Mga Hapot Hale sa mga Parabasa

May kakayahan daw si Satanas na Diablo na basahon an isip nin tawo?

Minsan ngani dai kita puedeng magin dogmatiko, malataw na si Satanas ni an saiyang mga demonyo mayo nin kakayahan na basahon an satong mga iniisip.

Estudyare an deskriptibong mga ngaran na iinatribwir ki Satanas. Inapod siang Satanas (Paratumang), Diablo (Parabalobagi), Halas (kaparehong kahulogan nin Paradaya), Parasugot, asin Putikon. (Job 1:6; Mateo 4:3; Juan 8:44; 2 Corinto 11:3; Kapahayagan 12:9) Mayo sa deskriptibong mga ngaran na ini an nagpaparisa na may kakayahan si Satanas na basahon an isip.

Minsan siring, bilang pagkokomparar, si Jehova Dios ilinaladawan bilang “an parasiyasat sa puso.” (Talinhaga 17:3; 1 Samuel 16:7; 1 Cronica 29:17) ‘Mayo nin linalang na bakong hayag sa pagheling ni Jehova,’ an sabi kan Hebreo 4:​13, “kundi an gabos na bagay huba asin bukas sa mga mata kaidtong satong paninimbagan.” Bakong makangangalas, tinawan ni Jehova an saiyang Aki, si Jesus, kan kakayahan na siyasaton an puso. Ipinahahayag kan binuhay liwat na si Jesus: “Ako iyo an nagsisiyasat kan mga bato asin puso, asin ako matao sa lambang saro sa saindo nin segun sa saindong mga gibo.”​—Kapahayagan 2:23.

Dai sinasabi sa Biblia na kayang siyasaton ni Satanas an puso asin isip nin mga tawo. Makahulogan ini, huling inaasegurar kita ni apostol Pablo na an mga Kristiano ‘bakong ignorante kan mga pakana ni Satanas.’ (2 Corinto 2:11) Kaya dai kita kaipuhan na matakot na si Satanas may ekstraordinaryong kakayahan na biyong dai kita nin pakaaram.

Minsan siring, dai ini nangangahulogan na dai kayang mamansayan kan satong Kaiwal an satong mga kaluyahan. Halawigon nang panahon na pinag-adalan ni Satanas an gawe-gawe nin tawo. Dai nia kaipuhan na mabasa an mga isip tanganing mamansayan an satong ugale, tanganing maobserbaran kun anong pag-aling-aling an hinahanap niato, o tanganing madangog kun anong mga bagay an sinasabi niato, asin iba pa. An satong panlauog asin postura puede man na magtao nin ideya sa kun ano an iniisip o nasa boot niato.

Pero sa pankagabsan, ginagamit ni Satanas an iyo man sanang mga paagi na ginamit nia sa tatamnan nin Eden​—kaputikan, panloloko, asin salang impormasyon. (Genesis 3:1-5) Minsan ngani dai kaipuhan na matakot an mga Kristiano na mababasa ni Satanas an saindang isip, may dahelan nanggad sinda na mahadit manongod sa kun anong mga kaisipan an tibaad hingoahon ni Satanas na ilaog sa saindang isip. Gusto nia na magin “maraot an isip asin nawaran kan katotoohan” an mga Kristiano. (1 Timoteo 6:5) Bakong makangangalas na an kinaban ni Satanas nagpabaha nin kadakoldakol na nakararaot na impormasyon asin aling-alingan. Tanganing mapaglabanan an pagsalakay na ini, dapat na protehiran kan mga Kristiano an saindang isip paagi sa pagsulot kan “takop sa payo na kaligtasan.” (Efeso 6:17) Ginigibo ninda ini paagi sa pagpano kan saindang isip nin mga katotoohan sa Biblia asin paglikay sa dai kaipuhan na koneksion sa nakaparirigsok na mga impluwensia kan kinaban ni Satanas.

Si Satanas masakit daogon na kalaban. Alagad dai kaipuhan na magkaigwa kita nin may pagkangiring takot sa saiya o sa saiyang mga demonyo. Inaasegurar kita kan Santiago 4:7: “Tumangon nindo an Diablo, asin sia madulag sa saindo.” Kun susunodon niato an konsehong ini, ikapapahayag niato, arog ni Jesus, na si Satanas mayo nin kapangyarihan sa sato.​—Juan 14:30.