Pagtatao na Nakakapaogma sa Dios

SI Jesus asin an saiyang mga disipulo nag-oogma sa masiram na kakanon sa Betania kaiba an nagkapirang dayupot na katood, kaiba si Maria, Marta, asin an bago pa sanang buhayon liwat na si Lazaro. Kan kuminua si Maria nin sarong librang mamahalon na ungguento asin lahidan an mga bitis ni Jesus, naggurobgutob si Judas Iscariote asin nagreklamo. “Tadaw ta dai ipinabakal an ungguentong ini nin tolong gatos na denario [katimbang nin mga sangtaon na sueldo] asin itinao sa mga tawong dukha?” an pag-insistir nia. An iba tolos na nagreklamo nin arog man kaiyan.​—Juan 12:1-6; Marcos 14:3-5.

Minsan siring, suminimbag si Jesus: “Pabayae sia nindo. . . . Huli ta pirmeng nasa kaibanan nindo an mga dukha, asin noarin man na boot nindo pirme nindo sindang magigibohan nin karahayan, alagad ako bako pirmeng nasa saindo.” (Marcos 14:6-9) Itinokdo kan Judiong mga namomoon sa relihion na an pag-abuloy bako sanang birtud kundi puede pa nganing tumubos sa mga kasalan. Sa ibong na lado, lininaw ni Jesus na an pagtatao na nakakapaogma sa Dios bako sanang an pagtatao nin abuloy sa mga dukha.

An halipot na pag-estudyar sa paagi nin pagtatao na ginibo kan enot na Kristianong kongregasyon an magtatampok kan nagkapirang praktikal na paagi na ikakapaheling niato an satong pagmalasakit asin sa siring mapaoogma an Dios sa satong pagtatao. Ipaheheling man kaiyan an sarong daing kaagid na klase nin pagtatao na pinakamarahay an magigin resulta.

“Maglimos”

Sa nagkapirang pangyayari inenkaminar ni Jesus an saiyang mga disipulo na “maglimos,” o arog kan ibang pagkatradusir kan fraseng iyan, “magtao nin abuloy” o “magtao sa pag-abuloy.” (Lucas 12:33; New English Bible; A Translation in the Language of the People, ni Charles B. Williams) Minsan siring, nagpatanid si Jesus tumang sa mapagpasikat na pagpaheling na an katuyohan sana iyo na omawon an nagtao imbes na an Dios. “Kun ika naglilimos,” sabi nia, “dai ka magpatanog nin trumpeta sa enotan mo, arog kan ginigibo kan mga parasaginsagin sa mga sinagoga asin sa mga lansangan, tangani sindang omawon nin mga tawo.” (Mateo 6:1-4) Huling iinaaplikar an konsehong ini, linikayan kan enot na mga Kristiano an mapagpasikat na mga pagpaheling kan sagin banal na relihiosong mga lider kan kaaldawan ninda asin pinili nindang tumabang sa mga nangangaipo paagi sa personal na mga paglilingkod o pagtao nin personal na mga regalo.

Halimbawa, sa Lucas 8:​1-3 sinasabi sa sato na ginamit ni Maria Magdalena, Juana, Susana, asin kan iba pa an “saindang mga rogaring” tanganing daing pagsaginsagin na maglingkod ki Jesus asin sa  saiyang mga apostol. Maski ngani an mga tawong ini bako man na dukhang-dukha, binayaan ninda an saindang kinukuanan nin pagbuhay tanganing ikakonsentrar an saindang mga paghihingoa solamente sa ministeryo. (Mateo 4:18-22; Lucas 5:​27, 28) Paagi sa pagtabang sainda na matapos an itinao nin Dios na asignasyon, an mga babaeng ini, garo man sana, nagpamuraway sa Dios. Asin ipinaheling nin Dios an saiyang pag-apresyar paagi sa pagpreserbar nin sarong rekord sa Biblia kan saindang maheherakon na pagigin buka an palad tanganing mabasa kan gabos na masurunod na henerasyon.​—Talinhaga 19:17; Hebreo 6:10.

Si Dorcas saro pang maboot na babae na “pano nin marahay na mga gibo asin mga balaog nin pagkaherak.” Naggibo sia nin mga gubing para sa daing sukat na mga babaeng balo sa saiyang banwaan sa gilid nin dagat sa Jope. Kun baga gastos nia mismo an gabos na materyales o dai sana sia nagpabayad sa paggibo kaiyan, dai niato aram. Minsan siring, huli sa marahay niang gibo napamahal sia sa mga natabangan nia, saka sa Dios, na maheherakon na binendisyonan an saiyang marahay na boot.​—Gibo 9:36-41.

