Estorya nin Buhay

An Paglilingkod sa Iba Nakaiina sa Kolog nin Pagdusa

ISINAYSAY NI JULIAN ARIAS

Kan 1988, kan ako 40 anyos, an sakong karera garo segurado na. Ako an rehional na direktor nin sarong multinasyonal na kompanya. Huli sa trabaho ko, tinawan ako kan kompanya nin mamahalon na kotse, halangkaw na sueldo, asin maluhong opisina sa sentro kan Madrid, España. May itinao pa nganing indikasyon an kompanya na ako gigibohon nindang direktor nasyonal. Dai ko lamang narealisar kaidto na may mangyayaring grabeng pagbabago sa sakong buhay.

SARONG aldaw kan taon na idto, ibinareta sa sako kan sakong doktor na igwa ako nin multiple sclerosis, sarong helang na dai nararahay. Nalunosan ako. Sa huri, kan mabasa ko kun ano an nagigibo kan multiple sclerosis sa sarong tawo, nakubhanan ako. * Garo baga may espadang magbibitaybitay sa ibabaw kan sakong payo sa bilog kong buhay. Paano ko maaasikaso an sakong agom, si Milagros, asin an sakong tres anyos na aking lalaki, si Ismael? Paano niamo aatubangon an siring kaining situwasyon? Mantang naghahanap pa ako nin simbag sa mga hapot na ini, saro pang mapait na pangyayari an nag-abot sa sako.

Mga sarong bulan pagkatapos na sabihon sa sako kan sakong doktor an manongod sa helang ko, inapod ako kan sakong superbisor sa saiyang opisina asin ipinaisi sa sako na an kompanya nangangaipo nin mga tawo na “marahay an itinataong impresyon.” Asin an sarong tawo na igwa nin nagpapaluyang helang​—dawa nagpopoon pa sana ini​—dai nakatatao nin siring na impresyon. Kaya tolos-tolos, sinisante ako kan sakong among. Bigla na sana, an sakong sekular na karera natapos!

 Sa atubangan kan sakong pamilya, hiningoa ko na magsagin pusoan, alagad minawot ko na makapagsolosolo, tanganing makapag-isip-isip manongod sa bago kong kamugtakan asin makapaghorophorop manongod sa sakong ngapit. Pinagmaigotan kong labanan an nag-oorog na pakamate nin makuring kamondoan. An nakakolog na marhay sa sako iyo an bagay na bigla na sana ako nagin daing serbi sa pagheling kan sakong kompanya.

Pakanompong nin Kakosogan Hale sa Kaluyahan

Marahay sana ta sa makamomondong panahon na ini, makaaasa ako sa nagkapirang ginigikanan nin kosog. Mga 20 taon bago kaini, nagin saro ako sa Mga Saksi ni Jehova. Kaya sinsero akong namibi ki Jehova manongod sa sakong mga namamatean asin kadaihan nin kasegurohan manongod sa ngapit. An sakong agom, na kapareho ko sa pagtubod, nagin torre nin kakosogan, asin tinabangan ako kan nagkapirang dayupot na amigo na an kabootan asin pagkaludok nagin daing kaagid.​—Talinhaga 17:17.

An pakamate nin paninimbagan sa iba nakatabang man. Gusto kong padakulaon na toltol an sakong aki, tokdoan sia, makikawat sa saiya, asin sanayon sia sa gibohon na paghuhulit. Kaya dai ako puedeng sumuko. Apuera kaini, saro akong magurang sa saro sa mga kongregasyon kan Mga Saksi ni Jehova, asin kaipuhan kan sakong Kristianong mga tugang na lalaki asin babae duman an sakong tabang. Kun tinogotan ko an sakong helang na paluyahon an sakong pagtubod, magigin anong klaseng halimbawa ako sa iba?

