“Dai Kamo Matakot o Masindakan”

“Dai kamo matakot o masindakan. . . . Si Jehova maiba sa saindo.”​—2 CRONICA 20:17.

1. Ano an epekto kan terorismo sa mga tawo, asin taano ta natural sana an saindang takot?

TERORISMO! An mismong tataramon na iyan nakapupukaw nin takot sa puso, nagpapamate nin pagkadaing seguridad asin pagkadaing maginibo. Nakapupukaw iyan nin saralak na emosyon nin makuring takot, kamondoan, asin kaanggotan. Asin iyan sarong tataramon na naglaladawan sa ikinatatakot nin dakol na magigin damat sa katawohan sa maabot na mga taon. May dahelan an siring na takot huli sa katunayan na an nagkapirang nasyon dakol na dekada nang limitado sana an kapangganahan na labanan an dakol na klase nin terorismo.

2. Ano an reaksion kan Mga Saksi ni Jehova dapit sa problema nin terorismo, na minagiya sa anong mga hapot?

² Minsan siring, may tunay na dahelan tanganing maglaom. An Mga Saksi ni Jehova, na aktibong naghuhulit sa 234 nasyon asin teritoryo kan daga, pambihira an pagkaoptimista. Imbes na matakot na an terorismo nungkang mahahale, kompiado sinda na iyan mahahale​—asin madali na. Realistiko daw na magkaigwa man kan siring na optimismo? Siisay daw an mapangganang makahahale kan damat na ini sa kinaban, asin paano iyan mangyayari? Huling kita gabos naapektaran na gayod nin sarong klase nin kadahasan, marahay na siyasaton an basehan kan siring na optimismo.

3. Anong mga dahelan nin pagkatakot an yaon, asin ano an ihinula manongod sa satong panahon?

 ³ Ngonyan, an mga tawo natatakot asin nasisindakan huli sa laen-laen na dahelan. Isipa an kadakol na tawo na dai na kayang asikasohon an saindang sadiri huli sa pagkagurang, an mga indibiduwal na nagluluya huli sa helang na dai nabobolong, asin an mga pamilya na nasasakitan sa pagbuhay. Sa katunayan, isipa an mga kadaihan nin kasegurohan sa buhay mismo! An biglang pagkagadan huli sa aksidente o kalamidad tibaad garo baga naglulukob sa gabos na lugar, na andam na taposon an gabos na bagay na mahal niato. Dahel sa siring na takot asin pagkahadit, kaiba na an dakol na personal na iriwal asin pagkasudya nin mga linalaoman, an satong mga panahon eksakto nanggad sa ilinadawan ni apostol Pablo: “Aramon mo ini, na sa huring mga aldaw maabot an delikadong mga panahon na masakit pakibagayan. Huli ta an mga tawo magigin mga mamomoton sa sainda man sana, . . . mga dai nin natural na kapadangatan, mga dai maoyonan, mga parapakaraot, mga mayong pagpopogol sa sadiri, mga maringis, mga mayong pagkamoot sa karahayan.”​—2 Timoteo 3:1-3.

4. May anong positibong aspekto an makamomondong paglaladawan na sinasabi sa 2 Timoteo 3:1-3?

⁴ Maski ngani makamomondo an ilinaladawan kan tekstong ini, minsan siring iyan may itinotokdong paglaom. Mangnoha na magkakaigwa nin delikadong mga panahon “sa huring mga aldaw” kan presenteng maraot na sistema nin mga bagay ni Satanas. Nangangahulogan ini na harani na an pakaginhawa asin na an maraot na sistema nin kinaban madali nang salidahan kan pamamahala kan sangkap na Kahadean nin Dios, na itinokdo ni Jesus sa saiyang mga parasunod na ipamibi. (Mateo 6:​9, 10) An Kahadean na iyan iyo an langitnon na gobyerno nin Dios, na “dai noarin man malalaglag,” sabi ni propeta Daniel, kundi “iyan an maronot asin matapos kan gabos na ining kahadean [nin tawo], asin iyan mismo magdadanay sagkod sa mga panahon na daing talaan.”​—Daniel 2:44.

