Magdanay na Marigon, Asin Manggana sa Paorumbasan Para sa Buhay

KUN kamo mabiahe sa sarong mabagyong dagat, anong klaseng sakayan an pipilion nindo? Gusto daw nindo nin maluyang klaseng baroto o nin sarong masarig, matibay an pagkagibong barko? Daing duda na pipilion nindo an barko, huling mas makakaya kaiyan an makokosog na alon.

Mantang kita nag-aagi sa mabagyo asin peligrosong sistemang ini nin mga bagay, napapaatubang kita sa nakapupurisaw na mga kadepisilan. Halimbawa, an mga hoben tibaad kun beses nariribaraw asin daing kasegurohan sa tahaw kan nakariribong na mga ideya asin uso sa kinaban na ini. An mga indibiduwal na bago pa sanang magpoon sa Kristianong pamumuhay tibaad medyo bako pang masarig. Maski an nagkapirang marigon na dakol nang taon na naglilingkod nin fiel sa Dios tibaad nakaeeksperyensia nin pagbalo huli ta an saindang mga linalaoman dai pa lubos na naootob.

An siring na mga saboot bakong bago. An fiel na mga lingkod ni Jehova, arog baga ki Moises, Job, asin David, may beses na napurisaw. (Bilang 11:​14, 15; Job 3:1-4; Salmo 55:4) Pero, an saindang pamumuhay midbid sa pagkaigwa nin marigon na debosyon ki Jehova. An saindang marahayon na halimbawa nag-eenkaminar sa sato na magin marigon man, alagad gusto ni Satanas na Diablo na isuki kita parayo sa paorumbasan para sa buhay na daing katapusan. (Lucas 22:31) Kaya paano kita makapagdadanay na “marigon sa pagtubod”? (1 Pedro 5:9) Asin paano niato mapakokosog an satong mga kapagtubod?

Boot ni Jehova na Kita Magin Marigon

Kun kita fiel ki Jehova, yaon sia pirme tanganing tabangan kitang mapagdanay an satong pagkamasarig. Si salmista David napaatubang sa dakol na masakit na situwasyon, alagad naglaom sia sa Dios asin kun siring nakaawit: “Hinawas man . . . ako [ni Jehova] sa nagraragubrob na kotkot, sa baldok kan katangyanan. Dangan pinatindog nia an sakong mga bitis sa ibabaw nin kantil; pinarigon nia an sakong mga lakad.”​—Salmo 40:2.

Pinakokosog kita ni Jehova na makipaglaban “kan marahay na pakilaban kan pagtubod” tanganing kita ‘makapangapot nin marigon sa buhay na daing katapusan.’ (1 Timoteo 6:12) Itinatao man nia an paagi tanganing kita magdanay na masarig asin manggana sa satong espirituwal na pakilaban. Sinadol ni apostol Pablo an mga kapwa Kristiano na ‘padagos na magkaigwa nin kosog sa Kagurangnan asin sa kapangyarihan kan saiyang kosog,’ asin ‘isulog an bilog na pangalasag hale sa Dios tanganing sinda marigon na makapanindogan tumang sa mga pakana kan Diablo.’ (Efeso 6:10-17) Alagad ano an puedeng makapurisaw sa sato? Asin paano niato malalabanan an siring na peligrosong mga impluwensia?

Magmaan sa mga Bagay na Nakapaluluya

Madonong na girumdomon an mahalagang marhay na katunayan na ini: An mga desisyon na ginigibo niato sa kahurihurihi nakaaapektar sa satong Kristianong pagkamasarig magsalang sa positibo o negatibong paagi. An mga hoben napapaatubang sa mga desisyon mapadapit sa mga bagay na arog kan karera, dugang na edukasyon, asin pag-agom. An mga nasa edad na tibaad kaipuhan na magdesisyon kun baga mabalyo sa ibang lugar o madagdag  nin trabaho. Naggigibo kita nin mga desisyon aroaldaw mapadapit sa paggamit nin panahon asin dakol na iba pang bagay. Ano an matabang sa sato na gumibo nin madonong na mga desisyon na makakokontribwir sa satong pagkamasarig bilang mga lingkod nin Dios? An sarong haloy nang Kristiana nagsabi: “Hinahagad ko an tabang ni Jehova kun nagdedesisyon. Naniniwala ako na mahalagang akoon asin iaplikar an hatol na itinatao sa Biblia, sa Kristianong mga pagtiripon, kan mga magurang, asin sa mga publikasyon na basado sa Biblia.”

Kun nagdedesisyon, marahay na ihapot ta sa satong sadiri: ‘Lima o sampulong taon poon ngonyan, maoogma daw ako sa mga desisyon na ginigibo ko ngonyan, o pagbabasolan ko daw iyan? Hinihingoa ko daw na seguradohon na an sakong mga desisyon dai makapaluluya sa sako sa espirituwal kundi makakokontribwir sa sakong pag-oswag sa espirituwal?’​—Filipos 3:16.

