Dai Kamo Maghiro Asin Helingon an Pagliligtas ni Jehova!

“Puesto na kamo, dai kamo maghiro asin helingon an pagliligtas ni Jehova sa saindo.”—2 CRONICA 20:17.

1, 2. Taano ta mas grabe an epekto kan madali nang pagsalakay ni “Gog kan daga nin Magog” kisa peligro nin internasyonal na terorismo?

AN TERORISMO sinasabi nin nagkapira na sarong pagsalakay sa pankinaban na komunidad, pati sa sibilisasyon mismo. Natural sana, an siring na peligro dapat na seryosohon. Sa ibong na lado, mas grabe pa ngani an magigin epekto nin saro pang pagsalakay, na daing gayo o dai ngani tinatawan nin atension kan pankinaban na komunidad. Ano daw iyan?

² Iyan an pagsalakay ni “Gog kan daga nin Magog,” na nasasambitan kan Biblia sa Ezequiel kapitulo 38. Pagpasobra daw na sabihon na mas grabe an epekto kan pagsalakay na ini kisa sa peligro nin internasyonal na terorismo? Dai man, huli ta an pagsalakay ni Gog bako sanang pag-atake sa mga gobyerno nin tawo. Inaatake kaiyan an langitnon na gobyerno nin Dios! Minsan siring, bakong arog nin mga tawo, na limitado sana an kapangganahan na makayang atubangon an mga pag-atake sa saindang sistema, an Kaglalang lubos na may kakayahan na atubangon an mas madahas na pagsalakay ni Gog.

 Sarong Pagsalakay sa Gobyerno nin Dios

3. An mga namamahala sa kinaban inimbitaran na gumibo nin ano poon kan 1914, asin ano an reaksion ninda?

³ An labanan kan namamahala na ngonyan na Hade nin Dios asin kan maraot na sistema ni Satanas nagpapadagos poon pa kan maestablisar an Kahadean nin Dios sa kalangitan kan 1914. Kan panahon na idto, an namamahalang mga tawo inapodan na magpasakop sa pinili nin Dios na Namamahala. Alagad habo ninda, siring kan ihinula: “Naninindogan an mga hade kan daga asin an haralangkaw na opisyal mismo nagsururog tumang ki Jehova asin tumang sa saiyang linahidan, na nagsasabi: ‘Paratodon ta an saindang mga panggapos asin iapon ta an saindang mga lubid!’” (Salmo 2:1-3) An paglaban sa pamamahala kan Kahadean malinaw na makakaabot sa kulminasyon kaiyan durante kan pagsalakay ni Gog nin Magog.

4, 5. Paano makalalaban an mga tawo sa dai naheheling, langitnon na gobyerno nin Dios?

⁴ Tibaad magngalas kita kun paano makalalaban an mga tawo sa sarong dai naheheling, langitnon na gobyerno. An gobyernong ini, na ihinahayag kan Biblia, kompuesto kan “sanggatos may apat na polo may apat na ribo, na binakal hale sa daga,” kabale an “Kordero,” si Cristo Jesus. (Kapahayagan 14:​1, 3; Juan 1:29) Huling langitnon, an bagong gobyerno sinasabing “bagong kalangitan,” mantang an mga sakop kaiyan sa daga rasonable sanang inaapod na “sarong bagong daga.” (Isaias 65:17; 2 Pedro 3:13) An kadaklan sa 144,000 na kaibang namamahala ni Cristo natapos na an daganon na buhay ninda na may pagigin fiel. Sa siring pinatunayan ninda an saindang pagigin maninigo na akoon an saindang bagong mga asignasyon nin paglilingkod sa langit.

⁵ Minsan siring, sarong sadit na natatada kan 144,000 an yaon pa digdi sa daga. Sa labing  15,000,000 na nag-atender sa selebrasyon kan Pamanggihan kan Kagurangnan kan 2002, solamente 8,760 an nagpahayag kan saindang paglaom bilang pinili para sa langitnon na asignasyon na ini. An siisay man na nangangahas na salakayon an natatada na may esperansang magin mga miembro kan Kahadean, sa totoo sana, Kahadean nin Dios an kinakalaban.​—Kapahayagan 12:17.

