Nagtataram si Cristo sa mga Kongregasyon

“Ini an mga bagay na isinabi kaidtong nagkakapot kan pitong bitoon sa saiyang toong kamot.”—KAPAHAYAGAN 2:1.

1, 2. Taano ta maninigo kitang magin interesado sa sinabi ni Cristo sa pitong kongregasyon sa Asia Minor?

AN BUGTONG na Aki ni Jehova, si Jesu-Cristo, iyo an Payo kan Kristianong kongregasyon. Tanganing papagdanayon na daing kanawayan an kongregasyon kan saiyang linahidan na mga parasunod, ginagamit ni Cristo an saiyang pagkapayo paagi sa pagtao sa sainda nin komendasyon asin pagtatanos. (Efeso 5:21-27) Igwa nin mga halimbawa kaini sa Kapahayagan kapitulo 2 asin 3, kun saen maheheling niato an mapuersa asin mamomoton na mga mensahe ni Jesus na ipinaabot sa pitong kongregasyon sa Asia Minor.

² Bago nia nadangog an mga tataramon ni Jesus sa pitong kongregasyon, si apostol Juan tinawan nin sarong bisyon kan “aldaw kan Kagurangnan.” (Kapahayagan 1:10) An “aldaw” na iyan nagpoon kan an Mesiyanikong Kahadean maestablisar kan 1914. Kun siring, an sinabi ni Cristo sa mga kongregasyon mahalagang marhay sa huring mga aldaw na ini. An saiyang pagparigon sa boot asin hatol nakatatabang sa sato na makayang atubangon an delikadong mga panahon na ini.—2 Timoteo 3:1-5.

3. Ano an piguratibong mga kahulogan kan mga “bitoon,” “anghel,” asin “kandelerong bulawan” na naheling ni apostol Juan?

³ Naheling ni Juan an pinamuraway na si Jesu-Cristo, na “nagkakapot kan pitong bitoon sa saiyang toong kamot” asin “naglalakaw sa tahaw kan pitong kandelerong bulawan,” o kongregasyon. An mga “bitoon” iyo an “mga anghel kan pitong kongregasyon.” (Kapahayagan 1:20; 2:1) An mga bitoon kun minsan nagsisimbolisar sa espiritung mga linalang na anghel, alagad si Cristo dai magamit nin tawo tanganing magsurat nin mga mensahe para sa espiritung mga linalang. Huli kaini, an mga “bitoon” na ini rasonable sanang nangangahulogan nin mga paraataman, o mga grupo nin kamagurangan, na linahidan nin espiritu. An terminong “anghel” igwa nin koneksion sa saindang papel bilang mga mensahero. Huling nag-oswag an organisasyon nin Dios, “an fiel na mayordomo” nagnombra man nin kualipikadong mga lalaki na kabilang sa “ibang karnero” ni Jesus bilang mga paraataman.—Lucas 12:42-44; Juan 10:16.

4. Paano nakikinabang an kamagurangan sa pagtao nin atension sa sinasabi ni Cristo sa mga kongregasyon?

⁴ An mga “bitoon” yaon sa toong kamot ni Jesus—sakop kan saiyang kapangyarihan, kontrol, pabor, asin proteksion. Kun siring, sinda maninimbag sa saiya. Paagi sa paghimate sa saiyang mga tataramon sa kada saro kan pitong kongregasyon, nasasabotan kan kamagurangan sa presenteng panahon kun paano ninda aasikasohon an kaparehong mga situwasyon. Siempre, an gabos na Kristiano kaipuhan na maghinanyog sa Aki nin Dios.  (Marcos 9:7) Kaya, ano an manonodan niato paagi sa pagtao nin atension mantang nagtataram si Cristo sa mga kongregasyon?

Sa Anghel sa Efeso

5. Anong klaseng siudad an Efeso?

⁵ Tinawan nin komendasyon asin sinagwe ni Jesus an kongregasyon sa Efeso. (Basahon an Kapahayagan 2:1-7.) An dakulaon na templo kan diosang si Artemis yaon sa mayaman na sentrong ini nin komersio asin relihion sa solnopan na baybayon nin Asia Minor. Minsan ngani an Efeso pano nin inmoralidad, falsong relihion, asin pagmahika, binendisyonan nin Dios an ministeryo ni apostol Pablo asin kan iba pa sa siudad na iyan.—Gibo, kapitulo 19.