Dai malilikayan, nagbago an sakong buhay sa pisikal asin sa pinansial​—sa nagkapirang paagi sa ikararaot alagad sa ibang paagi sa ikararahay. Sarong beses nadangog ko an sarong doktor na nagsabi: “An helang dai rinaraot an sarong tawo; imbes, binabago sia kaini.” Asin nanodan ko na an mga pagbabago bakong gabos negatibo.

Enot sa gabos, natabangan ako kan sakong “tonok sa laman” na orog na maintindihan an mga problema sa salud kan ibang tawo asin makidamay sa sainda. (2 Corinto 12:7) Nasabotan ko nin orog kasuarin man an mga tataramon sa Talinhaga 3:5: “Magtiwala ka ki Jehova sa bilog mong puso asin dai ka manarig sa saimong sadiring pakasabot.” Orog sa gabos, tinokdoan ako kan bago kong mga kamugtakan kun ano talaga an mahalaga sa buhay asin kun ano an nagtatao nin tunay na pagkakontento asin pakamate nin pagpapahalaga sa sadiri. Kadakol pa man giraray kan magigibo ko sa organisasyon ni Jehova. Nadiskobre ko an tunay na kahulogan kan mga tataramon ni Jesus: “Igwang orog na kaogmahan sa pagtao kisa pag-ako.”​—Gibo 20:35.

Sarong Bagong Buhay

Dai nahaloy pagkatapos kan pagkadiskobre kan sakong helang, naimbitaran ako sa sarong seminar sa Madrid kun saen tinokdoan an Kristianong mga boluntaryo na pataluboon an kooperasyon sa pag-oltanan kan mga doktor asin kan mga pasyente nindang Saksi. Sa huri, an mga boluntaryong idto inorganisar na magin mga Hospital Liaison Committee. Para sa sako, an seminar na idto tamang-tama sa panahon. Nadiskobre ko an mas marahay na karera, saro na magtatao sa sako nin orog nanggad na pagkakontento kisa arin man na trabahong komersial.

Naaraman niamo sa seminar na an bago pa sanang maorganisar na mga Hospital Liaison Committee madalaw sa mga ospital, mainterbio sa mga doktor, asin magibo nin mga presentasyon sa mga paraataman sa salud, gabos sa katuyohan na kultibaron an kooperasyon asin malikayan an mga komprontasyon. An mga komite nagtatabang sa mga kapwa Saksi na makakua nin mga doktor na andam na mag-operar na dai naggagamit nin dugo. Siempre, mantang dai man ako nag-adal nin medisina, kadakol akong dapat na manodan manongod sa medikal na mga termino, etika dapit sa medisina, asin organisasyon sa ospital. Pero, pagkatapos kan seminar na idto nagpuli ako na garo bagong tawo, na may bagong angat na ganado kong gibohon.

 Mga Pagdalaw sa Ospital—Sarong Burabod nin Pagkakontento

Dawa ngani an sakong helang luway-luway asin dai mapogolan na nagpapaluya sa sako, nagdakol an sakong responsibilidad bilang miembro kan Hospital Liaison Committee. Nagreresibi ako nin pension sa mga baldado, kaya igwa ako nin libreng oras sa mga pagdalaw sa ospital. Sa ibong kan paminsanminsan na pagkadesganar, an mga pagdalaw na ini nagin mas pasil asin nakakokontento kisa linalaoman ko. Maski ngani nasa silyang de rueda na ako ngonyan, dai ini nagin dakulang kaolangan. Pirme akong iniibanan nin sarong kapwa miembro kan komite. Apuera kaini, natuod na an mga doktor na makipag-olay sa mga tawo na nasa mga silyang de rueda, asin kun beses garo naghihinanyog sinda na may orog na paggalang kun naoobserbaran ninda an sakong paghihingoa na dalawon sinda.