Tinatapos kan Hade an Saiyang Pandadaog

6. Ano an pagheling ni Jehova asin ni Cristo sa pagtumang na ginigibo sa banwaan nin Dios?

⁶ Ihinula an reaksion ni Jehova sa pagtumang sa saiyang naestablisar nang Kahadean: “An mismong Saro na nagtutukaw sa kalangitan magngingisi; si Jehova mismo mag-oolog-olog sa sainda. Sa panahon na iyan sia mataram sa sainda sa saiyang kaanggotan asin sa naglalaad niang kabangisan riribokon nia sinda, na an sabi: ‘Ako mismo nagpatukaw kan sakuyang hade sa Sion, an sakong banal na bukid.’” (Salmo 2:4-6) Nag-abot na ngonyan an panahon tanganing, sa pagdirehir ni Jehova, ‘taposon [ni Cristo] an saiyang pandadaog.’ (Kapahayagan 6:2) Ano an pagheling ni Jehova sa pagtumang na ginigibo sa saiyang banwaan durante kan panahon nin pangultimong pandadaog? Ibinibilang nia iyan na sa katunayan ginigibo tumang sa saiya asin tumang sa saiyang nagrereynar nang Hade. “An nagtitikwil sa saindo nagtitikwil sa basilig kan sakong mata,” an sabi ni Jehova. (Zacarias 2:8) Asin may pagdodoon na sinabi ni Jesus na an ginigibo o dai ginigibo kan mga tawo sa saiyang linahidan na mga tugang ibinibilang nia na ginigibo o dai ginigibo sa saiya.​—Mateo 25:​40, 45.

7. Sa anong mga dahelan maeeksperyensiahan kan mga kabilang sa “dakulang kadaklan,” na ilinadawan sa Kapahayagan 7:​9, an kabangisan ni Gog?

⁷ Siempre, mamamatean man kan mga aktibong nagsusuportar sa linahidan na natatada an kabangisan ni Gog. An may esperansang magin mga miembrong ini kan “bagong daga” nin Dios “sarong dakulang kadaklan” na inapod “hale sa gabos na nasyon asin tribo asin banwaan patin tataramon.” (Kapahayagan 7:9) Sinda sinasabing “nagtitindog sa atubangan kan trono asin sa atubangan kan Kordero, na nagugubingan nin maputing mga gubing.” Sa siring igwa sinda nin inooyonan na kamugtakan sa atubangan nin Dios asin ni Cristo Jesus. Igwa nin “mga sanga nin palma sa saindang mga kamot,” irinurukyaw ninda si Jehova bilang lehitimong Soberano kan uniberso, na an pamamahala ipinahahayag paagi sa pagreynar kan saiyang pinatukaw na Hade, si Jesu-Cristo, “an Kordero nin Dios.”​—Juan 1:​29, 36.

8. An pagsalakay ni Gog an mapangyari ki Cristo na gibohon an ano, na may anong resulta?

⁸ An pagsalakay ni Gog an mapangyari sa pinatukaw nin Dios na Hade na humiro asin makipaglaban sa Armagedon. (Kapahayagan 16:​14, 16) An mga habong rekonoseron an soberaniya ni Jehova lalaglagon. Sa ibong na lado, an mga nag-agi nin kahorasaan huli sa saindang kaimbodan sa Kahadean nin Dios makaeeksperyensia nin permanenteng kaginhawahan. Mapadapit digdi, si apostol Pablo nagsurat: “Ini sarong patotoo sa katanosan nin paghokom nin Dios, na nagbubunga nin pagkabilang sa saindo na angay sa kahadean nin Dios, na para kaiyan kamo tunay na nagdudusa. Kinokonsiderar kaini na matanos para sa Dios na balosan nin kahorasaan an mga nagtatao nin kahorasaan sa saindo, alagad, sa saindo na nag-aagi sa kahorasaan, pakaginhawa kaiba mi sa pagkahayag  kan Kagurangnan na Jesus hale sa langit kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.”​—2 Tesalonica 1:5-8.

