Paglilingkod sa Sarong Napapalaen na Grupo nin Magkakalenguahe sa Korea

SARONG entusiastikong marhay alagad toninong na grupo an nagtiripon para sa sarong pandistritong kombension kan Mga Saksi ni Jehova kan tig-init nin 1997. Ini an kaenot-enoteng kombension na arog kaiyan sa Korea para sa mga bungog asin may diperensia sa pagdangog. Igwa iyan nin pinakahalangkaw na kabilangan nin nag-atender na 1,174. An bilog na programa—kaiba an mga pahayag, interbio, asin drama​—iprinesentar sa Koreanong Pagtaram sa Senyas asin naggamit nin projector kaya nadadalan sa sarong dakulang tilon na naheheling sa bilog na Assembly Hall. Ini an kulminasyon kan dakol na taon nin kahigosan kan kadakol na boluntaryo.

Maabot an panahon sa sarong paraiso digdi sa daga na “an mismong mga talinga kan mga bungog magkakaburukasan.” (Isaias 35:5) Tanganing maeksperyensiahan an buhay sa Paraisong iyan, an lambang saro, kaiba an mga bungog, kaipuhan ngunang maglaog sa espirituwal na paraiso, an maoswag na kamugtakan sa espirituwal kan maogmang banwaan nin Dios. Kaipuhan na sinda magin nagdusay, bautisadong mga Saksi ni Jehova, na natokdoan nia.—Miqueas 4:1-4.

Sadit na Kapinonan

Minsan ngani may ginigibo nang paghuhulit sa mga bungog kan mga taon nin 1960, kaidto sanang mga taon nin 1970 na an nagkapira sa sainda nagpoon na mag-atender sa mga pagtiripon kan Mga Saksi ni Jehova sa Seoul, an kabiserang siudad nin Korea. Sarong Kristianong tugang na lalaki na marikas magsurat an naggamit nin sarong pisara tanganing suratan kan mayor na mga punto kan mga pahayag, kaiba an ginamit na mga teksto sa Biblia.

Kan 1971 sa siudad nin Taejon, an sarong Saksi na may bungog na aking lalaki an nagpoon na itokdo digdi asin sa mga bungog na katood kaini an mensahe kan Kahadean. Sa grupong ini naggikan an nagkapirang maigot na indibiduwal na iyo ngonyan an pangenot na nagsusuportar sa teritoryong naggagamit nin pagtaram sa senyas.​—Zacarias 4:10.

 An mga Hoben Gikan sa Boot na Nagpepresentar kan Saindang Sadiri

Kun ilalaog sa isip kan mga bungog an kaaraman dapit ki Jehova asin ki Jesus patin sa siring maglalakaw sa dalan pasiring sa buhay, darudakulang paghihingoa an kaipuhan na gibohon kan ibang boluntaryo. (Juan 17:3) Tanganing magibo ini, dakol-dakol na Saksi ni Jehova an nag-adal nin pagtaram sa senyas asin binendisyonan nin nakapakokosog na mga eksperyensia.

An sarong 15 anyos, si Park In-sun, ginibong pasohan na makanood nin pagtaram sa senyas. Tanganing magibo iyan, nagin siang painante sa sarong pabrika na may 20 bungog na trabahador. Sa laog nin walong bulan nagtrabaho sia kaiba ninda tanganing makanood kan lenguahe asin kun paano mag-isip an mga bungog. Kan suminunod na taon, sia nagin regular payunir o bilog na panahon na parabalangibog kan Kahadean, asin nagtabang sa sarong grupo nin mga bungog na interesado sa katotoohan sa Biblia. An grupo marikason na nagdakol, asin dai nahaloy labing 35 na an nag-aatender sa mga pagtiripon kun Domingo.​—Salmo 110:3.

Pakatapos kaiyan, sa kaenot-enoteng pangyayari sa Seoul, an Kristianong mga pagtiripon eksklusibong iinareglo sa pagtaram sa senyas. Si tugang na Park In-sun naglingkod bilang espesyal payunir sa nagdadakulang grupong ini. Sia eksperto na ngonyan sa pagtaram sa senyas. Durante kan nagkapirang bulan, namayo sia nin 28 pag-adal sa Biblia sa mga bungog. Dakol sa mga ini an nag-oswag asin nagin mga Saksi ni Jehova.

Bilang resulta kan aktibong marhay na pagboluntaryong ini, naorganisar an enot na kongregasyon sa pagtaram sa senyas sa Seoul kan Oktubre 1976, na may 40 parahayag asin 2 regular payunir. Ini an nagtulod kan aktibidad sa iba pang siudad sa Korea. Dakol na bungog an may pagkagutom sa marahay na bareta asin naghahalat na madalaw.

