“An Dios Pagkamoot”

“An dai namomoot dai nakakamidbid sa Dios, huli ta an Dios pagkamoot.”​—1 JUAN 4:8.

1-3. (a) Ano an deklarasyon kan Biblia manongod sa kualidad ni Jehova na pagkamoot, asin sa anong paagi daing kaagid an deklarasyon na ini? (b) Taano ta sinasabi kan Biblia na “an Dios pagkamoot”?

AN GABOS na kualidad ni Jehova marahayon, sangkap, asin nakaaakit. Alagad an pinakakawiliwili sa gabos na kualidad ni Jehova iyo an pagkamoot. Mayo nang iba na nakadadagka sa sato na rumani ki Jehova na siring na gayo kakosog kan saiyang pagkamoot. Marahay sana ta an pagkamoot iyo man an saiyang nangingibabaw na kualidad. Paano niato iyan naaaraman?

² An Biblia may sinasabi manongod sa pagkamoot na nungkang sinasabi kaiyan manongod sa iba pang pangenot na kualidad ni Jehova. Dai sinasabi kan Kasuratan na an Dios kapangyarihan o na an Dios hustisya o na an Dios kadonongan ngani. Sia igwa kan mga kualidad na iyan asin sia an pinakaginigikanan kan gabos na tolong iyan. Pero manongod sa pagkamoot, may sinasabing mas hararom sa 1 Juan 4:8: “An Dios pagkamoot.” Iyo, an pagkamoot nakaiimpluwensiang marhay ki Jehova. Iyan an pinakaubod, o naturalesa nia. Sa pankagabsan, puede niato iyan na isipon nin arog kaini: An kapangyarihan ni Jehova nagpapangyari sa saiya na humiro. An saiyang hustisya asin an saiyang kadonongan naggigiya sa saiyang paghiro. Minsan siring, an pagkamoot ni Jehova nagmomotibar sa saiya na humiro. Asin an pagkamoot nia pirmeng nababanaag sa paagi nin paggamit nia kan iba niang kualidad.

³ Parateng sinasabi na si Jehova iyo an mismong personipikasyon nin pagkamoot. Huli kaini, kun gusto niatong makanood manongod sa pagkamoot, dapat na kita makanood manongod ki Jehova. Kun siring, siyasaton niato an nagkapirang aspekto kan daing kaagid na pagkamoot ni Jehova.

 An Kadarudakulaing Akto nin Pagkamoot

4, 5. (a) Ano an kadarudakulaing akto nin pagkamoot sa bilog na kasaysayan? (b) Taano ta masasabi niato na si Jehova asin an saiyang Aki pinagsaro kan pinakamakosog na bogkos nin pagkamoot kasuarin man?

⁴ Si Jehova nagpaheling nin pagkamoot sa dakol na paagi, alagad may saro na nakalalabi sa gabos na iba pa. Ano daw iyan? Iyan an pagsugo nia sa saiyang Aki tanganing magdusa asin magadan para sa sato. Masasabi niato nin daing makakokontra na ini an kadarudakulaing akto nin pagkamoot sa bilog na kasaysayan. Taano ta masasabi niato iyan?

⁵ Si Jesus inaapod kan Biblia na “an panganay sa gabos na linalang.” (Colosas 1:15) Isip-isipa na sana​—buhay na an Aki ni Jehova bago an pisikal na uniberso. Kun siring, gurano kahaloy na nag-ibaiba an Ama asin an Aki? Kinakalkulo nin nagkapirang sientista na an uniberso 13 bilyones nang taon an edad. Pero, dawa kun tama an kalkulong ini, kulang an lawig na iyan tanganing magrepresentar sa lawig nin buhay kan panganay na Aki ni Jehova! Ano an ginigibo nia durante kan gabos na panahon na idto? An Aki magayagayang naglingkod bilang “pangenot na trabahador” kan saiyang Ama. (Talinhaga 8:30; Juan 1:3) Si Jehova asin an saiyang Aki nagtabang na gibohon an gabos na ibang bagay. Abaa kanakapalulukso sa puso, kaogma kan mga panahon nin pag-ibaiba ninda! Kun siring, siisay sa sato an makarororop sa puersa nin bogkos na nag-eksister sa siring kalawig na panahon? Malinaw nanggad, si Jehova Dios asin an saiyang Aki pinagsaro kan pinakamakosog na bogkos nin pagkamoot kasuarin man.