Kristianong Neutralidad Kontra sa Terorismo

5. Ano an dai pa sana nahahaloy na nagin reaksion kan mga nasyon dapit sa peligro nin terorismo?

⁵ Sa dakol na dekada, rinibo na an nagadan sa terorismo. An lakop sa kinaban na pakamate kan peligrong ini lalong kuminosog na marhay pakatapos kan mga pag-atake sa Siudad nin Nueva York asin Washington, D.C., kan Setyembre 11, 2001. Huli sa kosog asin pagigin lakop sa globo kan terorismo, an mga nasyon sa bilog na daga tolos na nagsararo tanganing labanan iyan. Halimbawa, kan Disyembre 4, 2001, segun sa mga report kan media, “an mga ministrong panluwas hale sa 55 nasyon sa Europa, Amerika del Norte asin Asia Sentral may pagkasararo na inaprobaran an sarong plano” na sinadya tanganing pagsararoon an saindang mga paghihingoa. Inomaw nin sarong halangkaw na opisyal sa E.U. an aksion na ini na nagtatao nin “sarong bagong puersa” sa paghihingoa na labanan an terorismo. Bigla na sana, ginatos na milyon katawo an naimbueltong marhay sa inapod kan The New York Times Magazine na “an kapinonan nin sarong makosog na labanan.” Kun magigin gurano kamapanggana an siring na mga paghihingoa maaaraman pa pag-abot nin panahon. Minsan siring, an mga epekto nin siring na pakikilaban tumang sa grabeng takot nagpamate nin takot asin pagkahandal sa dakol, alagad bakong sa mga naglalaom ki Jehova.

6. (a) Taano ta kun beses tibaad masakit para sa nagkapira na akseptaron an paninindogan na Kristianong neutralidad kan Mga Saksi ni Jehova? (b) Anong halimbawa mapadapit sa politikal na aktibidad an itinao ni Jesus sa saiyang mga parasunod?

⁶ An Mga Saksi ni Jehova midbid na marhay sa saindang neutralidad sa politika. Minsan ngani an  kadaklan na tawo tibaad andam na akseptaron an paninindogan na ini sa mga panahon nin katoninongan, sinda nagigin bakong gayong mapagpabaya sa iba kun minalataw an ekstraordinaryong mga kamugtakan. Sa parate, an takot asin kadaihan nin kasegurohan dahelan sa guerra nagpupukaw nin makosog na mga sentimiento nin nasyonalismo. Huli kaini tibaad nagigin masakit para sa nagkapira na masabotan kun taano ta may habong sumuportar sa popular na mga mobimiento nasyonal. Minsan siring, aram kan tunay na mga Kristiano na dapat nindang kuyogon an pagboot ni Jesus na magin “bakong kabtang kan kinaban.” (Juan 15:19; 17:14-16; 18:36; Santiago 4:4) Hinahagad kaini na papagdanayon ninda an neutralidad sa politikal o sosyal na mga bagay. Itinao mismo ni Jesus an tamang halimbawa. Kun iisipon an saiyang sangkap na kadonongan asin pambihirang mga kakayahan, nakakontribwir kutana sia sa ikaooswag kan mga gibo-gibo nin tawo kaidtong saiyang kaaldawan. Pero, naglikay siang maimbuelto sa politika. Sa kapinonan kan saiyang ministeryo, marigon niang hinaboan an alok ni Satanas na pamamahala sa gabos na kahadean sa kinaban. Kan huri, desidido niang sinayumahan an pagpili sa saiya para sa politikal na katongdan.​—Mateo 4:8-10; Juan 6:​14, 15.

7, 8. (a) Ano an bakong kahulogan kan pagigin neutral sa politika kan Mga Saksi ni Jehova, asin taano? (b) Paano ipinaheheling kan Roma 13:​1, 2 na dai puede an pakikikabtang sa madahas na mga aktibidad laban sa mga gobyerno?

⁷ An neutral na paninindogan kan Mga Saksi ni Jehova dai maninigong misinterpretaron na nangangahulogan na sinusuportaran o kinokonsinte ninda an mga akto nin kadahasan. Para sa sainda an paggibo kaiyan kontra sa saindang paghingako na sinda mga lingkod kan “Dios nin pagkamoot asin nin katoninongan.” (2 Corinto 13:11) Nanodan ninda kun ano an saboot ni Jehova sa kadahasan. An salmista nagsurat: “Si Jehova mismo nagsisiyasat sa matanos patin sa maraot, asin an siisay man na namomoot sa kadahasan ikinaoongis nanggad kan Saiyang kalag.” (Salmo 11:5) Aram man ninda an sinabi ni Jesus ki apostol Pedro: “Sarungan an saimong espada, huli ta an gabos na minabingat nin espada sa espada man magagadan.”​—Mateo 26:52.

