“Papagdanayon Nindo an Marahay na Konsensia”

PARATENG nadadangog an sadol na “sunodon na sana nindo an saindong konsensia.” Alagad tanganing an satong konsensia magin masasarigan na giya, kaipuhan na iyan matokdoan nin tama manongod sa tama asin sala, saka kaipuhan na magin sensitibo kita sa paggiya kaiyan.

Estudyare an eksperyensia nin sarong tawo na an ngaran Zaqueo, na nasusurat sa Biblia. Si Zaqueo, na nakaistar sa Jerico, sarong namomoon na parakolekta nin buhis asin mayaman. Sa pag-admitir nia mismo, yuminaman sia huli sa pangingikil—gibohon na nakakolog nanggad sa iba. Rinibok daw si Zaqueo kan saiyang konsensia huli sa maraot na mga ginibo nia? Kun iyo, malinaw na dai nia iyan iniintindi.—Lucas 19:1-7.

Minsan siring, luminataw an sarong situwasyon na nagpangyaring horophoropon giraray ni Zaqueo an saiyang iginagawe. Si Jesus nagpasiring sa Jerico. Gusto siang maheling kan hababang si Zaqueo, alagad dai sia maheling kaini huli ta matawo. Kaya duminalagan ini sa enotan asin suminakat sa sarong kahoy tanganing makaheling na marhay. Natudok kan makosog na interes ni Zaqueo, sinabihan ini ni Jesus na sosongkoon nia ini sa harong kaini. Naogmang inistimar ni Zaqueo an saiyang bantog na bisita.

An naheling asin nadangog ni Zaqueo mantang nakikiasosyar ki Jesus nakatudok sa saiyang puso asin nakapahiro sa saiya na bagohon an saiyang gibo-gibo. Iinanunsiar nia: “Uya! An kabanga kan sakong mga rogaring, Kagurangnan, itatao ko sa mga dukha, asin an ano man na kinua ko sa pirit sa kiisay pa man paagi sa falsong akusasyon isusulit ko nin apat na doble.”—Lucas 19:8.

An konsensia ni Zaqueo naliwanagan, asin hininanyog patin hinimate nia iyan. An marahay na mga resulta may halawig na epekto. Imahinara an namatean ni Zaqueo kan sinabihan sia ni Jesus: “Sa aldaw na ini an kaligtasan nagdatong sa harong na ini!”—Lucas 19:9.

Kanigoan kanakaparirigon sa boot na halimbawa! Ipinaheheling kaiyan na ano man an iginawe niato kan nakaagi, puede kitang magbago. Arog ni Zaqueo, puede niatong himateon an mga tataramon ni Jesus—na nakasurat sa Biblia—asin paoswagon an satong pakamate nin tama asin sala. Dangan arog kan sadol ni apostol Pedro, puede niatong ‘papagdanayon an marahay na konsensia.’ Puede kitang magdangog sa satong sinanay na konsensia asin maggibo nin tama.​—1 Pedro 3:16.