Mga Hapot Hale sa mga Parabasa

Taano ta sinabi kan An Torrengbantayan na Abril 1, 2002, sa pahina 11, parapo 7, na an bautismo sa tubig kan bagong nagturubod na Judio kan Pentecostes 33 C.E. simbolo kan “saindang personal na pagdusay sa Dios paagi ki Cristo,” mantang an dating pagtubod iyo na an bautismo kan mga Judio poon kan 33 C.E. sagkod 36 C.E. dai nangaipo nin siring na personal na pagdusay?

Kan 1513 B.C.E., tinawan ni Jehova Dios nin oportunidad an mga Israelita na magin sarong banal na nasyon para sa saiya sa kondisyon na ‘maingat nanggad nindang kukuyogon an saiyang tingog asin ootobon an saiyang tipan.’ Nagsimbag sinda: “Andam kaming gibohon an gabos na itinaram ni Jehova.”​—Exodo 19:3-8; 24:1-8.

Paagi sa pag-oyon na otobon an tipan nin Ley ni Moises, idinusay kan mga Israelita an saindang sadiri sa Dios. An suminunod na kapag-arakian nin mga Judio namundag sa nagdusay na nasyon na ini. Minsan siring, an kalabot sa bautismo kan mga Judio na nagin mga parasunod ni Jesu-Cristo poon kan Pentecostes 33 C.E. bako sanang pagpresentar kan saindang sadiri sa Dios bilang mga miembro nin sarong nagdusay na nasyon. Nagsimbolisar iyan kan saindang pagdusay ki Jehova Dios sa sarong bagong relasyon sa saiya paagi ki Jesu-Cristo. Taano man?

Kasunod kan pagbubo nin banal na espiritu sa mga 120 disipulo na nagkatiripon sa sarong kuarto sa itaas sa Jerusalem kan Pentecostes 33 C.E., tuminindog si apostol Pedro asin nagpoon na maghulit sa kaburunyogan nin mga Judio asin proselita na nagtiripon tanganing maheling kun ano an nangyari. Pakatapos magtao nin lubos na patotoo, sinabi nia sa nakokonsensiang mga Judio: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan.” Bilang reaksion sa dugang pang pagsadol ni Pedro, “idtong mga maogmang nag-ako kan saiyang tataramon binautismohan, asin sa aldaw na idto mga tolong ribong kalag an nakadugang.”​—Gibo 2:1-41.

Bako daw na miembro na nin sarong nagdusay na nasyon an mga Judiong idto na nabautismohan pakatapos kan pagsadol ni Pedro? Mayo daw sinda nin dusay na relasyon sa Dios? Dai. Nagsurat si apostol Pablo na “an Ley hinale nin Dios paagi sa pagpako kaiyan sa hariging pasakitan.” (Colosas 2:14) Paagi sa kagadanan ni Cristo kan 33 C.E., hinale ni Jehova Dios an tipan nin Ley​—an pinakabasehan kan pagkaigwa kan mga Israelita nin dusay na relasyon sa Saiya. An nasyon  na naghabo sa Aki nin Dios hinaboan na ngonyan nin Dios mismo. “Idtong Israel segun sa laman” dai na puedeng maghingako na sinda nasyon na nagdusay sa Dios.​—1 Corinto 10:18; Mateo 21:43.

An tipan nin Ley inabolisar kan 33 C.E., alagad an peryodo nin espesyal na pabor asin atension nin Dios sa mga Judio dai natapos kan panahon na idto. * An peryodong iyan nagpadagos sagkod 36 C.E., kan hulitan ni Pedro an debotong Italiano na si Cornelio asin an saiyang kasararo sa harong saka an iba pang Hentil. (Gibo 10:1-48) Ano an basehan kan pagpalawig na ini kan pagtao nin pabor?

“Dapat na papagdanayon [kan Mesiyas na] may puersa an tipan para sa dakol sa laog nin sarong semana,” an sabi kan Daniel 9:27. An tipan na pinagdanay na may puersa sa laog nin pitong taon, o “sarong semana,” poon kan bautismohan si Jesus asin kan kapinonan kan pampublikong ministeryo kan Mesiyas kan 29 C.E. iyo an Abrahamikong tipan. Tanganing magkaigwa nin kabtang sa pakipagtipan na iyan, an saro kaipuhan sanang magin saro sa Hebreong mga gikan ni Abraham. An tipan na iyan na ginibo kan saro sanang lado dai nagpangyari sa indibiduwal na magkaigwa nin nagdusay na relasyon ki Jehova. Huli kaini, an nagturubod na Judio na nagpabautismo pakatapos kan pahayag ni Pedro kan Pentecostes 33 C.E., minsan ngani nag-ako kan espesyal na atension bilang natural na mga Judio, dai makahihingako na sinda igwa nin nagdusay na relasyon sa Dios kan oras na hinale na an tipan nin Ley. Kaipuhan ninda na personal na idusay an saindang sadiri sa Dios.

An personal na pagdusay kan mga Judio asin proselita na mapabautismo kan aldaw na idto nin Pentecostes 33 C.E. kaipuhan huli sa saro pang dahelan. Sinadol ni apostol Pedro an mga naghihinanyog sa saiya na magsolsol asin magpabautismo sa ngaran ni Jesus. Sa paggibo kaiyan kaipuhan nindang talikdan an dalan kan kinaban asin rekonoseron si Jesus bilang Kagurangnan asin Mesiyas, bilang Halangkaw na Saserdote, asin bilang an saro na nakatukaw sa too nin Dios sa langit. Kaipuhan sindang mag-apod sa ngaran ni Jehova Dios para sa kaligtasan paagi ki Cristo Jesus, na kalabot an pagtubod ki Cristo asin pagrekonoser sa saiya bilang saindang Poon. Nabago na ngonyan an bilog na basehan sa pagkaigwa nin relasyon sa Dios asin sa pagkamit nin kapatawadan nin mga kasalan. Bilang mga indibiduwal, kaipuhan na akoon kan mga nagtutubod na Judio an bagong areglong ini. Paano? Paagi sa pagdusay sa Dios asin paagi sa pagpahayag sa publiko na ginibo na ninda ini paagi sa pagpabautismo sa tubig sa ngaran ni Jesu-Cristo. An bautismo sa tubig sarong simbolo kan saindang pagdusay sa Dios, na nagdadara sa sainda sa sarong bagong relasyon sa saiya paagi ki Jesu-Cristo.​—Gibo 2:​21, 33-36; 3:19-23.

[Nota sa Ibaba]