⁸ Minsan ngani malinaw na ipinaheheling kan kasaysayan na an palsipikadong mga Kristiano parateng naggagamit kan “espada,” bako iyan na totoo sa Mga Saksi ni Jehova. Naglilikay sinda sa gabos na aktibidad na siring kaiyan. Fiel na kinukuyog kan mga Saksi an pagboot sa Roma 13:​1, 2: “An lambang kalag magpasakop sa superyor na mga autoridad [mga namamahala sa gobyerno], huli ta mayo nin autoridad na dai itinogot nin Dios; an nagdadanay na mga autoridad nagtitirindog sa saindang relatibong mga kamugtakan na itinogot nin Dios. Kun siring an minatumang sa autoridad minatumang sa areglo nin Dios; an mga minatumang kaiyan mag-aako nin silot sa sainda man sana.”

9. Sa anong duwang paagi linalabanan kan Mga Saksi ni Jehova an terorismo?

⁹ Minsan siring, huling maraoton an terorismo, bako daw na an Mga Saksi ni Jehova maninigo na gumibo nin paagi na tumabang na labanan iyan? Iyo maninigo nindang gibohon iyan, asin ginigibo ninda iyan. Enot sa gabos, sinda mismo dai nakikikabtang sa ano man na siring na aktibidad. Ikaduwa, itinotokdo ninda sa mga tawo an Kristianong mga prinsipyo na kun susunodon mahahale an gabos na klase nin kadahasan. * Kan nakaaging taon, an mga Saksi naggamit nin 1,202,381,302 na oras sa pagtabang sa mga tawo na manodan an Kristianong pamumuhay na ini. Bako ining oras na nasayang, ta bilang resulta kan aktibidad na ini, 265,469 katawo an nabautismohan bilang mga Saksi ni Jehova, na sa siring ipinaheheling sa publiko an saindang biyong paghabo sa kadahasan.

10. Ano an mga posibilidad na mapara an kadahasan sa presenteng kinaban?

¹⁰ Saro pa, rinerekonoser kan Mga Saksi ni Jehova na kun sinda sana nungka nindang mahahale an karatan sa kinaban. Iyan an dahelan kaya lubos an saindang tiwala sa saro na kayang gumibo kaiyan​—si Jehova Dios. (Salmo 83:18) Sa ibong nin sinserong mga paghihingoa, dai kaya nin mga tawo na taposon an kadahasan. An pinasabngan na kagsurat sa Biblia nagpatanid sa sato antes pa manongod sa panahon niato, an “huring mga aldaw,” asin nagsasabi: “An mga maraot asin nandadaya  orog na magraraot, na nanlalagalag asin ikinalalagalag.” (2 Timoteo 3:​1, 13) Kun hehelingon base sa punto de vistang ini, harayo an posibilidad na ganahon nin tawo an paglaban sa karatan. Sa ibong na lado, puede kitang manarig ki Jehova na biyo asin permanenteng hahaleon nia an kadahasan.​—Salmo 37:​1, 2, 9-11; Talinhaga 24:​19, 20; Isaias 60:18.

Daing Takot sa Ibong nin Nagdadangadang na Pagsalakay

11. Anong mga lakdang an ginibo na ni Jehova tanganing haleon an kadahasan?

¹¹ Huling an Dios nin katoninongan naoongis sa kadahasan, masasabotan niato kun taano ta pinonan na niang gumibo nin mga lakdang na paraon an pinakagikanan kaiyan, si Satanas na Diablo. Sa katunayan, pinangyari na Nia na si Satanas umagi nin makasusupog na pagkadaog sa kamot kan arkanghel na si Miguel​—an bagong patukawon nin Dios na Hade, si Cristo Jesus. Siring kaini an pagkaladawan kaiyan kan Biblia: “Puminutok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na ilinalagalag an bilog na ineerokan na daga; ihinolog sia sa daga, asin an saiyang mga anghel ihinolog kaiba nia.”​—Kapahayagan 12:7-9.

12, 13. (a) May anong kahulogan an taon 1914? (b) Ano an sinasabi kan hula sa Ezequiel para sa mga minasuportar sa Kahadean nin Dios?