Paglilingkod sa mga Bungog

Tibaad nag-iisip-isip kamo kun paano nanonompongan an mga bungog. Dakol sa sainda an nanompongan paagi sa mga rekomendasyon. Siring man, dinodolok an kagsadiri nin lokal na mga bakalan nin bagas, asin itinatao ninda an ngaran asin adres kan mga bungog. Nakatatabang man an nagkapirang opisina nin gobyerno sa pagtao kan siring na impormasyon. Mapangganang marhay an mahigos na pagkobre kan teritoryo kun saen nakaistar an mga bungog kaya, nag-abot an panahon, apat na kongregasyon sa pagtaram sa senyas an naorganisar. Dakol na Kristianong hoben an naenkaminar na mag-adal kan pagtaram sa senyas.

An espesyal payunir na mga ministro na nakanood kan pagtaram sa senyas iinasignar kan sangang opisina kan Mga Saksi ni Jehova sa mga kongregasyon na iyan. Mas bago pa sana, an mga naggradwar sa Paadalan sa Ministeryal na Pagsasanay iinasignar sa mga kongregasyon na ini asin pinakosog sinda sa espirituwal.

May mga kadepisilan na dapat pangganahan. An paglilingkod sa teritoryong ini nangangaipo nin paghihingoa na masabotan an kultura kan mga bungog. Sinda prangkang mag-isip asin maghiro. Nabibigla kun beses an mga tawo asin tibaad magin dahelan nin dai pagkasinabotan. Apuera kaini, kun an mga Saksi namamayo nin mga pag-adal sa Biblia sa mga bungog, kaipuhan na tabangan sinda na magin eksperto sa sadiri nindang lenguahe asin enkaminaron sindang paoswagon an sadiri nindang programa nin pagbasa asin pag-adal.

Sa pan-aroaldaw nindang mga aktibidad, an mga bungog napapaatubang sa mga kadepisilan na haros dai aram kan iba. Parateng nagigin dakulang problema para sa sainda an pakikomunikar sa mga opisina nin gobyerno asin pasilidad sa pag-asikaso sa salud, siring man sa simpleng mga transaksion sa negosyo. Huling an mga Saksi sa  kaharaning mga kongregasyon nag-alok nin mamomoton na tabang, an mga bungog sa Kristianong kongregasyon, nakaeksperyensia kan tunay na pagkanitugang.​—Juan 13:​34, 35.

An Impormal na Paghuhulit Nagkaigwa nin mga Resulta

Sa Pusan, na mayor na duongan na siudad sa timog nin Korea, an sarong Saksi dai tuyong nanuparan an duwang bungog na nagsurat sa sarong kapidasong papel: “Gusto mi an Paraiso. Gusto ming maaraman an mga teksto na nagsasabi manongod sa buhay na daing katapusan.” Ilinista kan tugang na lalaki an saindang adres asin iinareglong dalawon sinda. Kan dinalaw nia sinda, naabotan nia an sarong kuarto na pano nin mga bungog na naghahalat na madangog an mensahe kan Kahadean. An eksperyensiang ini an nagin dahelan na nagpoon siang mag-adal nin pagtaram sa senyas. Dai nahaloy naorganisar an sarong kongregasyon sa pagtaram sa senyas sa Pusan.

Narisa kan sarong tugang na lalaki sa kongregasyon na iyan an duwang bungog na nagsesenyasan asin dinolok sinda. Kan maaraman nia na hale pa sana sinda sa pag-atender sa sarong relihiosong pagtiripon, inimbitaran nia sinda sa Kingdom Hall sa oras na alas dos nin hapon sa aldaw man sanang iyan. Sinda uminabot, asin naponan an sarong pag-adal sa Biblia. Dai nahaloy pakatapos kaiyan, an 2 nag-atender sa pandistritong kombension kaiba an 20 sa saindang bungog na katood. Hale sa grupong iyan, nagkapira an nagdusay kan saindang buhay ki Jehova. Duwa an nagin magurang sa kongregasyon asin saro an nagin ministeryal na lingkod sa mga kongregasyon sa pagtaram sa senyas.

 Binalosan an Determinasyon

Mantang an nagkapirang bungog nakaistar na harayo sa arin man na kongregasyon sa pagtaram sa senyas, dakulang paghihingoa asin determinasyon an parateng kaipuhan tanganing ikatao sainda an regular na espirituwal na pagkakan hale sa Biblia. Halimbawa, an sarong 31 anyos na lalaki naghahanap-buhay paagi sa paninira sa gilid nin sarong isla. Nadangog nia an mensahe sa Biblia sa saiyang nguhod na tugang na lalaki, na nakaolay nin mga Saksi ni Jehova. Sa paghingoang mapanigoan an saiyang espirituwal na gutom, an bungog na parasirang ini nagbaroto nin 16 kilometros pasiring sa Siudad nin Tongyoung, sa timog na baybayon kan Korea. Ginigibo nia iyan tanganing tagboon an sarong espesyal payunir na hale sa kongregasyon sa pagtaram sa senyas sa Siudad nin Masan. Kada Lunes, an espesyal payunir na ini nagbibiahe nin 65 kilometros tangani sanang pamayohan nin pag-adal sa Biblia an bungog na parasirang ini.