9, 10. (a) Paano itinao ni Jehova sa Juda an kapangganahan laban sa masakit daogon na kalaban? (b) Ano an dapat na padagos na gibohon kan mga Kristiano ngonyan?

⁹ Durante kan nagdadangadang na dakulang kahorasaan, na matatapos sa Armagedon, si Cristo makikilaban sa gabos na maraot. Alagad dai kaipuhan na makilaban an saiyang mga parasunod, kun paanong dai iyan kinaipuhan na gibohon kan mga nag-eerok sa duwang tribong kahadean nin Juda kaidtong rinibong taon na an nakaagi. Ki Jehova an laban, asin itinao nia an kapangganahan. An rekord nagsasabi: “Si Jehova nagbugtak nin mga lalaking man-aabat tumang sa mga aki ni Amon, Moab asin kan mabukid na rehion nin Seir na minalaog sa Juda, asin tinira ninda an lambang saro. Asin an mga aki ni Amon asin Moab tuminindog tumang sa mga taga mabukid na rehion nin Seir tangani na laglagon sinda asin pohoon sinda; asin kan matapos na ninda an mga taga Seir, tinabangan ninda an lambang saro na laglagon an sadiring kaiba. Alagad kun dapit sa Juda, nagdatong iyan sa torrengbantayan sa kaawagan. Kan ikiling ninda an saindang mga lalauogon sa kadaklan, tara, yaon sinda, an saindang mga bangkay nakahutad sa daga na mayo nin siisay man na nakadulag.”​—2 Cronica 20:22-24.

¹⁰ Eksakto nanggad iyan sa ihinula ni Jehova: “Dai kamo kaipuhan na makipaglaban.” (2 Cronica 20:17) Ini an susundan kan mga Kristiano kun humiro na si Jesu-Cristo tanganing ‘taposon an saiyang pandadaog.’ Mientras tanto, padagos nindang linalabanan an karatan, bakong paagi sa literal na mga armas, kundi paagi sa espirituwal na mga armas. Paagi kaiyan ‘padagos nindang dinadaog an karatan nin karahayan.’​—Roma 6:13; 12:17-21; 13:12; 2 Corinto 10:3-5.

Siisay an Mangengenot sa Pagsalakay ni Gog

11. (a) Anong mga ahensia an gagamiton ni Gog sa paggibo kan saiyang pagsalakay? (b) Ano an kalabot sa pagigin listo sa espirituwal?

¹¹ An Gog nin Magog ipinamimidbid na iyo si Satanas na Diablo sa saiyang ibinabang kamugtakan poon kan 1914. Bilang espiritung linalang, dai nia magigibo nin direkta an saiyang pagsalakay, kundi magamit sia nin mga ahensiang tawo tanganing gibohon an saiyang mga gibo. Siisay an mga ahensiang tawo na ini? An Biblia mayong itinataong detalye sa sato, alagad talagang tinatawan kita kaiyan nin nagkapirang indikasyon na makatatabang sa sato na mamidbid kun siisay sinda. Mantang nagpapadagos an mga pangyayari sa kinaban bilang kaotoban kan mga hula sa Biblia, luway-luway na mamimidbid niato iyan nin mas malinaw. Linilikayan kan banwaan ni Jehova an  pagbanabana kundi nagdadanay na listo sa espirituwal, na lubos na nakamamansay sa politikal asin relihiosong mga pangyayari na nakakabagay sa kaotoban kan hula sa Biblia.

12, 13. Paano ihinula ni propeta Daniel an sarong pangultimong pagsalakay sa banwaan nin Dios?

¹² Si propeta Daniel nagtatao nin liwanag manongod sa sarong pangultimong pagsalakay tumang sa banwaan nin Dios, na nagsurat: “Sia [an hade kan amihanan] maluwas nanggad sa dakulang kabangisan tanganing pohoon asin laglagon an dakol. Asin itotogdok nia an saiyang garo palasyong mga tolda sa pag-oltanan kan dakulang dagat asin kan banal na bukid nin Dekorasyon.”​—Daniel 11:​44, 45.