¹² An kronolohiya sa Biblia asin an mga pangyayari sa kinaban nagkakaoyon sa pagtokdo sa taon 1914 bilang an panahon na nangyari an ralaban na iyan sa langit. Poon kaidto, an mga kamugtakan sa kinaban dagos-dagos nang naggrabe. An Kapahayagan 12:12 nagpapaliwanag kun taano, na sinasabi: “Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”

¹³ Siempre, an pangenot na punteriya kan kaanggotan kan Diablo iyo an linahidan na mga nagsasamba sa Dios asin an kairiba nindang “ibang karnero.” (Juan 10:16; Kapahayagan 12:17) Sa dai na mahahaloy an pagtumang na ini maabot sa kulminasyon kun ilansar na kan Diablo an makuring pagsalakay sa gabos na nagsusuportar sa naestablisar nang Kahadean nin Dios asin nananarig dian. An todo-todong pagsalakay na ini inaapod sa Ezequiel kapitulo 38 na pagsalakay ni “Gog kan daga nin Magog.”

14. Anong nagpoprotehir na mga paghihingoa an nakamtan kan Mga Saksi ni Jehova kaidto, asin pirme daw ining mangyayari?

¹⁴ Poon kan pahaleon si Satanas sa langit, an banwaan nin Dios may beses na naprotehiran sa mga pagsalakay ni Satanas paagi sa mga paghihingoa nin nagkapirang politikal na elemento, na ilinadawan sa simbolikong mga tataramon sa Kapahayagan 12:​15, 16. Sa kabaliktaran, ipinaheheling kan Biblia na durante kan pangultimong pagsalakay ni Satanas, mayo nin mga ahensia nin tawo na madepensa sa mga nagtitiwala ki Jehova. Maninigo daw ining ikatakot o ikasindak kan mga Kristiano? Dai nanggad!

15, 16. (a) An nakapakokosog liwat sa boot na mga tataramon ni Jehova sa saiyang banwaan kan kaaldawan ni Josafat nagtatao nin anong dahelan nin optimismo para sa mga Kristiano ngonyan? (b) Anong susundan an itinao ni Josafat asin kan banwaan para sa mga lingkod nin Dios ngonyan?

¹⁵ Seguradong susuportaran nin Dios an saiyang banwaan siring kan pagsuportar nia sa saiyang  tipikong nasyon kan kaaldawan ni Hadeng Josafat. Mababasa niato: “Pagdangog kamo, bilog na Juda asin kamo na mga taga Jerusalem patin Hadeng Josafat! Uya an isinabi sa saindo ni Jehova, ‘Dai kamo matakot o masindakan huli sa dakulang kadaklan na ini; huli ta bakong saindo an laban, kundi sa Dios. . . . Dai kamo kaipuhan na makipaglaban sa panahon na ini. Puesto na kamo, dai kamo maghiro asin helingon an pagliligtas ni Jehova sa saindo. O Juda asin Jerusalem, dai kamo matakot o masindakan. Nuodma lumuwas kamo tumang sa sainda, asin ta si Jehova maiba sa saindo.’”​—2 Cronica 20:15-17.

¹⁶ Sinierto sa banwaan nin Juda na dai sinda kaipuhan na makilaban. Kaagid kaiyan, kun an banwaan nin Dios salakayon na ni Gog nin Magog, dai sinda mabingat nin armas tanganing idepensa an sadiri. Imbes, sinda ‘dai mahiro asin hehelingon an pagliligtas ni Jehova’ sa sainda. Siempre, an dai paghiro dai nagpaparisa nin biyong kadaihan nin ginigibo, kun paanong an banwaan nin Dios kan kaaldawan ni Josafat bakong biyong daing ginigibo. Mababasa niato: “Si Josafat tolos na nagduko sa daga, asin an bilog na Juda asin an mga nag-eerok sa Jerusalem nagruluhod sa atubangan ni Jehova tanganing maghuruhod ki Jehova. . . . Dugang pa, nagkonsulta [si Josafat] sa banwaan asin nagbugtak nin mga paraawit ki Jehova asin kan mga nagtatao nin pag-omaw sa banal na samno mantang sinda nangengenotan sa armadong mga lalaki, asin nagsasabi: ‘Pag-omaw kamo ki Jehova, huli ta sagkod sa panahon na daing talaan an saiyang mamomoton na kabootan.’” (2 Cronica 20:18-21) Iyo, dawa napapaatubang sa pagsalakay nin kalaban, an banwaan padagos na aktibong nag-oomaw ki Jehova. Ini an susundan kan Mga Saksi ni Jehova kun ilansar na ni Gog an pagsalakay nia sa sainda.