Tanganing makaatender sa pagtiripon kun Domingo sa Siudad nin Masan, an bungog na inaadalan sa Biblia kaipuhan na magbaroto nin 16 kilometros dangan magsakay sa auto nin 65 kilometros pa. An saiyang determinasyon nagbunga. Sa laog nin pira sanang bulan, nag-oswag an saiyang pagtaram sa senyas, nakanood nin dugang pang alpabetong Koreano, asin​—an pinakaimportante​—nanodan nia an solamenteng paagi nin pagpatalubo nin relasyon ki Jehova. Huling narealisar an kahalagahan kan mga pagtiripon asin regular na paghuhulit, buminalyo sia sa teritoryo kan kongregasyon sa pagtaram sa senyas. Pasil daw iyan? Dai. Kinaipuhan niang bayaan an saiyang trabahong paninira na ginaganaran nia nin sagkod $3,800 dolyares kada bulan, alagad an saiyang determinasyon binalosan. Pagkatapos na umoswag sa katotoohan, sia nabautismohan asin maogma ngonyan na naglilingkod ki Jehova kaiba an saiyang pamilya.

Pagtradusir Para sa mga Bungog

An maogmang bareta kan Kahadean parateng ipinapaabot paagi sa pagtaram. Minsan siring, tanganing ikapaabot nin mas tama an mensahe hale sa Tataramon nin Dios, kaipuhan na ipresentar an katokdoan kan Biblia sa mas permanenteng porma. Sa siring, kan enot na siglo, isinurat an mga libro asin surat kan eksperyensiadong gurang na mga lalaki. (Gibo 15:22-31; Efeso 3:4; Colosas 1:2; 4:16) Sa satong panahon, itinatao an abundang espirituwal na kakanon paagi sa mga libro asin iba pang Kristianong publikasyon. Itrinadusir ini sa ginatos na lenguahe, kaiba an manlaenlaen na pagtaram sa senyas. Tanganing magibo ini sa Koreanong Pagtaram sa Senyas, an sangang opisina igwa nin departamento sa pagtradusir sa pagtaram sa senyas. An departamento sa video nagpoprodusir nin mga video para sa pagtaram sa senyas. Nagtatao ini nin espirituwal na pagkakan para sa mga bungog na parabalangibog kan maogmang bareta asin sa mga interesado sa mga kongregasyon sa bilog na Korea.

Minsan ngani dakol an nagin eksperto sa pagtaram sa senyas asin nakatabang sa pagprodusir kan mga video, sa parate an pinakamarahay na paratradusir iyo an mga aki kan bungog na mga magurang. Nanodan ninda an pagtaram sa senyas poon sa pagkaomboy. An mga ini bako sanang nagsesenyas nin tama kundi patin nagtatao nin odok sa pusong pakahulogan asin pagdodoon sa mensahe paagi sa saindang pagmustra asin panlauog, sa siring naaabot ninda an isip asin puso.

Siring kan nasambitan na, an mga kombension asin asamblea sa pagtaram sa senyas ginigibo na nin regular sa Korea. Dakulang trabaho, gastos, asin paghihingoa an kaipuhan tanganing magibo ini. Minsan siring, an mga nag-atender nagpapasalamat sa areglong ini. Pagkatapos kan mga pagtiripon na ini, dakol an dai nguna naghahale, na gustong ipadagos an nakapakokosog na pakikiasosyar asin pag-olayan an itinaong marahayon na espirituwal na kakanon. Malinaw nanggad, an paglilingkod sa napapalaen na grupong ini igwa nin mga kadepisilan, alagad an espirituwal na mga bendisyon sulit na marhay.

[Ritrato sa pahina 10]

Mga video sa pagtaram sa senyas na prinodusir sa Korea: “What Does God Require of Us?,” “Appreciating Our Spiritual Heritage,” “Warning Examples for Our Day,” asin “Respect Jehovah’s Authority”

[Mga Ritrato sa pahina 10]

Paitok poon sa ibaba: Video sa pagtaram sa senyas na pinoprodusir sa sangang opisina sa Korea; pag-andam nin mga senyas para sa teokratikong mga termino; grupo nin mga paratradusir sa pagtaram sa senyas; pagsenyas sa parasenyas durante nin paggibo nin video