Hula ni Isaias—Liwanag Para sa Bilog na Katawohan II

Kapitulo Biente: An Kamot ni Jehova Dai Nagin Halipot

Isaias 59:1-21

1. Ano an situwasyon sa Juda, asin ano an iniisip-isip nin dakol?

HINIHINGAKO kan nasyon nin Juda na sinda may pakipagtipan na relasyon ki Jehova. Pero, may kariribokan sa gabos na lugar. Bihira na an hustisya, lakop an krimen asin pan-aapi, asin dai nakakamtan an mga paglaom na magrahay an kamugtakan. Talagang may dakulang problema. Iniisip-isip nin dakol kun itatanos pa daw ni Jehova an mga bagay-bagay. Arog kaini an situwasyon kaidtong kaaldawan ni Isaias. Alagad an pagkasaysay ni Isaias manongod sa panahon na ini bakong suanoy na kasaysayan sana. An saiyang mga tataramon igwa nin makahulang mga patanid para sa siisay man na naghihingakong nagsasamba sa Dios alagad dai iniintindi an Saiyang mga ley. Asin an ipinasabong na hula na nakasurat sa Isaias kapitulo 59 nagtatao nin mamomoton na pamparigon sa boot para sa gabos na nagmamaigot na paglingkodan si Jehova sa ibong kan pamumuhay sa masakit asin peligrosong mga panahon.

Napapasuway sa Tunay na Dios

2, 3. Taano ta dai pinoprotehiran ni Jehova an Juda?

² Isip-isipa na sana​—nagkasala nin apostasiya an katipan na banwaan ni Jehova! Tinalikdan ninda an saindang Kaggibo, sa siring huminale sa irarom kan saiyang nagpoprotehir na kamot. Huli kaini, nag-aagi sinda nin grabeng kasakitan. Binabasol daw gayod ninda si Jehova huli sa saindang pagsakit? Sinasabihan sinda ni Isaias: “Uya! An kamot ni Jehova dai nagin halipot na marhay na dai na iyan makapagligtas, ni nagin magabat na marhay an saiyang talinga na dai na iyan makadangog. Dai, kundi an mga sala nindo iyo an dahelan kan pagkakasuwayan nindo asin kan saindong Dios, asin an saindo mismong mga kasalan iyo an dahelan na itinago nia sa saindo an saiyang lalauogon tanganing dai magdangog.”​—Isaias 59:​1, 2.

³ An mga tataramon na iyan prangka alagad totoo. Si Jehova pa man giraray an Dios nin kaligtasan. Bilang an “Paradangog nin pamibi,” hinihinanyog nia an mga pamibi kan saiyang fiel na mga lingkod. (Salmo 65:2) Minsan siring, dai nia binebendisyonan an mga paragibo nin sala. An banwaan mismo an may sala sa saindang pagkasuway ki Jehova. An sainda mismong karatan an dahelan na itinago nia sa sainda an saiyang lalauogon.

4. Anong mga akusasyon an iinatubang tumang sa Juda?

⁴ An totoo, maraoton an rekord kan Juda. Itinala kan hula ni Isaias an nagkapira sa mga akusasyon tumang sa sainda: “Nadigtaan nin dugo an saindong mga palad, asin nin sala an saindong mga moro. An saindong mga ngabil nagtaram nin putik. An saindong dila padagos na nagririmongrimong nin biyong pagkabakong matanos.” (Isaias 59:3) An banwaan nagpuputik asin nagtataram nin bakong matanos na mga bagay. An pagkasambit sa “nadigtaan nin dugo [na] mga palad” nag-iindikar na an nagkapira nakakomiter pa ngani nin paggadan. Abaang kalapastanganan sa Dios, na sa saiyang Ley bako sanang ipinangangalad an paggadan kundi patin ibinabawal an ‘pagkaongis sa saimong tugang sa saimong puso’! (Levitico 19:17) An daing pakundangan na pagkamakasalan kan mga nag-eerok sa Juda asin an dai malilikayan na resulta maninigong magpagirumdom sa balang saro sa sato ngonyan na kaipuhan niatong kontrolon an makasalan na mga kaisipan asin saboot. Ta kun dai, tibaad sa kahurihurihi makakomiter kita nin maraot na mga gibo na mapasuway sa sato sa Dios.​—Roma 12:9; Galacia 5:15; Santiago 1:​14, 15.