17, 18. (a) Ano an positibong aktitud kan Mga Saksi ni Jehova ngonyan mapadapit sa pagsalakay ni Gog? (b) Anong pagirumdom an itinao kasuarin pa sana sa Kristianong mga hoben?

¹⁷ Sagkod sa panahon na iyan​—asin dawa pagkapoon kan pagsalakay ni Gog​—an Mga Saksi ni Jehova magpapadagos sa saindang pagsuportar sa Kahadean nin Dios. Padagos sindang makua nin kosog asin proteksion sa pakikiasosyar sa labing 94,600 na kongregasyon sa bilog na kinaban. (Isaias 26:20) Tamang-tama nanggad na panahon na omawon si Jehova na may kosog nin boot! Dai, an pamumuhay na naghahalat kan madali nang pagsalakay ni Gog dai nagpapangyari sa sainda na sumibog huli sa takot. Imbes, pinahihiro sinda kaiyan na dugangan an saindang atang nin pag-omaw sagkod sa rasonableng mahihimo ninda.​—Salmo 146:2.

¹⁸ An positibong aktitud na ini angay na ipinaheheling kan rinibong hoben sa bilog na kinaban na naglaog sa bilog na panahon na ministeryo. Tanganing  idoon na nakalalabi an pagpili sa siring na dalan nin buhay, an pulyetong Mga Hoben​—Ano an Gigibohon Nindo sa Saindong Buhay? ilinuwas sa pandistritong mga kombension kan 2002. An mga Kristiano, hoben sagkod gurang, nagpapasalamat sa siring na napapanahon na mga pagirumdom.​—Salmo 119:​14, 24, 99, 119, 129, 146.

19, 20. (a) Taano ta mayo nin dahelan na matakot o masindakan an mga Kristiano? (b) Ano an gigibohon kan sunod na artikulong pag-aadalan?

¹⁹ Sa ibong kan mga kamugtakan sa kinaban, an mga Kristiano dai kaipuhan na matakot o masindakan. Aram ninda na madali nang paraon nin permanente kan Kahadean ni Jehova an gabos na klase nin kadahasan. Nararanga man sinda kan pakaaram na paagi sa pagkabuhay liwat ibabalik an buhay kan dakol na nagadan huli sa kadahasan. Minsan ngani ini an magigin enot na oportunidad para sa nagkapira na makanood manongod ki Jehova, iyan mapangyari man sa iba na ipadagos an saindang dalan nin dusay na paglilingkod sa saiya.​—Gibo 24:15.

²⁰ Bilang tunay na mga Kristiano, nasasabotan niato an pangangaipo na papagdanayon an Kristianong neutralidad asin determinado kitang gibohon iyan. Boot niatong mangapot sa makangangalas na paglaom na mahimo niatong ‘dai maghiro asin helingon an pagliligtas ni Jehova.’ Pakokosogon kan sunod na artikulo an satong pagtubod paagi sa pagpaaram sa sato kan mga pangyayari sa presenteng aldaw na progresibong nagtatao nin dugang na pakarorop sa kaotoban kan hula sa Biblia.

[Nota sa Ibaba]

Ikapaliliwanag daw Nindo?

• Taano ta pesimistang marhay an dakol na tawo ngonyan?

• Taano ta optimista an Mga Saksi ni Jehova manongod sa ngapit?

• Ano na an ginibo ni Jehova manongod sa dahelan kan gabos na kadahasan?

• Taano ta mayo nin dahelan na matakot kita sa pagsalakay ni Gog?

[Mga Hapot Para sa Pag-adal]

[Ritrato sa pahina 13]

Itinao ni Jesus an tamang halimbawa nin Kristianong neutralidad

[Mga Ritrato sa pahina 16]

Rinibong hoben na Saksi an magayagayang naglaog sa bilog na panahon na ministeryo

[Picture Credit Line sa pahina 12]

RETRATO KAN NU 186226/M. Grafman