Pilion an Buhay na Daing Sagkod

AN MGA tawo nungkang nagkaigwa nin kadakol na gayong pagpipilian. Halimbawa, an gubing na isusulot niato, an kakakanon niato, asin kun saen kita matrabaho asin maistar parateng minadepende sa kun ano an gusto niato. Sa dakol na parte kan kinaban, uso man na an saro an nagpipili kan aagomon nia. Minsan siring, an Biblia nagtatao nin pagpipilian na nakalalabi sa gabos na iba pang pagpipilian​—saro na bukas para sa gabos na tawo.

An Biblia nagsasabi: “An saro na marigon na naninindogan para sa katanosan nalilinya para sa buhay, alagad an saro na naglalapag sa maraot nalilinya para sa saiyang sadiring kagadanan.” (Talinhaga 11:19) Asin si Jesu-Cristo nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.

Iyo, ipinaabot sa sato kan Kaglalang niato an oportunidad na pumili nin dalan na puedeng gumiya sa buhay na daing katapusan! Ano an dapat na gibohon niato tanganing magkamit nin buhay na daing sagkod?

Oyon sa Biblia, “sa dalan nin katanosan yaon an buhay.” (Talinhaga 12:28) Puede kitang mapabilang sa mga matanos na yaon sa dalan pasiring sa buhay na daing katapusan. Paano? Paagi sa pagsegurado na an satong buhay kaoyon kan kabotan nin Dios asin mga pagboot nia. (Mateo 7:​13, 14) Kun siring, logod na tama an pilion niato asin akoon an balaog nin Dios na buhay na daing katapusan.​—Roma 6:23.