Hanapon an Marahay sa Gabos

“Girumdoma ako, O Dios ko, para sa karahayan.”—NEHEMIAS 13:31.

1. Paano si Jehova naghihirong may karahayan sa gabos?

PAKALIHIS nin dakol na madampog asin malumlom na aldaw, an liwanag kan saldang nagtatao nin nakaoogmang pagkaliwat. Magayon an kondisyon kan isip, asin marahay an pagmate kan mga tawo. Kaagid kaiyan, kasunod nin halawig na mga panahon nin mainiton na sirang kan saldang asin maalingahot na panahon, an dikit na oran​—dawa makosogon na pag-oran​—nagtatao nin represko asin ginhawa. An satong mamomoton na Kaglalang, si Jehova, ikinaag sa atmospera kan daga an makangangalas na balaog na ini na panahon. Dinara ni Jesus an atension sa pagigin buka an palad nin Dios kan itokdo nia: “Padagos na kamotan an saindong mga enemigo asin ipamibi idtong mga naglalamag sa saindo; tanganing mapatunayan nindo na kamo mga aki kan saindong Ama na nasa kalangitan, mantang pinasisirang nia an saiyang saldang sa maraot asin sa marahay asin pinapaoranan nia an matanos asin bakong matanos.” (Mateo 5:43-45) Iyo, si Jehova naghihirong may karahayan sa gabos. An mga lingkod nia maninigong magmaigot na arogon sia paagi sa paghanap kan marahay sa gabos.

2. (a) Basado sa ano si Jehova naghihirong may karahayan? (b) Ano an minamangno ni Jehova sa kun ano an reaksion niato sa saiyang karahayan?

² Basado sa ano si Jehova naghihirong may karahayan? Poon pa kan maholog si Adan sa kasalan, si Jehova pirme nanggad na hinahanap an marahay sa mga tawo. (Salmo 130:​3, 4) An katuyohan nia ibalik an makinuyog na katawohan sa buhay sa Paraiso. (Efeso 1:​9, 10) An saiyang dai na kutana maninigong kabootan nagtao sa sato kan oportunidad na makalda sa kasalan asin pagkabakong sangkap paagi sa ipinanugang Banhi. (Genesis 3:15; Roma 5:​12, 15) An pag-ako sa areglo kan pantubos nagbubukas kan dalan para sa pakabalik sa pagkasangkap pag-abot nin panahon. Minamasdan ngonyan ni Jehova an balang saro sa sato tanganing aramon, kabilang sa iba pang bagay, an satong reaksion sa saiyang pagigin buka an palad. (1 Juan 3:16) Minamangno nia an ano man na  ­ginigibo niato tanganing ipaheling an satong apresasyon sa saiyang karahayan. “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran,” an isinurat ni apostol Pablo.​—Hebreo 6:10.

3. Anong hapot an maninigo niatong pag-olayan?

³ Kun siring, paano niato maaarog si Jehova sa paghanap kan marahay sa iba? Pag-olayan niato an mga simbag sa hapot na ini sa apat na kabtang nin buhay: (1) an Kristianong ministeryo, (2) an pamilya, (3) an kongregasyon, asin (4) an satong relasyon sa iba.

Sa Paghuhulit Asin Paggibo nin Disipulo

4. Paanong an pakikikabtang sa Kristianong ministeryo sarong kapahayagan nin paghanap kan marahay sa iba?

⁴ “An oma iyo an kinaban,” an paliwanag ni Jesus bilang simbag sa mga hapot kan saiyang mga disipulo manongod sa kahulogan kan parabola kan trigo asin mga doot. Bilang mga disipulo ni Cristo sa presenteng aldaw, rinerekonoser niato an katotoohan na ini kun kita nasa ministeryo. (Mateo 13:36-38; 28:​19, 20) Kalabot sa satong ministeryo sa langtad an pagpahayag sa publiko kan satong pagtubod. An mismong katunayan na an mga Saksi ni Jehova midbid na marhay ngonyan sa saindang ministeryo sa harong-harong asin sa mga tinampo patotoo kan satong kahigosan sa paghanap kan gabos na maninigo sa mensahe kan Kahadean. Iyo nanggad, si Jesus nagboot: “Sa ano man na siudad o baryo kamo lumaog, hanapon nindo kun siisay dian an maninigo.”​—Mateo 10:11; Gibo 17:17; 20:20.

5, 6. Taano ta nagpapadagos kita na paorootrong dalawon an mga tawo sa saindang harong?