Mahalagang Marhay an Tamang Motibo

Ano an nagmotibar sa mga indibiduwal na ini na magtao? Iyan bako sanang pagkaludok na bigla na sanang napukaw nin emosyonal na naghagad nin tabang. Nakamamate sinda nin personal asin moral na paninimbagan na gibohon an magigibo ninda kada aldaw tanganing tabangan an mga nakaeeksperyensia nin kadukhaan, kasakitan, helang, o iba pang kadepisilan. (Talinhaga 3:​27, 28; Santiago 2:​15, 16) Ini an klase nin pagtatao na nakakapaogma sa Dios. Iyan sa pangenot minomotibar nin hararom na pagkamoot sa Dios asin nin pagmawot na arogon an saiyang maheherakon asin matinaong personalidad.​—Mateo 5:​44, 45; Santiago 1:17.

Idinoon ni apostol Juan an mahalagang marhay na aspektong ini nin pagtatao kan sia maghapot: “An siisay man na igwa nin pansustento sa buhay kan kinaban na ini asin naheheling an saiyang tugang na nasa pangangaipo alagad minapinto kan saiyang mamomoton na pagdamay sa saiya, paano an pag-erok kan pagkamoot nin Dios sa saiya?” (1 Juan 3:17) Risang-risa an simbag. An pagkamoot nin Dios nagpapahiro sa mga tawo na magin matinao. Pinahahalagahan asin binabalosan nin Dios an mga arog sa saiya na nagpapaheling nin matinaong aktitud. (Talinhaga 22:9; 2 Corinto 9:6-11) Naheheling daw niato an arog kaining klase nin pagigin buka an palad ngonyan? Estudyare an nangyari kasuarin pa sana sa sarong kongregasyon kan Mga Saksi ni Jehova.

An harong nin sarong may edad nang Kristiana nangangaipong marhay na hirahayon. Sia namumuhay nin solo asin mayo nin pamilya na matabang sa saiya. Sa nag-aging mga taon, an saiyang harong pirmeng bukas para sa mga pagtiripon kan kongregasyon, asin parate niang iiniiba sa pagkakan an siisay man na minaako sa saiyang imbitasyon. (Gibo 16:​14, 15, 40) Huling naheheling an saiyang kamugtakan, an mga miembro kan kongregasyon daramay na nagtarabang. An nagkapira nagkontribwir nin kuarta, an iba pa nagtrabaho mismo. Pakaagi nin pira sanang katapusan nin semana, an mga boluntaryo nakabugtak na nin bagong atop, nag-instalar nin bagong banyo, pinalitada asin pinintahan an bilog na enot na  eskalon, asin nag-instalar nin bagong mga iskaparate sa kusina. An pagtatao ninda bako sanang nakapanigo sa pangangaipo kan babae kundi patin nagin mas dayupot sa lambang saro an kongregasyon asin napahanga an mga kataed bilang halimbawa kan tunay na Kristianong pagtatao.

Kadakol kan paagi na puede kitang makatabang nin personal sa iba. Puede daw kitang magtagama nin panahon kaiba an sarong aking lalaki o babae na ilo sa ama? Puede daw kitang mamakal o manahi para sa sarong may edad nang babaeng balo na midbid niato? Puede daw kitang magluto o magtabang sa gastos para sa saro na may limitadong kabuhayan? Dai man niato kaipuhan na magin mayaman tanganing makatabang. Si apostol Pablo nagsurat: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” (2 Corinto 8:12) Pero, an siring daw na personal, direktang pagtatao an solamenteng klase nin pagtatao na bebendisyonan nin Dios? Dai.

Kumusta Man an Organisadong Pag-ayuda?

Kun beses bakong igo an personal na mga paghihingoa. Sa katunayan, si Jesus asin an saiyang mga apostol igwa nin komun na pondo para sa mga dukha, asin nag-aako sinda nin mga donasyon hale sa may pagmakolog na mga tawo na nanunuparan ninda sa saindang gibohon. (Juan 12:6; 13:29) Siring man, an mga kongregasyon kan enot na siglo nagkaigwa nin pangongolekta kan lumataw an pangangaipo asin nag-organisar nin mas dakulang pag-ayuda.​—Gibo 2:​44, 45; 6:1-3; 1 Timoteo 5:​9, 10.

An saro sa siring na mga okasyon luminataw kan mga 55 C.E. An mga kongregasyon sa Judea nagtios, tibaad bilang resulta kan grabeng tiggutom na nangyari kasuarin pa sana. (Gibo 11:27-30) Si apostol Pablo, na pirmeng nahahadit sa mga dukha, nagpatabang sa mga kongregasyon sagkod sa Macedonia. Sia mismo an nag-organisar nin pangongolekta asin naggamit nin aprobadong mga lalaki tanganing ihatod iyan. (1 Corinto 16:1-4; Galacia 2:10) Sia asin an siisay man na iba pang kalabot dai nag-ako nin bayad sa saindang paglilingkod.​—2 Corinto 8:​20, 21.