6. Paanong an maimbod na mga Kristiano ngonyan kapareho kan mga taga suanoy na Efeso?

⁶ Tinawan ni Cristo nin komendasyon an kongregasyon sa Efeso, na sinasabi: “Aram ko an saimong mga gibo, asin an saimong pagpapagal patin pakatagal, asin na dai mo natitios an maraot na mga tawo, asin na binabalo mo an mga nagsasabing sinda mga apostol, alagad bako man, patin nakua mo sindang mga putikon.” Ngonyan, an mga kongregasyon kan tunay na mga parasunod ni Jesus igwa nin kaparehong rekord nin marahay na mga gibo, kahigosan, asin pakatagal. Dai ninda natitios an falsong mga tugang na gustong ibilang na mga “apostol.” (2 Corinto 11:​13, 26) Arog kan mga taga Efeso, an maimbod na mga Kristiano ngonyan ‘dai natitios an maraot na mga tawo.’ Kun siring, tanganing papagdanayon an kadalisayan kan pagsamba ki Jehova asin tanganing protehiran an kongregasyon, dai sinda nakikiasosyar sa habong magsolsol na mga apostata.​—Galacia 2:4, 5; 2 Juan 8-11.

7, 8. Anong seryosong problema an yaon sa kongregasyon sa Efeso, asin paano daw niato aatubangon an kaparehong situwasyon?

⁷ Pero, an mga Kristiano sa Efeso igwa nin seryosong problema. “Ibinibilang ko ining tumang sa saimo,” sabi ni Jesus, “na binayaan mo an saimong pagkamoot kan enot.” Kaipuhan kan mga miembro kan kongregasyon na palaadon liwat an saindang enot na pagkamoot ki Jehova. (Marcos 12:28-30; Efeso 2:4; 5:1, 2) Kita mismo dapat na magmaan na dai mawara an enot na pagkamoot niato sa Dios. (3 Juan 3) Alagad paano kun an mga bagay na arog kan pagmawot sa materyal na mga kayamanan o paghanap nin kasingawan nagigin pangenot na sa satong buhay? (1 Timoteo 4:8; 6:9, 10) Kun siring, maninigo kitang odok na mamibi na logod tabangan kita nin Dios na salidahan an siring na mga inklinasyon nin hararom an pagkagamot na pagkamoot ki Jehova asin nin pagpasalamat sa gabos na ginibo nia asin kan saiyang Aki para sa sato.—1 Juan 4:10, 16.

⁸ Sinadol ni Cristo an mga taga Efeso: “Girumdoma kun saen ka naholog, asin magsolsol ka asin giboha an enot na mga gibo.” Paano kun dai ninda ini gibohon? “Kun dai,” sabi ni Jesus, “ako madian sa saimo, asin hahaleon ko an saimong kandelero sa namumugtakan kaiyan.” Kun mawawara kan gabos na karnero an saindang enot na pagkamoot, an “kandelero,” o kongregasyon, mawawara na. Kun siring, bilang maigot na mga Kristiano, logod na magmaigot kita na papagdanayon an kongregasyon na nagliliwanag sa espirituwal.—Mateo 5:14-16.

9. Paano maninigong mansayon an sektaryanismo?

⁹ Sa kaomawan ninda, ikinaongis kan mga taga Efeso an “mga gibo kan sekta ni Nicolas.” Apuera kan sinabi sa Kapahayagan, mayo nin eksaktong aram manongod sa ginikanan, mga katokdoan, asin gibo kan sektang ini. Minsan siring, mantang kinondenar ni Jesus an pagsunod sa mga tawo, kaipuhan na padagos niatong ikaongis an sektaryanismo, arog kan ginibo kan mga Kristiano sa Efeso.​—Mateo 23:10.