5. Sagkod saen nakaabot an karatan kan Juda?

⁵ An pagkamakasalan nakaimpluwensia sa bilog na nasyon. An hula nagsasabi: “Mayo nin siisay man na nag-aapod sa katanosan, asin mayo nanggad nin siisay man na minaduman sa hokoman sa pagigin fiel. An pinagtitiwalaan bakong tunay, asin an itinataram daing kamanungdanan. Ipinangingidam an kapurisawan, asin ipinangangaki an bagay na nakadadanyar.” (Isaias 59:4) Mayo nin siisay man na nagtataram nin katanosan. Dawa sa mga hokoman, bihirang makanompong nin saro na masasarigan o fiel. Tinalikdan kan Juda si Jehova asin nagtiwala sia sa pakipag-alyansa sa mga nasyon, sa daing buhay pa ngani na mga idolo. Gabos ini “bakong tunay,” mayo nin ano man na halaga. (Isaias 40:​17, 23; 41:29) Bilang resulta, dakol nin orolay, alagad gabos iyan daing kamanungdanan. May mga planong naiisipan, alagad an resulta kaiyan kapurisawan asin bagay na nakadadanyar.

6. Paano nakaaagid kan Juda an rekord kan Kakristianohan?

⁶ An pagkabakong matanos asin kadahasan sa Juda may risang marhay na pagkakaagid sa Kakristianohan. Duwang madahas na guerra mundial an pinaglabanan na imbuelto an Kristiano daang mga nasyon. Sagkod sa presente, napatunayan na daing puersa an porma nin relihion kan Kakristianohan na papondohon an etnikong pagdalisay asin paggaradanan kan mga tribo sa tahaw kan sadiri niang mga miembro. (2 Timoteo 3:5) Minsan ngani tinokdoan ni Jesus an saiyang mga parasunod na magtiwala sa Kahadean nin  Dios, an mga nasyon kan Kakristianohan padagos na nagsasarig sa arsenal nin militar asin politikal na mga pakialyansa para sa katiwasayan. (Mateo 6:10) Tunay nanggad, an kadaklan sa mayor na paragibo nin armas manonompongan sa mga nasyon nin Kakristianohan! Iyo, kun an Kakristianohan nagtitiwala sa mga paghihingoa asin institusyon nin tawo para sa matiwasay na ngapit, sia man nagtitiwala sa “bakong tunay.”

Pag-ani nin Mapait na Bunga

7. Taano ta nakadadanyar sana an ibinubunga kan mga pakana kan Juda?

⁷ An idolatriya asin pandadaya dai puedeng magbunga nin marahay na sosyedad. Huli sa siring na mga ginigibo, inaani ngonyan kan bakong fiel na mga Judio an problema na sinda mismo an nagsabwag. Mababasa niato: “Mga sogok nin mararang halas an hinimsa ninda, asin padagos sindang naghabol nin hamak na harong nin lawa. An siisay man na kumakan kan nagkapira sa saindang mga sogok magagadan, asin an sogok na pinasa mahimsa nin bibora.” (Isaias 59:5) Poon sa pagplano sagkod sa pagsagibo, mayo nin ano man na nagibo an mga pakana nin Juda. An saindang salang kaisipan nagreresulta sana nin maraot, kun paanong mararang mga halas sana an minaluwas sa mga sogok nin mararang halas. Asin nagdudusa an nasyon.

