Sarong Kawiliwiling Rekord nin Pagbiahe

NAGGIBO nin limang ekspedisyon sa Antartika an eksplorador na si Richard E. Byrd poon 1928 sagkod 1956. Paagi sa pagkaigwa nin dayari asin daing kasalasalang rekord nin pagbiahe, nahimo nia asin kan saiyang grupo na aramon an direksion nin doros, gumibo nin mga mapa, asin makakua nin awad-awad na impormasyon manongod sa kontinente kan Antartika.

Malinaw na ipinaheheling kan mga ekspedisyon ni Byrd an kahalagahan kan pagkaigwa nin rekord nin pagbiahe. Sa sarong rekord nin pagbiahe, kinokompilar an mga detalye kan sarong pagbiahe sa barko o eroplano. An impormasyon na ini puedeng gamiton sa huri sa pagsiyasat sa nangyari o sa pag-analisar sa impormasyon na puedeng magin kapakipakinabang sa mga pagbiahe sa ngapit.

An Kasuratan nagtatao nin kawiliwiling pagkasaysay kan Delubyo kan mga kaaldawan ni Noe. An lakop sa globong Baha na iyan naglawig nin labing sangtaon. Bilang pag-andam sa Delubyo, si Noe, an saiyang agom, asin an tolo nindang aking lalaki patin an mga agom kaini 50 o 60 taon na nagtogdok nin dahong—sarong dakulaon na sakayan na may kapasidad na haros 40,000 metro kubiko. Para sa ano iyan? Tanganing maingatan an mga tawo asin hayop sa Baha.—Genesis 7:1-3.

An libro sa Biblia na Genesis garo man sana igwa nin puedeng apodon na rekord nin pagbiahe ni Noe kan nangyari poon sa kapinonan kan Baha sagkod na sia asin an pamilya nia lumuwas sa dahong. Igwa daw iyan nin ano man na makahulogan para sa sato ngonyan?