Sa nag-aging sampulong taon, nadalaw ko an ginatos na doktor. An nagkapira andam nang tumabang sa sato sa kapinonan pa sana. Si Dr. Juan Duarte​—sarong siruhano sa puso sa Madrid na ipinag-oorgolyo an paggalang sa konsensia nin pasyente​—tolos-tolos na nag-alok kan saiyang serbisyo. Poon kaidto, labi na sa 200 an operasyon na ginibo nia sa mga pasyenteng Saksi hale sa dakol na lugar sa España na dai naggagamit nin dugo. Sa nag-aging mga taon, padakol nang padakol na mga doktor an nag-operar na dai naggagamit nin dugo. May ikinatabang an samong regular na mga pagdalaw, alagad an pag-oswag huli man sa medikal na mga progreso asin sa nagibong marahay na mga resulta sa pag-operar na dai naggagamit nin dugo. Asin kombensido kami na binendisyonan ni Jehova an samong mga paghihingoa.

Nangorogna na naparigon an sakong boot sa reaksion kan nagkapirang siruhano sa puso na nag-espesyalisar sa pagbolong sa mga aki. Sa laog nin duwang taon dinalaw niamo an sarong grupo nin duwang siruhano asin an saindang mga anestesiologo. Tinawan niamo sinda nin medikal na mga literatura na nagpapaliwanag kan ginigibo nin ibang mga doktor sa linyang ini. An samong mga paghihingoa binalosan kan 1999 durante kan Medikal na Komperensia sa Pag-operar sa Puso nin mga Omboy. An duwang siruhano​—na tinawan nin ekspertong pagdirehir nin sarong nakikikooperar na siruhano hale sa Inglaterra​—ginibo an depisil na marhay na operasyon sa sarong omboy na Saksi na kinaipuhan an paghira sa balbula sa aorta. * Naggayagaya ako kaiba kan mga magurang kan an saro sa mga siruhano magluwas hale sa sala de operasyon tanganing ianunsiar na nagin mapanggana an operasyon asin iginalang an konsensia kan pamilya. Sa ngonyan an duwang doktor na ini regular nang nag-aako nin mga pasyenteng Saksi hale sa bilog na España.

An talagang ikinaoogma ko manongod sa mga pangyayaring iyan iyo an pakaaram na puede akong makatabang sa sakong Kristianong mga tugang. Sa parate, kun kinokontak ninda an Hospital Liaison Committee, iyan an saro sa pinakadepisil na panahon sa saindang buhay. Mapaoperar sinda, asin an mga doktor sa lokal na ospital habo o dai kaya na bolongon sinda na mayo nin dugo. Minsan siring, kun naaaraman kan mga tugang na igwa nin nakikikooperar na mga siruhano sa gabos na linya nin medisina digdi sa Madrid, nakagiginhawa sindang marhay. Naheling ko nang magin maaliwalas an napupurisaw na lauog nin sarong tugang, huli sana ta yaon kami sa kataed nia sa ospital.

 An Kinaban nin mga Huwes Asin Etika Dapit sa Medisina

Kan nakaagi pa sanang mga taon, an mga miembro kan mga Hospital Liaison Committee ginibo man an pagdalaw sa mga huwes. Durante kan mga pagdalaw na iyan, tinatawan niamo sinda kan publikasyon na inaapod Family Care and Medical Management for Jehovah’s Witnesses, na espesyalmenteng inandam tanganing impormaran an siring na mga opisyal kan satong paninindogan sa paggamit nin dugo asin kan pagkaigwa nin ibang pagbolong na daing dugo. Nagkaigwa nin dakulang pangangaipo sa siring kaining mga pagdalaw, mantang dati parate na an mga huwes sa España nag-aautorisar sa mga doktor na gibohon an pag-ineksion nin dugo na kontra sa kamawotan kan pasyente.

An kuarto kan mga huwes nakagugulat na mga lugar, asin sa enot kong pagdalaw, namatean kong menos akong marhay sa pag-agi ko sa kahalabaan kan mga pasilyo sa sakong silyang de rueda. An nangyari pa, nagkaigwa kami nin kadikit na aksidente, asin napaluhod ako sa pagkahulog ko sa silyang de rueda. An nagkapirang huwes asin abogado na nakaheling kan sakong alanganon na kamugtakan maboot na tuminabang sa sako, alagad napasupog ako sa sainda.