6. Kan magpabautismo si Jesus, paano ipinahayag ni Jehova an saiyang mga saboot manongod sa Saiyang Aki?

⁶ Minsan siring, isinugo ni Jehova an saiyang Aki sa daga tanganing mamundag bilang omboy na tawo. An paggibo kaiyan nangahulogan na sa laog nin nagkapirang dekada, dai na nguna makakaibaiba nin dayupot ni Jehova an saiyang namomotan na marhay na Aki sa langit. May dakulaon na interes, nagmasid Sia duman sa langit mantang si Jesus nagdadakula na magin tawong sangkap. Sa edad na mga 30 anyos, nagpabautismo si Jesus. Sa okasyon na idto an Ama personal na nagtaram hale sa langit: “Ini an sakong Aki, an namomotan, na sakong inooyonan.” (Mateo 3:17) Sa pakaheling na fiel na ginibo ni Jesus an gabos na ihinula, an gabos na hinahagad sa saiya, seguradong ogmahon an saiyang Ama!​—Juan 5:36; 17:4.

7, 8. (a) Ano an inagihan ni Jesus kan Nisan 14, 33 C.E., asin ano an nagin epekto sa saiyang langitnon na Ama? (b) Taano ta itinogot ni Jehova na an saiyang Aki magdusa asin magadan?

 ⁷ Pero, ano an nagin pagmate ni Jehova kan Nisan 14, 33 C.E., mantang si Jesus pinasasaloiban dangan inarestar nin anggot na pagsururog? Mantang si Jesus inoolog-olog, linulutaban, asin sinusuntok? Mantang sia linalatigo, na nagkakarulugad an saiyang likod? Mantang sia ipinapako, sa kamot asin sa bitis, sa sarong palong kahoy asin pinabayaan na nakabitin duman mantang minumuda sia nin mga tawo? Ano an nagin pagmate kan Ama mantang nagkukurahaw sa saiya an namomotan niang marhay na Aki huli sa inaagihan na labi-labing kasakitan? Ano an nagin saboot ni Jehova kan mautsan si Jesus asin, sa kaenot-enote poon kan magpoon an gabos na paglalang, an mahal Niang Aki daing buhay?​—Mateo 26:14-16, 46, 47, 56, 59, 67; 27:​26, 38-44, 46; Juan 19:1.

⁸ Mantang may pagmate si Jehova, an kolog na siertong tinios nia huli sa pagkagadan kan saiyang Aki dai kayang ipahayag kan satong mga tataramon. An kayang ipahayag iyo an motibo ni Jehova sa pagtogot na iyan mangyari. Taano ta binoot kan Ama na sia mag-agi nin siring na kolog? May marahayon na ihinahayag sa sato si Jehova sa Juan 3:16​—sarong bersikulo sa Biblia na importanteng marhay kaya iyan inaapod na sadit na Ebanghelyo. Iyan nagsasabi: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” Kaya an motibo nin Dios iyo ini: pagkamoot. Mayo nang maorog pa digding pagkamoot na ipinaheling kasuarin man.

Kun Paano Sinisierto sa Sato ni Jehova an Saiyang Pagkamoot

9. Ano an gusto ni Satanas na paniwalaan niato manongod sa pagmansay sa sato ni Jehova, alagad ano an sinisierto sa sato ni Jehova?

⁹ Minsan siring, sarong mahalagang hapot an minalataw: Kita daw personal na namomotan nin Dios? An nagkapira tibaad minaoyon na namomotan nin Dios an katawohan sa pankagabsan, arog kan sinasabi kan Juan 3:16. Alagad an talagang saboot ninda, ‘Nungka na mamomotan ako nin Dios bilang indibiduwal.’ An totoo iyo na gustong-gusto ni Satanas na Diablo na kita maniwala na si Jehova dai namomoot sa sato ni nagpapahalaga sa sato. Sa ibong na lado, gurano man kita kamasakit kamotan o kadaing halaga sa paghona niato, sinisierto sa sato ni Jehova na an lambang saro kan saiyang fiel na mga lingkod mahalaga sa saiya.

10, 11. Paano ipinaheheling kan ilustrasyon ni Jesus manongod sa dignos na kita may halaga sa mga mata ni Jehova?