An pagpadaog sa mga sugot o pagtogot na haros mabalga na ninda an mga ley nin Dios nagin dahelan na an nagkapirang bautisadong indibiduwal magin bakong marigon an buhay. An nagkapirang hinale sa kongregasyon huli sa daing pagsolsol na pagpapadagos sa sarong makasalan na pamumuhay nagmaigot na marhay na makabalik, sanang natitiwalag giraray​—na kun beses dai pa sana nahahaloy​—huli sa kaparehong salang ginibo. Posible daw na dai sinda namibi para sa tabang nin Dios na ‘ikasurang nin makuri an maraot asin mangapot sa marahay’? (Roma 12:9; Salmo 97:10) Kita gabos kaipuhan na ‘padagos na gumibo nin tanos na mga dana para sa satong mga bitis.’ (Hebreo 12:13) Kun siring, estudyaran niato an nagkapirang punto na makatatabang sa sato na mapagdanay an espirituwal na pagkamasarig.

Padagos na Magin Marigon Paagi sa Kristianong Aktibidad

An sarong paagi tanganing mapagdanay an dagos-dagos na rikas sa satong pakipag-umbasan para sa buhay iyo an magkaigwa nin dakol na gigibohon sa paghuhulit kan Kahadean. Iyo, an satong Kristianong ministeryo sarong mahalagang pantabang sa pagpadanay kan satong puso asin isip na nakakonsentrar sa paggibo kan kabotan nin Dios asin marigon na nakaturuhok sa premyong buhay na daing katapusan. Mapadapit digdi, sinadol ni Pablo an mga taga Corinto: “Namomotan kong mga tugang, magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan.” (1 Corinto 15:58) An “marigon” nangangahulogan ‘nakapirme nin pusog.’ An “dai natatanyog” puedeng mangahulogan nin ‘dai pagtogot nin saro na sia mahubad sa pagkakaduong.’ Huli kaini, an pagigin sibot sa satong ministeryo puedeng magkaigwa nin nakapasasarig na epekto sa satong Kristianong pamumuhay. An pagtabang sa ibang tawo na mamidbid si Jehova nagtatao nin kahulogan sa satong buhay asin nin kaogmahan sa sato.​—Gibo 20:35.

Si Pauline, sarong Kristiana na labing 30 taon na sa pagmimisyonera asin sa iba pang bilog na panahon na aktibidad nin paghuhulit, nagsasabi: “An ministeryo sarong proteksion huli ta sa pagpatotoo sa iba nagigin segurado ako na talagang yaon sako an katotoohan.” Iyan man an kombiksion na ibinubunga nin regular na pakikikabtang sa iba pang Kristianong mga aktibidad, arog baga kan pag-atender sa mga pagtiripon para sa pagsamba asin mahigos na personal na pag-adal sa Biblia.

Napasasarig nin Mamomoton na Kasararoan nin Magturugang

An pagigin kabtang kan pambilog na kinaban na organisasyon nin tunay na mga parasamba puedeng magkaigwa nin mapuersa, nakapasasarig na epekto sa sato. Kanigoan na bendisyon an magin asosyado sa siring na mamomoton, pambilog na globong kasararoan nin magturugang! (1 Pedro 2:17) Asin puede kitang magkaigwa nin nakapasasarig na epekto sa satong mga kapagtubod.

Estudyare an nakatatabang na mga ginibo kan tanos na tawong si Job. Maski an falsong pararanga na si Elifaz napiritan na admitiron: “An siisay man na nasisingkog ibinabangon kan saimong mga tataramon; asin an mga tuhod na nanluluya pinapupusog mo.” (Job 4:4) Kumusta kita sa bagay na ini? Kita bilang mga indibiduwal igwa nin paninimbagan na tabangan an satong espirituwal na mga tugang na lalaki asin babae na makapadagos sa paglilingkod sa Dios. Sa satong pakikiiba sa sainda, puede kitang humiro segun sa prinsipyong yaon sa mga tataramon na: “Pakosoga nindo an maluyang mga kamot, asin papusoga nindo an nagkokobogkobog na mga tuhod.” (Isaias 35:3) Kaya taano ta dai nindo gibohon na pasohan na pakosogon asin parigonon an boot nin saro o duwang kapwa Kristiano kada makaolay nindo sinda? (Hebreo 10:​24, 25) An nakapakokosog sa boot na mga tataramon nin komendasyon asin pagpasalamat sa saindang padagos na mga paghihingoa na paogmahon si Jehova puede nanggad na makatabang sa sainda na magdanay na marigon  sa katuyohan na manggana sa paorumbasan para sa buhay.

