Minamangno daw ni Jehova an Saimong Ginigibo?

ANO an isisimbag mo sa hapot na iyan? Dakol an masabi: ‘Naniniwala ako na namangno nin Dios an mga ginibo kan mga tawong arog ki Moises, Gedeon, asin David, alagad duda ako na sia interesado sa ano man na nagigibo ko. Bako man akong arog ki Moises, Gedeon, o David.’

Totoo na an nagkapirang fiel na tawo kan mga panahon kan Biblia naggibo nin ekstraordinaryong mga akto nin pagtubod. Sinda ‘nakadaog sa mga kahadean, tinikom an ngoso nin mga leon, nakasigbo kan puersa nin kalayo, asin nakaligtas sa tarom nin minasbad.’ (Hebreo 11:33, 34) Pero an iba ipinaheling an saindang pagtubod sa bakong gayong pambihirang mga paagi, asin inaasegurar kita kan Biblia na minangno man nin Dios an saindang mga gibo nin pagtubod. Bilang ilustrasyon, estudyare an mga halimbawa sa Kasuratan nin sarong pastor, sarong propeta, asin sarong babaeng balo.

Nag-atang an Sarong Pastor

Ano an nagigirumdoman mo manongod ki Abel, an panduwang aki ni Adan asin Eva? Tibaad natatandaan mo na sia nagadan na martir, sarong bagay na posibleng marhay na maeeksperyensiahan nin pipira sa sato. Alagad iba an dahelan kan enot na pakamangno nin Dios ki Abel.

Sarong aldaw, kinua ni Abel an nagkapira sa pinakapiling hayop sa saiyang aripompon asin nagdolot nin atang sa Dios. An saiyang balaog tibaad ibibilang ngonyan na medyo simple sana, alagad minangno iyan ni Jehova asin ipinahayag an saiyang pag-oyon. Minsan siring, bako lang iyan. Pakalihis nin haros apat na ribong taon, pinasabngan ni Jehova si apostol Pablo na sumurat manongod dian sa librong Hebreo. Pakalihis nin kadakol na taon, dai nalingawan nin Dios an simpleng atang na idto!—Hebreo 6:10; 11:4.

Paano nagdesisyon si Abel kun anong klaseng atang an idodolot? Daing sinasabi an Biblia, alagad siertong pinag-isipan nia an bagay na iyan. Saro siang pastor, kaya inaasahan na madolot sia hale sa saiyang aripompon. Pero mangnoha na itinao nia an pinakapili—an “matatabang pidaso.” (Genesis 4:4) Posible man na hinorophorop nia an mga tataramon ni Jehova sa halas duman sa tatamnan sa Eden: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:15; Kapahayagan 12:9) Minsan ngani dai nasasabotan kun siisay an “babae” asin an saiyang “banhi,” tibaad narealisar ni Abel  na an ‘paglugad sa bool’ kan banhi kan babae may kalabot na pagpabolos nin dugo. Siertong rinekonoser nia na mayo nang maorog na halaga kisa buhay asin naghahangos na linalang. An pinakamahalaga, an atang na idinolot nia talagang angay.

Arog ki Abel, an mga Kristiano ngonyan nagdodolot nin mga atang sa Dios. Sinda nagdodolot, bako nin matuang mga ogbon nin hayop, kundi nin “atang nin pag-omaw, na iyo, an bunga nin mga ngabil na nagpapahayag sa publiko kan . . . ngaran” nin Dios. (Hebreo 13:15) An satong mga ngabil nagpapahayag sa publiko kun sinasabi niato sa iba an satong pagtubod.

Gusto mo daw na paoswagon an kualidad kan saimong atang? Kun siring maingat mong pag-isipan an mga pangangaipo kan mga tawo sa saindong teritoryo. Ano an mga ikinahahadit ninda? An mga pinagkakainteresan ninda? Anong mga aspekto kan mensahe sa Biblia an magugustohan ninda? Sa panahon nin kada paghuhulit, analisaron an ginibo mong mga pakikipag-olay sa katuyohan na paoswagon an saimong pagigin epektibo? Asin kun ika nagtataram manongod ki Jehova, gibohon mo iyan na may kombiksion, gikan sa puso. Gibohon mo an saimong atang na totoong “atang nin pag-omaw.”