⁵ Kun nagdadalaw kita sa mga tawo na dai ninda linalaoman, inoobserbaran niato an saindang reaksion sa mensahe niato. Kun minsan naheheling niato na an sarong miembro kan harong maghihinanyog sa sato, mantang an saro naman hale sa laog kan harong minakurahaw, “Dai kami interesado,” asin napopondo na an pagdalaw. Namomondo nanggad kita na an pagkontra o kadaihan nin interes nin sarong tawo nakaaapektar sa reaksion nin iba! Kun siring, ano an magigibo niato tanganing magpadagos sa paghanap kan marahay sa gabos?

⁶ An sunod na pagdalaw niato sa harong pagnaghulit kita sa lugar na iyan puedeng magtao nin oportunidad na makaolay mismo an tawo na puminutol sa naenot na pagdalaw. An paggirumdom sa nangyari kan panahon na iyan makatatabang sa sato na mag-andam. An nagkokontra tibaad naghiro  na may marahay na motibo, na naniniwala na maninigo niang papondohon sa paghinanyog sa mensahe kan Kahadean an tawong naghihimate. An saiyang punto de vista naimpluwensiahan gayod nin putik na impormasyon manongod sa satong mga intension. Alagad bako iyan na olang sa sato na magpadagos sa paghuhulit kan maogmang bareta kan Kahadean sa harong na iyan, na mataktikang hinihingoa na itanos an salang mga pakasabot. Interesado kitang tabangan an gabos na makaabot sa tamang kaaraman dapit sa Dios. Sa panahon na iyan tibaad dagkahon ni Jehova sa saiya an tawong iyan.​—Juan 6:44; 1 Timoteo 2:4.

7. Ano an makatatabang sa sato na magin positibo sa pagdolok niato sa mga tawo?

⁷ Nanabihan sa mga instruksion ni Jesus sa saiyang mga disipulo an pagkontra nin pamilya. Bako daw na sinabi nia: “Ako napadigdi tanganing magpabanga, sa sarong lalaki tumang sa saiyang ama, asin sa sarong aking babae tumang sa saiyang ina, asin sa agom na babae tumang sa saiyang panugangan na babae”? Idinugang ni Jesus: “An magigin mga kaiwal nin saro iyo an kairiba nia sa harong.” (Mateo 10:​35, 36) Pero, nagbabago an mga kamugtakan asin aktitud. An biglang paghelang, pagkagadan nin paryente, mga kalamidad, krisis sa emosyon, asin dai mabilang na iba pang bagay nakaiimpluwensia sa reaksion nin mga tawo sa satong paghuhulit. Kun negatibo an satong punto de vista​—na an mga tawong hinuhulitan niato magdadanay na dai naghihimate​—talaga daw na hinahanap niato an marahay sa sainda? Taano ta dai magayagayang dalawon liwat an saindang harong sa ibang panahon? Tibaad iba nang reaksion an maabotan niato. Kun beses bako sana an sinasabi niato kundi an paagi nin pagsabi niato kaiyan an nagigin dahelan nin pagbago nin reaksion. An odok na pamibi ki Jehova bago kita pumoon na maghulit seguradong matabang sa sato na magin positibo asin ikapresentar an mensahe kan Kahadean sa paaging magugustohan kan gabos.​—Colosas 4:6; 1 Tesalonica 5:17.

8. Ano an puedeng ibunga kun hinahanap kan mga Kristiano an marahay sa saindang daing pagtubod na mga paryente?

⁸ Sa nagkapirang kongregasyon an dakol na miembro nin iyo man sanang pamilya naglilingkod ki Jehova. Sa parate an nakaatraer sa paghanga asin paggalang kan mga nguhod iyo an pagmamaigot nin sarong matuang paryente na an marahay na relasyon sa laog nin pamilya asin nin mag-agom an nagbukas kan dalan tanganing magbago an puso kan mga nguhod. An paghimate sa hatol ni apostol Pedro nakatabang sa dakol na Kristianang agom na madara an saiyang agom na lalaki “minsan daing tataramon.”​—1 Pedro 3:​1, 2.

Sa Pamilya

9, 10. Paano hinanap ni Jacob sagkod ni Jose an marahay sa saindang pamilya?

⁹ An dayupot na bogkos nin mga miembro nin pamilya saro pang kabtang na puede niatong hanapon an marahay sa iba. Estudyare an sarong leksion sa pagtratar ni Jacob sa mga aki niang lalaki. Sa Genesis kapitulo 37, bersikulo 3 asin 4, ipinaheheling kan Biblia na nangongorog an pagkamoot ni Jacob ki Jose. Nauri an mga tugang ni Jose, sagkod na nagkasapakat sinda na gadanon an saindang tugang. Minsan siring, mangnoha an aktitud ni Jacob asin Jose sa huri. Pareho ninda hinanap an marahay sa saindang pamilya.