8. Ano an nagpapaheling kan may depektong kaisipan kan Juda?

⁸ Tibaad gumamit nin kadahasan an nagkapirang nag-eerok sa Juda sa paghingoang protehiran an saindang sadiri, alagad mapaprakaso sinda. An pisikal na kosog dai ikariribay sa pagtitiwala ki Jehova asin sa mga gibo nin katanosan bilang proteksion kun paanong an mga harong nin lawa dai ikariribay sa tunay na tela bilang proteksion tumang sa maraot na panahon. Ipinahahayag ni Isaias: “An saindang hamak na harong nin lawa dai puedeng magin gubing, ni ikatatakop man ninda sa saindang sadiri an saindang mga gibo. An saindang mga gibo nakadadanyar na mga gibo, asin an gibo nin kadahasan nasa saindang mga palad. An saindang mga bitis pirmeng nagdadalagan pasiring sa biyong karatan, asin naghihidale sinda tanganing magpabolos nin dugong daing kasalan. An saindang mga kaisipan nakadadanyar na mga kaisipan; an pananamsam asin pagkalaglag nasa saindang mga tinampo.” (Isaias 59:​6, 7) May depekto an kaisipan kan Juda. Paagi sa paggamit nin kadahasan sa paghingoang resolberan an saiyang mga problema, nagpapaheling sia nin maraot na aktitud. Dai siang pakiaram minsan dakol sa saiyang mga biktima daing kasalan asin na an nagkapira tunay na mga lingkod nin Dios.

9. Taano ta dai makamtan kan mga namomoon sa Kakristianohan an tunay na katoninongan?

⁹ An ipinasabong na mga tataramon na ini nagpapagirumdom sa sato kan madugong rekord nin Kakristianohan. Seguradong papanimbagon sia ni Jehova sa saiyang makaturotristeng pagmisrepresentar sa Kristianismo! Siring kan mga Judio kan kaaldawan ni Isaias, an Kakristianohan nagsusog sa dalan na biribid sa moral huli ta hinohona kan saiyang mga namomoon na iyan sana an praktikal na paagi. Mantang sinda nagtataram manongod sa katoninongan, sinda minagawe na may inhustisya. Abaang pagsaginsagin! Mantang padagos na ginagamit kan mga namomoon sa Kakristianohan an taktikang ini, dai ninda noarin man makakamtan an tunay na katoninongan. Siring iyan kan sinabi pa kan hula: “An dalan nin katoninongan dai ninda inintindi, asin mayo nin hustisya sa saindang inagihan. An saindang mga tinampo ginibo nindang biko para sa sainda man sana. Mayo nin siisay man na naglalakaw sa mga iyan an makamimidbid sa katoninongan.”​—Isaias 59:8.

Pagkapakapa sa Espirituwal na Kadikloman

10. Anong pagbuyboy an ginibo ni Isaias para sa Juda?

¹⁰ Dai puedeng bendisyonan ni Jehova an tuso asin kapahapahamak na mga dalan kan Juda. (Salmo 11:5) Kaya nagtataram para sa bilog na nasyon, ibinubuyboy ni Isaias an pagkakulpable kan Juda: “Nagin harayo sa samo an hustisya, asin dai nakakaabot sa samo an katanosan. Nagpaparahalat kami nin liwanag, alagad, uya! kadikloman; nin sinag, alagad ta sa daing ontok na kadikloman kami nagraralakaw. Nagkakapkap kami sa lanob arog kan mga buta, asin arog kan mga mayo nin mata kami nagkakapkap. Nasingkog kami sa lontok kapareho kun banggi; sa tahaw kan mga posog kami garo sana gadan. Padagos kaming nag-aagrotong, kami gabos, siring sa mga oso; asin siring sa mga salampati nagkukurukutok kami na may pagtangis.” (Isaias 59:9-11a) Dai tinogotan kan mga Judio na magin lampara sa saindang mga bitis asin liwanag sa saindang dalan an Tataramon nin Dios. (Salmo 119:105) Bilang resulta, nagin malumlom an mga bagay-bagay. Dawa lontok, sinda nagkakapakapa na garo sa banggi. Garo baga sinda mga gadan na. Sa pagmawot ninda nin kaginhawahan, nag-aagrotong sinda nin makosog na garo gutom o nalugadan na mga oso. An nagkapira kaherakherak na nagkukurukutok, na garo mamondong mga salampati.