10. Ano an maeeksperyensiahan kan mga naghihimate sa sinasabi kan espiritu?

¹⁰ “An igwa nin talinga magdangog sa sinasabi kan espiritu sa mga kongregasyon,” an sabi ni Cristo. Kan nasa daga, si Jesus nagtaram na ginigiyahan kan espiritu nin Dios. (Isaias 61:1; Lucas 4:16-21) Kaya maninigo kitang magtao nin atension sa sinasabi ngonyan nin Dios paagi sa saiya na ginagamit an banal na espiritu. Sa paggiya kan espiritu, si Jesus nanuga: “Sa makadaog itotogot ko na kumakan sa kahoy nin buhay, na yaon sa paraiso nin Dios.” Para sa mga linahidan, na naghihimate sa sinasabi kan espiritu, nangangahulogan ini nin inmortalidad sa langitnon na “paraiso nin Dios,” o mismong presensia ni Jehova. An “dakulang kadaklan,” na naghihinanyog man sa sinasabi kan espiritu, magkakamit nin daganon na paraiso kun saen mainom sinda sa “salog kan tubig nin buhay” asin makakukua nin kaomayan sa “mga dahon kan mga kahoy”  na yaon sa gilid kaiyan.​—Kapahayagan 7:9; 22:1, 2; Lucas 23:43.

11. Paano daw niato mapalalakop an pagkamoot ki Jehova?

¹¹ Nawara kan mga taga Efeso an enot na pagkamoot ninda, alagad paano kun nangyayari an kaparehong situwasyon sa sarong kongregasyon ngonyan? Bilang mga indibiduwal palakopon niato an pagkamoot ki Jehova paagi sa pagtaram manongod sa saiyang mamomoton na mga paagi nin paghiro. Puede niatong ipahayag an satong pagpasalamat sa pagkamoot na ipinaheling nin Dios sa pagtao kan pantubos paagi sa saiyang mahal na Aki. (Juan 3:16; Roma 5:8) Kun angay, puede niatong sambiton an pagkamoot nin Dios sa mga komento asin sa mga kabtang sa programa sa mga pagtiripon. Puede niatong ipaheling an sato mismong pagkamoot ki Jehova paagi sa pag-omaw sa saiyang ngaran sa Kristianong ministeryo. (Salmo 145:10-13) Iyo, dakol an magigibo kan satong mga tataramon asin hiro-hiro tanganing palaadon liwat o pakosogon an enot na pagkamoot nin sarong kongregasyon.

Sa Anghel sa Smirna

12. Ano an ihinahayag kan kasaysayan mapadapit sa Smirna asin sa relihiosong mga kaugalean duman?

¹² An kongregasyon sa Smirna tinawan nin komendasyon ni Cristo, “‘an Enot asin an Huri,’ na nagadan asin nabuhay liwat.” (Basahon an Kapahayagan 2:8-11.) An Smirna (ngonyan Izmir, Turkiya) itinogdok sa solnopan na baybayon kan Asia Minor. Mga Griego an nag-erok sa siudad, alagad linaglag iyan kan mga taga Lidia kaidtong mga 580 B.C.E. An mga kasalihid ni Alejandrong Dakula itinogdok liwat an Smirna sa sarong bagong lugar. Iyan nagin kabtang kan Romanong probinsia nin Asia asin nagin maoswag na sentro nin komersio na bantog sa magagayon na edipisyong pampubliko. Huli sa templo duman ni Tiberio Cesar iyan nagin sentro nin pagsamba sa emperador. An mga nagsasamba kaipuhan na magtotong nin gasibnit na insenso asin magsabing “Si Cesar Kagurangnan.” Dai puedeng sumunod an mga Kristiano huli ta para sa sainda “si Jesus Kagurangnan.” Huli kaini, nag-agi sinda nin kahorasaan.—Roma 10:9.

13. Minsan ngani dukha sa materyal, sa anong sentido mayaman an mga Kristiano sa Smirna?

¹³ Apuera sa kahorasaan, an mga Kristiano sa Smirna nag-agi nin kadukhaan, na posibleng nagtios nin pinansial na mga restriksion huli ta habo nindang makikabtang sa pagsamba sa emperador. An mga lingkod ni Jehova sa presenteng panahon bakong libre sa kaagid na mga pagbalo. (Kapahayagan 13:16, 17) Minsan ngani dukha sa materyal, an mga arog kan mga Kristiano sa Smirna mayaman sa espirituwal, asin iyan talaga an mahalaga!—Talinhaga 10:22; 3 Juan 2.