Maski ngani an mga huwes dai segurado kun ano an samong dahelan sa pagdalaw sa sainda, an kadaklan nagin maboot an pagtratar sa samo. An enot na huwes na sakong dinalaw dati nang pinagtuturotimbang an satong paninindogan, asin sinabi nia na gusto niang makipag-olay sa samo nin halawig. Sa sunod niamong pagdalaw, personal nia akong ibinusol palaog sa saiyang kuarto asin atento siang nagdangog. An marahay na mga resulta kan enot na pagdalaw na ini nagparigon sa boot ko asin kan sakong mga kaibaiba na mawara an samong pagkatakot, asin dai nahaloy naheling niamo an dugang pang marahay na mga resulta.

Kan taon man sanang idto, nagwalat kami nin kopya kan Family Care sa saro pang huwes, na maboot kaming inako asin nanuga na babasahon nia an impormasyon. Itinao ko sa saiya an numero ko sa telepono enkaso kaipuhan niang kontakon kami sa sarong emerhensia. Pakalihis nin duwang semana nag-apod sia tanganing sabihon na an sarong lokal na siruhano nakiolay sa saiya na autorisaran an pag-ineksion nin dugo sa sarong Saksi na nagkakaipo nin operasyon. Sinabi samo kan huwes na gusto niang tabangan niamo sia na makakua nin solusyon na igagalang an kamawotan kan Saksi na lumikay sa dugo. Daing gayo kami nadepisilan sa paghanap nin saro pang ospital, na duman mapangganang ginibo kan mga siruhano an operasyon na mayong dugo. Naogmang marhay an huwes kan madangog nia an resulta, asin sineguro nia sa samo na gigibohon nia an kaagid na solusyon sa maabot na panahon.

Sa panahon kan sakong mga pagdalaw sa ospital,  parateng naglalataw an isyu sa etika dapit sa medisina, huling gusto niamong konsideraron kan mga doktor an deretso asin konsensia kan pasyente. An sarong nakikikooperar na ospital sa Madrid inimbitaran ako na magpartisipar sa sarong kurso sa etika na iinaalok ninda. Pinangyari kan kursong ini na iatubang ko sa dakol na espesyalista sa linyang ini an satong punto de vista na basado sa Biblia. Tinabangan man ako kaiyan na masabotan an dakol na depisil na desisyon na kaipuhan na gibohon nin mga doktor.

An saro sa mga paratokdo kan kurso, si Propesor Diego Gracia, regular na nag-oorganisar nin prestihiosong kurso sa etika para sa Kastilang mga doktor asin nagin marigon na parasuportar sa satong deretso sa may kabatidan na pagtogot manongod sa pag-ineksion nin dugo. * An samong regular na pakipag-olay sa saiya nagin dahelan na an nagkapirang representante kan sangang opisina kan Mga Saksi ni Jehova sa España maimbitaran na ipaliwanag an satong paninindogan sa mga estudyanteng postgraduado ni Propesor Gracia, na an nagkapira ibinibilang na pinakamatitibay na doktor sa nasyon.

Pag-atubang sa Katotoohan

Siempre, an nakakokontentong gibohon na ini para sa mga kapagtubod dai nakaresolber sa gabos na personal kong problema. An sakong helang padagos na naggrabe. Minsan siring, marahay sana ta alisto an sakong isip. Sa tabang kan sakong agom asin aki, na nungkang nagreklamo, naaasikaso ko pa giraray an sakong mga paninimbagan. Kun mayo kan saindang tabang asin suporta, magigin imposible ini. Dai ko ngani kayang ibuton an sakong pantalon o isulot an halabang dyaket. Espesyalmenteng ikinaoogma ko an paghuhulit kada Sabado kaiba kan sakong aki, si Ismael, na ibinubusol ako tanganing makaolay ko an mga kagharong. Asin naaasikaso ko pa an sakong mga obligasyon bilang magurang sa kongregasyon.