11. Taano ta daing kamanungdanan an mga paglaom kan Juda para sa hustisya asin kaligtasan?

¹¹ Aram na marhay ni Isaias na rebelyon tumang sa Dios an dahelan kan mamondong kamugtakan kan Juda. Sia nagsasabi: “Padagos niamong linalaoman an hustisya, alagad mayo ngani; an kaligtasan, alagad nagdanay iyan na harayo sa samo. Huli ta an samong rebelyon duminakol sa atubangan mo; asin mapadapit sa samong mga kasalan, balang saro nagpatotoo tumang sa samo. Huli ta an samong rebelyon nasa samo; asin mapadapit sa samong mga sala, naaaraman niamo nin lubos an mga iyan. May paglapas asin pagdehar ki Jehova; asin may pagrayo hale sa samong Dios, pagtaram nin pan-aapi asin rebelyon, pangingidam asin pagrimongrimong nin putik na mga tataramon hale sa puso mismo.” (Isaias 59:11b-13) Huling dai nagsosolsol an mga nag-eerok sa Juda, dai pa pinatatawad an saindang mga kasalan. Nawara an hustisya sa daga huli ta binayaan kan banwaan si Jehova. Sinda lubos na napatunayan na falso, na inaapi pa ngani an saindang mga tugang. Siring nanggad kaiyan an mga nasa Kakristianohan ngonyan! Bako sanang dai iniintindi kan dakol an hustisya kundi aktibo man nindang linalamag an fiel na  mga Saksi ni Jehova, na naghihingoang gibohon an kabotan nin Dios.

Isinasagibo ni Jehova an Paghokom

12. Ano an aktitud kan mga may paninimbagan na magtao nin hustisya sa Juda?

¹² Garo baga mayo nin hustisya, katanosan, o katotoohan sa Juda. “An hustisya pirit na pinaatras, asin an katanosan danay na nagtitindog na sana sa harayo. Huli ta an katotoohan napukan ngani sa plasang pampubliko, asin an bagay na deretso dai makalaog.” (Isaias 59:14) Sa likod kan mga tata kan siudad sa Juda, may mga plasang pampubliko na duman nagtitiripon an kamagurangan na lalaki tanganing asikasohon an mga kaso sa ley. (Rut 4:​1, 2, 11) An mga lalaking idto maninigong maghokom sa katanosan asin sunodon an hustisya, dai mag-ako nin suhol. (Deuteronomio 16:18-20) Imbes, sinda naghohokom segun sa sadiri nindang maimot na mga ideya. Mas maraot pa, ibinibilang ninda na madaling biktimahon an siisay man na sinserong naghihingoang gumibo nin marahay. Mababasa niato: “An katotoohan nawawara, asin an siisay man na minatalikod sa karatan hinahabonan.”​—Isaias 59:15a.

13. Huling pabaya sa saindang katongdan an mga hokom sa Juda, ano an gigibohon ni Jehova?

¹³ An mga dai naggigirong tumang sa pagraot nin moral nakakalingaw na an Dios bakong buta, ignorante, o daing kosog. Si Isaias nagsurat: “Naheling ni Jehova, asin maraot sa saiyang pagheling na mayo nin hustisya. Asin kan maheling nia na mayong tawo, nagpoon siang magngalas na mayo nin siisay man na nangongoltanan. Asin an saiyang takyag nagligtas para sa saiya, asin an saiyang katanosan iyong nagsuportar sa saiya.” (Isaias 59:15b, 16) Huling pabaya an ninombrahan na mga hokom sa saindang katongdan, si Jehova mainterbenir sa bagay na ini. Kun gibohon na nia ini, sia mahiro sa katanosan asin kapangyarihan.

14. (a) Ano an aktitud kan dakol ngonyan? (b) Paano nag-aandam si Jehova para humiro?

