Bareta kan mga Parabalangibog kan Kahadean

Tabang sa Pagpapadanay sa Kabanalan nin Dugo

SA BILOG na daga pinatunayan kan mga lingkod ni Jehova an kaimbodan sa Dios may koneksion sa kabanalan nin dugo. (Gibo 15:​28, 29) Itinao an tabang sa Kristianong kasararoan nin magturugang kan grupong fiel asin may diskresion na oripon. (Mateo 24:45-47) Helingon niato kun ano an mga resulta sa Pilipinas.

An sangang opisina sa Pilipinas nagbabareta: “Kan 1990 ipinaisi samo na isasagibo kan mga representante hale sa Bethel sa Brooklyn an sarong seminar digdi sa Pilipinas. Inimbitaran an mga tugang hale sa nagkapirang sangang opisina sa Asia, kaiba an Korea, Taiwan, asin Hong Kong. An katuyohan tabangan na maorganisar an Hospital Information Services sa mga sangang opisina ninda asin siring man maareglo an Hospital Liaison Committees. Digdi sa Pilipinas an mga komite enot na inestablisar sa apat na mayor na siudad.” An mga komite maghihingoang makakua nin mga doktor na andam na makikooperar sa sato mapadapit sa Kristianong paninindogan sa dugo. Tatabangan man ninda an mga tugang kun lumataw an mga problema may koneksion sa dugo.

Si Remegio napiling maglingkod sa Hospital Liaison Committee sa Baguio. Sa pag-agi nin panahon, nagpoon na mamangno kan mga doktor an serbisyong ini. Nagigirumdoman ni Remegio an sarong pangyayari kan an dakol na doktor na nakikipagtipon kaiba kan Hospital Liaison Committee gustong maaraman kun paano bobolongon an mga pasyenteng Saksi na nagsasayuma sa dugo. Si Remegio nagsabi: “Nagpoon nang maghapot an mga doktor, alagad nanompongan ko an sakong sadiri na dai makasimbag huli ta teknikal na marhay an mga hapot.” Nag-arang sia nin tabang ki Jehova tanganing makaya an problemang ini. Nagpadagos si Remegio: “Pagkatapos kan kada hapot, an ibang doktor nag-itaas kan saindang kamot asin sinabi kun paano ninda inatubang an kaparehong situwasyon.” Naogma si Remegio sa tabang na iyan, nangorogna ta an hapot-simbagan naglawig nin duwang oras.

Igwa na ngonyan nin 21 komite sa bilog na nasyon, na may total na 77 tugang na lalaki na naglilingkod dian. Si Danilo, sarong Saksing doktor sa medisina, nagsasabi: “Aram kan mga doktor na an mga pasyente nindang Saksi sinusuportaran nin sarong organisasyon na mamomoton na inaataman sinda.” An sarong doktor nagduduwaduwa kan enot na mag-operar sa sarong tugang na lalaki na mayo nin pag-ineksion nin dugo. Minsan siring, marigon an tugang sa saiyang paninindogan. Ginibo an operasyon asin nagin mapanggana iyan. An Hospital Information Services nagbabareta: “Napangalas nanggad an doktor sa pagkaomay kan tugang na ini. Sia nagsabi: ‘Basado sa nangyari digdi, kun may siisay man sa mga miembro nindo na nangangaipo kan klaseng ini nin operasyon na dai magamit nin dugo, maoogma akong gibohon iyan.’”