An Sarong Propeta Naghulit sa Dai Naghihimate na Kataraed

Estudyare ngonyan si propeta Enoc. Tibaad biyo siang nagsosolo bilang saksi ni Jehova Dios. Ika daw, arog ki Enoc, an solamenteng miembro kan saindong pamilya na fiel na naglilingkod ki Jehova? Ika daw an solamenteng estudyante sa saindong klase o an solamenteng trabahador sa saindong pinagtatrabawohan na nagsususog sa mga prinsipyo kan Biblia? Kun iyo, tibaad may inaatubang kang mga angat. Tibaad sadolon ka nin mga katood, paryente, kaklase, o katrabaho na lapason an mga ley nin Dios. “Mayo nin siisay man na makakaaram kan ginibo mo,” an tibaad sabihon ninda. “Dai kami masumbong.” Tibaad iinsistir ninda na kamangmangan an mahadit manongod sa moral na mga pamantayan sa Biblia huli ta an Dios mayo man nin labot sa ginigibo mo. Naaanggot huli ta an saimong pag-iisip asin paghiro bakong arog sa sainda, tibaad gibohon ninda an gabos na magigibo ninda tanganing paluyahon an saimong pagsayuma.

Totoo, bakong pasil na atubangon an siring na pangigipit, alagad bako iyan na imposible. Isipa si Enoc, an ikapito sa linya ni Adan. (Judas 14) Kan panahon na mamundag si Enoc, an kadaklan na tawo nawaran na kan gabos na pagmate sa moral. An saindang pagtaram makasusupog; an saindang gawe-gawe “nakakukubhan.” (Judas 15) An paggawe ninda arog na marhay kan dakol na tawo ngonyan.

Paano iyan nakayang atubangon ni Enoc? An simbag sa hapot na iyan interesante sa sato ngonyan. Minsan ngani tibaad kaidto si Enoc an solamenteng tawo sa daga na nagsasamba ki Jehova, dai man talaga sia nagsosolo. Si Enoc naglakaw sa kaibanan nin Dios.—Genesis 5:22.

An pagpaogma sa Dios an pokus kan buhay ni Enoc. Aram nia na an kahulogan kan paglakaw sa kaibanan nin Dios bako sanang pagkaigwa nin malinig asin moral na pamumuhay. Inasahan ni Jehova na sia maghuhulit. (Judas 14, 15) An mga tawo kaipuhan na patanidan na may nagmamangno sa saindang maraot na mga gibo. Si Enoc padagos na naglakaw sa kaibanan nin Dios sa laog nin labing 300 na taon—mas halawig nanggad kisa tinagalan nin siisay man sa sato. Sagkod kan sia magadan, nagpadagos sia sa paglakaw sa kaibanan nin Dios.​—Genesis 5:23, 24.

Arog ki Enoc, kita sinugo man na maghulit. (Mateo 24:14) Apuera sa paghuhulit sa harong-harong, hinihingoa niato na paabotan kan maogmang bareta an mga paryente, kamidbid sa trabaho, asin kaklase. Pero kun beses tibaad nag-aalangan kitang magtaram. Totoo daw iyan sa saimo? Dai ka madesesperar. Arogon mo an enot na mga Kristiano, asin mamibi sa Dios na magkaigwa nin pagkapusoan. (Gibo 4:29) Nungkang paglingawan na sagkod na ika naglalakaw sa kaibanan nin Dios, ika dai talaga noarin man nagsosolo.

Nag-andam nin Pagkakan an Sarong Balo

Imahinaron mo, an sarong dai nginaranan na babaeng balo nag-ako nin duwang bendisyon huli ta sia nag-andam nin simpleng pagkakan! Sia bakong Israelita kundi taga ibang daga na nabuhay kaidtong ikasampulong siglo B.C.E. sa banwaan nin Sarepta. Kan madali nang matapos an halawig na tigmara asin tiggutom, paubos na an suplay na pagkakan kan babaeng balo. An natada na sana sa saiya sarong gugom na harina asin lana na igo na sanang panluto nin ultimong pagkakan nindang mag-ina.

Sa puntong ini, sarong bisita an nagdolok. Sia an propeta nin Dios na si Elias, na nakiolay na makikakan sa dikit na kakanon kan babaeng balo. Haros igo na sana iyan para sa saindang mag-ina, asin mayo na nanggad siang ikatatao sa bisita. Alagad inasegurar sia ni Elias, paagi sa tataramon ni Jehova, na kun ihihiras nia sa saiya an saiyang kakanon, sindang mag-ina dai magugutom. Nangaipo nin pagtubod tanganing maniwala na an Dios nin Israel mamangnohon sia, sarong babaeng balo na taga ibang daga. Pero, naniwala sia ki Elias, asin binalosan sia ni Jehova. “An dakulang dulay nin harina dai naubosan, asin an sadit na dulay nin lana dai kinulang, segun sa tataramon ni Jehova na itinaram nia paagi ki Elias.” An mag-ina nagkaigwa nin regular na suplay nin kakanon sagkod na natapos an tiggutom.—1 Hade 17:8-16.