¹⁴ May kaagid na situwasyon ngonyan. Kita nabubuhay sa kinaban na dakol an “nawaran na kan gabos na pagmate sa moral.” (Efeso 4:19) Dikit sana an nagtutubod na mainterbenir pa si Jehova tanganing haleon an karatan sa daga. Alagad ipinaheheling kan hula ni Isaias na maingat na pinagmamasdan ni Jehova an mga gibo-gibo nin tawo. Naggigibo sia nin mga paghokom, asin sa saiyang sadiring panahon, mahiro sia segun sa mga paghokom na idto. Makatanosan daw an saiyang mga paghokom? Ipinaheheling ni Isaias na iyan makatanosan. Sa kaso kan nasyon nin Juda, nagsurat sia: “Dangan nagsulot [si Jehova] nin katanosan bilang gubing na batbat, asin nin takop sa payo na kaligtasan. Dugang pa, nagsulot sia nin mga gubing na pamamalos bilang samno asin pinatos an saiyang sadiri nin kaigotan na garo gubing na daing takyag.” (Isaias 59:17) An makahulang mga tataramon na ini ilinaladawan si Jehova bilang sarong guerrero na naghahagkos para sa ralaban. Desidido siang magin mapanggana an saiyang causa. Segurado sia sa sadiri niang absoluto asin dai mapagdududahan na katanosan. Asin sia magigin maigot sa saiyang mga paghokom na daing kinatatakotan. Daing duda na mangingibabaw an katanosan.

15. (a) Paano magawe an tunay na mga Kristiano kun isagibo na ni Jehova an saiyang paghokom? (b) Ano an masasabi manongod sa mga paghokom ni Jehova?

¹⁵ Sa nagkapirang kadagaan ngonyan, hinihingoa kan mga kaiwal nin katotoohan na olangon an gibohon kan mga lingkod ni Jehova paagi sa pagpalakop nin falso asin mapagpakaraot na propaganda. An tunay na mga Kristiano dai nag-aalangan na manindogan para sa katotoohan, alagad dai sinda noarin man naghihingoang ipamalos an saindang sadiri. (Roma 12:19) Dawa kun papanimbagon na ni Jehova an apostatang Kakristianohan, an mga nagsasamba sa saiya sa daga dai makikikabtang sa paglaglag sa saiya. Aram ninda na itinalaga ni Jehova na sia mismo an mamalos asin na magibo sia nin angay na paghiro pag-abot kan panahon. Inaasegurar kita kan hula: “Segun sa mga pagtratar siring man an ibabalos nia, kabangisan sa saiyang mga kaiwal, nanonongod na tratamiento sa saiyang mga enemigo. An mga isla babalosan nia nin nanonongod na tratamiento.” (Isaias 59:18) Siring kan kaaldawan ni Isaias, bako sanang magigin makatanosan an mga paghokom nin Dios kundi magigin lubos man iyan. Makakaabot pa ngani iyan sa “mga isla,” sa hararayong lugar. Mayo nin siisay man na magigin harayoon o napapasuway na dai sia maaabot kan mga paghokom ni Jehova.

16. Siisay an makaliligtas sa mga paghokom ni Jehova, asin ano an manonodan ninda sa pagkaligtas ninda?

¹⁶ An mga naghihingoa na gibohon an tama hinohokoman ni Jehova sa matanos na paagi. Ihinula ni Isaias na sa mamoroporo kan daga​—sa bilog na daga​—an mga siring maliligtas. Asin an pakaeksperyensia ninda kan proteksion ni Jehova biyong mapakosog kan saindang pagreberensiar asin paggalang sa saiya. (Malaquias 1:11) Mababasa niato: “Poon sa solnopan nin saldang sinda mapoon na matakot sa ngaran ni Jehova, asin an kamurawayan nia poon sa sirangan nin saldang, huli ta madatong sia na siring sa nagpapasakit na salog, na iinugsod kan mismong espiritu ni Jehova.” (Isaias 59:19) Siring sa sarong makosog na bagyo nin doros na nagtutulod sa sarong mapanlaglag na lanob nin tubig sa enotan kaini asin rinaradas an gabos na yaon sa inaagihan kaiyan, paparaon kan espiritu ni Jehova an gabos na olang sa pagkaotob kan saiyang kabotan. An saiyang espiritu mas makosog kisa ano man na puersa na yaon sa tawo. Pagginamit nia iyan sa pagsagibo nin paghokom sa mga tawo asin nasyon, magigin sierto asin lubos an saiyang kapangganahan.