¹⁰ Halimbawa, estudyare an mga tataramon ni Jesus na nasusurat sa Mateo 10:29-​31. Iiniilustrar an halaga kan mga disipulo nia, si Jesus nagsabi: “Bakong ipinapabakal an duwang dignos nin sarong sentimo na kadikit sana an halaga? Alagad mayo ni saro sa sainda na mahoholog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring dai kamo matakot: orog kamong mahalaga kisa dakol na dignos.” Estudyare kun ano an nagin kahulogan kan mga tataramon na iyan para sa mga naghihinanyog ki Jesus kan enot na siglo.

¹¹ Kan kaaldawan ni Jesus an dignos iyo an pinakabaratong gamgam na ipinapabakal bilang kakanon. Sa kantidad na sarong sentimo na kadikit sana an halaga, duwang dignos an makukua nin minabakal. Alagad sa huri sinabi ni Jesus, segun sa Lucas 12:​6, 7, na kun duwang sentimo an gastoson nin saro, an makukua nia, bakong apat na dignos, kundi lima. An pasobrang gamgam idinadagdag na garo baga iyan mayo lamang nin halaga. Tibaad daing halaga an mga gamgam na iyan sa mata nin mga tawo, alagad ano an pagmansay sa sainda kan Kaglalang? Sabi ni Jesus: “Mayo ni saro sa sainda [dawa an idinagdag] na nalilingawan nin Dios.” Ngonyan tibaad  masabotan na niato an punto ni Jesus. Kun siring an pagpahalaga ni Jehova sa sarong dignos, gurano nanggad kamas mahalaga an sarong tawo! Arog kan sabi ni Jesus, aram ni Jehova an balang detalye manongod sa sato. Tara, an mismong buhok kan satong payo bilang!

12. Taano ta masisierto niato na realistiko si Jesus kan sabihon nia na bilang an buhok kan satong payo?

¹² Tibaad isipon nin nagkapira na pinasobrahan man ni Jesus an bagay na ini. Pero isip-isipa na sana an manongod sa pagkabuhay liwat. Dapat na mamidbid kita ni Jehova nin personal na marhay tanganing malalang nia kita giraray! Pinahahalagahan nia kitang marhay kaya ginigirumdom nia an balang detalye, pati an satong komplikadong kodigo henetiko asin an gabos na taon nin satong mga rekuerdo asin eksperyensia. An pagbilang kan satong buhok​—na mga 100,000 an minatubo sa ordinaryong payo​—magigin simple na sanang gibohon kun ikokomparar. Magayonon nanggad an pagsierto sa sato kan mga tataramon ni Jesus na si Jehova may pagmakolog sa sato bilang indibiduwal!

13. Paano ipinaheheling kan kaso ni Hadeng Josafat na hinahanap ni Jehova an marahay sa sato dawa ngani kita bakong sangkap?

¹³ May iba pang ihinahayag an Biblia na nagsisierto sa sato kan pagkamoot ni Jehova. Hinahanap asin pinahahalagahan nia an marahay sa sato. Halimbawa an marahay na si Hadeng Josafat. Kan an hade makaginibo nin katontohan, sinabihan sia kan propeta ni Jehova: “Huli kaini may gurobgutob tumang sa saimo hale ki Jehova mismo.” Abaa kanakapapepensar kaini! Alagad dai natapos duman an mensahe ni Jehova. Iyan nagpadagos: “Minsan siring, may marahay na mga bagay na nakua sa saimo.” (2 Cronica 19:1-3) Kaya an matanos na kaanggotan ni Jehova dai nagin dahelan na dai na nia maheling an “marahay na mga bagay” manongod ki Josafat. Bako daw na nakapakokosog liwat sa boot na maaraman na an marahay sa sato an hinahanap kan satong Dios dawa ngani kita bakong sangkap?

Dios na “Andam na Magpatawad”

14. Kun kita magkasala, anong nakapagagabat na mga saboot an tibaad maeksperyensiahan niato, alagad paano kita makikinabang sa pagpatawad ni Jehova?

