Mga Hapot Hale sa mga Parabasa

Kun an sarong Kristiano may nadadangog na mga tingog, pirmeng nangangahulogan daw iyan na sia sinasalakay nin demonyo?

Dai. Minsan ngani nababareta na naggigibo nin siring an mga demonyo, nadiskobre kan dakol na indibiduwal na nakadadangog nin mga tingog o nakaeeksperyensia nin iba pang dai ikapaliwanag asin nakapupurisaw na mga pakamate kan sinda nag-imbestigar na sinda may helang.

Dawa kan enot na siglo, minalataw na kun beses ibinibilang na magkapareho an mga epekto kan pagsalakay nin demonyo asin kan pisikal na kamugtakan nin salud. Sa Mateo 17:14-18, mababasa niato an manongod sa sarong solterito na pinaomayan ni Jesus. Minsan ngani an solterito nagkaigwa nin mga sintoma nin grabeng subi-subi, an totoo demonyo an dahelan kan pagdusa nia. Minsan siring, sa mas naenot na pangyayari kan dinara ki Jesus an mga kadaklan nin mga tawong may kamatean tanganing magpabolong, kaiba digdi an nagkapira na “sinaniban nin demonyo asin naghehelang nin subi-subi.” (Mateo 4:24) Minalataw na an nagkapirang may subi-subi ibinibilang na dai sinaniban nin demonyo. Pisikal an saindang problema.

Ibinabareta na an nagkapirang may schizophrenia, sarong helang na sa parate napapaomayan nin bolong, nakadadangog nin mga tingog o igwa nin ibang mga sintoma na puedeng magin garo baga misteryoso. * May iba pang pisikal na mga kamugtakan na puede man na magin dahelan nin pagkaribaraw nin isip na puedeng salang ipamugtak nin nagkapira na kagigibohan nin mga demonyo. Huli kaini, minsan ngani tibaad dai gugustohon nin sarong indibiduwal na nagsasabing nakadadangog nin mga tingog o nakaeeksperyensia nin iba pang nakapupurisaw na mga pakamate na haleon an posibilidad nin panriribok nin demonyo, maninigo nanggad na sia enkaminaron na pag-isipan niang mag-imbestigar kun baga may pisikal na paliwanag sa saiyang naeeksperyensiahan.

[Nota sa Ibaba]