang ama nagadan. Alagad sa panahon na ini mas nakaya nang atubangon ni Castro an pagkagadan kan saiyang ama. Ngonyan, namomotan nia si Jehova asin maimbod na ginagamit an saiyang buhay sa paglilingkod sa Dios. An kagayagayahan na nanompongan nia risang-risa kan gabos na nakakamidbid sa saiya.

Dakol na tawong nagadanan nin namomotan an naranga kan iyo man sanang mga katotoohan sa Biblia na nakaranga ki Castro. An nagkapira na nakaeksperyensia nin grabeng kasakitan huli sa mga ginibo nin maraot na mga tawo naghahapot, arog ni Job: “Taano ta an mga maraot padagos na nabubuhay?” (Job 21:7) Kun naghihinanyog talaga an mga tawo sa sinasabi nin Dios bilang simbag sa saiyang Tataramon, narerealisar ninda na an paagi nin Dios sa pag-asikaso sa mga bagay talagang para sa sainda mismong ikararahay.​—2 Pedro 3:9.

Si Barbara, na pinadakula sa Estados Unidos, dai man personalmenteng nakaeksperyensia kan makatatakot na marhay na mga pangyayari nin guerra. Alagad nagdakula sia sa tahaw nin sarong kinaban na may mga guerra. Aroaldaw ibinabareta an manongod sa mga karatan na ginigibo sa panahon nin guerra. Durante kan saiyang pag-adal sa eskuelahan, dakulang iisipon para sa saiya an mga pangyayari sa kasaysayan na garo baga dai masabi kun paano nangyari. Ano an dahelan kaiyan? An Dios daw nagmamakolog sa nangyayari? Nagtutubod sia na an Dios nag-eeksister, alagad nagkakakorontrahan an saboot nia manongod sa Dios.

Minsan siring, an punto de vista ni Barbara sa buhay luway-luway na nagbago bilang resulta kan  saiyang pakikiasosyar sa mga Saksi ni Jehova. Naghinanyog sia sainda asin nakipag-adal kan Biblia kaiba ninda. Nag-atender sia sa mga pagtiripon sa Kingdom Hall. Nag-atender pa ngani sia sa saro sa darakulang kombension ninda. Dugang pa, kun sia naghahapot, naobserbaran nia na dai nagkakalaenlaen an opinyon kan laen-laen na Saksi. Imbes, an mga Saksi nagkakaoroyon sa mga sinasabi ninda huli ta an saindang kaisipan nakabasar sa Biblia.

Itinokdo kan mga Saksi an prueba sa Biblia na an kinaban impluwensiado ni Satanas na Diablo, an namamahala kaiyan, asin ipinababanaag kaiyan an espiritu ni Satanas. (Juan 14:30; 2 Corinto 4:4; Efeso 2:1-3; 1 Juan 5:19) Ipinaliwanag ninda na an mga pangyayari na nagin dakulang iisipon para ki Barbara ihinula sa Biblia. (Daniel, kapitulo 2, 7, asin 8) Ihinula iyan nin Dios huli ta igwa sia nin kakayahan na maheling an ngapit kun gusto niang gibohon iyan. An Dios an nagpangyari kan nagkapira sa mga pangyayaring iyan. An iba itinogot nia sanang mangyari. Ipinaheling ki Barbara kan mga Saksi na ihinuhula man sa Biblia an marahay asin maraot na mga pangyayari sa kaaldawan niato asin ipinaliliwanag an kahulogan kaiyan. (Mateo 24:3-14) Ipinaheling ninda saiya an mga panuga sa Biblia na sarong bagong kinaban na dian mangingibabaw an katanosan asin an pagdusa magigin bagay na nakalihis na.—2 Pedro 3:13; Kapahayagan 21:3, 4.

Luway-luway, nagpoon na masabotan ni Barbara na minsan ngani bako si Jehova Dios an responsable sa pagdusa nin tawo, dai nia iyan inoolang paagi sa pagpirit sa mga tawo na sumunod sa saiyang mga togon kun gusto nindang makisuway. (Deuteronomio 30:​19, 20) Naggibo an Dios nin mga probisyon na dian puede kitang mabuhay sagkod lamang na may kaogmahan, alagad itinatao nia sato an oportunidad ngonyan na ipaheling kun baga mamumuhay kita kaoyon kan saiyang matanos na mga dalan. (Kapahayagan 14:6, 7) Nagdesisyon si Barbara na adalan an mga kahagadan nin Dios asin mamuhay oyon dian. Nanompongan man nia sa tahaw nin mga Saksi ni Jehova an klase nin pagkamoot na sinabi ni Jesus na magpapamidbid sa saiyang tunay na mga parasunod.—Juan 13:34, 35.