¹⁴ Kun kita magkasala, an namamatean niatong pagkadesganar, kasusupgan, asin pakamate nin kasalan tibaad magin dahelan na isipon niato na kita nungkang magigin maninigo na maglingkod ki Jehova. Pero girumdomon na si Jehova “andam na magpatawad.” (Salmo 86:5) Iyo, kun kita magsosolsol sa satong mga kasalan asin maghihingoang marhay na dai na iyan otrohon, puede kitang makinabang sa pagpatawad ni Jehova. Estudyare kun paano ilinaladawan kan Biblia an makangangalas na aspektong ini kan pagkamoot ni Jehova.

15. Gurano kaharayo na irinarayo sa sato ni Jehova an satong mga kasalan?

¹⁵ Naggamit si salmista David nin buhay na marhay na pananaram sa pagladawan sa pagpatawad ni Jehova: “Kun gurano kaharayo kan sirangan sa solnopan, siring man kaiyan kaharayo na hinale Nia sa sato an satong mga paglapas.” (Samo an italiko; Salmo 103:​12, The Amplified Bible) Gurano kaharayo kan sirangan sa solnopan? Sa sarong sentido, an sirangan pirmeng nasa pinakaharayong distansia sa solnopan; nungka na magkakatagboan an duwang iyan. Nagkokomento an sarong intelektuwal na an pananaram na ini nangangahulogan nin “sa pinakaharayong mapupuede; sa pinakaharayong maiimahinar niato.” Sinasabi sa sato kan ipinasabong na mga tataramon ni David na kun nagpapatawad si Jehova, irinarayo nia sa sato an satong mga kasalan sa pinakaharayong maiimahinar niato.

16. Kun ipinatatawad ni Jehova an satong mga kasalan, taano ta makaseseguro kita na minamansay nia kita na malinig pakatapos kaiyan?

¹⁶ Naprobaran na daw nindong haleon an mantsa sa badong bahado an kolor? Seguro sa ibong kan gabos nindong paghihingoa, heling pa man giraray an mantsa. Mangnoha kun paano ilinaladawan ni Jehova an kakayahan niang magpatawad: “Minsan ngani an saindong mga kasalan magin garo eskarlata, iyan papupution na garo niebe; minsan ngani iyan magin mapula na siring kan telang karmesi, iyan magigin ngani garo lana.” (Isaias 1:18) An tataramon na “eskarlata” nangangahulogan nin kolor na subidang pula. * An “karmesi” saro sa subidang mga kolor nin mga telang tinugma. Nungka na mahahale niato an mantsa nin kasalan paagi sa sadiri niatong mga paghihingoa. Pero si Jehova kayang papution na garo niebe o lanang dai tinugma an mga kasalan na garo eskarlata asin karmesi. Kaya kun ipinatatawad ni Jehova an satong mga kasalan, dai niato kaipuhan na isaboot na dara-dara niato an mantsa kan mga kasalan na iyan sagkod na kita nabubuhay.

17. Sa anong sentido na iinaapon ni Jehova an satong mga kasalan sa likodan nia?

 ¹⁷ Sa nakapupukaw sa boot na awit nin pagpasalamat na kinomponer ni Ezequias pakaligtasan sa saiya sa nakagagadan na helang, sinabi nia ki Jehova: “Iinapon mo sa likodan mo an gabos kong kasalan.” (Isaias 38:17) Digdi ilinaladawan si Jehova na kinukua an mga kasalan nin nagsolsol na paragibo nin sala asin iinapon iyan sa likodan Nia na dian an mga iyan dai na Nia naheheling ni minamangno. Segun sa sarong reperensia, an ideyang ipinahahayag puedeng sabihon na: “Ginibo mo [an sakong mga kasalan] na garo baga dai iyan nangyari.” Bako daw na iyan nakararanga?

18. Paano ipinaririsa ni propeta Miqueas na kun nagpapatawad si Jehova, hinahale Nia nin permanente an satong mga kasalan?

¹⁸ Sa sarong panuga manongod sa pagbabalik, ipinahayag ni propeta Miqueas an kombiksion nia na patatawadon ni Jehova an nagsosolsol niang banwaan: “Siisay an Dios na siring saimo, . . . dai na nag-iintindi kan paglapas kan natatada sa saiyang mana? . . . Asin iaapon mo sa kaladman kan dagat an gabos nindang kasalan.” (Miqueas 7:​18, 19) Imahinara an nagin kahulogan kan mga tataramon na iyan sa mga tawong nabubuhay kan mga panahon kan Biblia. May posibilidad daw na makua giraray an sarong bagay na iinapon “sa kaladman kan dagat”? Sa siring, ipinaririsa kan mga tataramon ni Miqueas na kun nagpapatawad si Jehova, hinahale nia nin permanente an satong mga kasalan.

