Pakanood kan Sekreto nin Pagigin Naninigoan sa Sadiri

Sa sarong nakaparirigon sa boot na surat sa mga Kristiano sa Filipos, si apostol Pablo nagsurat: “Nakanood ako, sa ano man na magin kamugtakan ko, na manigoan sa sadiri. . . . Sa gabos na bagay asin sa gabos na kamugtakan nanodan ko an hilom nin pagigin basog asin nin pagigin gutom, kun paano magin abunda asin kun paano magkulang.”​—Filipos 4:​11, 12.

Ano an sekreto kan pagigin naninigoan sa sadiri ni Pablo? Kun iisipon an halangkaw na kantidad nin mga barakalon asin an kadaihan nin kasegurohan kan ekonomiya sa satong panahon, daing duwa-duwa na kapakipakinabang para sa tunay na mga Kristiano na makanood kun paano magin naninigoan sa sadiri tanganing makakonsentrar sinda sa saindang paglilingkod sa Dios.

SA KAPINONAN kan saiyang surat, isinaysay ni Pablo an dati niang asensadong karera. Sabi nia: “Kun an siisay man na ibang tawo naghohona na sia may mga dahelan na magtiwala sa laman, ako orog na: tinuri sa ikawalong aldaw, hale sa kapag-arakian nin Israel, sa tribo ni Benjamin, sarong Hebreo na namundag sa mga Hebreo; kun dapit sa ley, sarong Fariseo; kun dapit sa kaigotan, naglamag sa kongregasyon; kun dapit sa katanosan na paagi sa ley, saro na pinatunayan an sadiri na daing katuyawan.” (Filipos 3:4-6) Dugang pa, bilang sarong maigot na Judio, si Pablo isinusugo asin sinusuportaran kan poon na mga saserdote sa Jerusalem. Gabos ini nanunuga sa saiya nin kapangyarihan asin prestihio​—sa politika, relihion, asin daing duda sa pinansial​—sa Judiong sistema.​—Gibo 26:​10, 12.

Minsan siring, kan si Pablo nagin maigot na Kristianong ministro, nagkaigwa nin dakulang pagbabago. Para sa kapakanan kan marahay na bareta, gikan sa boot niang binayaan an saiyang asensadong karera asin an gabos na ibinibilang dati na importante. (Filipos 3:​7, 8) Paano na nia ngonyan susustentohan an saiyang sadiri? Igwa daw sia nin sueldo bilang sarong ministro? Paano masusustentohan an saiyang personal na mga pangangaipo?

Inotob ni Pablo an saiyang ministeryo na daing bayad. Tanganing dai magin pagabat sa mga pinaglilingkodan nia, uminiba sia ki Aquila asin Priscila sa paggibo nin tolda mantang yaon sia sa Corinto, asin naggibo man sia nin iba pang bagay tanganing sustentohan an saiyang sadiri. (Gibo 18:1-3; 1 Tesalonica 2:9; 2 Tesalonica 3:8-10) Tolong mahiwas na pagbiahe an ginibo ni Pablo sa pagmimisyonero, asin sia nagbiahe man sa mga kongregasyon na nangangaipong dalawon. Huling sia sibot na marhay sa paglilingkod sa Dios, kakadikit kan saiyang materyal na rogaring. Sa parate an mga tugang an nagtatao kan saiyang mga pangangaipo. Pero, kun beses huli sa bakong paborableng mga sirkunstansia, sia nakaeeksperyensia nin pagkatikapo asin kadaihon. (2 Corinto 11:27; Filipos 4:15-18) Dawa siring, si Pablo dai noarin man nagreklamo sa kamugtakan nia, asin dai sia naara sa mga bagay na yaon sa  iba. Gikan sa boot asin may kaogmahan siang naghigos para sa kapakinabangan kan mga kapwa Kristiano. Sa katunayan, si Pablo an nagkotar kan mga tataramon ni Jesus na aram na marhay: “Igwang orog na kaogmahan sa pagtao kisa pag-ako.” Kanigoan karahay na halimbawa para sa sato gabos!—Gibo 20:33-35.