Andam man na tumabang an Mga Saksi ni Jehova ngonyan kun magkaigwa nin mga kalamidad. Halimbawa, durante nin tig-init kan 2001, an mga bagyo na may makosog na sulog nagin dahelan nin grabeng pagbaha sa Houston, Texas, E.U.A. Siete-sientos beinte tres gabos na harong nin mga Saksi an naraot, na an dakol kaiyan naraot nin grabe. Sarong komite sa pag-ayuda sa kalamidad na kompuesto nin kualipikadong Kristianong kamagurangan an tolos na inorganisar tanganing matantsar an indibiduwal na mga pangangaipo asin matagama an pondong pan-ayuda sa pagtabang sa lokal na mga Saksi na makaya an situwasyon na iyan asin mahirahay an saindang mga harong. Ginibo kan gikan sa boot na mga boluntaryo hale sa kataraed na kongregasyon an gabos na trabaho. Inapresyar na marhay kan sarong Saksi an tabang kaya kan nakua nia an bayad hale sa kompanya nin seguro na kompensasyon sa pagpahirahay kan saiyang harong, tolos niang idinonar an kuarta sa pondong pan-ayuda tanganing makatabang iyan sa iba pang nangangaipo.

 Pero, kun mapadapit sa organisadong institusyon sa pag-abuloy, kaipuhan na magin mapagmaan kita mantang tinuturotimbang niato an dakol na paghagad nin tabang na nareresibi niato. An nagkapirang institusyon sa pag-abuloy may dakulang gastos sa pag-administrar o paghagad nin pondo, kaya kadikit na sanang kabtang kan nakolektang kuarta an napapaduman sa dapat na padumanan kaiyan. An Talinhaga 14:15 nagsasabi: “An siisay man na daing kabatidan nagtutubod sa lambang tataramon, alagad an alisto an isip ineestudyaran an saiyang mga lakad.” Kaya kadonongan nanggad na siyasaton nin maingat an mga detalye.

An Pagtatao na Pinakakapakipakinabang

May sarong klase nin pagtatao na mas importante pa ngani kisa pag-abuloy. Nasambitan ini ni Jesus kan an sarong mayaman asin hoben na namamahala maghapot kun ano an gigibohon nia tanganing magkamit nin buhay na daing katapusan. Sinabihan sia ni Jesus: “Pabakalan an saimong mga sadiri asin tawan iyan sa mga dukha asin magkakaigwa ka nin kayamanan sa langit, asin madia sumunod ka sa sako.” (Mateo 19:16-22) Mangnoha na si Jesus dai sana nagsabing, ‘Magtao ka sa mga dukha asin magkakamit ka nin buhay.’ Imbes, idinugang nia, “Madia sumunod ka sa sako.” Sa ibang pagtaram, minsan ngani kaomaw-omaw asin kapakipakinabang an mga pag-abuloy, labi pa dian an kalabot sa Kristianong pagkadisipulo.

An pangenot ki Jesus iyo an pagtabang sa iba sa espirituwal. Dai nahaloy bago sia magadan, sinabi nia ki Pilato: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Minsan ngani nangenot sia sa pagtabang sa mga dukha, pagpaomay sa mga may helang, asin pagpakakan sa mga nagugutom, sa pangenot sinanay ni Jesus an saiyang mga disipulo na maghulit. (Mateo 10:​7, 8) Sa katunayan, kabilang sa huri niang mga instruksion sa sainda iyo an pagboot na: “Kun siring paduman kamo asin gumibo kamo nin mga disipulo sa mga tawo kan gabos na nasyon.”​—Mateo 28:​19, 20.

Siempre, dai mareresolberan kan paghuhulit an gabos na problema sa kinaban. Pero, an paghiras kan maogmang bareta kan Kahadean nin Dios sa gabos na klase nin tawo nagpapamuraway sa Dios huling naootob kan paghuhulit an kabotan nin Dios asin nagbubukas kan dalan pasiring sa daing katapusan na mga pakinabang para sa mga maako kan mensahe nin Dios. (Juan 17:3; 1 Timoteo 2:​3, 4) Taano ta dai maghinanyog sa sasabihon kan Mga Saksi ni Jehova sa sunod nindang pagdalaw? Minadalaw sinda na may darang espirituwal na regalo. Asin aram ninda na ini an pinakamarahay na paagi na makatatao sinda sa saindo.

[Mga Ritrato sa pahina 6]

Dakol an paagi na ikakapaheling niato na kita nagmamakolog

[Ritrato sa pahina 7]

An satong paghuhulit kan maogmang bareta nakakapaogma sa Dios asin nagbubukas kan dalan pasiring sa daing katapusan na mga pakinabang