Paglaom Asin BendisyonPara sa mga Nagsosolsol

17. Siisay an Paratubos kan Sion, asin kasuarin nia tinubos an Sion?

¹⁷ Segun sa Ley ni Moises, an sarong Israelita na nagpabakal kan saiyang sadiri sa kaoripnan puedeng tuboson sa kaoripnan nin sarong paratubos. Sa makahulang libro ni Isaias kaidto, si Jehova ilinadawan bilang Paratubos nin nagsosolsol na mga indibiduwal. (Isaias 48:17) Ngonyan ilinaladawan giraray sia bilang Paratubos nin mga nagsosolsol. Isinurat ni Isaias an panuga ni Jehova: “ ‘Sa Sion madatong nanggad an Paratubos, asin sa mga minatalikod sa paglapas sa Jacob,’ an sabi ni Jehova.” (Isaias 59:20) An nakapakokosog  liwat sa boot na panugang ini naotob kan 537 B.C.E. Alagad igwa iyan nin dugang pang kaotoban. Kinotar ni apostol Pablo an mga tataramon na ini hale sa bersion na Septuaginta asin iinaplikar iyan sa mga Kristiano. Sia nagsurat: “Sa paaging ini maliligtas an bilog na Israel. Siring kan nasusurat: ‘An paraligtas maluwas hale sa Sion asin irarayo an maraot na mga gibohon sa Jacob. Asin ini an sakong pakipagtipan sa sainda, kun haleon ko an saindang mga kasalan.’ ” (Roma 11:​26, 27) Tunay nanggad, mahiwason an aplikasyon kan hula ni Isaias​—nakaabot pa sa satong panahon asin lampas pa. Paano?

18. Kasuarin asin paano pinangyari ni Jehova an pag-eksister kan “Israel nin Dios”?

¹⁸ Kan enot na siglo, inako nin sarong sadit na natatada kan nasyon nin Israel si Jesus bilang an Mesiyas. (Roma 9:27; 11:5) Kan aldaw nin Pentecostes 33 C.E., ibinubo ni Jehova an saiyang banal na espiritu sa mga 120 kan mga nagtutubod na idto asin dinara sinda sa saiyang bagong tipan na si Jesu-Cristo an parapangoltanan. (Jeremias 31:31-33; Hebreo 9:15) Kan aldaw na idto nagpoon na mag-eksister an “Israel nin Dios,” sarong bagong nasyon na an mga miembro namimidbid, bakong huli sa pagigin mga gikan ni Abraham sa laman, kundi huli sa pagigin pinaniaki kan espiritu nin Dios. (Galacia 6:16) Poon ki Cornelio, an bagong nasyon kinabibilangan na nin bakong turi na mga Hentil. (Gibo 10:24-48; Kapahayagan 5:​9, 10) Sa siring inampon sinda ni Jehova Dios asin nagin espirituwal na mga aki nia, mga kapwa paramana ni Jesus.​—Roma 8:​16, 17.

19. Ano an ipinakipagtipan ni Jehova sa Israel nin Dios?

¹⁹ Nakipagtipan ngonyan si Jehova sa Israel nin Dios. Mababasa niato: “ ‘Kun manongod sa sako, iyo ini an sakuyang tipan sa sainda,’ sabi ni Jehova. ‘An sakuyang espiritu na yaon sa saimo asin an sakuyang mga tataramon na ibinugtak ko sa saimong ngoso​—iyan dai hahaleon sa saimong ngoso o sa ngoso kan saimong aki o sa ngoso kan aki kan saimong aki,’ sabi ni Jehova, ‘poon ngonyan sagkod sa panahon na daing talaan.’ ” (Isaias 59:21) Kun baga an mga tataramon na ini minaaplikar ki Isaias o dai, iyan naotob nanggad ki Jesus, na pinanugaan na ‘maheheling nia an saiyang aki.’ (Isaias 53:10) Sinabi ni Jesus an mga tataramon na nanodan nia ki Jehova, asin an espiritu ni Jehova napasaiya. (Juan 1:18; 7:16) Angay sana na an saiyang mga tugang asin kapwa paramana, na mga miembro kan Israel nin Dios, umako man kan banal na espiritu ni Jehova asin maghulit nin sarong mensahe na nanodan ninda sa saindang langitnon na Ama. Sinda gabos “mga tawong tinokdoan ni Jehova.” (Isaias 54:13; Lucas 12:12; Gibo 2:38) Paagi man ki Isaias o ki Jesus, na makahulang ilinaladawan ni Isaias, nakipagtipan ngonyan si Jehova na dai nia sinda noarin man riribayan kundi gagamiton sinda sagkod sa panahon na daing talaan bilang saiyang mga saksi. (Isaias 43:10) Pero siisay an mga “aki” ninda na nakikinabang man sa tipan na ini?