¹³ Sa konteksto kan Biblia, an “dakulang dagat” iyo an Dakulang Dagat, o an Mediterraneo, asin an “banal na bukid” iyo an Sion, na manongod dian nagsabi si Jehova: “Ako mismo nagpatukaw kan sakuyang hade sa Sion, an sakong banal na bukid.” (Salmo 2:6; Josue 1:4) Sa siring, sa espirituwal na sentido, an daga “sa pag-oltanan kan dakulang dagat asin kan banal na bukid” naglaladawan sa maoswag na espirituwal na kamugtakan kan linahidan na mga Kristiano. Bako na sindang midbid na kabilang sa dagat nin katawohan na siblag sa Dios, asin inaantisipar ninda na mamahala kaiba ni Cristo Jesus sa langitnon na Kahadean. Malinaw nanggad, an linahidan na mga lingkod nin Dios, kabale an saindang maimbod na kairiba na dakulang kadaklan, an magigin punteriya kan hade kan amihanan kun ilansar na nia an saiyang maringis na pagsalakay bilang kaotoban kan hula ni Daniel.—Isaias 57:20; Hebreo 12:22; Kapahayagan 14:1.

Paano Mahiro an mga Lingkod nin Dios

14. Ano an tolong bagay na gigibohon kan banwaan nin Dios pagsinalakay?

¹⁴ Ano an aasahan na gigibohon kan mga lingkod nin Dios oras na salakayon sinda? Sa giraray, an susundan iyo an ginibo kan tipikong nasyon nin Dios kan kaaldawan ni Josafat. Mangnoha na an mga siudadano kaiyan pinagbotan na gibohon an tolong bagay: (1) pumuesto, (2) dai maghiro, asin (3) helingon an pagliligtas ni Jehova. Paano mahiro an banwaan nin Dios ngonyan kaoyon kan mga tataramon na ini?​—2 Cronica 20:17.

15. Ano an boot sabihon pagsinabing pumuesto an banwaan ni Jehova?

¹⁵ Pumuesto: Dai nag-uurong-sulong, an banwaan nin Dios magpapadagos na magdanay sa puesto ninda na aktibong pagsuportar sa Kahadean nin Dios. Magpapadagos sindang papagdanayon an puesto ninda na pagigin neutral bilang Kristiano. Sinda magigin “marigon, dai natatanyog” sa saindang maimbod na paglilingkod ki Jehova asin padagos na hayagan na oomawon si Jehova huli sa saiyang mamomoton na kabootan. (1 Corinto 15:58; Salmo 118:​28, 29) Mayong pangigipit sa presente o sa ngapit na makatatanyog sa sainda sa inooyonan nin Dios na paninindogan na ini.

16. Sa anong mga paagi dai mahiro an mga lingkod ni Jehova?

¹⁶ Dai maghiro: An mga lingkod ni Jehova dai maghihingoang iligtas an saindang sadiri kundi lubos na magtitiwala ki Jehova. Sia sana an may kakayahan na isalbar an saiyang mga lingkod sa kariribokan kan kinaban, asin nanuga sia na gigibohon iyan. (Isaias 43:​10, 11; 54:15; Lamentacion 3:26) Magigin kabale sa pagtitiwala ki Jehova an pagtitiwala sa naheheling na pinakapaagihan sa presenteng panahon na malinaw na ginagamit nia sa laog nin dakol nang dekada tanganing mahaman an saiyang mga katuyohan. Orog kasuarin man kaidto, an tunay na mga Kristiano kaipuhan na sa panahon na iyan magsarig sa mga kapwa parasamba na inautorisaran ni Jehova asin kan saiyang nagrereynar na Hade na mangenot. An fiel na mga lalaking ini an magiya sa banwaan nin Dios. An pagpalimanliman sa saindang paggiya maresulta sa kapahamakan.​—Mateo 24:45-47; Hebreo 13:​7, 17.