14, 15. Anong karangahan an makukua kan mga linahidan sa Kapahayagan 2:10?

¹⁴ An kadaklan na Judio sa Smirna “sinagoga ni Satanas” huli ta saindang pinangaptan an mga tradisyon na bakong sono sa Kasuratan, isinikwal an Aki nin Dios, asin linanghadan an saiyang mga parasunod na pinaniaki nin espiritu. (Roma 2:​28, 29) Alagad kanigoan na karangahan an makukua kan mga linahidan sa sunod na mga tataramon ni Cristo! Sinabi nia: “Dai ka matakot sa mga bagay na saimong titioson. Uya! Ibibilanggo kan Diablo an nagkapira sa saindo tanganing kamo lubos na mabalo, asin tanganing magkaigwa kamo nin kahorasaan sa laog nin sampulong aldaw. Patunayan mo na ika fiel sagkod sa kagadanan, asin ta itatao ko sa saimo an korona nin buhay.”—Kapahayagan 2:10.

¹⁵ Dai natakot si Jesus na magadan huli sa pagsuportar sa soberaniya ni Jehova. (Filipos 2:5-8) Minsan ngani nakikilaban ngonyan si Satanas sa linahidan  na natatada, dai sinda natatakot sa mga bagay na kaipuhan nindang tioson bilang grupo​—kahorasaan, pagkabilanggo, o madahas na kagadanan. (Kapahayagan 12:17) Sinda magigin mga nakadaog sa kinaban. Asin imbes na naluluyos na koronang burak na isinusulot kan mga nanggana sa paganong karawat, ipinanunuga ni Cristo sa binuhay liwat na mga linahidan “an korona nin buhay” bilang inmortal na mga linalang sa langit. Abaa kadaing kaagid sa halagang balaog!

16. Kun kita asosyado sa sarong kongregasyon na arog kan sa suanoy na Smirna, sa anong isyu maninigong nakakonsentrar an satong atension?

¹⁶ Kumusta kun kita, baga man langitnon o daganon an satong paglaom, asosyado sa sarong kongregasyon na arog kan sa suanoy na Smirna? Kun siring, tabangan niato an mga kapagtubod na magkonsentrar sa pangenot na dahelan kun taano ta tinotogotan nin Dios an paglamag—an isyu nin unibersal na soberaniya. Pinatutunayan nin lambang Saksi ni Jehova na nagdadanay na may integridad na si Satanas putikon asin ipinaheheling nia na maski an pinaglalamag na tawo puedeng magin marigon na parasuportar sa deretso nin Dios na mamahala bilang Unibersal na Soberano. (Talinhaga 27:11) Parigonon niato an boot kan ibang mga Kristiano na tagalan an paglamag asin, bilang resulta, magkaigwa kan nagpapadagos na “pribilehio na daing takot na magtao nin sagradong paglilingkod [ki Jehova] na may kaimbodan asin katanosan sa atubangan nia sa satong bilog na pagkabuhay”—sagkod lamang pa ngani.​—Lucas 1:​68, 69, 74, 75.

Sa Anghel sa Pergamo

17, 18. An Pergamo sentro nin anong klaseng pagsamba, asin ano an puedeng ibunga kan pagsayumang makikabtang sa siring na idolatriya?

¹⁷ Komendasyon sagkod pagtatanos an itinao sa kongregasyon sa Pergamo. (Basahon an Kapahayagan 2:12-17.) Mga 80 kilometros sa amihanan nin Smirna, an Pergamo sarong siudad na sagom sa paganong relihion. An Caldeong mga mago (astrologo) garo baga duman nagdurulag hale sa Babilonya. An mga may helang nagduduruman sa bantog na templo sa Pergamo, an templo ni Asclepio, an falsong dios nin pagpaomay asin bolong. An Pergamo, na may templo na idinusay sa pagsamba ki Augusto Cesar, inapod na “an pangenot na sentro kan kulto kan emperador sa irarom kan enot na imperyo.”​—Encyclopædia Britannica, 1959, Tomo 17, pahina 507.