20. Paano naotob kan enot na siglo an panuga ni Jehova ki Abraham?

²⁰ Kan suanoy na mga panahon nanuga si Jehova ki Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:18) Kaoyon kaini, an sadit na natatada kan mga Israelita sa laman na nag-ako sa Mesiyas nagduman sa dakol na nasyon, na naghuhulit kan maogmang bareta manongod sa Cristo. Poon ki Cornelio dakol na bakong turi na Hentil an ‘nagbendisyon kan saindang sadiri’ paagi ki Jesus, an Banhi ni Abraham. Nagin kabtang sinda kan Israel nin Dios asin sekondaryong kabtang kan banhi ni Abraham. Sinda kabtang kan “banal na nasyon” ni Jehova, na isinugo na “ipahayag . . . nin mahiwas an mga kamurawayan kan saro na nag-apod sa [sainda] hale sa kadikloman pasiring sa saiyang makangangalas na liwanag.”​—1 Pedro 2:9; Galacia 3:7-9, 14, 26-29.

21. (a) An Israel nin Dios nagkaigwa nin anong mga “aki” sa presenteng mga panahon? (b) Paano nakaranga sa mga “aki” an tipan, o kontrata, na ginibo ni Jehova sa Israel nin Dios?

²¹ Ngonyan minalataw na natipon na an kompletong kabilangan kan Israel nin Dios. Pero, padagos na binebendisyonan an mga nasyon​—asin sa mahiwas na paagi. Paano? Sa bagay na an Israel nin Dios nagkaigwa nin mga “aki,” mga disipulo ni Jesus na an paglaom buhay na daing katapusan sa paraisong daga. (Salmo 37:​11, 29) An mga “aki” na ini tinokdoan man ni Jehova asin tinawan nin instruksion dapit sa saiyang mga dalan. (Isaias 2:2-4) Minsan ngani dai binautismohan nin banal na espiritu o ibinibilang na mga partisipante sa bagong tipan, sinda pinakosog kan banal na espiritu ni Jehova tanganing mapangganahan an gabos na kaolangan na ibinubugtak ni Satanas sa saindang paghuhulit. (Isaias 40:28-31) Minilyon na an kabilangan ninda ngonyan asin padagos na nagdadakol mantang nagkakaigwa sinda nin sadiring mga aki. An tipan, o kontrata, ni Jehova sa mga linahidan nagtatao nin kompiansa sa mga “aki” na ini na padagos man sindang gagamiton ni Jehova bilang saiyang isinugong mga parataram sagkod sa panahon na daing talaan.​—Kapahayagan 21:​3, 4, 7.

22. Puede kitang magkaigwa nin anong kompiansa ki Jehova, asin paano ini maninigong makaapektar sa sato?

²² Kun siring, papagdanayon logod niato gabos an satong pagtubod ki Jehova. Gusto nia saka kaya niang magligtas! An saiyang kamot dai noarin man magigin halipot; pirme niang ililigtas an saiyang fiel na banwaan. An gabos na nagtitiwala sa saiya padagos na magdadara kan saiyang marahay na mga tataramon sa saindang ngoso “poon ngonyan sagkod sa panahon na daing talaan.”

[Mga Hapot Para sa Pag-adal]