17. Taano ta maheheling kan fiel na mga lingkod nin Dios an pagliligtas ni Jehova?

 ¹⁷ Helingon an pagliligtas ni Jehova: Kaligtasan an magigin balos sa gabos na nagdadanay sa puesto ninda na Kristianong integridad asin nagtitiwala ki Jehova para sa pagliligtas. Sagkod sa ultimo ora​—asin sagkod sa mahihimo ninda​—ipapaisi ninda an pagdatong kan aldaw kan paghokom ni Jehova. An gabos na linalang dapat na makaaram na si Jehova an tunay na Dios asin na sia igwa nin fiel na mga lingkod sa daga. Nungka na giraray na kaipuhan pang magkaigwa nin halawig na kontrobersia dapit sa pagigin lehitimo kan soberaniya ni Jehova.​—Ezequiel 33:33; 36:23.

18, 19. (a) Paano ipinababanaag kan awit nin kapangganahan sa Exodo kapitulo 15 an mamamatean kan mga makaliligtas sa pagsalakay ni Gog? (b) Ano an angay na gibohon ngonyan kan banwaan nin Dios?

¹⁸ May bagong kosog, an banwaan nin Dios malaog sa bagong kinaban, na galagang awiton an sarong awit nin kapangganahan, arog kan ginibo kan mga Israelita kan suanoy pakatapos kan pagkaligtas ninda sa Dagat na Pula. Sagkod lamang na nagpapasalamat ki Jehova sa saiyang proteksion, bilang indibiduwal asin bilang grupo, ootrohon ninda an mga tataramon kaidtong suanoy: “Mag-aawit ako ki Jehova, ta sia napamuraway na gayo. . . . Si Jehova parapakilaban na lalaking-lalaki. Jehova an saiyang ngaran. . . . An saimong toong kamot, O Jehova, kayang ronoton an kalaban. Asin sa kadakolan kan saimong pakalabi kaya mong tumbahon an mga minatumang sa saimo; ilinuluwas mo an saimong naglalaad na kaanggotan, tinutumtom sinda kaiyan siring sa pinaggapasan. . . . Sa saimong mamomoton na kabootan giniyahan mo an banwaan na saimong nabawi; sa saimong kosog gigiyahan mo nanggad sinda sa saimong banal na erokan. . . . Dadarahon mo sinda asin itatanom sinda sa bukid nin saimong mana, sarong establisadong lugar na inandam mo tanganing pag-erokan mo, O Jehova, sarong santuaryo, O Jehova, na inestablisar kan saimong mga kamot. Si Jehova mamamahala bilang hade sagkod sa panahon na daing talaan, sagkod lamang pa ngani.”​—Exodo 15:1-19.

¹⁹ Ngonyan na igwa kan paglaom na buhay na daing katapusan na mas maliwanag kisa kaidto, marahayon nanggad na panahon ini para sa mga lingkod nin Dios na ipaheling an saindang debosyon ki Jehova asin pakosogon giraray an saindang determinasyon na paglingkodan sia bilang saindang Hade na daing katapusan!​—1 Cronica 29:11-13.

Ikapaliliwanag daw Nindo?

• Taano ta magigin punteriya kan pagsalakay ni Gog an mga linahidan asin ibang karnero?

• Paano mapuesto an banwaan nin Dios?

• Ano an boot sabihon kan dai maghiro?

• Paano maheheling kan banwaan nin Dios an pagliligtas ni Jehova?

[Mga Hapot Para sa Pag-adal]

[Ritrato sa pahina 18]

Tinawan ni Jehova nin kapangganahan si Josafat asin an saiyang banwaan, na dai na ninda kinaipuhan na makilaban

[Ritrato sa pahina 20]

An mga linahidan asin an ibang karnero iribanan sa pagsuportar sa soberaniya ni Jehova

[Ritrato sa pahina 22]

Arog kan mga Israelita kan suanoy, sa dai na mahahaloy an banwaan nin Dios maawit nin awit nin kapangganahan