Puede man kamong makinabang sa mga probisyon na nakatabang sa saiya.

Buhay na May Kahulogan

Dawa an mga garo baga marahay an dalagan kan buhay tibaad maghanap man nin simbag sa mga hapot na nakapupurisaw sa sainda. Halimbawa, si Matthew, sarong hoben na lalaki sa Britania, kaidto pa nakamamate na nin grabeng paghimuyawot na manompongan an tunay na Dios asin an katuyohan nin buhay. Nagadan an saiyang ama kan si Matthew 17 anyos. Pakatapos kaiyan, nakamit ni Matthew an titulo sa musika sa unibersidad. Dangan nakaeksperyensia sia nin nagkokosog na pakarealisar sa kadaihan nin pakinabang kan saiyang materyalistikong pamumuhay. Huminale sia sa sadiring lugar tanganing mag-istar sa Londres, asin duman naimbuelto sia sa pagdodroga, pagduman sa mga klab, astrolohiya, espiritismo, asin Budismong Zen saka iba pang pilosopiya—na gabos ginibo nia sa paghanap nin nakakokontentong pamumuhay. Sa pagkadesesperar nag-agrangay sia sa Dios na tabangan siang manompongan an katotoohan.

Pakalihis nin duwang aldaw nanuparan ni Matthew an sarong dating katood asin ipinaliwanag nia an saiyang alanganon na kamugtakan. An tawong ini nakipag-adal sa mga Saksi ni Jehova. Kan ipaheling ki Matthew an 2 Timoteo 3:1-5, napangalas sia ta ilinaladawan nin eksakto kan Biblia an kinaban sa palibot niato. Kan basahon nia an Sermon sa Bukid, napahiro kaiyan an saiyang puso. (Mateo, kapitulo 5-7) Kan primero, nagduwaduwa sia huling nakabasa sia nin nagkikritikar sa Mga Saksi ni Jehova, alagad sa katapustapusi nagdesisyon siang umatender sa mga pagtiripon sa kaharaning Kingdom Hall.

Nagustohan ni Matthew an saiyang nadangog asin nagpoon siang mag-adal kan Biblia kaiba kan saro sa mga magurang sa kongregasyon. Dai nahaloy narealisar nia na an nanonodan nia iyo an haloy na niang hinahanap, an simbag sa pamibi nia kaidto sa Dios. Nakaeksperyensia sia nin mga pakinabang kan bayaan nia an mga gibo na ikinaaanggot ni Jehova. Mantang kinukultibar nia an nakararahay na pagkatakot sa Dios, napahiro siang ioyon an saiyang buhay sa mga togon nin Dios. Naaraman ni Matthew na an siring na buhay igwa nin tunay na kahulogan.—Eclesiastes 12:13.

Dai itinalaga na si Matthew o an ibang nasambitan sa artikulong ini makanompong nin nakakokontentong pamumuhay. Minsan siring, nanodan ninda na si Jehova Dios igwa nin mamomoton na  katuyohan para sa gabos na maogmang pinipili na sumunod sa saiyang mga togon. (Gibo 10:34, 35) Kaiba sa katuyohan na iyan an buhay na daing sagkod sa sarong kinaban na mayo nang guerra, talingkas na sa helang saka gutom—talingkas na dawa sa kagadanan. (Isaias 2:4; 25:6-8; 33:24; Juan 3:16) Iyan daw an gusto nindo? Kun iyo, makakanood kamo nin orog pa manongod sa pakanompong kan liabe sa nakakokontentong buhay paagi sa pag-atender sa mga pagtiripon na basado sa Biblia sa Kingdom Hall kan Mga Saksi ni Jehova. May init kamong iniimbitaran na gibohon iyan.

[Ritrato sa pahina 7]

Odok na mamibi sa Dios, na ginagamit an saiyang personal na ngaran

[Ritrato sa pahina 7]

Pag-adalan an Biblia kaiba an mga totoong nagtotokdo kan laog kaiyan

[Mga Ritrato sa pahina 7]

Mag-atender sa mga pagtiripon sa Kingdom Hall

[Picture Credit Line sa pahina 4]

Parabaklay: Chad Ehlers/Index Stock Photography