¹⁸ Sa Pergamo igwa nin altar na idinusay ki Zeus. An siudad sentro man nin ipinasabong nin Diablo na pagsamba sa mga tawo. Bakong makangangalas na an kongregasyon duman sinasabing nag-eerok “kun saen an trono ni Satanas”! An pagsayumang sumamba sa emperador puedeng magbunga nin kagadanan para sa sarong parasuportar sa soberaniya ni Jehova. An kinaban sagkod ngonyan namumugtak sa kapangyarihan kan Diablo, asin an mga simbolo nin mga nasyon iniidolo ngonyan. (1 Juan 5:19) Poon kan enot na siglo sagkod sa presenteng aldaw, dakol na fiel na Kristiano an ginadan bilang martir, arog kan saro na inapod ni Cristo na “Antipas, an sakuyang saksi, an sarong fiel, na ginadan sa kataed nindo.” Ginigirumdom nanggad ni Jehova Dios asin ni Jesu-Cristo an siring na maimbod na mga lingkod.—1 Juan 5:21.

19. Ano an ginibo ni Balaam, asin tumang sa ano dapat na magmaan an gabos na Kristiano?

¹⁹ Naunabihan man ni Cristo an “katokdoan ni Balaam.” Mahanab sa materyal na pakinabang, an falsong propetang si Balaam naghingoang sumpaon an Israel. Kan an saiyang sumpa gibohon nin Dios na magin bendisyon, nakipagkasapakat si  Balaam ki Hadeng Balac nin Moab asin inakit an dakol na Israelita sa idolatriya asin seksuwal na inmoralidad. An Kristianong kamagurangan kaipuhan na magin marigon para sa katanosan arog ni Fineas, na naghiro tumang sa mga paagi ni Balaam. (Bilang 22:1–25:15; 2 Pedro 2:15, 16; Judas 11) An totoo, an gabos na Kristiano dapat na magmaan tumang sa idolatriya asin sa pakalaog nin seksuwal na inmoralidad sa kongregasyon.​—Judas 3, 4.

20. Kun an siisay man na Kristiano nagpopoon na magkaigwa nin apostatang mga punto de vista, ano an maninigo niang gibohon?

²⁰ An kongregasyon sa Pergamo namugtak sa dakulang peligro huli ta tinogotan kaiyan an “mga nangangapot nin higot sa katokdoan kan sekta ni Nicolas” na mapasa tahaw kaiyan. Sinabihan ni Cristo an kongregasyon: “Magsolsol ka. Kun dai, ako madatong sa saimo sa madali, asin ako makikilaban sa sainda paagi sa halabang espada kan sakong ngoso.” An mga sektaryano gustong danyaran sa espirituwal an mga Kristiano, asin an mga desididong magpalakop nin pagkabaranga asin mga sekta dai magmamana kan Kahadean nin Dios. (Roma 16:17, 18; 1 Corinto 1:10; Galacia 5:19-21) Kun an siisay man na Kristiano nagpopoon na magkaigwa nin apostatang mga punto de vista asin gustong palakopon iyan, dapat niang himateon an patanid ni Cristo! Tanganing iligtas an saiyang sadiri sa kapahamakan, maninigo siang magsolsol asin hagadon an espirituwal na tabang kan kamagurangan sa kongregasyon. (Santiago 5:13-18) Mahalagang marhay an listong paghiro, huli ta si Jesus madatong nin madali tanganing maghokom.

21, 22. Siisay an makakan kan “natatagong mana,” asin sa ano iyan nagsisimbolisar?

²¹ An fiel na linahidan na mga Kristiano asin an saindang maimbod na kairiba dai kaipuhan na matakot sa maabot na paghokom. Mga bendisyon an naghahalat sa gabos na naghihimate sa hatol ni Jesus na itinatao paagi sa paggiya kan banal na espiritu nin Dios. Halimbawa, an mga linahidan na nakadaog sa kinaban iimbitaran na kumakan kan “natatagong mana” asin tatawan nin “maputing gapo” na igwa nin “sarong bagong ngaran.”