An Kahulogan kan Pagigin Naninigoan sa Sadiri

An sarong pangenot na dahelan na nagkontribwir sa kaogmahan asin pagkakontento ni Pablo iyo an saiyang pakamate nin pagigin naninigoan sa sadiri. Pero, ano an kahulogan kan magin naninigoan sa sadiri? Sa simpleng pagtaram, nangangahulogan iyan nin pagigin kontento sa pundamental na mga bagay. Mapadapit digdi, sinabihan ni Pablo si Timoteo, an saiyang kaibaiba sa ministeryo: “Sa katotoohan, iyan may dakulang pakinabang, ining diosnon na debosyon kaiba an pagigin naninigoan sa sadiri. Huli ta dai kita nagdara nin ano man sa kinaban, asin dai man kita makadadara nin ano man hale dian. Kaya, mantang igwa na nin kakanon asin gubing, maninigoan na kita sa mga bagay na ini.”​—1 Timoteo 6:6-8.

Mangnohon na iinasosyar ni Pablo an pagigin naninigoan sa sadiri sa diosnon na debosyon. Rinekonoser nia na an tunay na kaogmahan naggigikan sa diosnon na debosyon, an boot sabihon, sa pag-enot sa satong paglilingkod sa Dios, asin bakong sa materyal na mga rogaring o kayamanan. An “kakanon asin gubing” mga bagay na sa paagi kaiyan padagos niang magigibo an diosnon na debosyon. Kaya para ki Pablo an sekreto nin pagigin naninigoan sa sadiri iyo an manarig ki Jehova, ano man an tibaad magin sirkunstansia.

Dakol na tawo ngonyan an nakakaeksperyensia nin grabeng kahaditan asin kamondoan huli ta dai ninda aram an sekretong iyan o dai ninda iyan iniintindi. Imbes na kultibaron an pagigin naninigoan sa sadiri, mas gusto nindang magtiwala sa kuarta asin sa kun ano an mababakal nin kuarta. Ipinamamate kan industriya nin pag-anunsio asin kan media sa mga tawo na dai sinda magigin maogma kun mayo sinda kan pinakabago asin  pinakamamahalon na mga produkto asin gamit na mekanikal o elektroniko​—asin kaipuhan na magkaigwa tolos sinda kaiyan. Bilang resulta, dakol an nabibiktima kan pagmamaigot na magkamit nin kuarta asin materyal na mga bagay. Imbes na manompongan an kaogmahan asin pagkakontento, sinda “nahoholog sa sugot asin sa siod patin sa dakol na daing isip asin nakararaot na mawot, na nagdadara sa mga tawo sa kalaglagan asin kapahamakan.”—1 Timoteo 6:​9, 10.

Nanodan Ninda an Sekreto

Ngonyan na mga aldaw, posible daw talaga na mamuhay na may diosnon na debosyon asin naninigoan sa sadiri patin manompongan an kaogmahan asin pagkakontento? Iyo nanggad. Sa katunayan, minilyon na tawo ngonyan an naggigibo na mismo kaiyan. Nanodan ninda an sekreto nin pagigin maogma sa materyal na mga bagay na igwa sinda. Sinda an Mga Saksi ni Jehova, na nagdusay kan saindang sadiri sa Dios, naggigibo kan saiyang kabotan asin nagtotokdo sa mga tawo kan saiyang katuyohan sa gabos na lugar.

 Halimbawa, isip-isipa an mga nagboluntaryo tanganing sanayon asin ipadara bilang mga misyonero sa bakong pamilyar na mga nasyon tanganing maghulit kan maogmang bareta kan Kahadean nin Dios. (Mateo 24:14) Sa parate, an buhay sa mga nasyon na dinestinohan sa sainda bakong maoswag sa materyal arog kan kinatodan ninda. Halimbawa, kan umabot an mga misyonero sa sarong nasyon sa Asia sa pagpopoon nin 1947, maheheling pa an mga epekto kan guerra, asin pira sanang harong an igwa nin de-koryenteng ilaw. Sa dakol na nasyon, naaraman kan mga misyonero na an paglaba ginigibo nin saro-saro sa ibabaw nin sarong tabla o sa ibabaw nin darakulang gapo sa salog imbes na gumamit nin sarong makinang panlaba. Alagad sinda nagduman tanganing tokdoan an mga tawo kan katotoohan sa Biblia, kaya nakibagay sinda sa lokal na mga kamugtakan asin nagin sibot sa ministeryo.