¹⁰ Kan si Jose naglilingkod bilang pangenot na administrador nin kakanon sa Egipto na nag-aagi nin tiggutom, maogma niang inako an saiyang mga tugang. Minsan ngani dai tolos nagpamidbid, minaniobra nia an mga pangyayari tanganing seguradohon na sinda naaasikasong marhay asin may kakanon na ikakapuli para sa saindang naggugurang nang ama. Iyo, apisar na nagin biktima kan pagkaongis ninda, si Jose naghiro para sa  saindang kapakanan. (Genesis 41:53–​42:8; 45:23) Siring man, kan naghihingagdan na, si Jacob nagpahayag nin makahulang mga bendisyon sa gabos niang aki. Minsan ngani an saindang salang ginibo nagresulta sa dai ninda pag-ako nin nagkapirang pribilehio, mayo ni saro na dai nakabaleng mag-ako nin pamanang daga. (Genesis 49:3-28) Kanigoan karahay na kapahayagan nin nagdadanay na pagkamoot an ipinaheling duman ni Jacob!

11, 12. (a) Anong makahulang halimbawa an nagdodoon kan halaga nin paghanap kan marahay sa laog kan pamilya? (b) Anong leksion an manonodan niato sa halimbawa kan ama sa ilustrasyon ni Jesus kan gastador na aki?

¹¹ An pakatios ni Jehova sa pagtratar sa bakong fiel na nasyon nin Israel nagtatao nin dugang na pakarorop sa kun paano nia hinanap an marahay sa saiyang banwaan. Ginagamit an mga kamugtakan sa pamilya ni propeta Oseas, iinilustrar ni Jehova an saiyang nagdadanay na pagkamoot. Si Gomer, an agom ni Oseas, paorootrong nagkomiter nin pagsambay. Sa ibong kaiyan, pinagbotan ni Jehova si Oseas: “Paduman ka giraray, kamotan mo an sarong babae na namomotan nin kaibaiba asin nagpapasambay, arog kan pagkamoot ni Jehova sa mga aki ni Israel mantang sinda minadolok sa ibang mga dios asin namomoot sa mga tinapay na pasas.” (Oseas 3:1) Taano ta siring an mga instruksion? Aram ni Jehova na sa tahaw kan nasyon na suminuway sa saiyang mga dalan, may mga indibiduwal na mahimate sa saiyang pasensia. Si Oseas nagsabi: “Pakatapos an mga aki ni Israel mabaralik asin hahanapon nanggad si Jehova na saindang Dios, asin si David na saindang hade; asin sinda madorolok nanggad na may pagtakig ki Jehova asin sa saiyang karahayan sa huring kabtang kan mga aldaw.” (Oseas 3:5) Sierto nanggad na marahayon na halimbawa ini na dapat pensaron kun napapaatubang sa pampamilyang mga problema. An saindong pagpadagos na hanapon an marahay sa ibang miembro kan pamilya minsan paano magigin marahayon na halimbawa nin pasensia.

¹² An parabola ni Jesus kan gastador na aki nagtatao nin dugang pang pakarorop sa kun paano niato mahahanap an marahay may labot sa sadiring pamilya niato. An nguhod na aki nagpuli pakatapos na bayaan nia an saiyang marompot na buhay. Trinatar siang may pagkaherak kan saiyang ama. Ano an reaksion kan ama sa mga reklamo kan matuang aki na dai noarin man naghale sa saiyang pamilya? Kaolay an matua niang aki, an ama nagsabi: “Aki ko, danay ka nang nasa kaibahan ko, asin an gabos na bagay na sakuya saimo.” Bako ining anggot na pagkontra kundi pagkumpirmar sana kan pagkamoot kan ama. “Kaipuhan nanggad kitang magpakagayagaya  asin maggayagaya,” an sabi pa nia, “huli ta an tugang mong ini gadan na asin nabuhay, patin sia nawara asin nakua.” Puede man niatong padagos na hanapon an marahay sa iba.​—Lucas 15:11-32.

Sa Kristianong Kongregasyon

13, 14. Ano an sarong paagi nin pagsagibo kan sa hadeng ley nin pagkamoot sa laog kan Kristianong kongregasyon?