Dakol an magigibo kan Kristianong kamagurangan paagi sa pagparigon sa boot kan mga bagohan. Tibaad posible ini paagi sa pagtao nin nakatatabang na mga suhestion asin marahay na sadol sa Kasuratan saka pag-iba sa sainda sa ministeryo sa langtad. Pirmeng inaprobetsaran ni apostol Pablo an mga oportunidad na pakosogon an iba. Naghimuyawot sia na maheling an mga Kristiano sa Roma tanganing makatabang sia na pasarigon sinda sa espirituwal. (Roma 1:11) An namomotan niang mga tugang na lalaki asin babae sa Filipos ibinilang nia na saiyang “kagayagayahan asin korona” asin sinadol nia sinda na ‘manindogan na marigon sa paaging ini sa Kagurangnan.’ (Filipos 4:1) Kan mabaretaan an mga kasakitan kan saiyang mga tugang sa Tesalonica, isinugo ni Pablo si Timoteo na ‘parigonon sinda asin rangahon sinda, tanganing mayo nin siisay man na madara kan mga kahorasaan.’​—1 Tesalonica 3:1-3.

Rinekonoser asin inapresyar ni apostol Pablo asin Pedro an fiel na mga paghihingoa kan saindang mga kapwa parasamba. (Colosas 2:5; 1 Tesalonica 3:​7, 8; 2 Pedro 1:12) Logod na kita magturuhok man, bakong sa mga kaluyahan kan satong mga tugang, kundi sa saindang marahayon na mga kualidad asin sa saindang mapangganang pakikilaban na magdanay na marigon asin tawan nin onra si Jehova.

Kun kita negatibo o mapagkritikar, tibaad dai niato tinutuyo na lalo niatong pinadedepisil para sa nagkapira na papagdanayon an pagigin pusog sa pagtubod. Angay nanggad na girumdomon na an satong mga tugang “naanitan asin nagkakaralagalag” sa sistemang ini nin mga bagay! (Mateo 9:36) Sa Kristianong kongregasyon, tama sanang asahan nindang makakua nin karangahan asin kaginhawahan. Kun siring, logod na gibohon niato gabos an satong pinakamakakaya na pakosogon an satong mga kapagtubod asin tabangan sinda na magdanay na marigon.

Tibaad kun minsan an pagtratar sa sato nin iba puedeng makapaluya sa satong karigonan. Totogotan ta daw na an sarong makolog na sinabi o maringis na ginibo magpaluya sa sato sa paglilingkod niato ki Jehova? Nungka logod niatong togotan an siisay man na irayo kita sa satong karigonan!—2 Pedro 3:17.

An mga Panuga nin Dios—Sarong Nakapasasarig na Impluwensia

An panuga ni Jehova na sarong makangangalas na ngapit sa irarom kan pamamahala kan Kahadean nagtatao sa sato nin paglaom na nakatatabang sa sato na mapagdanay an satong karigonan. (Hebreo 6:19) Asin an pananarig na pirmeng inootob nin Dios an saiyang mga panuga nagmomotibar sa sato na ‘magpuka asin manindogan na marigon sa pagtubod.’ (1 Corinto 16:13; Hebreo 3:6) An garo baga pagkahaloy kan pagkaotob kan nagkapira sa mga panuga nin Dios puedeng makabalo sa satong pagtubod. Kun siring, kaipuhan nanggad na kita magmaan na dai madaya nin falsong katokdoan asin maparayo sa satong paglaom.​—Colosas 1:23; Hebreo 13:9.

An maraot na halimbawa kan mga Israelita na nagkagaradan huli ta mayo sinda nin pagtubod sa mga panuga ni Jehova maninigo na magserbing patanid sa sato. (Salmo 78:37) Imbes na magin arog ninda, logod na kita magin marigon, na naglilingkod sa Dios na may pakamate nin pagkaapurado sa huring mga aldaw na ini. “Namumuhay ako kada aldaw na garo baga an dakulang aldaw ni Jehova maabot nuodma,” sabi nin sarong may kabatidan na magurang sa kongregasyon.​—Joel 1:15.

Iyo, an dakulang aldaw ni Jehova madali na. Minsan siring, mayo kitang dapat ikatakot basta kita dayupot sa Dios. Kun kita pusog na nagsususog sa saiyang matanos na mga pamantayan asin nagdadanay na marigon, mapanggana kitang makadadalagan sa paorumbasan para sa buhay na daing sagkod!​—Talinhaga 11:19; 1 Timoteo 6:​12, 17-19.

[Ritrato sa pahina 23]

Ginigibo daw nindo an gabos nindong makakaya na tabangan an mga kapwa Kristiano na magdanay na marigon?

[Picture Credit Line sa pahina 21]

The Complete Encyclopedia of Illustration/J. G. Heck