²² An Dios nagtao nin mana tanganing susteniran an mga Israelita durante kan saindang 40 taon na pagbaklay sa kaawagan. An nagkapira sa “tinapay” na iyan sinasaray sa sarong dulay na bulawan sa laog kan kaban kan tipan asin sa siring natatago sa Kabanalbanale kan tabernakulo, kun saen an sarong milagrosong liwanag nagsisimbolisar sa presensia ni Jehova. (Exodo 16:14, 15, 23, 26, 33; 26:34; Hebreo 9:3, 4) Mayo nin tinotogotan na kumakan kan natatagong mana na iyan. Pero pagbinuhay na sinda liwat, an linahidan na mga parasunod ni Jesus masolog nin inmortalidad, na isinisimbolisar kan pagkakan kan “natatagong mana.”—1 Corinto 15:53-57.

23. Ano an kahulogan kan “maputing gapo” asin kan “bagong ngaran”?

²³ Sa mga korte nin Roma an itom na gapo nangahulogan nin pagkakondenar, mantang an maputing gapo nangahulogan nin pagkaabsuelto. An pagtao ni Jesus nin “maputing gapo” sa nakadaog na linahidan na mga Kristiano nagpaparisa na ibinibilang nia sindang daing sala, dalisay, asin malinig. Mantang an mga Romano naggamit man nin mga gapo tanganing makalaog sa importanteng mga okasyon, an “maputing gapo” puede man na mangahulogan kan pag-ako sa linahidan sa sarong lugar sa langit sa kasal kan Kordero. (Kapahayagan 19:7-9) An “bagong ngaran” minalataw na nangangahulogan kan pribilehio na magin kasaro ni Jesus bilang kairibang paramana sa langitnon na Kahadean. An gabos na ini nakaparirigon nanggad sa boot kan mga linahidan saka kan saindang kairiba sa paglilingkod ki Jehova, na may paglaom na mabuhay sa sarong paraisong daga!

24. Ano an maninigo na magin paninindogan niato may labot sa apostasiya?

²⁴ Madonong na girumdomon na an kongregasyon sa Pergamo nameligro dahel sa mga apostata. Kun an kaparehong situwasyon nagsasapeligro kan  espirituwal na kapakanan kan kongregasyon na naaasosyaran niato, biyo niatong isikwal an apostasiya asin padagos kitang maglakaw sa katotoohan. (Juan 8:32, 44; 3 Juan 4) Huling an falsong mga paratokdo o indibiduwal na may inklinasyon sa apostasiya puedeng makaraot sa sarong bilog na kongregasyon, dapat niatong papagdanayon an marigon na paninindogan tumang sa apostasiya, na nungkang tinotogotan an maraot na pangongombensir na olangon kita sa pagsunod sa katotoohan.​—Galacia 5:7-12; 2 Juan 8-11.

25. An mga mensahe ni Cristo sa anong mga kongregasyon an totokaron sa sunod na artikulo?

²⁵ Nakapupukaw nanggad nin isip na mga tataramon nin komendasyon asin hatol na sinabi kan pinamuraway na si Jesu-Cristo sa tolo kan pitong kongregasyon sa Asia Minor an pinag-olayan niato! Minsan siring, segun sa paggiya kan banal na espiritu, dakol man an sinabi nia sa apat pang natatadang kongregasyon. An mga mensaheng ini, na ipinaabot sa Tiatira, Sardis, Filadelfia, asin Laodicea, totokaron sa sunod na artikulo.

Ano an Isisimbag Nindo?

• Taano ta maninigo kitang magtao nin atension sa sinabi ni Cristo sa mga kongregasyon?

• Paano daw kita makatatabang na mapalaad liwat an enot na pagkamoot nin sarong kongregasyon?

• Taano ta masasabi na an totoo mayaman an dukha sa materyal na mga Kristiano sa suanoy na Smirna?

• Sa paghorophorop kan situwasyon sa kongregasyon sa Pergamo, paano niato maninigong mansayon an apostatang kaisipan?

[Mga Hapot Para sa Pag-adal]

[Mapa sa pahina 10]

(Para sa aktuwal na format, hilingon an publikasyon)

GRECIA

ASIA MINOR

Efeso

Smirna

Pergamo

Tiatira

Sardis

Filadelfia

Laodicea

[Ritrato sa pahina 12]

An “dakulang kadaklan” magkakamit nin daganon na paraiso

[Mga Ritrato sa pahina 13]

An pinaglamag na mga Kristiano nakadaog sa kinaban