An “Mamomoton na Pagkaludok kan Satong Dios”

19, 20. (a) Ano an kahulogan kan berbong Hebreo na trinadusir na “magpaheling nin pagkaherak” o “maherak”? (b) Paano ginagamit kan Biblia an mga saboot nin sarong ina para sa saiyang omboy tanganing tokdoan kita manongod sa pagkaludok ni Jehova?

¹⁹ An pagkaludok saro pang aspekto kan pagkamoot ni Jehova. Ano an pagkaludok? Sa Biblia, may haraning relasyon an pagkaludok asin pagkaherak. An dakol na tataramon sa Hebreo asin Griego nangangahulogan nin pagkaludok. Halimbawa, an berbong Hebreo na ra·chamʹ parateng tinatradusir na “magpaheling nin pagkaherak” o “maherak.” An tataramon na ini sa Hebreo, na iinaaplikar ni Jehova sa saiya man sana, konektado sa tataramon para sa “matris” asin masasabing “pagkaludok nin ina.”

²⁰ Ginagamit kan Biblia an mga saboot nin sarong ina para sa saiyang omboy tanganing tokdoan kita manongod sa pagkaludok ni Jehova. An Isaias 49:15 nagsasabi: “Malilingawan daw nin sarong babae an aki niang pasusohon, tanganing dai sia magkaigwa nin pagkaludok [ra·chamʹ] sa aki kan saiyang matris? Iyo, tibaad makalingaw sinda, pero ako dai malilingaw sa saimo.” (The Amplified Bible) Depisil imahinaron na an sarong ina malilingaw na pasusohon asin asikasohon an aki niang pasusohon. Total, an omboy daing maginibo; banggi-aldaw kaipuhan nin omboy an atension kan ina kaiyan. Minsan siring, makamomondo ta may nababaretaan na kitang kapabayaan nin ina, nangorogna sa “delikadong mga panahon” na ini. (2 Timoteo 3:​1, 3) “Pero,” sabi ni Jehova, “ako dai malilingaw sa saimo.” An mamomoton na pagkaludok ni Jehova para sa saiyang mga lingkod mas makosog na marhay sa  pinakamamomoton na natural na saboot na maiimahinar niato​—an pagkaludok na normal na namamatean nin ina para sa saiyang omboy.

21, 22. Ano an naeksperyensiahan kan mga Israelita sa suanoy na Egipto, asin ano an nagin reaksion ni Jehova sa saindang mga pagtangis?

²¹ Arog nin sarong mamomoton na magurang, paano si Jehova nagpapaheling nin pagkaludok? An kualidad na ini malinaw na naheheling sa nagin pagtratar nia sa suanoy na Israel. Kaidtong katapusan kan ika-16 na siglo B.C.E., minilyon na Israelita an oripon sa Egipto, na duman sinda inapi nin makuri. (Exodo 1:​11, 14) Huli sa kasakitan ninda, an mga Israelita nagtangis ki Jehova. Ano an nagin reaksion kan Dios nin pagkaludok?

²² Napahiro an puso ni Jehova. Sinabi nia: “Naheling ko an makuring sakit kan sakuyang banwaan na nasa Egipto, asin nadangog ko an saindang pagtangis . . . Aram kong gayo an kakologan na saindang pinagdudusahan.” (Exodo 3:7) Dai kaya ni Jehova na paghelingon an mga pagdusa kan saiyang banwaan o pagdangogon an mga pagtangis ninda na dai nakikisimpatiya sa sainda. Si Jehova Dios nin empatiya. Asin an empatiya​—an abilidad na makidumamay sa kakologan nin iba​—konektadong marhay sa pagkaludok. Minsan siring, si Jehova dai sana nakisimpatiya sa saiyang banwaan; napahiro siang humiro para sa sainda. Sinasabi kan Isaias 63:9: “Huli sa saiyang pagkamoot asin huli sa saiyang pagkaludok sia mismo an buminalukat sa sainda.” Paagi sa “makosog na kamot,” an mga Israelita isinalbar nia sa Egipto. (Deuteronomio 4:34) Pakatapos kaiyan, tinawan nia sinda nin milagrosong kakanon asin kinalda sinda pasiring sa sadiri nindang daga na mabunga.