An iba ginibo an saindang ministeryo na pambilog na panahon o buminalyo sa mga lugar na dai pa naaabot kan maogmang bareta. Si Adulfo labing 50 taon nang naglilingkod bilang pambilog na panahon na ministro sa manlaenlaen na parte nin Mejico. Sabi nia: “Arog ni apostol Pablo, nakanood kaming mag-agom na ibagay an samong sadiri sa mga sirkunstansia. Halimbawa, an saro sa mga kongregasyon na dinalaw mi harayong marhay sa arin man na siudad o saod. Sa kada pagkakan, an mga tugang kontento nang magkakan nin sarong tortilla na may kadikit na mantikilya saka asin patin sarong tasang kape. Iyan sana an pagkakan ninda​—tolong tortilla kada aldaw. Kaya nakanood kaming mamuhay na arog nanggad kan mga tugang. Dakol na arog kaini an naeksperyensiahan ko durante kan 54 taon na naglilingkod ako ki Jehova nin bilog na panahon.”

Nagigirumdoman ni Florentino kun paanong sia asin an saiyang pamilya kinaipuhan na makibagay sa masakit na mga kamugtakan. Ginigirumdom kan sia aki pa, sia nagsabi: “An sakong ama sarong asensadong negosyante. Kagsadiri sia nin dakol na lote. Nagigirumdoman ko pa an counter kan groseriya na sadiri mi. Igwa iyan nin sulong-sulong na mga 50 sentimetro an lakbang asin 20 sentimetro an rarom, asin may apat iyan na laganan. Dian mi ilinalaag an benta kan aldaw. Sa katapusan nin aldaw, iyan pirmeng sobra-sobra nin mga sinsilyo asin kuartang papel.

“Dangan bigla na sana, naeksperyensiahan mi an pagbagsak sa pinansial asin hale sa pagkaigwa nin abunda napasiring sa pagkatikapo. Nawara sa samo an gabos na bagay apuera sa samong harong. Apuera kaini, an saro sa sakong tugang na lalaki naaksidente asin naparalisar an duwang tabay. Nabago nang marhay an gabos. Sa laog nin kadikit na panahon nagtrabaho ako bilang paratinda nin mga prutas asin karne. Nag-ani man ako nin gapas, ubas, asin alfalfa, saka nagtrabaho ako sa pagpatubig sa mga oma. An mga tawo inapod ako na tawong kadakol nin aram na trabaho. Parate kaming rinaranga kan sakong ina sa pagsabi na yaon samo an katotoohan, sarong espirituwal na kayamanan na pira sana an igwa kaiyan. Kaya nanodan kong magkaigwa nin abunda saka magkaigwa nin kadikit o mayo pa ngani. Ngonyan na mga 25 taon na akong naglilingkod ki Jehova nin bilog na panahon, masasabi ko na sa kada aldaw naeeksperyensiahan ko an bendisyon kan pakaaram na pinili ko an pinakamarahay na paagi nin pamumuhay​—an paglilingkod ki Jehova nin bilog na panahon.”

May pagdodoon na sinasabi sato kan Biblia na “an kamugtakan kan kinaban na ini nagbabago.” Huli sa dahelan na ini, sinasadol man kita kaiyan: “An mga nag-oogma [magin] siring sa mga dai nag-oogma, asin an mga nagbabakal siring sa mga dai nin rogaring, asin an mga minagamit kan kinaban siring sa mga dai naggagamit kaiyan nin lubos.”​—1 Corinto 7:29-31.

Kun siring, ngonyan na an panahon na siyasaton na marhay an saimong pamumuhay. Kun limitado an saimong pagbuhay, magmaan na dai maghinanakit, na mapano ngani nin kapaitan asin pagkauri. Sa ibong na lado, ano man na materyal na rogaring an yaon saimo, madonong na ilaag mo iyan sa tamang lugar sa buhay mo tanganing dai ka magin oripon kaiyan. Arog kan sadol ni apostol Pablo, maninigo nanggad na ibugtak an saimong paglaom, “bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong pagkaogma.” Kun gigibohon mo iyan, kun siring, masasabi mo man na nanodan mo an sekreto nin pagigin naninigoan sa sadiri.​—1 Timoteo 6:17-19.

[Ritrato sa pahina 9]

Si Pablo nagtrabaho paagi sa sadiri niang mga kamot tanganing dai magin pagabat sa iba

[Mga Ritrato sa pahina 10]

Rinibo an nakanonompong nin kaogmahan sa buhay na may “diosnon na debosyon kaiba an pagigin naninigoan sa sadiri”