¹³ Bilang mga Kristiano, katuyohan niato na isagibo an sa hadeng ley nin pagkamoot. (Santiago 2:1-9) Totoo, tibaad inaako niato an mga kakongregasyon niato na an situwasyon sa materyal laen kisa kan sa sato. Alagad igwa daw kita nin “pagpalaenlaen” huli sa ginikanan na rasa, kultura, o relihion pa ngani? Kun igwa, paano niato puedeng isapuso an hatol ni Santiago?

¹⁴ An maogmang pag-ako sa gabos na nag-aatender sa Kristianong mga pagtiripon ebidensia kan satong pagkamapag-istimar. Kun kita na mismo an umenot na makipag-olay sa mga bagohan na nag-aatender sa Kingdom Hall, an ano man na pagkanerbios asin pagkamasusupgon ninda sa primero posibleng marhay na mawawara. Iyo nanggad, an nagkapira na nag-atender sa sarong Kristianong pagtiripon sa kaenot-enote nagkomento: “Makikatood na gayo an gabos. Garo baga dati na akong midbid kan gabos. Pamugtak an boot ko.”

15. Paano matatabangan an mga hoben sa kongregasyon na magpaheling nin interes sa mga mas may edad na?

¹⁵ Sa nagkapirang kongregasyon, an pirang hoben tibaad nagtitiripontipon sa laog o luwas kan Kingdom Hall pagkatapos nin pagtiripon, na naglilikay na makiasosyar sa mga mas may edad na. Paano daw magigibo an sarong bagay na positibo tanganing mahale an tendensiang ini? Siempre, an enot na lakdang iyo na patuodon kan mga magurang an saindang mga aki sa harong, na inaandam sinda para sa mga pagtiripon. (Talinhaga 22:6) Puede sindang tawan nin trabaho na andamon an laen-laen na publikasyon tanganing an gabos igwa na kan kaipuhan na dadarahon sa mga pagtiripon. An mga magurang nasa pinakamarahay man na kamugtakan na dagkahon an saindang mga aki na makipag-olay nin kadikit sa mga mas may edad na asin maluya na an hawak sa Kingdom Hall. An pagkaigwa nin sarong bagay na makahulogan na sabihon sa sainda puedeng magpamate nin satispaksion sa mga aki.

16, 17. Paano mahihimo kan mga nasa edad na na hanapon an marahay sa mga hoben sa kongregasyon?

¹⁶ An mga mas may edad nang tugang na lalaki asin babae maninigo na magpaheling nin interes sa mga aki sa kongregasyon. (Filipos 2:4) Puedeng sinda na mismo an umenot na makipag-olay sa mga aki sa nakaparirigon sa boot na paagi. Sa parate may marahayon na mga puntong ipinaliwanag durante kan pagtiripon. Puedeng hapoton an mga aki kun nagustohan ninda an pagtiripon asin kun baga igwa nin ano man na mga punto na nangorognang inapresyar ninda asin puedeng iaplikar. Bilang mahalagang kabtang kan kongregasyon, an mga hoben maninigong tawan nin pagrekonoser sa saindang pagigin atento asin nin komendasyon sa ano man na komento ninda durante kan pagtiripon o sa ano man na kabtang ninda sa programa. An paagi nin interaksion kan mga aki sa mga mas may edad na sa kongregasyon asin an paagi nin pag-asikaso ninda sa simpleng mga trabaho sa harong magpaparisa na posibleng marhay na kaya nindang asikasohon an mas dakulang mga paninimbagan pag-abot nin panahon.​—Lucas 16:10.

¹⁷ Paagi sa pag-ako nin paninimbagan, an  nagkapirang aki uminoswag sagkod sa punto na an saindang espirituwal na mga kualidad nagpangyari sa sainda na mag-ako nin mas magabat na mga asignasyon. An pagkaigwa nin gigibohon puede man na makatabang na mapogolan an paglinoko. (2 Timoteo 2:22) Paagi sa siring na mga asignasyon ‘mababalo kun baga angay’ an mga tugang na lalaki na naghihingoang maabot an paglilingkod bilang ministeryal na mga lingkod. (1 Timoteo 3:10) An saindang andam na pagpartisipar sa mga pagtiripon asin an saindang kaigotan sa ministeryo, saka an saindang pagigin mapagmakolog sa gabos sa kongregasyon, nakatatabang sa kamagurangan na mamansayan an saindang potensial kun iniisip nindang tawan sinda nin dugang na asignasyon.

