Saro Sana daw na Kinaugalean o Panunuhol?

SA NAGKAPIRANG kolehio sa Polandia, kinaugalean na kan mga estudyante na mangolekta nin kuarta tanganing bumakal nin mga regalo para sa saindang mga maestra, na naglalaom na makakua nin haralangkaw na grado sa saindang mga eksamin. Bakong makangangalas na napaatubang an sarong hoben na Kristiana na an ngaran Katarzyna sa sarong depisil na situwasyon. “Matao daw ako nin kuarta o dai?” an inisip-isip nia. An kairiba nia nangatanosan: “Ordinaryo nang kinaugalean ini. Mayong mawawara sa saimo, alagad makikinabang kang marhay, kaya taano ta nagduduwaduwa ka?”

“Inaadmitir ko na sa enot na taon kan sakong pag-eskuela, nagpartisipar ako sa pangongolekta nin kuarta,” an pag-admitir ni Katarzyna. “Kan huri ko na sana narealisar na sa paaging ini nagsuportar ako sa panunuhol, na kinokondenar sa Biblia.” Nagirumdoman nia an mga teksto na nagpapaheling na makosog na dai inooyonan ni Jehova an panunuhol. (Deuteronomio 10:17; 16:19; 2 Cronica 19:7) Sabi ni Katarzyna: “Nasabotan ko kun gurano kapasil na magpadara sa impluwensia nin kairiba. Pinag-isipan ko giraray iyan asin poon kaidto dai na ako nakikabtang sa kinaugalean na ini.” Sa nag-aging tolong taon, sa ibong kan pag-olog-olog kan ibang mga estudyante, ikinapaliwanag nia sa nagkapira na dai sia nagpapartisipar sa mga pangongolektang ini para sa “pagregalo” huli sa saiyang kombiksion na basado sa Biblia.

Sinahotan kan nagkapira si Katarzyna nin pagigin maimot asin may pagkaantisosyal. “Antipatiko pa man giraray sako an nagkapira sa sainda,” an sabi nia. “Sa ibong na lado, rinerespeto nin dakol an sakong punto de vista, na nagpapaogma sa sako.” Namidbid si Katarzyna bilang saro sa Mga Saksi ni Jehova, na nag-ootob kan mga prinsipyo sa Biblia sa pangaroaldaw na buhay.