Nakaeksperyensia ako nin nagkapirang makologon na mga pangyayari durante kan nag-aging 12 taon. Kun beses, an pakaheling ko kun paano an sakong pagkabaldado nakaaapektar sa sakong pamilya nagtatao sa sako nin orog na kolog kisa helang ko mismo. Aram ko na nagdudusa sinda, dawa dai ninda sinasabi. Dai pa sana nahahaloy, sa laog nin sarong taon, an sakong panugangan na babae asin an sakong ama nagadan. Kan taon man sanang idto, nanompongan ko an sakong sadiri na dai na makahiro na mayo nin silyang de rueda. An sakong ama, na nag-iistar sa samong harong, nagadan sa saro pang nagpapaluyang helang. Si Milagros, na iyo an nag-ataman sa saiya, nakamate na garo man sana naheheling nia an mangyayari sa sako sa maabot na panahon.

Pero, sa positibong lado naman, sararo an samong pamilya mantang iriba niamong inaatubang an mga kadepisilan. Rinibayan ko nin silyang de rueda an silya nin ehekutibo, alagad sa katunayan mas marahay an sakong buhay ngonyan huling biyo ining dusay sa paglilingkod sa iba. An pagtao puedeng makaina sa pagdusa, asin talagang inootob ni Jehova an saiyang panuga na pakosogon kita sa panahon nin pangangaipo. Arog ni Pablo, talagang masasabi ko: “Igwa ako kan kosog para sa gabos na bagay huli sa saiya na nagtatao nin puersa sa sako.”​—Filipos 4:13.

[Mga Nota sa Ibaba]

[Kahon sa pahina 24]

An Punto de Vista nin Sarong Agom na Babae

Para sa sarong agom na babae, depisil na makiiba sa sarong agom na igwa nin multiple sclerosis​—sa mental, emosyonal, asin pisikal. Kaipuhan kong magin rasonable sa pinaplano kong gibohon asin andam na ipagilid an dai kaipuhan na paghadit manongod sa ngapit. (Mateo 6:34) Minsan siring, an pamumuhay na may pagdusa puedeng makapagpaluwas kan pinakamarahay na mga kualidad nin sarong tawo. An samong pag-agoman mas makosog kisa kaidto, asin mas dayupot an sakong relasyon ki Jehova. An mga estorya nin buhay nin iba na nasa kamugtakan man na pano nin tension nakapakosog man na marhay sa sako. Namamatean ko man an pagkakontento ni Julian bilang resulta kan saiyang mahalagang paglilingkod para sa mga tugang, asin napatunayan ko na nungka kaming pinabayaan ni Jehova, dawa ngani kada aldaw tibaad may bagong angat na maglataw.

[Kahon sa pahina 24]

An Punto de Vista nin Sarong Aki

Sa pakatagal asin positibong espiritu kan sakong ama, nakanood ako nin marahayon na halimbawa, asin namamatean ko na kapakipakinabang ako kun ipinagbubusolbusol ko sia. Aram ko na dai ko pirmeng magigibo an gusto kong gibohon. Saro na akong tinedyer ngonyan, alagad pag-abot ko sa tamang edad, gusto kong maglingkod bilang miembro nin Hospital Liaison Committee. Aram ko sa mga panuga kan Biblia na temporaryo sana an pagdusa asin dakol na mga tugang na lalaki asin babae an orog na nagdudusa kisa samo.

[Ritrato sa pahina 22]

An sakong agom sarong burabod nin kosog para sa sako

[Ritrato sa pahina 23]

Pakikipag-olay sa siruhano sa puso na si Dr. Juan Duarte

[Ritrato sa pahina 25]

Kaogmahan niamong mag-ama na mag-ibanan sa ministeryo