Paghanap kan Marahay sa Gabos

18. Anong natatagong mga peligro kun dapit sa paghokom an dapat na likayan, asin taano?

¹⁸ “An pagpaheling nin pagpaorog sa paghokom bakong marahay,” an sabi kan Talinhaga 24:23. An langitnon na kadonongan naghahagad na likayan kan kamagurangan an pagpaorog kun naghohokom sa mga bagay-bagay sa kongregasyon. Si Santiago nagsabi: “An kadonongan hale sa itaas enot sa gabos mabini, dangan toninong, rasonable, andam na magkuyog, pano nin pagkaherak asin marahay na mga bunga, dai nagpapalaenlaen na may ipinaoorog, bakong ipokrito.” (Santiago 3:17) Siempre pa, minsan ngani hinahanap an marahay sa iba, kaipuhan na seguradohon kan kamagurangan na an saindang paghokom dai natatahoban nin personal na mga relasyon o emosyon. “An Dios yaon sa kasararoan kan Banal na Saro,” an isinurat ni salmista Asaf. “Sa tahaw kan mga dios [“mga arog-dios,” nota sa ibaba, na nanonongod sa mga hokom na tawo] sia naghohokom: ‘Sagkod noarin kamo maghohokom sa inhustisya asin magpapaorog sa mga maraot?’ ” (Salmo 82:​1, 2) Huli kaiyan, linilikayan kan Kristianong kamagurangan an ano man na tendensia nin paboritismo sa mga bagay na kalabot an sarong katood o paryente. Paagi kaini iniingatan ninda an pagkasararo kan kongregasyon asin tinotogotan na bumolos nin suelto an espiritu ni Jehova.​—1 Tesalonica 5:23.

19. Sa anong mga paagi niato mahihimong hanapon an marahay sa iba?

¹⁹ Sa paghanap kan marahay sa satong mga tugang na lalaki asin babae, ipinababanaag niato an aktitud ni Pablo kan kaolayon nia an kongregasyon sa Tesalonica. Sia nagsabi: “Dugang pa, kami may kompiansa sa Kagurangnan mapadapit sa saindo, na ginigibo nindo asin padagos na gigibohon an mga bagay na samuyang ipinagboot.” (2 Tesalonica 3:4) Mas may tendensia kita na lingawan an mga sala nin iba kun hinahanap niato an marahay sa sainda. Mahanap kita nin mga bagay na puede niatong tawan nin komendasyon an satong mga tugang, na linilikayan nanggad an pagigin mapagkritikar. “An hinahanap sa mga mayordomo,” an isinurat ni Pablo, “iyo na an tawo makuang fiel.” (1 Corinto 4:2) An pagigin fiel bako sana kan mga igwa kan katongdan nin pagigin mayordomo sa kongregasyon kundi kan gabos niatong Kristianong tugang na lalaki asin babae an dahelan na napapamahal sinda sa sato. Sa siring orog kitang napaparani sa sainda, na pinakokosog an mga bogkos nin Kristianong pagkakatood. Inaarog niato an pagmansay ni Pablo sa mga tugang kan saiyang kaaldawan. Sinda ‘mga kapwa trabahador para sa kahadean nin Dios’ asin “tabang na nagpapakosog” sa sato. (Colosas 4:11) Sa siring ipinaheheling niato an aktitud ni Jehova.

20. Anong mga bendisyon an kakamtan kan mga hinahanap an marahay sa gabos?

²⁰ Seguradong inaarog niato an pamibi ni Nehemias: “Girumdoma ako, O Dios ko, para sa karahayan.” (Nehemias 13:31) Naoogma nanggad kita na hinahanap ni Jehova an marahay sa tawo! (1 Hade 14:13) Logod na arogon man niato iyan sa satong mga pagtratar sa iba. An paggibo kaiyan nagtatao sa sato kan oportunidad na pagkabalukat asin buhay na daing sagkod sa bagong kinaban na haranihon na ngonyan.​—Salmo 130:3-8.

Ano an Isisimbag Nindo?

• Basado sa ano si Jehova naghihirong may karahayan sa gabos?

• Paano niato mahihimong hanapon an marahay sa iba

• sa satong ministeryo?

• sa satong pamilya?

• sa satong kongregasyon?

• sa gabos niatong relasyon?

[Mga Hapot Para sa Pag-adal]

[Ritrato sa pahina 18]

Apisar kan pagkaongis sa saiya kan saiyang mga tugang kan enot, hinanap ni Jose an ikararahay ninda

[Ritrato sa pahina 19]

An pagkontra dai nakapopogol sa sato sa paghingoang tabangan an gabos

[Ritrato sa pahina 20]

Sa ibong kan saindang nakaagi, mayo ni saro sa mga aki ni Jacob na dai nakabale sa mga bendisyon nia

[Ritrato sa pahina 21]

Maogmang akoon an gabos sa Kristianong mga pagtiripon