Minsan siring, saro pang bendisyon an naghahalat sa babaeng balo. Paghaloyhaloy pakatapos kan milagrong iyan, an namomotan niang aki naghelang asin nagadan. Napahiro nin pagkaherak, nakimaherak si Elias ki Jehova na ibalik an buhay kan solterito. (1 Hade 17:17-24) Mangangaipo iyan nin sarong dai pang kaagid na milagro. Mayo nin rekord nin siisay man na binuhay liwat bago kaiyan! Pahehelingan daw giraray ni Jehova nin pagkaherak an babaeng balo na ini na taga ibang daga? Iyo nanggad. Tinawan ni Jehova nin kapangyarihan si Elias na ibalik an buhay kan solterito. Kan huri may sinabi si Jesus mapadapit sa pribilehiadong babaeng ini: ‘Dakol an babaeng balo sa Israel. Pero si Elias isinugo sa Sarepta sa daga nin Sidon sa sarong babaeng balo.’—Lucas 4:25, 26.

An kamugtakan ngonyan sa pagbuhay dai nanggad nin  kasegurohan, dawa sa industrialisadong mga nasyon. An nagkapirang darakulang korporasyon hinale an mga empleyado na nagin maimbod na mga trabahador sa laog nin dakol na dekada. Napapaatubang sa posibilidad na mawaran nin trabaho, an sarong Kristiano tibaad masugotan na gumamit nin sobra-sobrang panahon sa trabaho, sa paglaom na dai sia hahaleon kan saiyang kompanya. Dahel sa paggibo kaiyan tibaad kulang na an panahon nia sa pag-atender sa Kristianong mga pagtiripon, sa pakikikabtang sa ministeryo sa langtad, o sa pag-asikaso sa emosyonal asin espirituwal na mga pangangaipo kan saiyang pamilya. Minsan siring, iniisip nia na dapat siang magdanay sa trabahong iyan ano man an mangyari.

An sarong Kristiano na nasa siring kadepisil na situwasyon sa pagbuhay may dahelan na mahadit. Masakit maghanap nin trabaho sa mga aldaw na ini. An kadaklan sa sato dai man nagmamaigot na yumaman, alagad arog kan babaeng balo sa Sarepta, talagang gusto niato na may ikapuestong kakanon sa lamesa. Minsan siring, ipinagigirumdom sa sato ni apostol Pablo na an Dios nagsabi: “Sa ano man na paagi dai taka babayaan ni sa ano man na paagi pababayaan taka.” Kompiado kitang makasasabi: “Si Jehova an sakong paratabang; dai ako matatakot. Ano an magigibo nin tawo sa sako?” (Hebreo 13:5, 6) Itinaya ni Pablo an mismong buhay nia sa panuga na iyan, asin pirme siang inataman ni Jehova. Iyan man an gigibohon sa sato nin Dios kun dai niato sia pababayaan.

Tibaad isipon niato na nungka niatong mapapantayan an pambihirang mga ginibo kan espirituwal na mga tawong arog ki Moises, Gedeon, asin David, alagad puede niatong arogon an saindang pagtubod. Asin puede niatong girumdomon an simpleng mga akto nin pagtubod na ginibo ni Abel, Enoc, asin kan babaeng balo sa Sarepta. Interesado si Jehova sa gabos na akto nin pagtubod—dawa saradit. Kun an sarong matatakton sa Dios na estudyante magsayumang akoon an droga hale sa sarong kaedad, kun an sarong Kristianong trabahador haboan an inmoral na mga alok sa pinagtatrabawohan, o kun an sarong gurang nang Saksi fiel na nag-aatender sa mga pagtiripon kan kongregasyon apisar kan pagkapagal asin maluyang salud, naheheling iyan ni Jehova. Asin naggagayagaya sia!—Talinhaga 27:11.

Namamangno Mo daw an Ginigibo nin Iba?

Iyo, minamangno ni Jehova an ginigibo niato. Huli kaini, bilang mga paraarog sa Dios, maninigo kitang magin listo na rekonoseron an mga paghihingoa kan iba. (Efeso 5:1) Taano ta dai aramon nin orog an mga angat na inaatubang kan saimong mga kapwa Kristiano tanganing makaatender sa mga pagtiripon kan kongregasyon, makapakikabtang sa ministeryo sa langtad, magibo pa ngani an saindang pangaroaldaw na mga aktibidad?

Dangan, sabihon mo sa saimong mga kapwa parasamba ki Jehova na inaapresyar mo an saindang mga paghihingoa. Maoogma sinda na namamangno mo iyan, asin an saimong pagmakolog puedeng makapag-asegurar giraray sa sainda na minamangno man iyan ni Jehova.