23. (a) Paano sinisierto sa sato kan mga tataramon kan salmista na si Jehova nagmamakolog na marhay sa sato bilang indibiduwal? (b) Sa anong mga paagi kita tinatabangan ni Jehova?

²³ Si Jehova dai sana nagpapaheling nin pagkaludok sa saiyang banwaan bilang sarong grupo. An satong mamomoton na Dios nagmamakolog na marhay sa sato bilang mga indibiduwal. Aram niang marhay an ano man na pagdusa na tibaad inaagihan niato. An salmista nagsabi: “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang mga paghagad nin tabang. Si Jehova harani sa mga laglag an puso; asin an mga nasasakitan an espiritu saiyang iliniligtas.” (Salmo 34:​15, 18) Paano kita tinatabangan ni Jehova bilang mga indibiduwal? Dai man nia pirmeng hinahale an causa kan satong pagdusa. Alagad abunda an probisyon nia para sa mga nagtatangis sa saiya para sa tabang. An Saiyang Tataramon nagtatao nin praktikal na konseho na nagkakaepekto. Sa kongregasyon, nagtatao sia nin mga paraataman na may espirituwal na kualipikasyon, na naghihingoa na ipabanaag an saiyang pagkaludok sa pagtabang sa iba. (Santiago 5:​14, 15) Bilang an “Paradangog nin pamibi,” si Jehova nagtatao nin “banal na espiritu sa mga naghahagad sa saiya.” (Salmo 65:2; Lucas 11:13) An gabos na probisyon na iyan kapahayagan kan “mamomoton na pagkaludok kan satong Dios.”​—Lucas 1:78.

24. Paano nindo babalosan an pagkamoot ni Jehova?

²⁴ Bako daw na nakapupukaw sa boot na horophoropon an pagkamoot kan satong langitnon na Ama? Sa naenot na artikulo, ipinagirumdom sa sato na ginagamit ni Jehova an saiyang kapangyarihan, hustisya, asin kadonongan sa mamomoton na mga paagi para sa kapakinabangan niato. Asin sa artikulong ini, naheling niato na direktang ipinahayag ni Jehova an saiyang pagkamoot sa katawohan​—asin sa sato bilang mga indibiduwal​—sa pambihirang mga paagi. Ngonyan, marahay na ihapot kan lambang saro sa sato, ‘Paano ko daw babalosan an pagkamoot ni Jehova?’ Logod na balosan nindo iyan paagi sa pagkamoot nindo sa saiya sa bilog nindong puso, isip, kalag, asin kosog. (Marcos 12:​29, 30) Logod na an pamumuhay nindo aroaldaw magpabanaag kan saindong odok sa pusong pagmawot na orog pang rumani ki Jehova. Asin logod na si Jehova, an Dios na pagkamoot, orog pang rumani sa saindo​—sa bilog na panahon na daing sagkod!​—Santiago 4:8.

[Nota sa Ibaba]

Nagigirumdoman daw Nindo?

• Paano niato naaaraman na an pagkamoot an nangingibabaw na kualidad ni Jehova?

• Taano ta masasabi na an pagsugo ni Jehova sa saiyang Aki tanganing magdusa asin magadan para sa sato iyo an kadarudakulaing akto nin pagkamoot na ginibo kasuarin man?

• Paano sinisierto sa sato ni Jehova na namomotan nia kita bilang mga indibiduwal?

• Sa anong buhay na marhay na mga paagi ilinaladawan kan Biblia an pagpatawad ni Jehova?

[Mga Hapot Para sa Pag-adal]

[Ritrato sa pahina 15]

‘Itinao nin Dios an saiyang Aking bugtong’

[Ritrato sa pahina 16, 17]

“Orog kamong mahalaga kisa dakol na dignos”

[Credit Line]

© J. Heidecker/VIREO

[Ritrato sa pahina 18]

An mga saboot nin sarong ina para sa saiyang omboy makapagtotokdo sa sato manongod sa pagkaludok ni Jehova